இக்கலித் தொகையில் ஒவ்வொருதிணையும் முதற்பொருள், கருப் பொருள், உரிப் பொருள் கொண்டு புனைந்துரைக்கப் பெற்றிருக்கும் அழகு தமிழறிஞர்களுக்கு மிக்க இன்பத்தைத் தருவதாம். அன்றியும், இதன் முல்லைத்திணையிலுள்ள கலிப்பாக்கள் அசுரமணத்தின் ஒரு பகுதியாகிய ஏறுகோடற் செய்தியையும் குடிகளுக்குத் தம் அரசன்மாட்டிருந்த அன்பினிலையையும் அறிந்துகோடற்குச் சிறந்த கருவியாகும்.

இது பாவின் பெயரால் தொகுக்கப்பெற்ற நூலுக்கு, தண்டியலங் காரவுரையிலும் (சூ. 4) இலக்கணவிளக்கவுரையிலும் (சூ. 625) மேற்கோளாகக் காட்டப்பெற்றிருக்கிறது. இப்பாவின் இலக்கணம், ‘அகத்தியமும் தொல்காப்பியமுமே தொகைகளுக்கு நூல்’ என்று தொல்காப்பியம் புறத்திணையியல் 35-ஆம் சூத்திரவுரையில் நச்சினார்க்கினியர் எழுதியிருப்பதால் இவ்விரு நூலிலும் கூறப்பெற்றுள்ளதென்று அறியப்படுமாயினும் முன்னதிற் சில சூத்திரங்களேயன்றி மற்றவை இறந்தமையின், பின்னதாகிய தொல்காப்பிய நூல்கொண்டே அறியத்தக்கதா யிருக்கிறது. அதிற் பெரும்பாலன இந்நூல் 23-ஆம் பக்கத்திலுள்ள உரையில் வந்துள்ளன.

இதிலுள்ள செய்யுட்கள் 150. இறையனாரகப்பொருளுரையிலும், தொல்காப்பியவுரைகளிலும், இந்நூலுரையிலும் இத்தொகை இவ்வளவு தொகை யுடையதென்றே கூறப்பெற்றிருக்கிறது. இந்த 150. செய்யுட்களும் கலியின்வகைகளே. இவற்றுள், ஒத்தாழிசைக்கலி 61; கொச்சகம் 49, கொச்சக வொருபோகு 1;