கி.பி. 19-ஆம் நூற்றாண்டில் இந்தியாவின் பல்வேறு பகுதிகளில்
நிலை கொண்ட ஆங்கிலக் கிழக்கிந்தியக் கம்பெனி, சென்னை
மண்டலத்தில் திருவிதாங்கூர், புதுக்கோட்டை முதலிய ஒரு சில
சமஸ்தானங்களைத் தவிர்த்து மற்ற பகுதிகள் முழுவதையும் தன்
ஆளுகையின்கீழ்க் கொண்டு வந்தது. கி.பி. 1789-இல் வெல்லஸ்லி
பிரபுதஞ்சை மன்னர் சரபோஜியுடன் ஓர் உடன்படிக்கை செய்து
கொண்டு, அம்மன்னர் வாழ்ந்த கோட்டை ஒன்றைத் தவிர,
தஞ்சை நாடு முழுவதையும் ரெஸிடெண்டின் ஆட்சியின் கீழ்க்
கொண்டு வந்தார்.

    கி.பி. 18-ஆம் நூற்றாண்டின் இறுதியில் பிரிட்டானிய
நாடாளுமன்றம் ஆங்கில வணிகக் குழுவினர் (கம்பெனி ஆட்சி)
ஆட்சி முறையை ஒழுங்குபடுத்தவும் , அதன் மீது நேரடிப்
பார்வையைச் செலுத்தவும் சட்டங்கள் கொண்டு வந்தது. கி.பி.
1723-இல் ஒழுங்குமுறை சட்டத்தையும், கி.பி.1784-இல் பிட் இந்திய
சட்டத்தையும், பிற சட்டங்களையும் கொண்டு வந்தது. சென்னை,
மும்பாய் முதலிய மாநில ஆளுநர்களுக்கு மலோக, ‘தலைமை
ஆளுநர்’ (GOVERNER - GENERAL) நியமனம் செய்யப் பெற்றார். பிட்
இந்தியா சட்டப்படி, சென்னை ஆளுநர்சபையில் ஆளுநருடன்
சேர்ந்து நான்கு உறுப்பினர்கள் அமர்த்தப்பட்டனர். ஆளுநர்,
படையமைப்பு, வரித்தண்டல், போர்     ஆகிய அனைத்து
நிர்வாகங்களையும் கவனித்து வந்தார்.

    19-ஆம் நூற்றாண்டில் படிப்படியாக வளர்ந்த ஆங்கிலக்
கம்பெனியின் ஆட்சிக் காலத்தில் மாநிலம் பல மாவட்டங்களாகப்
பிரிக்கப் பெற்று, கலெக்டர்களின் நிர்வாகத்தின்கீழ்க் கொணரப்
பெற்றது. மாவட்ட நீதிபதிகள் நீதித்துறைப் பொறுப்புகளை ஏற்று
நடத்தினர். 1813-ஆம் ஆண்டுச் சட்டம் கல்வி, சட்டம், நீதி,
வரித்தண்டல் ஆகியவற்றில் ஆளுநரின் பொறுப்புகளை
வரையறுத்தது. 1833-ஆம் ஆண்டு நடைமுறைப் படுத்தப் பெற்ற
சட்டத்தால், சென்னை மண்டலத்தில் நிலவி வந்த சட்டங்களை
ஒழித்து, நாடு முழுவதிற்கும் பொதுவாகத் தலைமை ஆளுநர்
சபையில் இயற்றப்படும் சட்டங்களே நடைமுறைப் படுத்தப்
பெற்றன. தலைமை ஆளுநர் வங்கத்திலிருந்து செயல்பட்டார்.

    கி.பி. 1858-ஆம் ஆண்டு கொண்டு வரப்பெற்ற இந்திய அரசுச்
சட்டப்படி, அவ்வாண்டு ஆகஸ்டுத் திங்களிலிருந்து இந்தியா
முழுவதும், இங்கிலாந்து நாட்டை ஆண்டு வந்த விக்டோரியா
பேரரசியின் நேரடி ஆட்சியின் கீழ் வந்தது. ஆங்கிலக் கம்பெனி
ஆதிக்கம் முற்றிலுமாக அகற்றப்பட்டது. தலைமை ஆளுநர்
இங்கிலாந்து அரசின் பிரதிநிதியாகச் செயல்பட்டார். மாநில
ஆளுநர்கள் இங்கிலாந்து அரசியால் நியமிக்கப்பட்டனர். இந்தியா
முழுவதிற்குமாக இங்கிலாந்தில் இயற்றப்படும் சட்டங்களின்படி,
ஆளுநர்கள் பொதுத்துறை அதிகாரிகளைக் கொண்டு மாநிலங்களை
ஆண்டனர்.