20. marutam

	aiya! kuRumakaT kaNTikum: vaiki,
	makizn'an mArpil tujci, aviz iNart
	tEm pAy marAam kamazum kUn'tal
	tuLagkuiyal acaivara, kaligkam tuyalvara,
5	ceRitoTi teLirppa vIci, maRukil,
	pUp pOl uNkaN peyarppa n'Okki,
	cenRanaL-vAziya, maTan'tai!-n'uN pal
	cuNagku aNivuRRa viLagku pUNaL;
	mArpuRu muyakkiTai jemirn'ta cOr kuzai,
10	pazam piNi vaikiya tOL iNaik
	kuzain'ta kOtai, koTi muyagkalaLE.

30. marutam

	kaNTanen-makizn'a!-kaNTu evanceykO?-
	pANan kaiyatu paNpuTaic cIRiyAz
	yANar vaNTin immena imirum,
	Ertaru teruvin, etircci n'Okki, n'in
5	mArpu talaikkoNTa mANizai makaLir
	kaval EmuRRa veytu vIz arip pani-
	kAl EmuRRa paitaru kAlai,
	kaTalmaram kavizn'tenak kalagki, uTan vIzpu,
	palar koL palakai pOla-
10	vAgkavAgka n'inRu Ugku ajar n'ilaiyE.

40. marutam

	n'eTu n'A oL maNi kaTi manai iraTTa,
	kurai ilaip pOkiya viravu maNaR pan'tar,
	perumpAN kAval pUNTena, oru cAr,
	tirun'tuizai makaLir viricci n'iRpa,
5	veRi uRa virin'ta aRuvai mel aNaip
	puniRu n'ARu ceviliyoTu putalvan tujca,
	aiyavi aNin'ta n'eyyATTu IraNip
	pacu n'ey kUrn'ta menmai yAkkaic
	cIrkezu maTan'tai Ir-imai porun'ta,
10	n'aLLen kagkul, kaLvan pOla,
	akan tuRai Uranum van'tanan-
	ciRan'tOn peyaran piRan'tamARE.

50. marutam

	aRiyAmaiyin, annai! ajci,
	kuzaiyan kOtaiyan kuRum pain' toTiyan
	vizavu ayar tuNagkai tazUukam cella,
	n'eTu n'imir teruvil kaipuku koTu miTai
5	n'otumalALan katumenat tAkkalin,
	'kETpOr uLarkol, illaikol? pORRu' ena,
	'yANatu pacalai' enRanan; atan etir,
	'n'AN ilai, eluva!' enRu van'ticinE-
	ceRun'arum vizaiyum cemmalOn ena,
10	n'aRu n'utal arivai! pORREn,
	ciRumai perumaiyin kANAtu tuNin'tE.

60. marutam

	malai kaNTanna n'ilai puNarn'ivappin
	peru n'eR pal kUTTu erumai uzava!
	kaNpaTai peRAatu, taN pular viTiyal,
	karug kaN varAal perun' taTi miLirvaiyoTu
5	pukarvai aricip pommaR peruj cORu
	kavar paTu kaiyai kazuma mAn'ti,
	n'Ir uRu ceRuvin n'ARu muTi azutta, n'in
	n'aTun'aroTu cERiAyin, avaN
	cAyum n'eytalum Ompumati; emmil
10	mA irug kUn'tal maTan'tai
	Ay vaLai kUTTum aNiyumAr avaiyE.

70. marutam

	ciRu veLLAgkurukE! ciRu veLLAgkurukE!
	tuRai pOku aRuvait tU maTi anna
	n'iRam kiLar tUvic ciRu veLLAgkurukE!
	em Ur van'tu, em uNtuRait tuzaii,
5	cinaik keLiRRu Arkaiyai avar Urp peyarti,
	anaiya anpinaiyO, peru maRaviyaiyO-
	AgkaN tIm punal IgkaN parakkum
	kazani n'al Ur makizn'arkku en
	izai n'ekiz paruvaral ceppAtOyE!

80. marutam

	'manRa erumai malar talaik kArAn
	in tIm pARpayam koNmAr, kanRu viTTu,
	Urk kuRumAkkaL mERkoNTu kaziyum
	perum pular viTiyalin virumpip pOttan'tu,
5	tazaiyum tArum tan'tanan, ivan' ena,
	izai aNi AyamoTu taku n'AN taTaii,
	taiit tigkaL taN kayam paTiyum
	perun' tOT kuRumakaL allatu,
	marun'tu piRitu illai, yAn uRRa n'OykkE.

90. marutam

	ATu iyal vizavin azugkal mUtUr,
	uTaiyOr panmaiyin perug kai tUvA,
	vaRan il pulaitti ellit tOytta
	pukAp pukar koNTa pun pUg kaligkamoTu
5	vATA mAlai tuyalvara, OTi,
	perug kayiRu n'Alum irum panam piNaiyal
	pUg kaN Ayam Ukka, UgkAL,
	azutanaL peyarum am cil Oti,
	n'alkUr peNTin, cil vaLaik kuRumakaL
10	Ucal uRu tozil pUcal kUTTA
	n'ayan il mAkkaLoTu kezIi,
	payan inRu amma, iv vEn'tuTai avaiyE!

100. marutam

	uLLutoRum n'akuvEn-tOzi!-vaL ukir
	mArik kokkin kUral anna
	kuNTu n'Ir Ampal taN tuRai Uran
	tEm kamaz aimpAl paRRi, en vayin
5	vAn kOl el vaLai vauviya pUcal
	cinaviya mukattu, 'cinavAtu cenRu, n'in
	manaiyOTku uraippal' enRalin, munai Urp
	pal A n'eTu n'irai villin oyyum
	tEr vaN malaiyan mun'tai, pEr icaip
10	pulam puri vayiriyar n'alam puri muzavin
	maN Ar kaNNin atirum,
	n'annar ALan n'aTugku ajar n'ilaiyE.

120. marutam

	taTa maruppu erumai maTa n'aTaik kuzavi
	tUN toRum yAtta kANtaku n'al il,
	koTug kuzai peyta cezuj cey pEtai
	ciRu tAz ceRitta mel viral cEppa,
5	vALai Irn' taTi vallitin vakaii,
	pukai uNTu amartta kaNNaL, takai peRap
	piRai n'utal poRitta ciRu n'uN pal viyar
	am tukil talaiyil tuTaiyinaL, n'ap pulan'tu,
	aTTilOLE am mA arivai-
10	emakkE varukatil virun'tE! civappAL anRu,
	ciRu muL eyiRu tOnRa
	muRuval koNTa mukam kANkammE.

150. marutam

	n'akai n'anku uTaiyan-pANa!-n'um perumakan:
	'miLai vali citaiyak kaLiRu pala parappi,
	araN pala kaTan'ta muraN koL tAnai
	vazuti, vAziya pala! enat tozutu, INTu
5	man eyil uTaiyOr pOla, aHtu yAm
	ennatum pariyalO ilam' enat taN n'aTaik
	kali mA kaTaii van'tu, em cErit
	tArum kaNNiyum kATTi, orumaiya
	n'ejcam koNTamai viTumO? ajca,
10	kaNNuTaic ciRu kOl paRRik
	katam peritu uTaiyaL, yAy; azugkalO ilaLE.

170. marutam

	maTak kaN, takarak kUn'tal, paNait tOL,
	vArn'ta vAl eyiRRu, cErn'tu ceRi kuRagkin,
	piNaiyal am tazai taii, tuNaiyilaL
	vizavuk kaLam poliya van'tu n'inRanaLE;
5	ezuminO ezumin, em kozun'aR kAkkam;
	Ariyar tuvanRiya pEr icai muLLUr,
	palar uTan kazitta oL vAL malaiyanatu
	oru vERku OTiyAgku, n'am
	panmaiyatu evanO, ivaL vanmai talaippaTinE?

180. marutam

	pazanap pAkal muyiRu mUcu kuTampai
	kazani n'Arai uraittalin, cen'n'el
	viravu veLLariciyin tAam Uran
	palarp peRal n'acaii, n'am il vAralanE;
5	mAyOL, n'alattai n'ampi viTal ollALE
	anniyum periyan; avaninum vizumiya
	iru peru vEn'tar, poru kaLattu ozitta
	punnai vizumam pOla,
	ennoTu kaziyum-iv iruvaratu ikalE.

200. marutam

	kaNNi kaTTiya katira anna
	oN kural n'occit teriyal cUTi,
	yARu kiTan'tanna akal n'eTun' teruvil,
	'cARu' ena n'uvalum mutu vAyk kuyava!
5	Itum AgkaN n'uvanRicin mAtO-
	Ampal amanRa tIm perum pazanattup
	poykai Urkkup pOvOy Aki,
	'kai kavar n'arampin panuvaR pANan
	ceyta allal palkuva-vai eyiRRu,
10	aitu akal alkul makaLir!-ivan
	poy poti koTuj col Ompumin' enavE.

210. marutam

	arikAl mARiya am kaN akal vayal
	maRu kAl uzuta Irac ceRuvin,
	vittoTu cenRa vaTTi paRpala
	mInoTu peyarum yANar Ura!
5	n'eTiya mozitalum kaTiya Urtalum
	celvam anRu; tan cey vinaip payanE;
	cAnROr celvam enpatu, cErn'tOr
	punkaN ajcum paNpin
	men kaT celvam celvam enpatuvE.

216. marutam

	tuni tIr kUTTamoTu tunnAr Ayinum,
	initE, kANun'ark kANpuzi vAztal;
	kaNNuRu vizumam kai pOl utavi,
	n'am uRu tuyaram kaLaiyAr Ayinum,
5	innAtuanRE, avar il UrE;
	eri maruL vEgkaik kaTavuL kAkkum
	kuruku Ar kazaniyin itaNattu AgkaN,
	EtilALan kavalai kavaRRa,
	oru mulai aRutta tirumAvuNNik
10	kETTOr anaiyarAyinum,
	vETTOr allatu, piRar innArE.

230. marutam

	muyap piTic ceviyin anna pAcaTai,
	kayak kaNak kokkin anna kUmpu mukai,
	kaNaik kAl, Ampal amiztu n'ARu taN pOtu,
	kuNakkut tOnRu veLLiyin, iruL keTa viriyum
5	kayaRkaNam kalitta poykai Ura!
	munivu il parattaiyai eR tuRan'tu aruLAy;
	n'ani pulampu alaitta ellai n'Igka,
	putuvaRamkUrn'ta ceRuvil taNNena
	mali punal parattan'tAagku,
10	initE teyya, n'in kANugkAlE.

250. marutam

	n'akukam vArAy-pANa!-pakuvAy
	ari pey kiNkiNi Arppa, teruvil
	tEr n'aTaipayiRRum tEmozip putalvan
	pU n'ARu cev vAy citaitta cAn'tamoTu
5	kAmar n'ejcam turappa, yAm tan
	muyagkal viruppoTu kuRukinEmAka,
	piRai vanappu uRRa mAcu aRu tiru n'utal
	n'ARu irug katuppin em kAtali vERu uNarn'tu,
	verUum mAn piNaiyin orIi,
10	'yAraiyO?' enRu ikan'tu n'inRatuvE!

260. marutam

	kazun'Ir mEyn'ta karun' tAL erumai
	pazanat tAmaraip panimalar muNaii,
	taNTu cEr maLLarin iyali, ayalatu
	kunRu cEr veN maNal tujcum Ura!
5	veyyai pOla muyagkuti: munai ezat
	tevvart tEytta cev vEl vayavan
	mali punal vAyil iruppai anna, en
	oli pal kUn'tal n'alam peRap punain'ta
	mukai aviz kOtai vATTiya
10	pakaivanman? yAn maRan'tu amaikalanE!

280. marutam

	'kokkinukku ozin'ta tIm pazam, kokkin
	kUmpu n'ilai anna mukaiya Ampal
	tUgku n'Irk kuTTattu, tuTumena vIzum
	taN tuRai Uran taNTAp parattamai
5	pulavAy' enRi-tOzi!-pulavEn-
	pazana yAmaip pAcaTaip puRattu,
	kazani kAvalar curi n'an'tu uTaikkum,
	tonRu mutir vELir, kunRUr anna en
	n'al manai n'ani virun'tu ayarum
10	kaitUvu inmaiyin eytAmARE.

290. marutam

	vayal veL Ampal cUTu taru putup pUk
	kanRuTaip puniRRA tinRa miccil
	Oyn'aTai mutu pakaTu Arum Uran
	toTarpu n'I veHkinai Ayin, en col
5	koLLalmAtO, muL eyiRROyE!
	n'IyE peru n'alattaiyE; avanE,
	'n'eTu n'Irp poykai n'aTu n'AL eyti,
	taN kamaz putu malar Utum
	vaNTu' ena mozipa; 'makan' ennArE.

300. marutam

	cuTart toTik kOmakaL cinan'tena, atan etir
	maTat takai Ayam kaitozutAagku,
	uRu kAl oRRa olki, Ampal
	tAmaraikku iRaijcum taN tuRai Uran-
5	ciRu vaLai vilai enap perun' tEr paNNi, em
	mun kaTai n'iRIic cenRicinOnE!
	n'Iyum, tEroTu van'tu pErtal cellAtu,
	n'ey vArn'tanna tuy aTagku n'arampin
	irum pAN okkal talaivan! perum puN
10	Eer tazumpan UNUr AgkaN,
	piccai cUz perug kaLiRu pOla, em
	aTTil Olai toTTanai n'inmE.

310. marutam

	viLakkin anna cuTar viTu tAmarai,
	kaLiRRuc cevi anna pAcaTai tayagka,
	uNtuRai makaLir iriya, kuNTu n'Ir
	vALai piRazum UraRku, n'ALai
5	makaT koTai etirn'ta maTam kezu peNTE!
	tolain'ta n'Avin ulain'ta kuRu mozi
	uTanpaTTu, OrAt tAyaroTu ozipuTan
	collalaikollO n'IyE-vallai,
	kaLiRu peRu valcip pANan kaiyatai
10	vaL uyirt taNNumai pOla,
	uL yAtum illatu Or pOrvaiam collE?

320. marutam

	'vizavum mUzttanRu; muzavum tUgkinRu;
	evan kuRittanaLkol?' enRi Ayin-
	tazai aNin'tu alamarum alkul, teruvin,
	iLaiyOL iRan'ta anaittaRku, paza viRal
5	Orik konRa oru perun' teruvil,
	kAri pukka n'ErAr pulampOl,
	kallenRanRAl, UrE; ataRkoNTu,
	kAval ceRiya mATTi, AytoTi
	ezil mA mEni makaLir
10	vizumAn'tanar, tam kozun'araik kAttE.

330. marutam

	taTa maruppu erumaip piNarc cuval irum pOttu,
	maTa n'aTai n'Araip pal inam iriya,
	n'eTu n'Irt taN kayam tuTumenap pAyn'tu,
	n'AT tozil varuttam vITa, cEN cinai
5	iruL punai marutin in n'izal vatiyum
	yANar Ura! n'in mAN izai makaLirai
	em manait tan'tu n'I tazIiyinum, avartam
	pun manattu uNmaiyO aritE: avarum,
	pain' toTi makaLiroTu ciRuvarp payan'tu,
10	n'anRi cAnRa kaRpoTu
	em pATu Atal ataninum aritE.

340. marutam

	pullEn, makizn'a! pulattalum illEn-
	kallA yAnaik kaTun' tErc ceziyan
	paTai mAN perug kuLa maTai n'Ir viTTena,
	kAl aNain'tu etiriya kaNaik kOTTu vALai
5	aLLal am kazani uLvAy OTi,
	pakaTu cERu utaitta puLLi veN puRattu,
	cej cAl uzavar kOl puTai matari,
	paig kAR ceRuvin aNaimutal piRazum
	vANan ciRukuTi anna, en
10	kOL n'Er el vaLai n'ekiztta n'ummE!

350. marutam

	veNNel arin'ar taNNumai verIi,
	pazanap pal puL iriya, kazani
	vAgku cinai marutat tUgkutuNar utirum
	tEr vaN virAan iruppai anna, en
5	tol kavin tolaiyinum tolaika! cAra
	viTEen: viTukkuven Ayin, kaTaiik
	kavavuk kai tAgkum matukaiya kuvavu mulai
	cATiya cAn'tinai; vATiya kOtaiyai;
	Acu il kalam tazIiyaRRu;
10	vAral; vAziya, kavaii n'inROLE!

360. marutam

	muzavu mukam pularn'tu muRaiyin ATiya
	vizavu ozi kaLatta pAvai pOla,
	n'erun'aip puNarn'tOr putu n'alam vauvi,
	inRu taru makaLir men tOL peRIiyar,
5	cenRI-peruma!-ciRakka, n'in parattai!
	pallOr pazittal n'ANi, vallE
	kAzin kuttik kacin'tavar alaippa,
	kaiiTai vaittatu meyyiTait timirum
	muniyuTaik kavaLam pOla, n'ani peritu
10	uRRa n'in vizumam uvappen;
	maRRum kUTum, manai maTi tuyilE.

370. marutam

	vArAy, pANa! n'akukam-n'Erizai
	kaTumpuTaik kaTuj cUl n'am kuTikku utavi,
	n'eyyOTu imaikkum aiyavit tiraL kAz
	viLagku n'akar viLagkak kiTan'tOT kuRuki,
5	'putalvan InRenap peyar peyarttu, av varit
	titalai alkul mutu peNTu Aki,
	tujcutiyO, mel am cil Oti?' ena,
	pal mAN akaTTil kuvaLai oRRi,
	uLLinen uRaiyum eR kaNTu, mella,
10	mukai n'AN muRuval tORRi,
	takai malar uNkaN kai putaittatuvE.

380. marutam

	n'eyyum kuyyum ATi, meyyoTu
	mAcu paTTanRE kaligkamum; tOLum,
	titalai men mulait tIm pAl piliRRa,
	putalvaR pullip puniRu n'ARummE;
5	vAl izai makaLir cErit tOnRum
	tErORku ottanem allEm; atanAl
	pon purai n'arampin in kural cIRiyAz
	ezAal vallai Ayinum, tozAal;
	koNTu cel-pANa!-n'in taN tuRai Uranai,
10	pATu manaip pATal; kUTAtu n'ITu n'ilaip
	puraviyum pUN n'ilai munikuva;
	viraku ila moziyal, yAm vETTatu il vaziyE!

390. marutam

	vALai vALin piRaza, n'ALum
	poykai n'Irn'Ay vaikutuyil ERkum
	kai vaN kiLLi veNNi cUzn'ta
	vayal veL Ampal uruva n'eRit tazai
5	aitu akal alkul aNi peRat taii,
	vizavin celIiyar vENTummannO;
	yANar Uran kANun'an Ayin,
	varaiyAmaiO aritE; varaiyin,
	varaipOl yAnai, vAymozi muTiyan
10	varai vEy puraiyum n'al tOL
	aLiya-tOzi!-tolaiyun'a palavE.

400. marutam

	vAzai men tOTu vArpuuRupu Ukkum
	n'el viLai kazani n'Er kaN ceRuvin,
	arivanar iTTa cUTTu ayal, periya
	iruj cuval vALai piRazum Ura!
5	n'ininRu amaikuven Ayin, ivaN n'inRu,
	innA n'OkkamoTu evan pizaippu uNTO?
	maRam kezu cOzar uRan'tai avaiyattu,
	aRam keTa aRiyAtAgku, ciRan'ta
	kENmaiyoTu aLaii, n'IyE
10	keTu aRiyAy en n'ejcattAnE.