24

	நெல் அரியும் இருந் தொழுவர்
	செஞ் ஞாயிற்று வெயில் முனையின்,
	தெண் கடல் திரை மிசைப் பாயுந்து;
	திண் திமில் வன் பரதவர்
5	வெப்பு உடைய மட்டு உண்டு,
	தண் குரவைச் சீர் தூங்குந்து;
	தூவல் கலித்த தேம் பாய் புன்னை
	மெல் இணர்க் கண்ணி மிலைந்த மைந்தர்
	எல் வளை மகளிர்த் தலைக் கை தரூஉந்து;
10	வண்டு பட மலர்ந்த தண் நறுங் கானல்
	முண்டகக் கோதை ஒண் தொடி மகளிர்
	இரும் பனையின் குரும்பை நீரும்,
	பூங் கரும்பின் தீம் சாறும்,
	ஓங்கு மணல் குவவுத் தாழைத்
15	தீம் நீரொடு உடன் விராஅய்,
	முந் நீர் உண்டு முந்நீர்ப் பாயும்;
	தாங்கா உறையுள் நல் ஊர் கெழீஇய
	ஓம்பா ஈகை மா வேள் எவ்வி
	புனல் அம் புதவின் மிழலையொடு கழனிக்
20	கயல் ஆர் நாரை போர்வில் சேக்கும்,
	பொன் அணி யானைத் தொல் முதிர் வேளிர்,
	குப்பை நெல்லின், முத்தூறு தந்த
	கொற்ற நீள் குடை, கொடித் தேர்ச் செழிய!
	நின்று நிலைஇயர் நின் நாள்மீன்; நில்லாது
25	படாஅச் செலீஇயர், நின் பகைவர் மீனே
	நின்னொடு, தொன்று மூத்த உயிரினும், உயிரொடு
	நின்று மூத்த யாக்கை அன்ன, நின்
	ஆடு குடி மூத்த விழுத் திணைச் சிறந்த
	வாளின் வாழ்நர் தாள் வலம் வாழ்த்த,
30	இரவல் மாக்கள் ஈகை நுவல,
	ஒண் தொடி மகளிர் பொலங்கலத்து ஏந்திய
	தண் கமழ் தேறல் மடுப்ப, மகிழ் சிறந்து,
	ஆங்கு இனிது ஒழுகுமதி, பெரும! 'ஆங்கு அது
	வல்லுநர் வாழ்ந்தோர்' என்ப தொல் இசை,
35	மலர் தலை உலகத்துத் தோன்றி,
	பலர், செலச் செல்லாது, நின்று விளிந்தோரே.

35

	நளி இரு முந்நீர் ஏணி ஆக,
	வளி இடை வழங்கா வானம் சூடிய
	மண் திணி கிடக்கைத் தண் தமிழ்க் கிழவர்,
	முரசு முழங்கு தானை மூவருள்ளும்,
5	அரசு எனப்படுவது நினதே, பெரும!
	அலங்குகதிர்க் கனலி நால்வயின் தோன்றினும்,
	இலங்குகதிர் வெள்ளி தென் புலம் படரினும்,
	அம் தண் காவிரி வந்து கவர்பு ஊட்ட,
	தோடு கொள் வேலின் தோற்றம் போல,
10	ஆடு கண் கரும்பின் வெண் பூ நுடங்கும்
	நாடு எனப்படுவது நினதே அத்தை; ஆங்க
	நாடு கெழு செல்வத்துப் பீடு கெழு வேந்தே!
	நினவ கூறுவல்; எனவ கேண்மதி!
	அறம் புரிந்தன்ன செங்கோல் நாட்டத்து
15	முறை வேண்டு பொழுதில் பதன் எளியோர் ஈண்டு
	உறை வேண்டு பொழுதில் பெயல் பெற்றோரே;
	ஞாயிறு சுமந்த கோடு திரள் கொண்மூ
	மாக விசும்பின் நடுவு நின்றாங்கு,
	கண் பொர விளங்கு நின் விண் பொரு வியன்குடை
20	வெயில் மறைக் கொண்டன்றோ? அன்றே; வருந்திய
	குடி மறைப்பதுவே; கூர்வேல் வளவ!
	வெளிற்றுப் பனந் துணியின் வீற்றுவீற்றுக் கிடப்ப,
	களிற்றுக் கணம் பொருத கண் அகன் பறந்தலை,
	வருபடை தாங்கி, பெயர் புறத்து ஆர்த்து,
25	பொருபடை தரூஉம் கொற்றமும் உழுபடை
	ஊன்று சால் மருங்கின் ஈன்றதன் பயனே;
	மாரி பொய்ப்பினும், வாரி குன்றினும்,
	இயற்கை அல்லன செயற்கையில் தோன்றினும்,
	காவலர்ப் பழிக்கும், இக் கண் அகல் ஞாலம்;
30	அது நற்கு அறிந்தனைஆயின், நீயும்
	நொதுமலாளர் பொதுமொழி கொள்ளாது,
	பகடு புறந்தருநர் பாரம் ஓம்பி,
	குடி புறந்தருகுவை ஆயின், நின்
	அடி புறந்தருகுவர், அடங்காதோரே.

45

	இரும் பனை வெண் தோடு மலைந்தோன்அல்லன்;
	கருஞ் சினை வேம்பின் தெரியலோன்அல்லன்;
	நின்ன கண்ணியும் ஆர் மிடைந்தன்றே; நின்னொடு
	பொருவோன் கண்ணியும் ஆர் மிடைந்தன்றே;
5	ஒருவீர் தோற்பினும், தோற்ப நும் குடியே;
	இருவீர் வேறல் இயற்கையும் அன்றே; அதனால்,
	குடிப்பொருள் அன்று, நும் செய்தி; கொடித் தேர்
	நும் ஓர்அன்ன வேந்தர்க்கு
	மெய்ம் மலி உவகை செய்யும்; இவ் இகலே.

56

	ஏற்று வலன் உயரிய எரி மருள் அவிர் சடை,
	மாற்று அருங் கணிச்சி, மணி மிடற்றோனும்;
	கடல் வளர் புரி வளை புரையும் மேனி,
	அடல் வெந் நாஞ்சில், பனைக் கொடியோனும்;
5	மண்ணுறு திரு மணி புரையும் மேனி,
	விண் உயர் புள் கொடி, விறல் வெய்யோனும்,
	மணி மயில் உயரிய மாறா வென்றி,
	பிணிமுக ஊர்தி, ஒண் செய்யோனும் என
	ஞாலம் காக்கும் கால முன்பின்,
10	தோலா நல் இசை, நால்வருள்ளும்,
	கூற்று ஒத்தீயே, மாற்று அருஞ் சீற்றம்;
	வலி ஒத்தீயே, வாலியோனை;
	புகழ் ஒத்தீயே, இகழுநர் அடுநனை;
	முருகு ஒத்தீயே, முன்னியது முடித்தலின்;
15	ஆங்கு ஆங்கு அவர் அவர் ஒத்தலின், யாங்கும்
	அரியவும் உளவோ, நினக்கே? அதனால்,
	இரவலர்க்கு அருங் கலம் அருகாது ஈயா,
	யவனர் நன் கலம் தந்த தண் கமழ் தேறல்
	பொன் செய் புனை கலத்து ஏந்தி, நாளும்
20	ஒண் தொடி மகளிர் மடுப்ப, மகிழ் சிறந்து,
	ஆங்கு இனிது ஒழுகுமதி! ஓங்கு வாள் மாற!
	அம் கண் விசும்பின் ஆர் இருள் அகற்றும்
	வெங் கதிர்ச் செல்வன் போலவும், குட திசைத்
	தண் கதிர் மதியம் போலவும்,
25	நின்று நிலைஇயர், உலகமோடு உடனே!

58

	நீயே, தண் புனல் காவிரிக் கிழவனை; இவனே,
	முழு முதல் தொலைந்த கோளி ஆலத்துக்
	கொழு நிழல் நெடுஞ் சினை வீழ் பொறுத்தாங்கு,
	தொல்லோர் மாய்ந்தெனத் துளங்கல் செல்லாது,
5	நல் இசை முது குடி நடுக்கு அறத் தழீஇ,
	இளையது ஆயினும் கிளை அரா எறியும்
	அருநரை உருமின், பொருநரைப் பொறாஅச்
	செரு மாண் பஞ்சவர் ஏறே; நீயே,
	அறம் துஞ்சு உறந்தைப் பொருநனை; இவனே,
10	நெல்லும் நீரும் எல்லார்க்கும் எளிய என,
	வரைய சாந்தமும், திரைய முத்தமும்,
	இமிழ் குரல் முரசம் மூன்றுடன் ஆளும்
	தமிழ் கெழு கூடல் தண் கோல் வேந்தே;
	பால் நிற உருவின் பனைக் கொடியோனும்,
15	நீல் நிற உருவின் நேமியோனும், என்று
	இரு பெருந் தெய்வமும் உடன் நின்றாஅங்கு,
	உரு கெழு தோற்றமொடு உட்குவர விளங்கி,
	இன்னீர் ஆகலின், இனியவும் உளவோ?
	இன்னும் கேண்மின்: நும் இசை வாழியவே;
20	ஒருவீர் ஒருவீர்க்கு ஆற்றுதிர்; இருவீரும்
	உடன் நிலை திரியீர்ஆயின், இமிழ்திரைப்
	பௌவம் உடுத்த இப் பயம் கெழு மா நிலம்
	கையகப்படுவது பொய் ஆகாதே;
	அதனால், நல்ல போலவும், நயவ போலவும்,
25	தொல்லோர் சென்ற நெறிய போலவும்,
	காதல் நெஞ்சின் நும் இடை புகற்கு அலமரும்
	ஏதில் மாக்கள் பொதுமொழி கொள்ளாது,
	இன்றே போல்க, நும் புணர்ச்சி; வென்று வென்று
	அடு களத்து உயர்க, நும் வேலே; கொடுவரிக்
30	கோள்மாக் குயின்ற சேண் விளங்கு தொடு பொறி
	நெடு நீர்க் கெண்டையொடு பொறித்த
	குடுமிய ஆக, பிறர் குன்று கெழு நாடே.

61

	கொண்டைக் கூழைத் தண் தழைக் கடைசியர்
	சிறு மாண் நெய்தல் ஆம்பலொடு கட்கும்,
	மலங்கு மிளிர், செறுவின் தளம்பு தடிந்து இட்ட
	பழன வாளைப் பரூஉக் கண் துணியல்
5	புது நெல் வெண் சோற்றுக் கண்ணுறை ஆக, விலாப் புடை மருங்கு விசிப்ப மாந்தி,
	நீடு கதிர்க் கழனிச் சூடு தடுமாறும்
	வன் கை வினைஞர் புன் தலைச் சிறாஅர்
	தெங்கு படு வியன் பழம் முனையின், தந்தையர்
10	குறைக்கண் நெடும் போர் ஏறி, விசைத்து எழுந்து
	செழுங் கோள் பெண்ணைப் பழம் தொட முயலும்,
	வைகல் யாணர், நல் நாட்டுப் பொருநன்,
	எஃகு விளங்கு தடக் கை இயல் தேர்ச் சென்னி,
	சிலைத் தார் அகலம் மலைக்குநர் உளர்எனின்,
15	தாம் அறிகுவர் தமக்கு உறுதி; யாம் அவன்
	எழு உறழ் திணி தோள் வழு இன்று மலைந்தோர்
	வாழக் கண்டன்றும் இலமே; தாழாது,
	திருந்து அடி பொருந்த வல்லோர்
	வருந்தக் காண்டல், அதனினும் இலமே.

85

	என்னைக்கு ஊர் இஃது அன்மையானும்,
	என்னைக்கு நாடு இஃது அன்மையானும்,
	'ஆடு ஆடு' என்ப, ஒரு சாரோரே;
	'ஆடு அன்று' என்ப, ஒரு சாரோரே;
5	நல்ல, பல்லோர் இரு நன் மொழியே;
	அம் சிலம்பு ஒலிப்ப ஓடி, எம் இல்,
	முழாஅரைப் போந்தை பொருந்தி நின்று,
	யான் கண்டனன், அவன் ஆடு ஆகுதலே.

99

	அமரர்ப் பேணியும், ஆவுதி அருத்தியும்,
	அரும் பெறல் மரபின் கரும்பு இவண் தந்தும்,
	நீர் அக இருக்கை ஆழி சூட்டிய
	தொல் நிலை மரபின் நின் முன்னோர் போல,
5	ஈகை அம் கழல் கால், இரும் பனம் புடையல்,
	பூ ஆர் காவின், புனிற்றுப் புலால் நெடு வேல்,
	எழு பொறி நாட்டத்து எழாஅத் தாயம்
	வழு இன்று எய்தியும் அமையாய், செரு வேட்டு,
	இமிழ் குரல் முரசின் எழுவரொடு முரணிச்
10	சென்று, அமர் கடந்து, நின் ஆற்றல் தோற்றிய
	அன்றும், பாடுநர்க்கு அரியை; இன்றும்
	பரணன் பாடினன் மற்கொல் மற்று நீ
	முரண் மிகு கோவலூர் நூறி, நின்
	அரண் அடு திகிரி ஏந்திய தோளே!

229

	ஆடு இயல் அழல் குட்டத்து
	ஆர் இருள் அரை இரவில்,
	முடப் பனையத்து வேர் முதலாக்
	கடைக் குளத்துக் கயம் காய,
5	பங்குனி உயர் அழுவத்து,
	தலை நாள்மீன் நிலை திரிய,
	நிலை நாள்மீன் அதன் எதிர் ஏர்தர,
	தொல் நாள்மீன் துறை படிய,
	பாசிச் செல்லாது, ஊசித் துன்னாது,
10	அளக்கர்த் திணை விளக்காகக்
	கனை எரி பரப்ப, கால் எதிர்பு பொங்கி,
	ஒரு மீன் வீழ்ந்தன்றால், விசும்பினானே;
	அது கண்டு, யாமும் பிறரும் பல் வேறு இரவலர்,
	'பறை இசை அருவி நல் நாட்டுப் பொருநன்
15	நோய் இலனாயின் நன்றுமன் தில்' என
	அழிந்த நெஞ்சம் மடிஉளம் பரப்ப,
	அஞ்சினம்; எழு நாள் வந்தன்று, இன்றே;
	மைந்துடை யானை கை வைத்து உறங்கவும்,
	திண் பிணி முரசம் கண் கிழிந்து உருளவும்,
20	காவல் வெண்குடை கால் பரிந்து உலறவும்,
	கால் இயல் கலி மாக் கதி இல வைகவும்,
	மேலோர் உலகம் எய்தினன்; ஆகலின்,
	ஒண் தொடி மகளிர்க்கு உறு துணை ஆகி,
	தன் துணை ஆயம் மறந்தனன்கொல்லோ
25	பகைவர்ப் பிணிக்கும் ஆற்றல், நசைவர்க்கு
	அளந்து கொடை அறியா ஈகை,
	மணி வரை அன்ன மாஅயோனே?

249

	கதிர் மூக்கு ஆரல் கீழ் சேற்று ஒளிப்ப,
	கணைக் கோட்டு வாளை மீநீர்ப் பிறழ,
	எரிப் பூம் பழனம் நெரித்து உடன் வலைஞர்
	அரிக் குரல் தடாரியின் யாமை மிளிர,
5	பனை நுகும்பு அன்ன சினை முதிர் வராலொடு,
	உறழ் வேல் அன்ன ஒண் கயல் முகக்கும்,
	அகல் நாட்டு அண்ணல் புகாவே, நெருநைப்
	பகல் இடம் கண்ணிப் பலரொடும் கூடி,
	ஒருவழிப்பட்டன்று; மன்னே! இன்றே,
10	அடங்கிய கற்பின், ஆய் நுதல் மடந்தை,
	உயர் நிலை உலகம் அவன் புக,.... வரி
	நீறு ஆடு சுளகின் சீறிடம் நீக்கி,
	அழுதல் ஆனாக் கண்ணள்,
	மெழுகும், ஆப்பி கண் கலுழ் நீரானே.

265

	ஊர் நனி இறந்த பார் முதிர் பறந்தலை,
	ஓங்கு நிலை வேங்கை ஒள் இணர் நறு வீப்
	போந்தை அம் தோட்டின் புனைந்தனர் தொடுத்து,
	பல் ஆன் கோவலர் படலை சூட்ட,
5	கல் ஆயினையே கடு மான் தோன்றல்!
	வான் ஏறு புரையும் நின் தாள் நிழல் வாழ்க்கைப்
	பரிசிலர் செல்வம் அன்றியும், விரி தார்க்
	கடும் பகட்டு யானை வேந்தர்
	ஒடுங்கா வென்றியும், நின்னொடு செலவே.

297

	பெரு நீர் மேவல் தண்ணடை எருமை
	இரு மருப்பு உறழும் நெடு மாண் நெற்றின்
	பைம் பயறு உதிர்த்த கோதின் கோல் அணை,
	கன்றுடை மரை ஆத் துஞ்சும் சீறூர்க்
5	கோள் இவண் வேண்டேம், புரவே; நார் அரி
	நனை முதிர் சாடி நறவின் வாழ்த்தி,
	துறை நனி கெழீஇக் கம்புள் ஈனும்
	தண்ணடை பெறுதலும் உரித்தே வைந் நுதி
	நெடு வேல் பாய்ந்த மார்பின்,
10	மடல் வன் போந்தையின், நிற்குமோர்க்கே.

340

	அணித் தழை நுடங்க ஓடி, மணிப் பொறிக்
	குரல் அம் குன்றி கொள்ளும் இளையோள்,
	மா மகள்
	....................... ல் என வினவுதி, கேள், நீ:
5	எடுப்பவெ...,..................................................
	..........................மைந்தர் தந்தை
	இரும் பனை அன்ன பெருங் கை யானை
	கரந்தை அம் செறுவின் பெயர்க்கும்
	பெருந் தகை மன்னர்க்கு வரைந்திருந்தனனே.

375

	அலங்கு கதிர் சுமந்த கலங்கற் சூழி,
	நிலைதளர்வு தொலைந்த ஒல்கு நிலைப் பல் காற்
	பொதியில் ஒரு சிறை பள்ளி ஆக,
	முழாஅரைப் போந்தை அர வாய் மா மடல்
5	நாரும் போழும் கிணையொடு சுருக்கி,
	ஏரின் வாழ்நர் குடிமுறை புகாஅ,
	'ஊழ் இரந்து உண்ணும் உயவல் வாழ்வைப்
	புரவு எதிர்ந்து கொள்ளும் சான்றோர் யார்?' எனப்
	பிரசம் தூங்கும் அறாஅ யாணர்,
10	வரை அணி படப்பை, நல் நாட்டுப் பொருந!
	பொய்யா ஈகைக் கழல் தொடி ஆஅய்!
	யாவரும் இன்மையின் கிணைப்ப, தாவது,
	பெரு மழை கடல் பரந்தாஅங்கு, யானும்
	ஒரு நின் உள்ளி வந்தனென்; அதனால்
15	புலவர் புக்கில் ஆகி, நிலவரை
	நிலீஇயர் அத்தை, நீயே! ஒன்றே
	நின் இன்று வறுவிது ஆகிய உலகத்து,
	நிலவன்மாரோ, புரவலர்! துன்னி,
	பெரிய ஓதினும் சிறிய உணராப்
20	பீடு இன்று பெருகிய திருவின்,
	பாடு இல், மன்னரைப் பாடன்மார், எமரே!