ஓவியம் பேசுவது போல் இருக்க வேண்டும். ஏதோ ஒரு
செய்தியை உணர்த்துவது போல் இருக்க வேண்டும்.
"தன்னைவிட்டுத் தன் கணவன் பிரிந்து போய்விடுவானோ என்று
அஞ்சுகிறாள் ஒரு பெண். போகாதீர்கள்! என்று சொல்ல
நினைக்கிறாள். வாய் வரவில்லை ஆனால் அவள் நிற்கும்
நிலையும் கண்ணில் இழையோடும் சோகமும் அந்தக் கருத்தை
'ஓவியச் செய்தி' போல உணர்த்தியதாக" புலவர் ஒருவர்
பாடுகின்றார். ஓவியம் ஒரு கதை சொல்வதாக அமையலாம்; ஒரு
நீதியை அறிவுறுத்துவதாகவும் அமையலாம்.

கி. பி. 600க்கு முற்பட்ட கோயில்கள் செங்கல், மரம்,
சுண்ணாம்பு ஆகியவற்றால்     கட்டப்பட்டவை.     அவை
அழிந்துபோய் விட்டன. அவற்றில் வரைந்த ஓவியங்கள் பற்றியும்
நமக்குச் செய்திகள் கிடைக்கவில்லை. நமக்குக் கிடைப்பனவற்றுள்
காலத்தால் முற்பட்டது சித்தன்ன வாசல் ஓவியமே! அரசன் அரசி
ஓவியம், தாமரைப் பொய்கை ஓவியம் ஆகியன அழகுமிக்கவை.
அவையும் இன்று மெல்ல அழிந்து வரும் நிலையில் உள்ளன.
இந்த ஓவியங்களைத் தீட்டிய ஓவியர்களைப் பற்றிய செய்தி ஏதும்
நமக்கு கிடைக்கவில்லை. எனினும் கேவாத பெருந்தச்சன்,
குணமல்லன், சாத முக்கியன், கலியாணி, கொல்லன் சேமகன்,
இராசராசப் பெருந்தச்சன் போன்ற பெயர்கள் மட்டும்
அறியப்படுகின்றன.