அரக்கு, சுதை, மரம், மெழுகு, தந்தம், பஞ்ச லோகம், கல்
ஆகியவற்றில் சிற்பங்கள் செய்யப்படுகின்றன. உலோகத்தினாலும்
கல்லினாலும் அமைக்கப்பட்ட சிற்ப வடிவங்களை நான்கு
வகைகளாகப் பிரிக்கலாம். அவையாவன :

• பிரதிமை உருவங்கள் என்பன சிலரை அப்படியே சிலை
  வடிவம் போல உருவாக்குவனவாகும்.

• தெய்வ உருவங்கள் என்பன சிவன், முருகன், திருமால்
  முதலிய கடவுள் உருவங்கள் ஆகும்

• கற்பனை உருவங்கள் என்பன காமதேனு, கற்பகமரம்
  போன்றவை ஆகும்.

• இயற்கை உருவங்கள் என்பன மரம், செடி, கொடிகளாகும்.
  சிற்பக்கலை தொன்மையான கலைகளில் ஒன்றாகப்
  போற்றப்படுகிறது

2.3.1 கல்லும் சொல்லாதோ கவி

மரத்தால் ஒரு யானை செய்தார்கள். யானை அச்சாக
அவ்வாறே இருந்தது. அது யானை என்று கருதிப்
பார்த்தவர்களுக்கு அது மரம் என்று நினைக்கத் தோன்றவில்லை.
அது மரம் என்று கருதிப் பார்த்தவர்களுக்கு அது யானை என்று
நினைக்கத் தோன்றவில்லை. இதைத்தான் திருமந்திரம் என்ற நூல்

மரத்தை மறைத்தது மாமத யானை
மரத்தில் மறைந்தது மாமத யானை

(திருமந்: 2290)

என்று கூறுகிறது. இது சிற்பக்கலையின் பெருமையை
உணர்த்துவது!