முகப்பு

17

	தென் குமரி, வட பெருங்கல்,
	குண குட கடலா எல்லை,
	குன்று, மலை, காடு, நாடு,
	ஒன்று பட்டு வழிமொழிய,
5	கொடிது கடிந்து, கோல் திருத்தி,
	படுவது உண்டு, பகல் ஆற்றி,
	இனிது உருண்ட சுடர் நேமி
	முழுது ஆண்டோர் வழி காவல!
	குலை இறைஞ்சிய கோள் தாழை
10	அகல் வயல், மலை வேலி,
	நிலவு மணல் வியன் கானல்,
	தெண் கழிமிசைத் தீப் பூவின்,
	தண் தொண்டியோர் அடு பொருந!
	மாப் பயம்பின் பொறை போற்றாது,
15	நீடு குழி அகப்பட்ட
	பீடு உடைய எறுழ் முன்பின்,
	கோடு முற்றிய கொல் களிறு
	நிலை கலங்கக் குழி கொன்று,
	கிளை புகலத் தலைக்கூடியாங்கு
20	நீ பட்ட அரு முன்பின்
	பெருந் தளர்ச்சி, பலர் உவப்ப,
	பிறிது சென்று, மலர் தாயத்துப்
	பலர் நாப்பண் மீக்கூறலின்,
	'உண்டாகிய உயர் மண்ணும்,
25	சென்று பட்ட விழுக் கலனும்,
	பெறல் கூடும், இவன் நெஞ்சு உறப் பெறின்' எனவும்,
	'ஏந்து கொடி இறைப்புரிசை,
	வீங்கு சிறை, வியல்அருப்பம்,
	இழந்து வைகுதும், இனி நாம் இவன்
30	உடன்று நோக்கினன், பெரிது' எனவும்,
	வேற்று அரசு பணி தொடங்கு நின்
	ஆற்றலொடு புகழ் ஏத்தி,
	காண்கு வந்திசின், பெரும! ஈண்டிய
	மழை என மருளும் பல் தோல், மலை எனத்
35	தேன் இறை கொள்ளும் இரும் பல் யானை,
	உடலுநர் உட்க வீங்கி, கடல் என
	வான் நீர்க்கு ஊக்கும் தானை, ஆனாது
	கடு ஒடுங்கு எயிற்ற அரவுத் தலை பனிப்ப,
	இடி என முழங்கும் முரசின்,
40	வரையா ஈகைக் குடவர் கோவே!

19

	இமிழ் கடல் வளைஇய ஈண்டு அகன் கிடக்கை,
	தமிழ் தலைமயங்கிய தலையாலங்கானத்து,
	மன் உயிர்ப் பன்மையும், கூற்றத்து ஒருமையும்,
	நின்னொடு தூக்கிய வென் வேல் செழிய!
5	'இரும் புலி வேட்டுவன் பொறி அறிந்து மாட்டிய
	பெருங் கல் அடாரும் போன்ம்' என விரும்பி,
	முயங்கினேன் அல்லனோ, யானே மயங்கிக்
	குன்றத்து இறுத்த குரீஇ இனம் போல,
	அம்பு சென்று இறுத்த அரும் புண் யானைத்
10	தூம்புடைத் தடக் கை வாயொடு துமிந்து,
	நாஞ்சில் ஒப்ப, நிலம் மிசைப் புரள,
	எறிந்து களம் படுத்த ஏந்து வாள் வலத்தர்
	எந்தையொடு கிடந்தோர், எம் புன் தலைப் புதல்வர்;
	'இன்ன விறலும் உளகொல், நமக்கு?' என,
15	மூதில் பெண்டிர் கசிந்து அழ, நாணி,
	கூற்றுக் கண்ணோடிய வெருவரு பறந்தலை,
	எழுவர் நல் வலம் கடந்தோய்! நின்
	கழூஉ விளங்கு ஆரம் கவைஇய மார்பே?

20

	இரு முந்நீர்க் குட்டமும்,
	வியல் ஞாலத்து அகலமும்,
	வளி வழங்கு திசையும்,
	வறிது நிலைஇய காயமும், என்றாங்கு
5	அவை அளந்து அறியினும், அளத்தற்கு அரியை,
	அறிவும், ஈரமும், பெருங் கண்ணோட்டமும்:
	சோறு படுக்கும் தீயோடு
	செஞ் ஞாயிற்றுத் தெறல் அல்லது
	பிறிது தெறல் அறியார், நின் நிழல் வாழ்வோரே;
10	திருவில் அல்லது கொலை வில் அறியார்;
	நாஞ்சில் அல்லது படையும் அறியார்;
	திறன் அறி வயவரொடு தெவ்வர் தேய, அப்
	பிறர் மண் உண்ணும் செம்மல்! நின் நாட்டு
	வயவுறு மகளிர் வேட்டு உணின் அல்லது,
15	பகைவர் உண்ணா அரு மண்ணினையே;
	அம்பு துஞ்சும் கடி அரணால்,
	அறம் துஞ்சும் செங்கோலையே;
	புதுப் புள் வரினும், பழம் புள் போகினும்,
	விதுப்புறவு அறியா ஏமக் காப்பினை;
20	அனையை ஆகல்மாறே,
	மன் உயிர் எல்லாம் நின் அஞ்சும்மே.

21

	புல வரை இறந்த புகழ்சால் தோன்றல்!
	'நில வரை இறந்த குண்டு கண் அகழி,
	வான் தோய்வு அன்ன புரிசை, விசும்பின்
	மீன் பூத்தன்ன உருவ ஞாயில்,
5	கதிர் நுழைகல்லா மரம் பயில் கடி மிளை,
	அருங் குறும்பு உடுத்த கானப்பேர் எயில்,
	கருங் கைக் கொல்லன் செந் தீ மாட்டிய
	இரும்பு உண் நீரினும் மீட்டற்கு அரிது' என,
	வேங்கை மார்பன் இரங்க, வைகலும்
10	ஆடு கொளக் குழைந்த தும்பை, புலவர்
	பாடுதுறை முற்றிய, கொற்ற வேந்தே!
	இகழுநர் இசையொடு மாய,
	புகழொடு விளங்கிப் பூக்க, நின் வேலே!

22

	தூங்கு கையான் ஓங்கு நடைய,
	உறழ் மணியான் உயர் மருப்பின,
	பிறை நுதலான் செறல் நோக்கின,
	பா அடியான் பணை எருத்தின,
5	தேன் சிதைந்த வரை போல,
	மிஞிறு ஆர்க்கும் கமழ் கடாத்து,
	அயறு சோரும் இருஞ் சென்னிய,
	மைந்து மலிந்த மழ களிறு
	கந்து சேர்பு நிலைஇ வழங்க;
10	பாஅல் நின்று கதிர் சோரும்
	வான் உறையும் மதி போலும்
	மாலை வெண் குடை நீழலான்,
	வாள் மருங்கு இலோர் காப்பு உறங்க;
	அலங்கு செந்நெல் கதிர் வேய்ந்த
15	ஆய் கரும்பின் கொடிக் கூரை,
	சாறு கொண்ட களம் போல,
	வேறு வேறு பொலிவு தோன்ற;
	குற்று ஆனா உலக்கையான்
	கலிச் சும்மை வியல் ஆங்கண்,
20	பொலந் தோட்டுப் பைந் தும்பை
	மிசை அலங்கு உளைய பனைப் போழ் செரீஇ,
	சின மாந்தர் வெறிக் குரவை
	ஓத நீரின் பெயர்பு பொங்க;
	வாய் காவாது பரந்து பட்ட
25	வியன் பாசறைக் காப்பாள!
	வேந்து தந்த பணி திறையான்
	சேர்ந்தவர்தம் கடும்பு ஆர்த்தும்,
	ஓங்கு கொல்லியோர், அடு பொருந!
	வேழ நோக்கின் விறல் வெஞ் சேஎய்!
30	வாழிய, பெரும! நின் வரம்பு இல் படைப்பே,
	நிற் பாடிய வயங்கு செந் நாப்
	பின் பிறர் இசை நுவலாமை,
	ஓம்பாது ஈயும் ஆற்றல் எம் கோ!
	'மாந்தரஞ்சேரல் இரும்பொறை ஓம்பிய நாடே
35	புத்தேள் உலகத்து அற்று' எனக் கேட்டு வந்து,
	இனிது கண்டிசின்; பெரும! முனிவு இலை,
	வேறு புலத்து இறுக்கும் தானையொடு,
	சோறு பட நடத்தி நீ துஞ்சாய்மாறே!

23

	'வெளிறு இல் நோன் காழ்ப் பணை நிலை முனைஇ,
	களிறு படிந்து உண்டென, கலங்கிய துறையும்;
	கார் நறுங் கடம்பின் பாசிலைத் தெரியல்,
	சூர் நவை, முருகன் சுற்றத்து அன்ன, நின்
5	கூர் நல் அம்பின் கொடு வில் கூளியர்
	கொள்வது கொண்டு, கொள்ளா மிச்சில்
	கொள் பதம் ஒழிய வீசிய புலனும்;
	வடி நவில் நவியம் பாய்தலின், ஊர்தொறும்
	கடி மரம் துளங்கிய காவும்; நெடு நகர்
10	வினை புனை நல் இல் வெவ் எரி நைப்ப,
	கனை எரி உரறிய மருங்கும்; நோக்கி,
	நண்ணார் நாண, நாள்தொறும் தலைச் சென்று,
	இன்னும் இன்ன பல செய்குவன், யாவரும்
	துன்னல் போகிய துணிவினோன்' என,
15	ஞாலம் நெளிய ஈண்டிய வியன் படை
	ஆலங்கானத்து அமர் கடந்து அட்ட
	கால முன்ப! நின் கண்டனென் வருவல்
	அறு மருப்பு எழில் கலை புலிப்பால் பட்டென,
	சிறு மறி தழீஇய தெறிநடை மடப் பிணை
20	பூளை நீடிய வெருவரு பறந்தலை
	வேளை வெண் பூக் கறிக்கும்
	ஆள் இல் அத்தம் ஆகிய காடே.

25

	மீன் திகழ் விசும்பில் பாய் இருள் அகல
	ஈண்டு செலல் மரபின் தன் இயல் வழாஅது,
	உரவுச் சினம் திருகிய உரு கெழு ஞாயிறு,
	நிலவுத் திகழ் மதியமொடு, நிலம் சேர்ந்தாஅங்கு,
5	உடல் அருந் துப்பின் ஒன்றுமொழி வேந்தரை
	அணங்கு அரும் பறந்தலை உணங்கப் பண்ணி,
	பிணியுறு முரசம் கொண்ட காலை,
	நிலை திரிபு எறிய, திண் மடை கலங்கிச்
	சிதைதல் உய்ந்தன்றோ, நின் வேல் செழிய!
10	முலை பொலி ஆகம் உருப்ப நூறி,
	மெய்ம் மறந்து பட்ட வரையாப் பூசல்
	ஒள் நுதல் மகளிர் கைம்மை கூர,
	அவிர் அறல் கடுக்கும் அம் மென்
	குவை இருங் கூந்தல் கொய்தல் கண்டே.

26

	நளி கடல் இருங் குட்டத்து
	வளி புடைத்த கலம் போல,
	களிறு சென்று களன் அகற்றவும்,
	களன் அகற்றிய வியல் ஆங்கண்
5	ஒளிறு இலைய எஃகு ஏந்தி,
	அரைசு பட அமர் உழக்கி,
	உரை செல முரசு வௌவி,
	முடித் தலை அடுப்பு ஆக,
	புனல் குருதி உலைக் கொளீஇ,
10	தொடித் தோள் துடுப்பின் துழந்த வல்சியின்,
	அடுகளம் வேட்ட அடு போர்ச் செழிய!
	ஆன்ற கேள்வி, அடங்கிய கொள்கை,
	நான் மறை முதல்வர் சுற்றம் ஆக,
	மன்னர் ஏவல் செய்ய, மன்னிய
15	வேள்வி முற்றிய வாய் வாள் வேந்தே!
	நோற்றோர் மன்ற நின் பகைவர், நின்னொடு
	மாற்றார் என்னும் பெயர் பெற்று,
	ஆற்றார் ஆயினும், ஆண்டு வாழ்வோரே.

31

	சிறப்புடை மரபின் பொருளும் இன்பமும்
	அறத்து வழிப்படூஉம் தோற்றம் போல,
	இரு குடை பின்பட ஓங்கிய ஒரு குடை,
	உரு கெழு மதியின், நிவந்து, சேண் விளங்க,
5	நல் இசை வேட்டம் வேண்டி, வெல் போர்ப்
	பாசறை அல்லது நீ ஒல்லாயே;
	நுதிமுகம் மழுங்க மண்டி, ஒன்னார்
	கடி மதில் பாயும் நின் களிறு அடங்கலவே;
	'போர்' எனின், புகலும் புனை கழல் மறவர்,
10	'காடு இடைக் கிடந்த நாடு நனி சேஎய;
	செல்வேம் அல்லேம்' என்னார்; 'கல்லென்
	விழவுடை ஆங்கண் வேற்றுப் புலத்து இறுத்து,
	குண கடல் பின்னது ஆக, குட கடல்
	வெண் தலைப் புணரி நின் மான் குளம்பு அலைப்ப,
15	வல முறை வருதலும் உண்டு' என்று அலமந்து,
	நெஞ்சு நடுங்கு அவலம் பாய,
	துஞ்சாக் கண்ண, வட புலத்து அரசே.

33

	கான் உறை வாழ்க்கை, கத நாய், வேட்டுவன்
	மான் தசை சொரிந்த வட்டியும், ஆய்மகள்
	தயிர் கொடு வந்த தசும்பும், நிறைய,
	ஏரின் வாழ்நர் பேர் இல் அரிவையர்
5	குளக் கீழ் விளைந்த களக் கொள் வெண்ணெல்
	முகந்தனர் கொடுப்ப, உகந்தனர் பெயரும்
	தென்னம் பொருப்பன் நல் நாட்டுள்ளும்,
	ஏழ் எயில் கதவம் எறிந்து, கைக்கொண்டு, நின்
	பேழ்வாய் உழுவை பொறிக்கும் ஆற்றலை;
10	பாடுநர் வஞ்சி பாட, படையோர்
	தாது எரு மறுகின் பாசறை பொலிய,
	புலராப் பச்சிலை இடை இடுபு தொடுத்த
	மலரா மாலைப் பந்து கண்டன்ன
	ஊன் சோற்று அமலை பாண் கடும்பு அருத்தும்
15	செம்மற்று அம்ம, நின் வெம் முனை இருக்கை
	வல்லோன் தைஇய வரி வனப்பு உற்ற
	அல்லிப் பாவை ஆடு வனப்பு ஏய்ப்ப,
	காம இருவர் அல்லது, யாமத்துத்
	தனி மகன் வழங்காப் பனி மலர்க் காவின்,
20	ஒதுக்குஇன் திணி மணல் புதுப் பூம் பள்ளி
	வாயில் மாடந்தொறும் மை விடை வீழ்ப்ப,
	நீ ஆங்குக் கொண்ட விழவினும் பலவே.

37

	நஞ்சுடை வால் எயிற்று, ஐந் தலை சுமந்த,
	வேக வெந் திறல், நாகம் புக்கென,
	விசும்பு தீப் பிறப்பத் திருகி, பசுங் கொடிப்
	பெரு மலை விடரகத்து உரும் எறிந்தாங்கு,
5	புள் உறு புன்கண் தீர்த்த, வெள் வேல்,
	சினம் கெழு தானை, செம்பியன் மருக!
	கராஅம் கலித்த குண்டு கண் அகழி,
	இடம் கருங் குட்டத்து உடன் தொக்கு ஓடி,
	யாமம் கொள்பவர் சுடர் நிழல் கதூஉம்
10	கடு முரண் முதலைய நெடு நீர் இலஞ்சி,
	செம்பு உறழ் புரிசை, செம்மல் மூதூர்,
	வம்பு அணி யானை வேந்து அகத்து உண்மையின்,
	'நல்ல' என்னாது, சிதைத்தல்
	வல்லையால், நெடுந்தகை! செருவத்தானே.

42

	ஆனா ஈகை, அடு போர், அண்ணல்! நின்
	யானையும் மலையின் தோன்றும்; பெரும! நின்
	தானையும் கடல் என முழங்கும்; கூர் நுனை
	வேலும் மின்னின் விளங்கும்; உலகத்து
5	அரைசு தலை பனிக்கும் ஆற்றலைஆதலின்,
	புரை தீர்ந்தன்று; அது புதுவதோ அன்றே;
	தண் புனல் பூசல் அல்லது, நொந்து,
	'களைக, வாழி, வளவ!' என்று, நின்
	முனைதரு பூசல் கனவினும் அறியாது,
10	புலி புறங்காக்கும் குருளை போல,
	மெலிவு இல் செங்கோல் நீ புறங்காப்ப,
	பெரு விறல் யாணர்த்து ஆகி, அரிநர்
	கீழ் மடைக் கொண்ட வாளையும், உழவர்
	படை மிளிர்ந்திட்ட யாமையும், அறைநர்
15	கரும்பில் கொண்ட தேனும், பெருந் துறை
	நீர் தரு மகளிர் குற்ற குவளையும்,
	வன் புலக் கேளிர்க்கு வரு விருந்து அயரும்
	மென் புல வைப்பின் நல் நாட்டுப் பொருந!
	மலையின் இழிந்து, மாக் கடல் நோக்கி,
20	நில வரை இழிதரும் பல் யாறு போல,
	புலவர் எல்லாம் நின் நோக்கினரே;
	நீயே, மருந்து இல் கணிச்சி வருந்த வட்டித்துக்
	கூற்று வெகுண்டன்ன முன்பொடு,
	மாற்று இரு வேந்தர் மண் நோக்கினையே.

43

	நிலமிசை வாழ்நர் அலமரல் தீர,
	தெறு கதிர்க் கனலி வெம்மை தாங்கி,
	கால் உணவு ஆக, சுடரொடு கொட்கும்
	அவிர்சடை முனிவரும் மருள, கொடுந்சிறைக்
5	கூர் உகிர்ப் பருந்தின் ஏறு குறித்து, ஒரீஇ,
	தன் அகம் புக்க குறு நடைப் புறவின்
	தபுதி அஞ்சிச் சீரை புக்க
	வரையா ஈகை உரவோன் மருக!
	நேரார்க் கடந்த முரண் மிகு திருவின்
10	தேர் வண் கிள்ளி தம்பி! வார் கோல்,
	கொடுமர மறவர் பெரும! கடு மான்
	கை வண் தோன்றல்! ஐயம் உடையேன்:
	'ஆர் புனை தெரியல் நின் முன்னோர் எல்லாம்
	பார்ப்பார் நோவன செய்யலர்; மற்று இது
15	நீர்த்தோ நினக்கு?' என வெறுப்பக் கூறி,
	நின் யான் பிழைத்தது நோவாய் என்னினும்,
	நீ பிழைத்தாய் போல் நனி நாணினையே;
	'தம்மைப் பிழைத்தோர்ப் பொறுக்கும் செம்மல்
	இக் குடிப் பிறந்தோர்க்கு எண்மை காணும்' என,
20	காண்தகு மொய்ம்ப! காட்டினை; ஆகலின்,
	யானே பிழைத்தனென்; சிறக்க நின் ஆயுள்
	மிக்கு வரும் இன் நீர்க் காவிரி
	எக்கர் இட்ட மணலினும் பலவே!

44

	இரும் பிடித் தொழுதியொடு பெருங் கயம் படியா,
	நெல்லுடைக் கவளமொடு நெய்ம் மிதி பெறாஅ,
	திருந்து அரை நோன் வெளில் வருந்த ஒற்றி,
	நிலமிசைப் புரளும் கைய, வெய்து உயிர்த்து,
5	அலமரல் யானை உரும் என முழங்கவும்,
	பால் இல் குழவி அலறவும், மகளிர்
	பூ இல் வறுந் தலை முடிப்பவும், நீர் இல்
	வினை புனை நல் இல் இனைகூஉக் கேட்பவும்,
	இன்னாது அம்ம, ஈங்கு இனிது இருத்தல்;
10	துன் அருந் துப்பின் வய மான் தோன்றல்!
	அறவை ஆயின்,' நினது' எனத் திறத்தல்;
	மறவை ஆயின், போரொடு திறத்தல்;
	அறவையும் மறவையும் அல்லையாக,
	திறவாது அடைத்த திண் நிலைக் கதவின்
15	நீள் மதில் ஒரு சிறை ஒடுங்குதல்
	நாணுத்தகவு உடைத்து, இது காணுங்காலே.

51

	நீர் மிகின், சிறையும் இல்லை; தீ மிகின்,
	மன் உயிர் நிழற்றும் நிழலும் இல்லை;
	வளி மிகின், வலியும் இல்லை; ஒளி மிக்கு
	அவற்று ஓர் அன்ன சினப் போர் வழுதி,
5	'தண் தமிழ் பொது' எனப் பொறாஅன், போர் எதிர்ந்து,
	கொண்டி வேண்டுவன் ஆயின், 'கொள்க' எனக்
	கொடுத்த மன்னர் நடுக்கு அற்றனரே;
	அளியரோ அளியர், அவன் அளி இழந்தோரே
	நுண் பல சிதலை அரிது முயன்று எடுத்த
10	செம் புற்று ஈயல் போல,
	ஒரு பகல் வாழ்க்கைக்கு உலமருவோரே!

52

	அணங்குடை நெடுங் கோட்டு அளையகம் முனைஇ,
	முணங்கு நிமிர் வயமான் முழு வலி ஒருத்தல்,
	ஊன் நசை உள்ளம் துரப்ப, இரை குறித்து,
	தான் வேண்டு மருங்கின் வேட்டு எழுந்தாங்கு,
5	வட புல மன்னர் வாட, அடல் குறித்து,
	இன்னா வெம் போர் இயல் தேர் வழுதி!
	இது நீ கண்ணியது ஆயின், இரு நிலத்து
	யார்கொல் அளியர்தாமே? ஊர்தொறும்
	மீன் சுடு புகையின் புலவு நாறு நெடுங் கொடி
10	வயலுழை மருதின் வாங்குசினை வலக்கும்
	பெரு நல் யாணரின் ஒரீஇ, இனியே
	கலி கெழு கடவுள் கந்தம் கைவிடப்
	பலி கண் மாறிய பாழ்படு பொதியில்,
	நரை மூதாளர் நாய் இடக் குழிந்த
15	வல்லின் நல் அகம் நிறைய, பல் பொறிக்
	கான வாரணம் ஈனும்
	காடு ஆகி விளியும் நாடு உடையோரே!

53

	முதிர் வார் இப்பி முத்த வார் மணல்,
	கதிர் விடு மணியின் கண் பொரு மாடத்து,
	இலங்கு வளை மகளிர் தெற்றி ஆடும்
	விளங்கு சீர் விளங்கில் விழுமம் கொன்ற
5	களம் கொள் யானை, கடு மான், பொறைய!
	விரிப்பின் அகலும்; தொகுப்பின் எஞ்சும்;
	மம்மர் நெஞ்சத்து எம்மனோர்க்கு ஒருதலை
	கைம்முற்றல, நின் புகழே, என்றும்;
	ஒளியோர் பிறந்த இம் மலர் தலை உலகத்து
10	வாழேம் என்றலும் அரிதே 'தாழாது
	செறுத்த செய்யுள் செய் செந் நாவின்,
	வெறுத்த கேள்வி, விளங்கு புகழ்க் கபிலன்
	இன்று உளன் ஆயின், நன்றுமன்' என்ற நின்
	ஆடு கொள் வரிசைக்கு ஒப்ப,
15	பாடுவல் மன்னால், பகைவரைக் கடப்பே.

54

	எம் கோன் இருந்த கம்பலை மூதூர்,
	உடையோர் போல இடையின்று குறுகி,
	செம்மல் நாள் அவை அண்ணாந்து புகுதல்
	எம் அன வாழ்க்கை இரவலர்க்கு எளிதே;
5	இரவலர்க்கு எண்மை அல்லது புரவு எதிர்ந்து,
	வானம் நாண, வரையாது, சென்றோர்க்கு
	ஆனாது ஈயும் கவி கை வண்மைக்
	கடு மான் கோதை துப்பு எதிர்ந்து எழுந்த
	நெடுமொழி மன்னர் நினைக்கும் காலை,
10	பாசிலைத் தொடுத்த, உவலைக் கண்ணி,
	மாசு உண் உடுக்கை, மடி வாய், இடையன்
	சிறு தலை ஆயமொடு குறுகல்செல்லாப்
	புலி துஞ்சு வியன் புலத்தற்றே
	வலி துஞ்சு தடக் கை அவனுடை நாடே.

61

	கொண்டைக் கூழைத் தண் தழைக் கடைசியர்
	சிறு மாண் நெய்தல் ஆம்பலொடு கட்கும்,
	மலங்கு மிளிர், செறுவின் தளம்பு தடிந்து இட்ட
	பழன வாளைப் பரூஉக் கண் துணியல்
5	புது நெல் வெண் சோற்றுக் கண்ணுறை ஆக,
	விலாப் புடை மருங்கு விசிப்ப மாந்தி,
	நீடு கதிர்க் கழனிச் சூடு தடுமாறும்
	வன் கை வினைஞர் புன் தலைச் சிறாஅர்
	தெங்கு படு வியன் பழம் முனையின், தந்தையர்
10	குறைக்கண் நெடும் போர் ஏறி, விசைத்து எழுந்து
	செழுங் கோள் பெண்ணைப் பழம் தொட முயலும்,
	வைகல் யாணர், நல் நாட்டுப் பொருநன்,
	எஃகு விளங்கு தடக் கை இயல் தேர்ச் சென்னி,
	சிலைத் தார் அகலம் மலைக்குநர் உளர்எனின்,
15	தாம் அறிகுவர் தமக்கு உறுதி; யாம் அவன்
	எழு உறழ் திணி தோள் வழு இன்று மலைந்தோர்
	வாழக் கண்டன்றும் இலமே; தாழாது,
	திருந்து அடி பொருந்த வல்லோர்
	வருந்தக் காண்டல், அதனினும் இலமே.

66

	நளி இரு முந்நீர் நாவாய் ஓட்டி,
	வளி தொழில் ஆண்ட உரவோன் மருக!
	களி இயல் யானைக் கரிகால்வளவ!
	சென்று, அமர்க் கடந்த நின் ஆற்றல் தோன்ற
5	வென்றோய்! நின்னினும் நல்லன் அன்றே
	கலி கொள் யாணர் வெண்ணிப் பறந்தலை,
	மிகப் புகழ் உலகம் எய்தி,
	புறப் புண் நாணி, வடக்கிருந்தோனே?

76

	ஒருவனை ஒருவன் அடுதலும், தொலைதலும்,
	புதுவது அன்று; இவ் உலகத்து இயற்கை;
	இன்றின் ஊங்கோ கேளலம் திரள் அரை
	மன்ற வேம்பின் மாச் சினை ஒண் தளிர்
5	நெடுங் கொடி உழிஞைப் பவரொடு மிடைந்து,
	செறியத் தொடுத்த தேம் பாய் கண்ணி,
	ஒலியல் மாலையொடு, பொலியச் சூடி,
	பாடு இன் தெண் கிணை கறங்க, காண்தக,
	நாடு கெழு திருவின், பசும் பூண், செழியன்
10	பீடும் செம்மலும் அறியார் கூடி,
	'பொருதும்' என்று தன்தலை வந்த
	புனை கழல் எழுவர் நல் வலம் அடங்க,
	ஒரு தான் ஆகிப் பொருது, களத்து அடலே.

77

	கிண்கிணி களைந்த கால் ஒண் கழல் தொட்டு,
	குடுமி களைந்த நுதல் வேம்பின் ஒண் தளிர்
	நெடுங் கொடி உழிஞைப் பவரொடு மிலைந்து,
	குறுந் தொடி கழித்த கைச் சாபம் பற்றி,
5	நெடுந் தேர்க் கொடுஞ்சி பொலிய நின்றோன்
	யார்கொல்? வாழ்க, அவன் கண்ணி! தார் பூண்டு,
	தாலி களைந்தன்றும் இலனே; பால் விட்டு
	அயினியும் இன்று அயின்றனனே; வயின்வயின்
	உடன்று மேல் வந்த வம்ப மள்ளரை
10	வியந்தன்றும், இழிந்தன்றும், இலனே; அவரை
	அழுந்தப் பற்றி, அகல் விசும்பு ஆர்ப்பு எழ,
	கவிழ்ந்து நிலம் சேர அட்டதை
	மகிழ்ந்தன்றும், மலிந்தன்றும், அதனினும் இலனே.

78

	வணங்கு தொடைப் பொலிந்த வலி கெழு நோன் தாள்,
	அணங்கு அருங் கடுந் திறல் என்னை முணங்கு நிமிர்ந்து,
	அளைச் செறி உழுவை இரைக்கு வந்தன்ன
	மலைப்பு அரும் அகலம் மதியார், சிலைத்து எழுந்து,
5	'விழுமியம், பெரியம், யாமே; நம்மின்
	பொருநனும் இளையன்; கொண்டியும் பெரிது' என,
	எள்ளி வந்த வம்ப மள்ளர்
	புல்லென் கண்ணர்; புறத்தில் பெயர,
	ஈண்டு அவர் அடுதலும் ஒல்லான், ஆண்டு அவர்
10	மாண் இழை மகளிர் நாணினர் கழிய,
	தந்தை தம் ஊர் ஆங்கண்,
	தெண் கிணை கறங்கச் சென்று, ஆண்டு அட்டனனே.

79

	மூதூர் வாயில் பனிக் கயம் மண்ணி,
	மன்ற வேம்பின் ஒண் குழை மலைந்து,
	தெண் கிணை முன்னர்க் களிற்றின் இயலி,
	வெம் போர்ச் செழியனும் வந்தனன்; எதிர்ந்த
5	வம்ப மள்ளரோ பலரே;
	எஞ்சுவர் கொல்லோ, பகல் தவச் சிறிதே?

81

	ஆர்ப்பு எழு கடலினும் பெரிது; அவன் களிறே
	கார்ப் பெயல் உருமின் முழங்கல் ஆனாவே;
	யார்கொல் அளியர்தாமே ஆர் நார்ச்
	செறியத் தொடுத்த கண்ணிக்
5	கவி கை மள்ளன் கைப்பட்டோரே?

82

	சாறு தலைக்கொண்டென, பெண் ஈற்று உற்றென,
	பட்ட மாரி ஞான்ற ஞாயிற்று,
	கட்டில் நிணக்கும் இழிசினன் கையது
	போழ் தூண்டு ஊசியின் விரைந்தன்று மாதோ
5	ஊர் கொள வந்த பொருநனொடு,
	ஆர் புனை தெரியல் நெடுந்தகை போரே!

86

	சிற்றில் நல் தூண் பற்றி, 'நின் மகன்
	யாண்டு உளனோ?' என வினவுதி; என் மகன்
	யாண்டு உளன்ஆயினும் அறியேன்; ஓரும்
	புலி சேர்ந்து போகிய கல் அளை போல,
5	ஈன்ற வயிறோ இதுவே;
	தோன்றுவன் மாதோ, போர்க்களத்தானே!

93

	திண் பிணி முரசம் இழுமென முழங்கச்
	சென்று, அமர் கடத்தல் யாவது? வந்தோர்
	தார் தாங்குதலும் ஆற்றார், வெடிபட்டு,
	ஓடல் மரீஇய பீடு இல் மன்னர்
5	நோய்ப்பால் விளிந்த யாக்கை தழீஇ,
	காதல் மறந்து, அவர் தீது மருங்கு அறுமார்,
	அறம் புரி கொள்கை நான்மறை முதல்வர்
	திறம் புரி பசும் புல் பரப்பினர் கிடப்பி,
	'மறம் கந்தாக நல் அமர் வீழ்ந்த
10	நீள் கழல் மறவர் செல்வுழிச் செல்க!' என
	வாள் போழ்ந்து அடக்கலும் உய்ந்தனர் மாதோ
	வரி ஞிமிறு ஆர்க்கும் வாய் புகு கடாஅத்து
	அண்ணல் யானை அடு களத்து ஒழிய,
	அருஞ் சமம் ததைய நூறி, நீ,
15	பெருந் தகை! விழுப் புண் பட்ட மாறே.

94

	ஊர்க் குறுமாக்கள் வெண் கோடு கழாஅலின்,
	நீர்த் துறை படியும் பெருங் களிறு போல
	இனியை, பெரும! எமக்கே; மற்று அதன்
	துன் அருங் கடாஅம் போல
5	இன்னாய், பெரும! நின் ஒன்னாதோர்க்கே.

98

	முனைத் தெவ்வர் முரண் அவியப்
	பொரக் குறுகிய நுதி மருப்பின் நின்
	இனக் களிறு செலக் கண்டவர்
	மதில் கதவம் எழுச் செல்லவும்,
5	பிணன் அழுங்கக் களன் உழக்கிச்
	செலவு அசைஇய மறுக் குளம்பின் நின்
	இன நல் மாச் செலக் கண்டவர்
	கவை முள்ளின் புழை அடைப்பவும்,
	மார்புறச் சேர்ந்து ஒல்காத்
10	தோல் செறிப்பு இல் நின் வேல் கண்டவர்
	தோல் கழியொடு பிடி செறிப்பவும்,
	வாள் வாய்த்த வடுப் பரந்த நின்
	மற மைந்தர் மைந்து கண்டவர்
	புண் படு குருதி அம்பு ஒடுக்கவும்,
15	நீயே, ஐயவி புகைப்பவும் தாங்காது, ஒய்யென,
	உறுமுறை மரபின் புறம் நின்று உய்க்கும்
	கூற்றத்து அனையை; ஆகலின், போற்றார்
	இரங்க விளிவதுகொல்லோ வரம்பு அணைந்து
	இறங்குகதிர் அலம்வரு கழனி,
20	பெரும் புனல் படப்பை, அவர் அகன் தலை நாடே!

99

	அமரர்ப் பேணியும், ஆவுதி அருத்தியும்,
	அரும் பெறல் மரபின் கரும்பு இவண் தந்தும்,
	நீர் அக இருக்கை ஆழி சூட்டிய
	தொல் நிலை மரபின் நின் முன்னோர் போல,
5	ஈகை அம் கழல் கால், இரும் பனம் புடையல்,
	பூ ஆர் காவின், புனிற்றுப் புலால் நெடு வேல்,
	எழு பொறி நாட்டத்து எழாஅத் தாயம்
	வழு இன்று எய்தியும் அமையாய், செரு வேட்டு,
	இமிழ் குரல் முரசின் எழுவரொடு முரணிச்
10	சென்று, அமர் கடந்து, நின் ஆற்றல் தோற்றிய
	அன்றும், பாடுநர்க்கு அரியை; இன்றும்
	பரணன் பாடினன் மற்கொல் மற்று நீ
	முரண் மிகு கோவலூர் நூறி, நின்
	அரண் அடு திகிரி ஏந்திய தோளே!

100

	கையது வேலே; காலன புனை கழல்;
	மெய்யது வியரே; மிடற்றது பசும் புண்;
	வட்கர் போகிய வளர் இளம் போந்தை
	உச்சிக் கொண்ட ஊசி வெண் தோட்டு,
5	வெட்சி மா மலர், வேங்கையொடு விரைஇ,
	சுரி இரும் பித்தை பொலியச் சூடி,
	வரிவயம் பொருத வயக் களிறு போல,
	இன்னும் மாறாது சினனே; அன்னோ!
	உய்ந்தனர் அல்லர், இவன் உடற்றியோரே;
10	செறுவர் நோக்கிய கண், தன்
	சிறுவனை நோக்கியும், சிவப்பு ஆனாவே.

104

	போற்றுமின், மறவீர்! சாற்றுதும், நும்மை:
	ஊர்க் குறுமாக்கள் ஆடக் கலங்கும்
	தாள் படு சில் நீர்க் களிறு அட்டு வீழ்க்கும்
	ஈர்ப்புடைக் கராஅத்து அன்ன என்னை
5	நுண் பல் கருமம் நினையாது,
	'இளையன்' என்று இகழின், பெறல் அரிது, ஆடே.

125

	பருத்திப் பெண்டின் பனுவல் அன்ன,
	நெருப்புச் சினம் தணிந்த நிணம் தயங்கு கொழுங் குறை,
	பரூஉக் கள் மண்டையொடு, ஊழ் மாறு பெயர
	உண்கும், எந்தை! நிற் காண்கு வந்திசினே,
5	நள்ளாதார் மிடல் சாய்த்த
	வல்லாள! நின் மகிழ் இருக்கையே.
	உழுத நோன் பகடு அழி தின்றாங்கு
	நல் அமிழ்து ஆக, நீ நயந்து உண்ணும் நறவே;
	குன்றத்து அன்ன களிறு பெயர,
10	கடந்து அட்டு வென்றோனும், நிற் கூறும்மே;
	'வெலீஇயோன் இவன்' என,
	'கழல் அணிப் பொலிந்த சேவடி நிலம் கவர்பு
	விரைந்து வந்து, சமம் தாங்கிய,
	வல் வேல் மலையன் அல்லன் ஆயின்,
15	நல் அமர் கடத்தல் எளிதுமன், நமக்கு' எனத்
	தோற்றோன்தானும், நிற் கூறும்மே,
	'தொலைஇயோன் இவன்' என,
	ஒரு நீ ஆயினை பெரும! பெரு மழைக்கு
	இருக்கை சான்ற உயர் மலைத்
20	திருத் தகு சேஎய்! நிற் பெற்றிசினோர்க்கே.

166

	நன்று ஆய்ந்த நீள் நிமிர் சடை
	முது முதல்வன் வாய் போகாது,
	ஒன்று புரிந்த ஈர் இரண்டின்,
	ஆறு உணர்ந்த ஒரு முது நூல்
5	இகல் கண்டோர் மிகல் சாய்மார்,
	மெய் அன்ன பொய் உணர்ந்து,
	பொய் ஓராது மெய் கொளீஇ,
	மூ ஏழ் துறையும் முட்டு இன்று போகிய
	உரைசால் சிறப்பின் உரவோர் மருக!
10	வினைக்கு வேண்டி நீ பூண்ட
	புலப் புல்வாய்க் கலைப் பச்சை
	சுவல் பூண் ஞாண்மிசைப் பொலிய;
	மறம் கடிந்த அருங் கற்பின்,
	அறம் புகழ்ந்த வலை சூடி,
15	சிறு நுதல், பேர் அகல் அல்குல்,
	சில சொல்லின், பல கூந்தல், நின்
	நிலைக்கு ஒத்த நின் துணைத் துணைவியர்
	தமக்கு அமைந்த தொழில் கேட்ப;
	காடு என்றா நாடு என்று ஆங்கு
20	ஈர் ஏழின் இடம் முட்டாது,
	நீர் நாண நெய் வழங்கியும்,
	எண் நாணப் பல வேட்டும்,
	மண் நாணப் புகழ் பரப்பியும்,
	அருங் கடிப் பெருங் காலை,
25	விருந்துற்ற நின் திருந்து ஏந்து நிலை,
	என்றும், காண்கதில் அம்ம, யாமே! குடாஅது
	பொன் படு நெடு வரைப் புயலேறு சிலைப்பின்,
	பூ விரி புது நீர்க் காவிரி புரக்கும்
	தண் புனல் படப்பை எம் ஊர் ஆங்கண்,
30	உண்டும் தின்றும் ஊர்ந்தும் ஆடுகம்;
	செல்வல் அத்தை, யானே; செல்லாது,
	மழை அண்ணாப்ப நீடிய நெடு வரைக்
	கழை வளர் இமயம் போல,
	நிலீஇயர் அத்தை, நீ நிலம்மிசையானே?

167

	நீயே, அமர் காணின் அமர் கடந்து, அவர்
	படை விலக்கி எதிர் நிற்றலின்,
	வாஅள் வாய்த்த வடு ஆழ் யாக்கையொடு,
	கேள்விக்கு இனியை; கட்கு இன்னாயே:
5	அவரே, நிற் காணின் புறம் கொடுத்தலின்,
	ஊறு அறியா மெய் யாக்கையொடு,
	கண்ணுக்கு இனியர்; செவிக்கு இன்னாரே:
	அதனால், நீயும் ஒன்று இனியை; அவரும் ஒன்று இனியர்;
	ஒவ்வா யா உள, மற்றே? வெல் போர்க்
10	கழல் புனை திருந்து அடிக் கடு மான் கிள்ளி!
	நின்னை வியக்கும் இவ் உலகம்; அஃது
	என்னோ? பெரும! உரைத்திசின் எமக்கே.

170

	மரை பிரித்து உண்ட நெல்லி வேலி,
	பரலுடை முன்றில், அம் குடிச் சீறூர்,
	எல் அடிப்படுத்த கல்லாக் காட்சி
	வில் உழுது உண்மார் நாப்பண், ஒல்லென,
5	இழி பிறப்பாளன் கருங் கை சிவப்ப,
	வலி துரந்து சிலைக்கும் வன் கண் கடுந் துடி
	புலி துஞ்சு நெடு வரைக் குடிஞையோடு இரட்டும்
	மலை கெழு நாடன், கூர்வேல் பிட்டன்,
	குறுகல் ஓம்புமின், தெவ்விர்! அவனே
10	சிறு கண் யானை வெண் கோடு பயந்த
	ஒளி திகழ் முத்தம் விறலியர்க்கு ஈத்து,
	நார் பிழிக் கொண்ட வெங் கள் தேறல்
	பண் அமை நல் யாழ்ப் பாண் கடும்பு அருத்தி,
	நசைவர்க்கு மென்மை அல்லது, பகைவர்க்கு
15	இரும்பு பயன் படுக்கும் கருங் கைக் கொல்லன்
	விசைத்து எறி கூடமொடு பொரூஉம்
	உலைக் கல் அன்ன, வல்லாளன்னே.

174

	அணங்குடை அவுணர் கணம் கொண்டு ஒளித்தென,
	சேண் விளங்கு சிறப்பின் ஞாயிறு காணாது,
	இருள் கண் கெடுத்த பருதி ஞாலத்து
	இடும்பை கொள் பருவரல் தீர, கடுந் திறல்
5	அஞ்சன உருவன் தந்து நிறுத்தாங்கு,
	அரசு இழந்திருந்த அல்லல் காலை,
	முரசு எழுந்து இரங்கும் முற்றமொடு, கரை பொருது
	இரங்கு புனல் நெரிதரு மிகு பெருங் காவிரி
	மல்லல் நல் நாட்டு அல்லல் தீர,
10	பொய்யா நாவின் கபிலன் பாடிய,
	மை அணி நெடு வரை ஆங்கண், ஒய்யெனச்
	செருப் புகல் மறவர் செல்புறம் கண்ட
	எள் அறு சிறப்பின் முள்ளூர் மீமிசை,
	அரு வழி இருந்த பெரு விறல் வளவன்
15	மதி மருள் வெண்குடை காட்டி, அக் குடை
	புதுமையின் நிறுத்த புகழ் மேம்படுந!
	விடர்ப் புலி பொறித்த கோட்டை, சுடர்ப் பூண்,
	சுரும்பு ஆர் கண்ணி, பெரும் பெயர் நும் முன்
	ஈண்டுச் செய் நல் வினை ஆண்டுச் சென்று உணீஇயர்,
20	உயர்ந்தோர் உலகத்துப் பெயர்ந்தனன் ஆகலின்,
	ஆறு கொல் மருங்கின் மாதிரம் துழவும்
	கவலை நெஞ்சத்து அவலம் தீர,
	நீ தோன்றினையே நிரைத் தார் அண்ணல்!
	கல் கண் பொடிய, கானம் வெம்ப,
25	மல்கு நீர் வரைப்பின் கயம் பல உணங்க,
	கோடை நீடிய பைது அறு காலை,
	இரு நிலம் நெளிய ஈண்டி,
	உரும் உரறு கருவிய மழை பொழிந்தாங்கே.

178

	கந்து முனிந்து உயிர்க்கும் யானையொடு, பணை முனிந்து
	கால் இயல் புரவி ஆலும் ஆங்கண்,
	மணல் மலி முற்றம் புக்க சான்றோர்
	உண்ணார் ஆயினும், தன்னொடு சூளுற்று,
5	'உண்ம்' என இரக்கும் பெரும் பெயர்ச் சாத்தன்
	ஈண்டோ இன் சாயலனே; வேண்டார்
	எறி படை மயங்கிய வெருவரு ஞாட்பின்,
	கள்ளுடைக் கலத்தர் உள்ளூர்க் கூறிய
	நெடுமொழி மறந்த சிறு பேராளர்
10	அஞ்சி நீங்கும்காலை,
	ஏமமாகத் தான் முந்துறுமே.

179

	'ஞாலம் மீமிசை வள்ளியோர் மாய்ந்தென,
	ஏலாது கவிழ்ந்த என் இரவல் மண்டை
	மலர்ப்போர் யார்?' என வினவலின், மலைந்தோர்
	விசி பிணி முரசமொடு மண் பல தந்த
5	திரு வீழ் நுண் பூண் பாண்டியன் மறவன்,
	படை வேண்டுவழி வாள் உதவியும்,
	வினை வேண்டுவழி அறிவு உதவியும்,
	வேண்டுப வேண்டுப வேந்தன் தேஎத்து
	அசை நுகம் படாஅ ஆண்தகை உள்ளத்து,
10	தோலா நல் இசை, நாலை கிழவன்,
	பருந்து பசி தீர்க்கும் நற் போர்த்
	திருந்து வேல் நாகன் கூறினர், பலரே.

180

	நிரப்பாது கொடுக்கும் செல்வமும் இலனே;
	'இல்' என மறுக்கும் சிறுமையும் இலனே;
	இறை உறு விழுமம் தாங்கி, அமரகத்து
	இரும்பு சுவைக் கொண்ட விழுப்புண் நோய் தீர்ந்து,
5	மருந்து கொள் மரத்தின் வாள் வடு மயங்கி,
	வடு இன்று வடிந்த யாக்கையன், கொடை எதிர்ந்து,
	ஈர்ந்தையோனே, பாண் பசிப் பகைஞன்;
	இன்மை தீர வேண்டின், எம்மொடு
	நீயும் வம்மோ? முது வாய் இரவல!
10	யாம் தன் இரக்கும்காலை, தான் எம்
	உண்ணா மருங்குல் காட்டி, தன் ஊர்க்
	கருங் கைக் கொல்லனை இரக்கும்,
	'திருந்து இலை நெடு வேல் வடித்திசின்' எனவே.

181

	மன்ற விளவின் மனை வீழ் வெள்ளில்,
	கருங் கண் எயிற்றி காதல் மகனொடு,
	கான இரும் பிடிக் கன்று தலைக் கொள்ளும்
	பெருங் குறும்பு உடுத்த வன் புல இருக்கை,
5	புலாஅ அம்பின், போர் அருங் கடி மிளை,
	வலாஅரோனே, வாய் வாள் பண்ணன்;
	உண்ணா வறுங் கடும்பு உய்தல் வேண்டின்,
	இன்னே சென்மதி, நீயே சென்று, அவன்
	பகைப் புலம் படராஅளவை, நின்
10	பசிப் பகைப் பரிசில் காட்டினை கொளற்கே.

251

	ஓவத்து அன்ன இடனுடை வரைப்பில்,
	பாவை அன்ன குறுந் தொடி மகளிர்
	இழை நிலை நெகிழ்த்த மள்ளன் கண்டிகும்
	கழைக் கண் நெடு வரை அருவி ஆடி,
5	கான யானை தந்த விறகின்
	கடுந் தெறல் செந் தீ வேட்டு,
	புறம் தாழ் புரி சடை புலர்த்துவோனே!

252

	கறங்கு வெள் அருவி ஏற்றலின், நிறம் பெயர்ந்து,
	தில்லை அன்ன புல்லென் சடையோடு,
	அள் இலைத் தாளி கொய்யுமோனே
	இல் வழங்கு மட மயில் பிணிக்கும்
5	சொல் வலை வேட்டுவன் ஆயினன், முன்னே!

279

	கெடுக சிந்தை; கடிது இவள் துணிவே;
	மூதில் மகளிர் ஆதல் தகுமே:
	மேல்நாள் உற்ற செருவிற்கு இவள் தன்னை,
	யானை எறிந்து, களத்து ஒழிந்தனனே;
5	நெருநல் உற்ற செருவிற்கு இவள் கொழுநன்,
	பெரு நிரை விலங்கி, ஆண்டுப் பட்டனனே;
	இன்றும், செருப் பறை கேட்டு, விருப்புற்று, மயங்கி,
	வேல் கைக் கொடுத்து, வெளிது விரித்து உடீஇ,
	பாறு மயிர்க் குடுமி எண்ணெய் நீவி,
10
	'செருமுகம் நோக்கிச் செல்க' என விடுமே!

285

	பாசறையீரே! பாசறையீரே!
	துடியன் கையது வேலே; அடி புணர்
	வாங்கு இரு மருப்பின் தீம் தொடைச் சீறியாழ்ப்
	பாணன் கையது தோலே; காண்வரக்
5	கடுந் தெற்று மூடையின்......................
	வாடிய மாலை மலைந்த சென்னியன்;
	வேந்து தொழில் அயரும் அருந் தலைச் சுற்றமொடு
	நெடு நகர் வந்தென, விடு கணை மொசித்த
	மூரி வெண் தோல்
10	சேறுபடு குருதிச் செம்மல் உக்குஓஒ!
	மாறு செறு நெடு வேல் மார்பு உளம் போக,
	நிணம் பொதி கழலொடு நிலம் சேர்ந்தனனே;
	அது கண்டு, பரந்தோர் எல்லாம் புகழத் தலை பணிந்து
	இறைஞ்சியோனே, குருசில்! பிணங்கு கதிர்
15	அலமருங் கழனித் தண்ணடை ஒழிய,
	இலம்பாடு ஒக்கல் தலைவற்கு ஓர்
	கரம்பைச் சீறூர் நல்கினன் எனவே.

296

	வேம்பு சினை ஒடிப்பவும், காஞ்சி பாடவும்,
	நெய்யுடைக் கையர் ஐயவி புகைப்பவும்,
	எல்லா மனையும் கல்லென்றவ்வே;
	வேந்து உடன்று எறிவான்கொல்லோ
5	நெடிது வந்தன்றால் நெடுந்தகை தேரே?

305

	வயலைக் கொடியின் வாடிய மருங்குல்,
	உயவல் ஊர்தி, பயலைப் பார்ப்பான்
	எல்லி வந்து நில்லாது புக்கு,
	சொல்லிய சொல்லோ சிலவே; அதற்கே
5	ஏணியும் சீப்பும் மாற்றி,
	மாண் வினை யானையும் மணி களைந்தனவே.

306

	களிறு பொரக் கலங்கு, கழல் முள் வேலி,
	அரிது உண் கூவல், அம் குடிச் சீறூர்
	ஒலி மென் கூந்தல் ஒள் நுதல் அரிவை
	நடுகல் கை தொழுது பரவும், ஒடியாது;
5	விருந்து எதிர் பெறுகதில் யானே; என்னையும்
	ஒ ... ... ... ... ... ... ...வேந்தனொடு
	நாடுதரு விழுப் பகை எய்துக எனவே.

308

	பொன் வார்ந்தன்ன புரி அடங்கு நரம்பின்,
	மின் நேர் பச்சை, மிஞிற்றுக் குரல் சீறியாழ்
	நன்மை நிறைந்த நய வரு பாண!
	சீறூர் மன்னன் சிறியிலை எஃகம்
5	வேந்து ஊர் யானை ஏந்து முகத்ததுவே;
	வேந்து உடன்று எறிந்த வேலே, என்னை
	சாந்து ஆர் அகலம் உளம் கழிந்தன்றே;
	உளம் கழி சுடர்ப் படை ஏந்தி, நம் பெருவிறல்
	ஓச்சினன் துரந்த காலை, மற்றவன்
10	புன் தலை மடப் பிடி நாண,
	குஞ்சரம் எல்லாம் புறக்கொடுத்தனவே.

312

	ஈன்று புறந்தருதல் என் தலைக் கடனே;
	சான்றோன் ஆக்குதல் தந்தைக்குக் கடனே;
	வேல் வடித்துக் கொடுத்தல் கொல்லற்குக் கடனே;
	நன்னடை நல்கல் வேந்தற்குக் கடனே,
5	ஒளிறு வாள் அருஞ் சமம் முருக்கி,
	களிறு எறிந்து பெயர்தல் காளைக்குக் கடனே.

313

	அத்தம் நண்ணிய நாடு கெழு பெருவிறல்
	கைப் பொருள் யாதொன்றும் இலனே; நச்சிக்
	காணிய சென்ற இரவல் மாக்கள்
	களிறொடு நெடுந் தேர் வேண்டினும், கடவ;
5	உப்பு ஒய் சாகாட்டு உமணர் காட்ட
	கழி முரி குன்றத்து அற்றே,
	எள் அமைவு இன்று, அவன் உள்ளிய பொருளே.

314

	மனைக்கு விளக்கு ஆகிய வாணுதல் கணவன்,
	முனைக்கு வரம்பு ஆகிய வென் வேல் நெடுந் தகை,
	நடுகல் பிறங்கிய உவல் இடு பறந்தலை,
	புன் காழ் நெல்லி வன் புலச் சீறூர்க்
5	குடியும் மன்னும் தானே; கொடி எடுத்து
	நிறை அழிந்து எழுதரு தானைக்குச்
	சிறையும் தானே தன் இறை விழுமுறினே.

315

	உடையன்ஆயின் உண்ணவும் வல்லன்;
	கடவர் மீதும் இரப்போர்க்கு ஈயும்;
	மடவர் மகிழ் துணை; நெடு மான் அஞ்சி
	இல் இறைச் செரீஇய ஞெலிகோல் போல,
5	தோன்றாது இருக்கவும் வல்லன்; மற்றதன்
	கான்று படு கனை எரி போல,
	தோன்றவும் வல்லன் தான் தோன்றுங்காலே.

316

	கள்ளின் வாழ்த்தி, கள்ளின் வாழ்த்தி,
	காட்டொடு மிடைந்த சீயா முன்றில்,
	நாட் செருக்கு அனந்தர்த் துஞ்சுவோனே.
	அவன் எம் இறைவன்; யாம் அவன் பாணர்;
5	நெருநை வந்த விருந்திற்கு மற்றுத் தன்
	இரும் புடைப் பழ வாள் வைத்தனன்; இன்று இக்
	கருங் கோட்டுச் சீறியாழ் பணையம்; இது கொண்டு
	ஈவதிலாளன் என்னாது, நீயும்,
	வள்ளி மருங்குல் வயங்கு இழை அணிய,
10	கள்ளுடைக் கலத்தேம் யாம் மகிழ் தூங்க,
	சென்று வாய் சிவந்து மேல் வருக
	சிறு கண் யானை வேந்து விழுமுறவே.

317

	வென் வேல் ................................. நது
	முன்றில் கிடந்த பெருங் களியாற்கு
	அதள் உண்டாயினும், பாய் உண்டாயினும்,
	யாது உண்டாயினும், கொடுமின் வல்லே;
5	வேட்கை மீளப
	..................கும், எமக்கும், பிறர்க்கும்,
	யார்க்கும், ஈய்ந்து, துயில் ஏற்பினனே.

318

	கொய் அடகு வாட, தரு விறகு உணங்க,
	மயில்அம் சாயல் மாஅயோளொடு
	பசித்தன்று அம்ம, பெருந்தகை ஊரே
	மனை உறை குரீஇக் கறை அணல் சேவல்,
5	பாணர் நரம்பின் சுகிரொடு, வய மான்
	குரல் செய் பீலியின் இழைத்த குடம்பை,
	பெருஞ் செய் நெல்லின் அரிசி ஆர்ந்து, தன்
	புன் புறப் பெடையொடு வதியும்
	யாணர்த்து ஆகும் வேந்து விழுமுறினே.

319

	பூவல் படுவில் கூவல் தோண்டிய
	செங் கண் சில் நீர் பெய்த சீறில்
	முன்றில் இருந்த முது வாய்ச் சாடி
	யாம் கஃடு உண்டென, வறிது மாசு இன்று;
5	படலை முன்றில் சிறு தினை உணங்கல்
	புறவும் இதலும் அறவும் உண்கெனப்
	பெய்தற்கு எல்லின்று பொழுதே; அதனான்,
	முயல் சுட்ட ஆயினும் தருகுவேம்; புகுதந்து
	ஈங்கு இருந்தீமோ, முது வாய்ப் பாண!
10	கொடுங் கோட்டு ஆமான் நடுங்கு தலைக் குழவி
	புன் தலைச் சிறாஅர் கன்று எனப் பூட்டும்
	சீறூர் மன்னன் நெருநை ஞாங்கர்,
	வேந்து விடு தொழிலொடு சென்றனன்; வந்து, நின்
	பாடினி மாலை அணிய,
15	வாடாத் தாமரை சூட்டுவன் நினக்கே.

320

	முன்றில் முஞ்ஞையொடு முசுண்டை பம்பி,
	பந்தர் வேண்டாப் பலா தூங்கு நீழல்,
	கைம்மான் வேட்டுவன் கனை துயில் மடிந்தென,
	பார்வை மடப் பிணை தழீஇ, பிறிது ஓர்
5	தீர் தொழில் தனிக் கலை திளைத்து விளையாட,
	இன்புறு புணர்நிலை கண்ட மனையோள்
	கணவன் எழுதலும் அஞ்சி, கலையே
	பிணைவயின் தீர்தலும் அஞ்சி, யாவதும்,
	இல் வழங்காமையின், கல்லென ஒலித்து,
10	மான் அதள் பெய்த உணங்கு தினை வல்சி
	கானக் கோழியோடு இதல் கவர்ந்து உண்டென,
	ஆர நெருப்பின், ஆரல் நாற,
	தடிவு ஆர்ந்திட்ட முழு வள்ளூரம்
	இரும் பேர் ஒக்கலொடு ஒருங்கு இனிது அருந்தி,
15	தங்கினை சென்மோ, பாண! தங்காது,
	வேந்து தரு விழுக் கூழ் பரிசிலர்க்கு என்றும்
	அருகாது ஈயும் வண்மை
	உரைசால் நெடுந் தகை ஓம்பும் ஊரே.

321

	பொறிப் புறப் பூழின் போர் வல் சேவல்
	மேந் தோல் களைந்த தீம் கோள் வெள் எள்
	சுளகிடை உணங்கல் செவ்வி கொண்டு, உடன்
	வேனில் கோங்கின் பூம் பொகுட்டு அன்ன
5	குடந்தை அம் செவிய கோட்டு எலி ஆட்ட,
	கலி ஆர் வரகின் பிறங்கு பீள் ஒளிக்கும்,
	வன் புல வைப்பினதுவே சென்று
	தின் பழம் பசீஇ ..........னனோ, பாண!
	வாள் வடு விளங்கிய சென்னிச்
10	செரு வெங் குருசில் ஓம்பும் ஊரே.

322

	உழுது ஊர் காளை ஊழ் கோடு அன்ன
	கவை முள் கள்ளிப் பொரி அரைப் பொருந்தி,
	புது வரகு அரிகால் கருப்பை பார்க்கும்
	புன் தலைச் சிறாஅர் வில் எடுத்து ஆர்ப்பின்,
5	பெருங் கண் குறு முயல் கருங் கலன் உடைய
	மன்றில் பாயும் வன் புலத்ததுவே
	கரும்பின் எந்திரம் சிலைப்பின், அயலது.
	இருஞ் சுவல் வாளை பிறழும் ஆங்கண்,
	தண் பணை ஆளும் வேந்தர்க்குக்
10	கண் படை ஈயா வேலோன் ஊரே.

324

	வெருக்கு விடை அன்ன வெகுள் நோக்குக் கயந் தலை,
	புள் ஊன் தின்ற புலவு நாறு கய வாய்,
	வெள் வாய் வேட்டுவர் வீழ் துணை மகாஅர்
	சிறியிலை உடையின் சுரையுடை வால் முள்
5	ஊக நுண் கோல் செறித்த அம்பின்,
	வலாஅர் வல்வில் குலாவரக் கோலி,
	பருத்தி வேலிக் கருப்பை பார்க்கும்
	புன் புலம் தழீஇய அம் குடிச் சீறூர்,
	குமிழ் உண் வெள்ளை பகு வாய் பெயர்த்த
10	வெண் காழ் தாய வண் கால் பந்தர்,
	இடையன் பொத்திய சிறு தீ விளக்கத்து,
	பாணரொடு இருந்த நாணுடை நெடுந்தகை
	வலம் படு தானை வேந்தர்க்கு
	உலந்துழி உலக்கும் நெஞ்சு அறி துணையே.

325

	களிறு நீறு ஆடிய விடு நில மருங்கின்,
	வம்பப் பெரும் பெயல் வரைந்து சொரிந்து இறந்தென,
	குழி கொள் சில் நீர் குராஅல் உண்டலின்,
	சேறு கிளைத்திட்ட கலுழ் கண் ஊறல்
5	முறையின் உண்ணும் நிறையா வாழ்க்கை,
	முளவு மாத் தொலைச்சிய முழுச்சொல் ஆடவர்
	உடும்பு இழுது அறுத்த ஒடுங் காழ்ப் படலைச்
	சீறில் முன்றில் கூறுசெய்திடுமார்,
	கொள்ளி வைத்த கொழு நிண நாற்றம்
10	மறுகுடன் கமழும் மதுகை மன்றத்து,
	அலந்தலை இரத்தி அலங்குபடு நீழல்,
	கயந் தலைச் சிறாஅர் கணை விளையாடும்
	அரு மிளை இருக்கையதுவே வென் வேல்
	வேந்து தலைவரினும் தாங்கும்,
15	தாங்கா ஈகை, நெடுந்தகை ஊரே.

326

	ஊர் முது வேலிப் பார் நடை வெருகின்
	இருள் பகை வெரீஇய நாகு இளம் பேடை
	உயிர் நடுக்குற்றுப் புலா விட்டு அரற்ற,
	சிறையும் செற்றையும் புடையுநள் எழுந்த
5	பருத்திப் பெண்டின் சிறு தீ விளக்கத்து,
	கவிர்ப் பூ நெற்றிச் சேவலின் தணியும்
	அரு மிளை இருக்கையதுவே மனைவியும்,
	வேட்டச் சிறாஅர் சேண் புலம் படராது,
	படப்பைக் கொண்ட குறுந் தாள் உடும்பின்
10	விழுக்கு நிணம் பெய்த தயிர்க் கண் விதவை,
	யாணர் நல்லவை பாணரொடு, ஒராங்கு
	வரு விருந்து அயரும் விருப்பினள்; கிழவனும்,
	அருஞ் சமம் ததையத் தாக்கி, பெருஞ் சமத்து
	அண்ணல் யானை அணிந்த
15	பொன் செய் ஓடைப் பெரும் பரிசிலனே.

327

	எருது கால் உறாஅது, இளைஞர் கொன்ற
	சில் விளை வரகின் புல்லென் குப்பை,
	தொடுத்த கடவர்க்குக் கொடுத்த மிச்சில்
	பசித்த பாணர் உண்டு, கடை தப்பலின்,
5	ஒக்கல் ஒற்கம் சொலிய, தன் ஊர்ச்
	சிறு புல்லாளர் முகத்து அவை கூறி,
	வரகு கடன் இரக்கும் நெடுந் தகை
	அரசு வரின் தாங்கும் வல்லாளன்னே.

328

	..........டை முதல் புறவு சேர்ந்திருந்த
	புன் புலச் சீறூர், நெல் விளையாதே;
	வரகும் தினையும் உள்ளவை எல்லாம்
	இரவல் மாக்களுக்கு ஈயத் தொலைந்தன;
5	................. டு அமைந்தனனே;
	அன்னன் ஆயினும், பாண! நன்றும்
	வெள்ளத்திடும் பாலுள் உறை தொட....
	களவுப் புளி அன்ன விளை....
	..............வாடு ஊன் கொழுங் குறை
10	கொய் குரல் அரிசியொடு நெய் பெய்து அட்டு,
	துடுப்பொடு சிவணிய களிக் கொள் வெண் சோறு
	உண்டு, இனிது இருந்த பின்
	... ... ... ... .... ... தருகுவன் மாதோ
	தாளி முதல் நீடிய சிறு நறு முஞ்ஞை
15	முயல் வந்து கறிக்கும் முன்றில்,
	சீறூர் மன்னனைப் பாடினை செலினே.

329

	இல் அடு கள்ளின் சில் குடிச் சீறூர்ப்
	புடை நடு கல்லின் நாட் பலி ஊட்டி,
	நல் நீராட்டி, நெய்ந் நறைக் கொளீஇய,
	மங்குல் மாப் புகை மறுகுடன் கமழும்,
5	அரு முனை இருக்கைத்துஆயினும், வரி மிடற்று
	அரவு உறை புற்றத்து அற்றே நாளும்
	புரவலர் புன்கண் நோக்காது, இரவலர்க்கு
	அருகாது ஈயும் வண்மை,
	உரைசால், நெடுந்தகை ஓம்பும் ஊரே.

330

	வேந்துடைத் தானை முனை கெட நெரிதர,
	ஏந்து வாள் வலத்தன் ஒருவன் ஆகி,
	தன் இறந்து வாராமை விலக்கலின், பெருங் கடற்கு
	ஆழி அனையன்மாதோ என்றும்
5	பாடிச் சென்றோர்க்கு அன்றியும், வாரிப்
	புரவிற்கு ஆற்றாச் சீறூர்த்
	தொன்மை சுட்டிய வண்மையோனே.

331

	கல் அறுத்து இயற்றிய வல் உவர்க் கூவல்,
	வில் ஏர் வாழ்க்கை, சீறூர் மதவலி
	நனி நல்கூர்ந்தனன்ஆயினும், பனி மிக,
	புல்லென் மாலைச் சிறு தீ ஞெலியும்
5	கல்லா இடையன் போல, குறிப்பின்
	இல்லது படைக்கவும் வல்லன்; உள்ளது
	தவச் சிறிது ஆயினும் மிகப் பலர் என்னாள்,
	நீள் நெடும் பந்தர் ஊண் முறை ஊட்டும்
	இல் பொலி மகடூஉப் போல, சிற் சில
10	வரிசையின் அளிக்கவும் வல்லன்; உரிதினின்
	காவல் மன்னர் கடைமுகத்து உகுக்கும்
	போகு பலி வெண் சோறு போலத்
	தூவவும் வல்லன், அவன் தூவுங்காலே.

332

	பிறர் வேல் போலாதாகி, இவ் ஊர்
	மறவன் வேலோ பெருந் தகை உடைத்தே;
	இரும் புறம் நீறும் ஆடி, கலந்து இடைக்
	குரம்பைக் கூரைக் கிடக்கினும் கிடக்கும்;
5	மங்கல மகளிரொடு மாலை சூட்டி,
	இன் குரல் இரும் பை யாழொடு ததும்ப,
	தெண் நீர்ப் படுவினும் தெருவினும் திரிந்து,
	மண் முழுது அழுங்கச் செல்லினும் செல்லும்; ஆங்கு,
	இருங் கடல் தானை வேந்தர்
10	பெருங் களிற்று முகத்தினும் செலவு ஆனாதே.

333

	நீருள் பட்ட மாரிப் பேர் உறை
	மொக்குள் அன்ன பொகுட்டு விழிக் கண்ண,
	கரும் பிடர்த் தலைய, பெருஞ் செவிக் குறு முயல்
	உள் ஊர்க் குறும் புதல் துள்ளுவன உகளும்
5	தொள்ளை மன்றத்து ஆங்கண் படரின்,
	'உண்க' என உணரா உயவிற்று ஆயினும்,
	தங்கினிர் சென்மோ, புலவிர்! நன்றும்;
	சென்றதற் கொண்டு, மனையோள் விரும்பி,
	வரகும் தினையும் உள்ளவை எல்லாம்
10	இரவல் மாக்கள் உணக்கொளத் தீர்ந்தென,
	குறித்து மாறு எதிர்ப்பை பெறாஅமையின்,
	குரல் உணங்கு விதைத் தினை உரல் வாய்ப் பெய்து,
	சிறிது புறப்பட்டன்றோ இலளே; தன் ஊர்
	வேட்டக் குடிதொறும் கூட்டு
15	.............................................. உடும்பு செய்
	பாணி நெடுந் தேர் வல்லரோடு ஊரா,
	வம்பு அணி யானை வேந்து தலைவரினும்,
	உண்பது மன்னும் அதுவே;
	பரிசில் மன்னும், குருசில் கொண்டதுவே.