இறையனார் களவியல் உரையில் கவிதைப் பண்பு மிகுந்திருப்பதைக் காணலாம். சில இடங்களில் செய்யுள் நடையும் பல இடங்களில் வினாவிடை என்ற முறையிலும் இவ்வுரை அமைந்துள்ளது. இறையனார் களவியல் உரை குறித்து டாக்டர்.மு.வ. அவர்கள், “இக்கவிதைத் தன்மை சிலப்பதிகார உரைப்பாட்டுமடை போன்றது. தமிழ் உரைநடையின் ஆரம்ப காலத்தை கவிதை நிலையிலிருந்து     உரைநிலைக்குத் தமிழ் மாறுகிற ஒரு காலப்பகுதியைக் களவியல் உரை காட்டுகிறது’’ என்று குறிப்பிடுகிறார்.

    திருமாலை முழுமுதற் கடவுளாகக் கொண்டு வழிபடுவர்கள் வைணவ ஆழ்வார்கள். தமிழ் உலகில் செந்தமிழை வளர்த்த பெருமைக்கு உரியவர்கள் இந்த ஆழ்வார்கள். அவர்கள் இயற்றிய நாலாயிர திவ்வியப் பிரபந்தத்தை வைணவர்கள் வேதமாகக் கருதுகின்றனர். இப்பாடல்களுக்குக் காலந்தோறும் பல உரைகள் தோன்றின. இவ்வுரைகளை வியாக்கியானங்கள் என்று அழைப்பர். இவை மணிப்பிரவாள நடையில் அமைந்த உரைகளாகும்.

6.1.5 சைவ உரைகள்

    சிவபெருமானை     முழுமுதற்கடவுளாகக் கொண்டு வழிபடுவர்கள் சைவ நாயன்மார்கள். சைவர்களால் பாடப்பட்ட தேவாரம், திருவாசகம் முதலிய பன்னிரு திருமுறைக்கும் உரைகள் எழுதப்பட்டுள்ளன. அதேபோல் சைவ சித்தாந்த நூல்கள் அனைத்திற்கும் உரை நூல்கள் உள்ளன. சைவத் திருமடங்களான திருவாவடுதுறை ஆதீனம், திருப்பனந்தாள், காசிமடம் போன்றவை சைவ இலக்கியங்கள் உரையுடன் வெளிவரப் பேருதவி செய்துள்ளன.