பழந்தமிழ் நூல்களில் திருமாலுக்குரிய திருப்பதிகள் பற்றியும்,
திருமாலது கோலம் பற்றியும், திருமாலின் பெயர்கள் பற்றியும் பல
செய்திகள் இடம் பெற்றுள்ளன.

காஞ்சி நகரைச் சார்ந்த திருவெஃகா, மதுரையை அடுத்த
மாலிருங்குன்றம் ஆகிய இடங்களேயன்றி மதுரை, திருவரங்கம்,
திருவேங்கடம், காவிரிப்பூம்பட்டினம் ஆகிய இடங்களிலும்
திருமாலுக்குக் கோயில்கள் இருந்தன. பரிபாடல் கூறும்
இருந்தையூர் என்னும் திருமால் தலம் மதுரையைச்
சார்ந்ததாகும். அத்தலத்துப் பெருமானை, ‘நீடுநீர்வையை
நெடுமால்’ (18:4) என்று சிலப்பதிகாரம் ஏத்துகின்றது. இந்நாளில்
அத்திருக்கோயில் ‘கூடலழகர் கோயில்’ என வழங்குகிறது.
காவிரிப் பூம்பட்டினத்தில் பலதேவனுக்குக் கோயில் இருந்ததைக்
குறிக்கும் சிலப்பதிகாரம் (9:10) திருவனந்தபுரத்துத் திருமால்
கோயில் பற்றியும் (26:62) பேசுகின்றது. மேலும் அக்காப்பியத்தில்
திருவரங்கத்துத் திருமாலின் கிடந்த கோலமும் திருவேங்கடத்தில்
அவனது நின்ற கோலமும் வருணிக்கப்படுகின்றன (11:35-51).
கூடலாகிய மதுரையில் - கருடக்கொடியையுடைய திருமாலுக்கும்
மேழிப்படையையுடைய அவன் முன்னோனாகிய பலதேவனுக்கும்
கோயில் இருந்ததையும் சிலப்பதிகாரம் தெரிவிக்கின்றது. (14:8-9).