எமலோகம் போனதென்ன?

தன் பெண்ணை மிகவும் அன்புடன் பேணி வளர்த்தார் தந்தை. தன்னுடன் வெளியில் அழைத்துச் செல்வார்.அவள் முகம் வாடுவதற்குச் சம்மதிக்கமாட்டார். காற்று சற்று பலமாக அடித்தால்கூட அதனால் மகளுக்கு உடல் நலம் குறைந்து விடக் கூடாதென்று காற்றடிக்காமல் தான் மகளை மறைத்து நின்று கொள்வார். அவ்வளவு அன்பான தந்தை இறந்தவுடன் மகள் உணர்ச்சி மேலிட்டுத் தன்னை அவர் அன்போடு பாதுகாத்து வளர்த்ததை வாய்விட்டுச் சொல்லி பொருமி அழுகிறாள்.

பத்தடிக் கொட்டாயி
பவளக்கால் மேல் தூலம்
பசுங் காத்தடிக்கி திண்ணும்
என்ன பெத்த எப்பா
பக்கமாக நிறுத்தனையே
பத்தடுக்கு மெத்தை மேலே
படிக்கிறதா எண்ணியிருந்தேன்-நீங்க
படிக்க முடியாம
பரலோகம் போன தென்ன
எட்டடுக்கு மெத்தை யிலே
எழுதறா எண்ணியிருந்தேன்
எழுத முடியாம-நீங்க
எமலோகம் போன தென்ன

வட்டார வழக்கு:கொட்டாயி-கொட்டகை