1. pAlai

	'vaNTu paTat tatain'ta kaNNi, oN kazal,
	uruvak kutirai mazavar OTTiya
	murukan n'aR pOr n'eTu vEL Avi,
	aRukOTTu yAnaip potini AgkaN,
5	ciRu kArOTan payinoTu cErttiya
	kal pOl piriyalam' enRa coltAm
	maRan'tanarkollO tOzi! ciRan'ta
	vEy maruL paNait tOL n'ekiza, cEy n'ATTup
	polagkala veRukkai tarumAr n'ilam paka,
10	azal pOl vegkatir paitu aRat teRutalin,
	n'izal tEyn'tu ulaRiya maratta; aRai kAypu,
	aRun'Irp paij cunai Am aRap pulartalin,
	uku n'el poriyum vemmaiya; yAvarum
	vazagkun'ar inmaiyin, vauvun'ar maTiya,
15	curam pullenRa ARRa; alagku cinai
	n'Ar il murugkai n'aviral vAn pUc
	cUral am kaTu vaLi eTuppa, AruRRu,
	uTai tiraip pitirvin pogki, mun
	kaTal pOl tOnRala kATu iRan'tOrE?

2. kuRijci

	kOzilai vAzaik kOL mutir perug kulai
	UzuRu tIm kani, uNNun'art taTutta
	cAraR palavin cuLaiyoTu, Uz paTu
	pARai n'eTuj cunai, viLain'ta tERal
5	aRiyAtu uNTa kaTuvan ayalatu
	kaRi vaLar cAn'tam ERalcellAtu,
	n'aRu vI aTukkattu makizn'tu kaNpaTukkum
	kuRiyA inpam, eLitin, n'in malaip
	pal vERu vilagkum, eytum n'ATa!
10	kuRitta inpam n'inakku evan ariya?
	veRutta Eer, vEy purai paNait tOL,
	n'iRuppa n'illA n'ejcamoTu n'inmATTu,
	ivaLum, inaiyaL Ayin, tan'tai
	arug kaTik kAvalar cOr patan oRRi,
15	kagkul varutalum uriyai; paim putal
	vEgkaiyum oL iNar virin'tana;
	n'eTu veN tigkaLum UrkoNTanRE.

3. pAlai

	irug kazi mutalai mEen'tOl anna
	karug kAl Omaik kANpu in peruj cinaik
	kaTiyuTai n'anan'talai, InRu iLaippaTTa,
	koTu vAyp pETaikku alkuirai tarIiya,
5	mAnRu vETTu ezun'ta cej cevi eruvai
	vAn tOy cimaiya viRal varaik kavAan,
	tuLagku n'aTai maraiyA valam paTat tolaicci,
	oN ceg kuruti uvaRRi uNTu arun'tupu,
	pulavup puli tuRan'ta kalavuk kazi kaTu muTai,
10	koLLai mAn'tarin AnAtu kavarum
	pul ilai marAatta akan cEN attam,
	kalam taral uLLamoTu kaziyak kATTi,
	pin n'inRu turakkum n'ejcam! n'in vAy
	vAypOl poymmozi evvam en kaLaimA
15	kavir itaz anna kANpu in cev vAy,
	am tIm kiLavi, Ay izai, maTan'tai
	koTug kuzaikku amartta n'Okkam
	n'eTuj cEN Ar iTai vilagkum jAnRE?

4. mullai

	mullai vain' n'unai tOnRa, illamoTu
	paig kAR konRai men piNi aviza,
	irumpu tirittanna mA iru maruppin,
	paral aval aTaiya, iralai, teRippa,
5	malarn'ta jAlam pulampu puRakkoTuppa,
	karuvi vAnam kataz uRai citaRi,
	kAr ceytanRE, kavin peRu kAnam.
	kuragku uLaip polin'ta koycuvaR puravi,
	n'arampu Arttanna, vAgku vaLpu ariya,
10	pUtta pogkart tuNaiyoTu vatin'ta
	tAtu uN paRavai pEtuRal ajci,
	maNi n'A Artta mAN vinait tEran,
	uvakkAN tOnRum kuRum poRai n'ATan,
	kaRagku icai vizavin uRan'taik kuNAtu,
15	n'eTum perug kunRattu amanRa kAn'taT
	pOtu aviz alarin n'ARum
	Ay toTi arivai! n'in mAN n'alam paTarn'tE.

5. pAlai

	aLi n'ilai poRAatu amariya mukattaL,
	viLi n'ilai koLLAL, tamiyaL, menmela,
	n'alam miku cEvaTi n'ilam vaTuk koLAa,
	kuRuka van'tu, tan kUr eyiRu tOnRa
5	vaRitu akattu ezun'ta vAy al muRuvalaL,
	kaNNiyatu uNarA aLavai, oNNutal,
	vinai talaippaTutal cellA n'inaivuTan
	muLin'ta Omai mutaiyal am kATTu,
	paLigkattu anna pal kAy n'elli,
10	mOTTu irum pARai, ITTu vaTTu Eyppa,
	utirvana paTUum katir teRu kavAan,
	mAytta pOla mazuku n'unai tORRi,
	pAttiyanna kuTumik kUrg kal,
	viral n'uti citaikkum n'irai n'ilai atara,
15	paral murampu Akiya payam il, kAnam
	iRappa eNNutir Ayin "aRattARu
	anRu" ena mozin'ta tonRupaTu kiLavi
	anna Aka' ennun'aL pOla,
	munnam kATTi, mukattin uraiyA,
20	Ovac ceytiyin onRu n'inain'tu oRRi,
	pAvai mAytta panin'Ir n'OkkamoTu,
	Akattu oTukkiya putalvan pun talait
	tU n'Ir payan'ta tuNai amai piNaiyal
	mOyinaL uyirtta kAlai, mA malar
25	maNi uru izan'ta aNi azi tORRam
	kaNTE kaTin'tanam, celavE oNToTi
	uzaiyam Akavum inaivOL
	pizaiyalaLmAtO, piritum n'Am eninE!

6. marutam

	ari pey cilampin Ampal am toTalai,
	aram pOz av vaLaip polin'ta munkai,
	izai aNi paNait tOL, aiyai tan'tai,
	mazai vaLam tarUum mA vaN tittan,
5	piNTa n'ellin uRan'tai AgkaN
	kazai n'ilai peRAak kAviri n'Ittam,
	kuzai mAN oL izai n'I veyyOLoTu,
	vEza veN puNai tazIi, pUziyar
	kayam n'ATu yAnaiyin mukan amarn'tAagku,
10	En'tu ezil Akattup pUn' tAr kuzaiya,
	n'erun'al ATinai, punalE; inRu van'tu,
	'Aka vana mulai arumpiya cuNagkin,
	mAcu il kaRpin, putalvan tAy!' ena,
	mAyap poymmozi cAyinai payiRRi, em
15	mutumai eLLal; aHtu amaikum tilla!
	cuTarp pUn' tAmarai n'Ir mutir pazanattu,
	am tUmpu vaLLai Ay koTi mayakki,
	vALai mEyn'ta vaL eyiRRu n'Irn'Ay,
	muL araip pirampin mUtaril ceRiyum,
20	pal vEl matti, kazAar anna em
	iLamai cenRu tavat tollaHtE;
	inimai evan ceyvatu, poymmozi, emakkE?

7. pAlai

	'mulai mukamceytana; muL eyiRu ilagkina;
	talai muTicAnRa; taN tazai uTaiyai;
	alamaral AyamoTu yAgkaNum paTAal;
	mUppuTai mutu pati tAkkuaNagku uTaiya;
5	kAppum pUNTicin; kaTaiyum pOkalai;
	pEtai allai mEtaiam kuRumakaL!
	petumpaip paruvattu otugkinai, puRattu' ena,
	oN cuTar n'al il arug kaTi n'Ivi,
	tan citaivu aRital ajci in cilai
10	ERuTai inatta, n'ARu uyir n'avvi!
	valai kAN piNaiyin pOki, Igku Or
	tolaivu il veL vEl viTalaiyoTu, en makaL
	ic curam paTartan'tOLE. AyiTai,
	attak kaLvar A tozu aRuttena,
15	piRpaTu pUcalin vazivazi OTi,
	meyt talaippaTutalcellEn; it talai,
	n'innoTu vinaval kELAy! ponnoTu
	pulip pal kOtta pulampu maNit tAli,
	olik kuzaic ceyalai uTai mAN alkul,
20	Ay cuLaip palavin mEy kalai utirtta
	tuyt talai veN kAz peRUum
	kal kezu ciRukuTik kAnavan makaLE.

8. kuRijci

	Iyal puRRattu Irm puRattu iRutta
	kurumpi valcip perug kai ERRai
	tUgku tOl tutiya vaL ukir katuvalin,
	pAmpu matan aziyum pAnAT kagkulum,
5	ariya allaman ikuLai! 'periya
	kEzal aTTa pEzvAy ERRai
	palA amal aTukkam pulAva Irkkum
	kazai n'aral cilampin AgkaN, vazaiyoTu
	vAzai Ogkiya tAz kaN acumpil,
10	paTu kaTug kaLiRRin varuttam coliya,
	piTi paTi muRukkiya peru marap pUcal
	viN tOy viTarakattu iyampum avar n'ATTu,
	eN arum piRagkal mAn atar mayagkAtu,
	minnu viTac ciRiya otugki, menmela,
15	tuLi talait talaiiya maNi Er aimpAl
	ciRupuRam putaiya vAri, kural piziyUu,
	n'eRi keTa vilagkiya, n'Iyir, ic curam,
	aRitalum aRitirO?' ennun'arp peRinE.

9. pAlai

	kol vinaip polin'ta, kUrg kuRum puzukin,
	villOr tUNi vIgkap peyta
	appu n'unai Eyppa arumpiya iruppai,
	ceppu aTar anna ceg kuzai akamtORu,
5	izutin anna tIm puzal tuyvAy
	uzutu kAN tuLaiya Aki, Ar kazalpu,
	Ali vAnin kAloTu pARi,
	tuppin anna ceg kOTTu iyavin,
	n'eyttOr mImicai n'iNattin parikkum
10	attam n'aNNiya am kuTic cIRUr
	koTu n'uN Oti makaLir Okkiya
	toTi mAN ulakkait tUNTu ural pANi,
	n'eTu mAl varaiya kuTijaiyOTu iraTTum
	kunRu pin oziyap pOki, uram turan'tu,
15	jAyiRu paTinum, 'Ur cEyttu' enAtu,
	tunai pari turakkum tujcAc celavin
	emminum, virain'tu val eyti, pal mAN
	Ogkiya n'al il oru ciRai n'ilaii,
	pAgkarp palli paTutoRum paravi,
20	kanRu puku mAlai n'inROL eyti,
	kai kaviyAc cenRu, kaN putaiyAk kuRuki,
	piTik kai anna pinnakam tINTi,
	toTik kai taivarat tOyn'tanRukollO
	n'ANoTu miTain'ta kaRpin, vAL n'utal,
25	am tIm kiLavik kuRumakaL
	men tOL peRa n'acaiic cenRa en n'ejcE?

10. n'eytal

	vAn kaTaR parappil tUvaRku etiriya,
	mIn kaNTanna mel arumpu Uztta,
	muTavu mutir punnait taTavu n'ilai mAc cinai,
	puL iRaikUrum mellam pulampa!
5	n'eytal uNkaN paitala kaluza,
	pirital eNNinaiAyin, n'anRum
	aritu uRRanaiyAl peruma! uritinin
	koNTu Agkup peyartalvENTum koNTaloTu
	kurUut tiraip puNari uTaitarum ekkarp
10	pazan' timil konRa putu valaip paratavar
	mOTTu maNal aTaikaraik kOTTumIn keNTi,
	maNam kamaz pAkkattup pakukkum
	vaLam kezu toNTi anna ivaL n'alanE.

11. pAlai

	vAnam Urn'ta vayagku oLi maNTilam
	n'eruppu enac civan'ta uruppu avir am kATTu,
	ilai ila malarn'ta mukai il ilavam
	kali koL Ayam malipu tokupu eTutta
5	am cuTar n'eTug koTi poRpat tOnRi,
	kayam tukaL Akiya payam tapu kAnam
	emmoTu kazin'tanar Ayin, kammena,
	vampu virittanna pogku maNaR kAn yARRup
	paTu cinai tAzn'ta payil iNar ekkar,
10	mey pukuvu anna kai kavar muyakkam
	avarum peRukuvarmannE! n'ayavara,
	n'Ir vAr n'ikar malar kaTuppa, O maRan'tu
	aRu kuLam n'iRaikkun'a pOla, alkalum
	azutal mEvala Aki,
15	pazi tIr kaNNum paTukuvamannE!

12. kuRijci

	yAyE, kaNNinum kaTug kAtalaLE;
	en'taiyum, n'ilan uRap poRAan; 'cIRaTi civappa,
	evan, ila! kuRumakaL! iyagkuti?' ennum;
	yAmE, pirivu inRu iyain'ta tuvarA n'aTpin,
5	iru talaip puLLin Or uyirammE;
	Enal am kAvalar AnAtu ArttoRum,
	kiLi viLi payiRRum veLil ATu peruj cinai,
	vizuk kOT palavin pazup payam koNmAr,
	kuRavar UnRiya kurampai putaiya,
10	vEgkai tAaya tEm pAy tORRam
	puli cettu, verIiya pukarmuka vEzam,
	mazai paTu cilampil kazaipaTa, peyarum
	n'al varai n'ATa! n'I varin,
	melliyal Orum tAn vAzalaLE.

13. pAlai

	tan kaTaR piRan'ta muttin Aramum,
	munai tiRai koTukkum tuppin, tan malait
	teRal aru marapin kaTavuT pENi,
	kuRavar tan'ta can'tin Aramum,
5	iru pEr Aramum ezil peRa aNiyum
	tiru vIz mArpin tennavan maRavan
	kuziyil koNTa marAa yAnai
	moziyin uNarttum ciRu varai allatu,
	varai n'ilai inRi iravalarkku Iyum,
10	vaL vAy ampin, kOTaip porun'an
	paNNi taiiya payam kezu vELviyin,
	vizumitu n'ikazvatu Ayinum teRku Erpu,
	kazi mazai pozin'ta pozutu koL amaiyattu,
	cAyal in tuNai ivaT pirin'tu uRaiyin,
15	n'Oy inRAka ceyporuL! vayiRpaTa
	mAcu il tU maTi virin'ta cEkkai,
	kavavu inpuRAmaik kazika vaLa vayal,
	azal n'uti anna tOkai InRa
	kazani n'el In kavaimutal alagkal
20	n'irampu akan ceRuvil varampu aNaiyAt tuyalvara,
	pulampoTu van'ta pozutu koL vATai,
	ilagku pUg karumpin Er kazai irun'ta
	veN kuruku n'arala, vIcum
	n'uN pal tuvalaiya taN pani n'ALE!

14. mullai

	'arakkattu anna cen' n'ilap peru vazi,
	kAyAj cemmal tAay, pala uTan
	Iyal mUtAy varippa, pavaLamoTu
	maNi miTain'tanna kunRam kavaiiya
5	am kATTu Ar iTai, maTap piNai tazIi,
	tiri maruppu iralai pul arun'tu ukaLa,
	mullai viyan pulam parappi, kOvalar
	kuRum poRai marugkin n'aRum pU ayara,
	patavu mEyal arun'tu matavu n'aTai n'al An
10	vIgku mAN ceruttal, tIm pAl piliRRa,
	kanRu payir kurala, manRu n'iRai pukutarum
	mAlaiyum uLLAr Ayin, kAlai
	yAgku Akuvamkol? pANa!' enRa
	manaiyOL col etir collalcellEn,
15	cevvazi n'al yAz icaiyinen, paiyena,
	kaTavuL vAztti, paiyuL meyn' n'iRuttu,
	avar tiRam celvEn kaNTanen, yAnE
	viTu vicaik kutirai vilagku pari muTuka,
	kal porutu iragkum pal Ar n'Emik
20	kAr mazai muzakku icai kaTukkum,
	munai n'al Uran, punai n'eTun' tErE.

15. pAlai

	em veg kAmam iyaivatu Ayin,
	meym mali perum pUN, cemmaR kOcar
	kommaiam pacug kAyk kuTumi viLain'ta
	pAkal Arkaip paRaik kaT pIlit
5	tOkaik kAvin tuLun'ATTu anna,
	vaRug kai vampalart tAgkum paNpin
	ceRin'ta cEric cemmal mUtUr,
	aRin'ta mAkkaTTu Akukatilla
	tOzimArum yAnum pulampa,
10	cUzi yAnaic cuTarp pUN n'annan
	pAzi anna kaTiyuTai viyal n'akarc
	ceRin'ta kAppu ikan'tu, avanoTu pOki,
	atta iruppai Ar kazal putup pUt
	tuytta vAya, tukaL n'ilam parakka,
15	konRai am cinaik kuzaRpazam kozuti,
	van kai eNkin vaya n'irai parakkum
	in tuNaip paTarn'ta koLkaiyoTu orAgku
	kunRa vEyin tiraNTa en
	men tOL ajjai cenRa ARE!

16. marutam

	n'AyuTai mutu n'Irk kalitta tAmarait
	tAtin alli avir itaz puraiyum,
	mAcu il agkai, maNi maruL av vAy,
	n'AvoTu n'avilA n'akaipaTu tIm col,
5	yAvarum vizaiyum polan'toTip putalvanai,
	tEr vazagku teruvil, tamiyOR kaNTE!
	kUr eyiRRu arivai kuRukinaL; yAvarum
	kANun'ar inmaiyin, cettanaL pENi,
	polagkalam cuman'ta pUN tAgku iLa mulai,
10	'varukamALa, en uyir!' enap peritu uvan'tu,
	koNTanaL n'inROT kaNTu, n'ilaic cellEn,
	'mAcu il kuRumakaL! evan pEtuRRanai?
	n'Iyum tAyai ivaRku?' ena, yAn taR
	karaiya, van'tu viraivanen kavaii
15	kaLavu uTampaTun'arin kavizn'tu, n'ilam kiLaiyA,
	n'ANi n'inROL n'ilai kaNTu, yAnum
	pENinen allenO makizn'a! vAnattu
	aNagku arug kaTavuL annOL n'in
	makan tAy Atal puraivatu Agku enavE?

17. pAlai

	vaLam kezu tiru n'akarp pan'tu ciRitu eRiyinum,
	iLan' tuNai AyamoTu kazagku uTan ATinum,
	'uyagkinRu, annai! en mey' enRu acaii,
	mayagku viyar poRitta n'utalaL, taNNena,
5	muyagkinaL vatiyummannE! iniyE,
	toTi mAN cuRRamum emmum uLLAL,
	n'eTu mozit tan'tai arug kaTi n'Ivi,
	n'otumalALan n'ejcu aRap peRRa en
	ciRu mutukkuRaivi cilampu Ar cIRaTi
10	vallakol, cellat tAmE kallena
	Ur ezun'tanna uru kezu celavin,
	n'Ir il attattu Ar iTai, maTutta,
	koTug kOl umaNar, pakaTu tezi teL viLi
	n'eTum perug kunRattu imiz koLa iyampum,
15	kaTug katir tirukiya, vEy payil, piRagkal,
	perug kaLiRu urijciya maN arai yAattu
	aruj curak kavalaiya atar paTu marugkin,
	n'IL arai ilavattu Uz kazi pal malar,
	vizavut talaikkoNTa paza viRal mUtUr,
20	n'ey umiz cuTarin kAl porac cilki,
	vaikuRu mInin tOnRum
	mai paTu mA malai vilagkiya curanE?

18. kuRijci

	n'Ir n'iRam karappa, UzuRupu utirn'tu,
	pUmalar kajaliya kaTu varaR kAn yARRu,
	karAam tujcum kal uyar maRi cuzi,
	marAa yAnai matam tapa oRRi,
5	urAa Irkkum uTkuvaru n'Ittam
	kaTugkaN panRiyin n'aTugkAtu tuNin'tu,
	n'Ama arun' tuRaip pErtan'tu, yAmattu
	Igkum varupavO? Ogkal veRpa!
	oru n'AL vizumam uRinum, vazi n'AL,
10	vAzkuvaL allaL, en tOzi; yAvatum
	URu il vazikaLum payila vazagkun'ar
	n'ITu inRu Aka izukkuvar; atanAl,
	ulamaral varuttam uRutum; em paTappaik
	koTun' tEn izaitta kOTu uyar n'eTu varai,
15	pazam tUgku n'aLippin kAn'taL am potumpil,
	pakal n'I varinum puNarkuvai akal malai
	vAgku amaik kaN iTai kaTuppa, yAy
	OmpinaL eTutta, taTa men tOLE.

19. pAlai

	anRu avaN ozin'tanRum ilaiyE; van'tu n'ani
	varun'tinai vAzi, en n'ejcE! parun'tu irun'tu
	uyA viLi payiRRum, yA uyar, n'anan'talai,
	uruL tuTi makuLiyin poruL terin'tu icaikkum
5	kaTug kuraR kuTijaiya n'eTum perug kunRam,
	emmoTu iRattalumcellAy; pin n'inRu,
	oziyac cUzn'tanaiAyin, tavirAtu,
	cel ini; ciRakka, n'in uLLam! vallE
	maRaval Ompumati, emmE n'aRavin
10	cEyitaz anaiya Aki, kuvaLai
	mA itaz puraiyum malir koL Ir imai,
	uLLakam kanala uLLutoRu ulaRi,
	pazagkaN koNTa, kalizn'tu vIz, avir aRal
	veyya ukutara, verIi, paiyena,
15	cil vaLai corin'ta mel iRai munkai
	pU vI koTiyin pullenap pOki,
	aTarcey Ay akal cuTar tuNai Aka,
	iyagkAtu vatin'ta n'am kAtali
	uyagku cAy ciRupuRam muyagkiya pinnE!

20. n'eytal

	perun'Ir azuvattu en'tai tan'ta
	kozu mIn uNagkaR paTu puL Oppi,
	ekkarp punnai in n'izal acaii,
	cekkar jeNTin kuNTu aLai keNTi,
5	jAzal Ogku cinait toTutta koTug kazit
	tAzai vIz kayiRRu Ucal tUgki,
	koNTal iTu maNal kuravai munaiyin
	veN talaip puNari AyamoTu ATi,
	maNip pUm pain' tazai taii, aNittakap
10	pal pUg kAnal alkinam varutal
	kavvai n'al aNagku uRRa, iv Ur,
	koTitu aRi peNTir coRkoNTu, annai
	kaTi koNTanaLE tOzi! 'perun'tuRai,
	ellaiyum iravum ennAtu, kallena
15	valavan Ayn'ta vaN pari
	n'ilavu maNal koTkum Or tEr uNTu' enavE.

21. pAlai

	'manai iLa n'occi mauval vAl mukait
	tuNai n'iraittanna, mA vIz, veN pal,
	av vayiRRu, akanRa alkul, taiit
	tAz men kUn'tal, taTa men paNait tOL,
5	maTan'tai mAN n'alam pulampa, cEy n'ATTuc
	cellal' enRu, yAn collavum, ollAy,
	vinai n'ayan'tu amain'tanaiAyin, manai n'akap
	pal vERu veRukkai tarukam vallE,
	ezu ini, vAzi, en n'ejcE! puri iNar
10	mel aviz am cinai pulampa, vallOn
	kOTu aRai kompin vI ukat tINTi,
	marAam alaitta maNa vAyt tenRal,
	curam cel maLLar curiyal tURRum,
	enRUz n'inRa pun talai vaippil,
15	parun'tu iLaippaTUum pARu talai Omai
	irug kal viTarakattu, InRu iLaippaTTa,
	men puniRRu am piNavu pacittena, paig kaT
	cen'n'Ay ERRai kEzal tAkka,
	iriyaR piNaval tINTalin, parIic
20	ceg kAy utirn'ta paig kulai In'tin
	paral maN cuvala muraN n'ilam uTaitta
	val vAyk kaNicci, kUz Ar, kOvalar
	URAtu iTTa uvalaik kUval,
	veN kOTu n'ayan'ta anpu il kAnavar
25	ikazn'tu iyagku iyavin akazn'ta kuzi cettu,
	irug kaLiRRu ina n'irai, tUrkkum
	perug kal attam vilagkiya kATE.

22. kuRijci

	aNagkuTai n'eTu varai ucciyin izitarum
	kaNam koL aruvik kAn kezu n'ATan
	maNam kamaz viyal mArpu aNagkiya cellal
	itu ena aRiyA maRuvaraR pozutil,
5	'paTiyOrt tEytta pal pukazt taTak kai
	n'eTu vET pENat taNikuvaL ivaL' ena,
	mutu vAyp peNTir atu vAy kURa,
	kaLam n'anku izaittu, kaNNi cUTTi,
	vaLa n'akar cilampap pATi, pali koTuttu,
10	uruvac cen'tinai kurutiyoTu tUuy,
	muruku ARRuppaTutta uru kezu n'aTu n'AL,
	Aram n'ARa, aru viTart tatain'ta
	cAraR pal pU vaNTu paTac cUTi,
	kaLiRRu irai terIiya pArval otukkin
15	oLittu iyagkum marapin vayap puli pOla,
	n'al manai n'eTu n'akark kAvalar aRiyAmai
	tan n'acai uLLattu n'am n'acai vAyppa,
	in uyir kuzaiya muyagkutoRum meym malin'tu,
	n'akkanen allenO yAnE eytta
20	n'Oy taNi kAtalar vara, INTu
	Etil vElaRku ulan'tamai kaNTE?

23. pAlai

	maNkaN kuLirppa, vIcit taN peyal,
	pATu ulan'tanRE, paRaik kural ezili;
	putalmicait taLavin ital muT cen' n'anai
	n'erugku kulaip piTavamoTu orugku piNi aviza,
5	kATE kammenRanRE; avala,
	kOTu uTain'tanna kOTaR paim payir,
	patavin pAvai, munaii, matavu n'aTai
	aNNal iralai amar piNai tazIi,
	taN aRal parukit tAzn'tupaTTanavE;
10	anaiyakol vAzi, tOzi! manaiya
	tAzvin n'occi, cUzvana malarum
	mauval, mAc cinai kATTi,
	av aLavu enRAr, ANTuc cey poruLE!

24. mullai

	vELAp pArppAn vALaran' tumitta
	vaLai kaLain'tu ozin'ta kozun'tin anna,
	taLai piNi avizA, curi mukap pakanRai,
	citaral am tuvalai tUvalin, malarum
5	taii n'inRa taN peyal kaTain'AL,
	vayagku katir karan'ta vATai vaikaRai,
	vicumpu urivatupOl, viyal iTattu ozuki,
	magkul mA mazai, ten pulam paTarum
	pani irug kagkulum tamiyaL n'In'ti,
10	tam UrOLE, n'annutal; yAmE,
	kaTi matil katavam pAytalin, toTi piLan'tu,
	n'uti mukam mazukiya maNNai veN kOTTu,
	ciRu kaN yAnai n'eTu n'A oN maNi,
	kazip piNik kaRait tOl pozi kaNai utaippu,
15	tazagkukural muracamoTu muzagkum yAmattu,
	kazittu uRai ceRiyA vALuTai eRuzt tOL,
	iravut tuyil maTin'ta tAnai,
	uravuc cina vEn'tan pAcaRaiyEmE.

25. pAlai

	"n'eTug karaik kAnyARRuk kaTum punal cAay,
	avir aRal koNTa viravu maNal akan tuRait
	taN kayam n'aNNiya poziltoRum, kAjcip
	pain' tAtu aNin'ta pOtu mali ekkar,
5	vatuvai n'ARRam putuvatu kajala,
	mA n'anai kozutiya maNi n'iRa irug kuyil
	paTu n'A viLi yAnaTun'inRu, alkalum
	uraippa pOla, Uz koLpu kUva,
	inac citar ukutta ilavattuAgkaN,
10	cinaip pUg kOgkin n'uN tAtu pakarn'ar
	pavaLac ceppil pon corin'tanna,
	ikazun'ar ikazA iLa n'AL amaiyam
	ceytOr manRa kuRi" ena, n'I n'in
	paital uNkaN pani vArpu uRaippa,
15	vArAmaiyin pulan'ta n'ejcamoTu,
	n'Oval, kuRumakaL! n'Oyiyar, en uyir!' ena,
	melliya iniya kURi, vallE
	varuvar vAzi tOzi! porun'ar
	cel camam kaTan'ta vil kezu taTak kaip
20	potiyiR celvan, polan'tErt titiyan,
	in icai iyattin kaRagkum
	kalmicai aruviya kATu iRan'tOrE.

26. marutam

	kUn muL muLLik kuvikulaik kazanRa,
	mIn muL anna, veN kAl mA malar
	poytal makaLir vizavu aNik kUTTum
	av vayal n'aNNiya vaLam kEz Uranaip
5	pulattal kUTumO tOzi! alkal
	perug katavu poruta yAnai maruppin
	irumpu cey toTiyin Era Aki,
	mAk kaN aTaiya mArpakam porun'ti
	muyagkal viTAal ivai' ena mayagki,
10	'yAn Om' ennavum ollAr, tAm maRRu
	ivai pArATTiya paruvamum uLavE; iniyE
	putalvaR taTutta pAloTu taTaii,
	titalai aNin'ta tEm koL men mulai
	n'aRuj cAn'tu aNin'ta kEz kiLar akalam
15	vIgka muyagkal yAm vENTinamE;
	tIm pAl paTutal tAm ajcinarE; AyiTaik
	kavavuk kai n'ekizn'tamai pORRi, matavu n'aTaic
	cevili kai en putalvanai n'Okki,
	'n'allOrkku ottanir n'Iyir; iHtO
20	celvaRku ottanam, yAm' ena, mella en
	makanvayin peyartan'tEnE; atu kaNTu,
	'yAmum kAtalam, avaRku' enac cAay,
	ciRu puRam kavaiyinanAka, uRu peyal
	taN tuLikku ERRa pala uzu cej cey
25	maN pOl n'ekizn'tu, avaR kaluzn'tE
	n'ejcu aRaipOkiya aRivinERkE?

27. pAlai

	"koTu vari irum puli tayagka, n'eTu varai
	ATu kazai iru vetir kOTaikku olkum
	kAnam kaTiya ennAr, n'Am aza,
	n'inRatu il poruT piNic cenRu ivaN tarumAr,
5	celpa" enpa' enpOy! n'alla
	maTavaimanRa n'IyE; vaTavayin
	vEgkaTam payan'ta veN kOTTu yAnai,
	maRap pOrp pANTiyar aRattin kAkkum
	koRkai am perum tuRai muttin anna
10	n'akaip polin'tu ilagkum eyiRu kezu tuvar vAy
	takaippat tagkalar Ayinum, ikappa
	yAgganam viTumO maRRE tEm paTat
	teL n'Irkku ERRa tiraL kAR kuvaLaip
	perun'takai citaittum, amaiyA, parun'tu paTa,
15	vEttu amark kaTan'ta venRi n'al vEl
	kurutiyoTu tuyalvan'tanna n'in
	ari vEy uNkaN amartta n'OkkE?

28. kuRijci

	meyyin tIrA mEvaru kAmamoTu
	eyyAy Ayinum, uraippal tOzi!
	koyyA munnum, kural vArpu, tinaiyE
	aruvi AnRa paig kAl tORum
5	iruvi tOnRina palavE. n'IyE,
	muruku muraNkoLLum tEm pAy kaNNi,
	pariyal n'AyoTu pal malaip paTarum
	vETTuvaR peRaloTu amain'tanai; yAza n'in
	pUk kezu toTalai n'uTagka, ezun'tu ezun'tu,
10	kiLLait teL viLi iTaiiTai payiRRi,
	Agku Agku ozukAy Ayin, annai,
	'ciRu kiLi kaTital tERRAL, ivaL' ena,
	piRart tan'tu n'iRukkuvaL Ayin,
	uRaRku aritu Akum, avan malarn'ta mArpE.

29. pAlai

	"toTagku vinai tavirA, acaivu il n'On tAL,
	kiTan'tu uyir maRukuvatuAyinum, iTam paTin
	vIz kaLiRu micaiyAp puliyinum ciRan'ta
	tAzvu il uLLam talaitalaic ciRappa,
5	ceyvinaikku akanRa kAlai, eHku uRRu
	iru vERu Akiya teri taku vanappin
	mAvin n'aRu vaTi pOla, kANtoRum
	mEval taNTA makiz n'Okku uNkaN
	n'inaiyAtu kazin'ta vaikal, enaiyatUum,
10	vAzalen yAn" enat tERRi, pal mAN
	tAzak kURiya takaicAl n'al mozi
	maRan'tanir pORir em' enac ciRan'ta n'in
	eyiRu kezu tuvar vAy in n'akai azugka
	vinaval AnAp punaiizai! kEL ini
15	vemmai taNTA eri uku paRan'talai,
	kommai vATiya iyavuL yAnai
	n'Ir marugku aRiyAtu, tEr marugku OTi,
	aRu n'Ir ampiyin n'eRimutal uNagkum
	uLLun'arp panikkum Ukku arug kaTattiTai,
20	eLLal n'OnAp poruL taral viruppoTu
	n'ANut taLai Aka vaiki, mAN vinaikku
	uTampu ANTu ozin'tamai allatai,
	maTam kezu n'ejcam n'in uzaiyatuvE!

30. n'eytal

	n'eTug kayiRu valan'ta kuRug kaN av valai,
	kaTal pATu aziya, ina mIn mukan'tu,
	tuNai puNar uvakaiyar parata mAkkaL
	iLaiyarum mutiyarum kiLaiyuTan tuvanRi,
5	uppu oy umaNar arun' tuRaipOkkum
	ozukai n'On pakaTu oppak kuzIi,
	ayir tiNi aTaikarai olippa vAgki,
	perug kaLam tokutta uzavar pOla,
	iran'tOr vaRug kalam malka vIci,
10	pATu pala amaittu, koLLai cARRi,
	kOTu uyar tiNi maNal tujcum tuRaiva!
	perumai enpatu keTumO oru n'AL
	maNNA muttam arumpiya punnait
	taN n'aRug kAnal van'tu, 'n'um
15	vaNNam evanO?' enRanir celinE?

31. pAlai

	n'eruppu enac civan'ta uruppu avir maNTilam
	pulagkaTai maTagkat teRutalin, joLki,
	'n'ilam puTaipeyarvatu anRukol, inRu?' ena,
	man uyir maTin'ta mazai mARu amaiyattu,
5	ilai ila Ogkiya n'ilai uyar yAattu
	mER kavaTTu irun'ta pArppinagkaTku,
	kalluTaik kuRumpin vayavar vil iTa,
	n'iNa varik kuRain'ta n'iRatta atartoRum,
	kaNavira mAlai iTUuk kazin'tanna
10	puN umiz kuruti parippak kiTan'tOr
	kaN umiz kazukin kAnam n'In'ti,
	'cenRAr' enpu ilar tOzi! venRiyoTu
	vil alaittu uNNum val AN vAzkkait
	tamiz kezu mUvar kAkkum
15	mozi peyar tEetta pal malai iRan'tE.

32. kuRijci

	n'erun'al ellai Enal tOnRi,
	tiru maNi oLirvarum pUNan van'tu,
	puravalan pOlum tORRam uRazkoLa,
	iraval mAkkaLin paNimozi payiRRi,
5	ciRu tinaip paTu kiLi kaTIiyar, pal mAN
	kuLir koL taTTai matan ila puTaiyA,
	'cUraramakaLirin n'inRa n'I maRRu
	yAraiyO? em aNagkiyOy! uNku' enac
	ciRupuRam kavaiyinanAka, ataRkoNTu
10	iku peyal maNNin jekizpu, ajar uRRa en
	uL avan aRital ajci, uL il
	kaTiya kURi, kai piNi viTAa,
	verUum mAn piNaiyin orIi, n'inRa
	en urat takaimaiyin peyarttu, piRitu envayin
15	colla valliRRum ilanE; allAn'tu,
	inam tIr kaLiRRin peyarn'tOn inRum
	tOlAvARu illai tOzi! n'Am cenmO.
	cAy iRaip paNait tOT kizamai tanakkE
	mAcu inRAtalum aRiyAn, EcaRRu,
20	en kuRaip puRanilai muyalum
	aNkaNALanai n'akukam, yAmE.

33. pAlai

	vinai n'anRAtal veRuppak kATTi,
	"manai mAN kaRpin vANutal oziya,
	kavai muRi izan'ta cen' n'ilai yAattu
	onRu Ogku uyar cinai irun'ta, van paRai,
5	vILaip parun'tin kOL val cEval
	vaLai vAyp pETai varu tiRam payirum
	iLi tEr tIm kural icaikkum attam
	celavu arugkuraiya ennAtu, cenRu, avaL
	malar pATu AnRa, mai ezil, mazaik kaN
10	teLiyA n'Okkam uLLinai, uLi vAy
	vem paral atara kunRu pala n'In'ti,
	yAmE emiyam Aka, n'IyE
	oziyac cUzn'tanaiAyin munAatu
	vel pOr vAnavan kolli mImicai,
15	n'uNagku amai puraiyum vaNagku iRaip paNait tOL,
	vari aNi alkul, vAl eyiRROLvayin
	piriyAy Ayin n'anRuman tilla.
	anRu n'am aRiyAy Ayinum, inRu n'am
	ceyvinai ARRuRa vilagkin,
20	eytuvaiallaiyO, piRar n'aku poruLE?

34. mullai

	ciRu karum piTavin veN talaik kuRum putal
	kaNNiyin malarum taN n'aRum puRavil,
	toTutOR kAnavan kavai poRuttanna
	iru tiri maruppin aNNal iralai
5	ceRi ilaip patavin ceg kOl men kural
	maRi ATu marugkin maTap piNai arutti,
	teL aRal tazIiya vAr maNal aTaikarai,
	melkiTu kavuLa tujcu puRam kAkkum
	perun'takaikku uTain'ta n'ejcam EmuRa,
10	celka, tErE n'al valam peRun'a!
	pacai kol mel viral, perun' tOL, pulaitti
	tuRai viTTanna tU mayir ekinam
	tuNaiyoTu tiLaikkum kAppuTai varaippil,
	cen' tArp paig kiLi munkai En'ti,
15	'inRu varal uraimO, cenRicinOr tiRattu' ena,
	illavar aRital ajci, mellena
	mazalai in col payiRRum
	n'ANuTai arivai mAN n'alam peRavE.

35. pAlai

	InRu puRan'tan'ta emmum uLLAL,
	vAn tOy ijci n'al n'akar pulampa
	tani maNi iraTTum tALuTaik kaTikai,
	n'uzai n'uti n'eTu vEl, kuRum paTai, mazavar
5	munai At tan'tu, murampin vIztta
	vil Er vAzkkai vizut toTai maRavar
	val AN patukkaik kaTavuT pENmAr,
	n'aTukal pIli cUTTi, tuTippaTuttu,
	tOppik kaLLoTu turUup pali koTukkum
10	pOkku arug kavalaiya pulavu n'ARu aruj curam
	tuNin'tu, piRaL AyinaL Ayinum, aNin'tu aNin'tu,
	Arva n'ejcamoTu Ay n'alan aLaii, tan
	mArpu tuNaiyAkat tuyiRRukatilla
	tujcA muzavin kOvaR kOmAn
15	n'eTun' tErk kAri koTugkAl muntuRai,
	peNNai am pEriyARRu n'uN aRal kaTukkum
	n'eRi irug katuppin en pEtaikku,
	aRiyAt tEettu ARRiya tuNaiyE!

36. marutam

	pakuvAy varAaR pal vari irum pOttuk
	koTu vAy irumpin kOL irai tuRRi,
	Ampal mel aTai kiziya, kuvaLaik
	kUmpu viTu pal malar citaiyap pAyn'tu, ezun'tu,
5	aril paTu vaLLai Ay koTi mayakki,
	tUNTil vETTuvan vAgka vArAtu,
	kayiRu iTu katac cEp pOla, matam mikku,
	n'AL, kayam uzakkum pUk kEz Ura!
	varu punal vaiyai vAr maNal akan tuRai,
10	tiru marutu Ogkiya viri malark kAvil,
	n'aRum pal kUn'taR kuRun' toTi maTan'taiyoTu
	vatuvai ayarn'tanai enpa. alarE,
	koy cuval puravik koTit tErc ceziyan
	AlagkAnattu akan talai civappa,
15	cEral, cempiyan, cinam kezu titiyan,
	pOr val yAnaip polam pUN ezini,
	n'Ar ari n'aRavin erumaiyUran,
	tEm kamaz akalattup pularn'ta cAn'tin
	irugkO vENmAn, iyal tErp porun'an, enRu
20	ezuvar n'al valam aTagka, oru pakal
	muraicoTu veNkuTai akappaTuttu, urai cela,
	konRu, kaLamvETTa jAnRai,
	venRi koL vIrar Arppinum peritE!

37. pAlai

	maRan'tu, avaN amaiyAr Ayinum, kaRagku icaik
	kagkul Otaik kali makiz uzavar
	pogkazi mukan'ta tA il n'uN tukaL,
	magkul vAnin, mAtiram maRaippa,
5	vaiku pular viTiyal vai peyarttu ATTi,
	toziR cerukku anan'tar vITa, ezil takai
	vaLiyoTu cinaiiya vaN taLir mAattuk
	kiLi pOl kAya kiLait tuNar vaTittu,
	puLippatan amaitta putuk kuTa malir n'iRai
10	veyil verin' n'iRutta payil itazp pacug kuTai,
	kayam maNTu pakaTTin paruki, kAN vara,
	koLLoTu payaRu pAl viraii, veLLik
	kOl varain'tanna vAl aviz mitavai
	vAgku kai taTutta pinRai, Ogkiya
15	parutiam kuppai cuRRi, pakal cela,
	marutamara n'izal, erutoTu vatiyum
	kAmar vEnilman itu,
	mAN n'alam n'ukarum tuNai uTaiyOrkkE!

38. kuRijci

	viri iNar vEgkai vaNTu paTu kaNNiyan,
	teri itazk kuvaLait tEm pAy tAran,
	am cilai iTavatu Aka, vej celal
	kaNai valam terin'tu, tuNai paTarn'tu uLLi,
5	varutal vAyvatu, vAn tOy veRpan.
	van'tanan Ayin, am taLirc ceyalait
	tAzvu il Ogku cinait toTutta vIz kayiRRu
	Ucal mARiya marugkum, pAypu uTan
	ATAmaiyin kaluzpu ila tERi,
10	n'ITu itaz talaiiya kavin peRu n'Ilam
	kaN ena malarn'ta cunaiyum, vaN paRai
	maTak kiLi eTuttalcellAt taTak kural
	kulavup poRai iRutta kOl talai iruvi
	koytu ozi punamum, n'Okki; n'eTitu n'inain'tu;
15	paitalan peyaralankollO? ai tEyku
	'aya veL aruvi cUTiya uyar varaik
	kUum kaNaHtu em Ur' ena
	Agku atai aRivuRal maRan'ticin, yAnE.

39. pAlai

	'ozittatu pazitta n'ejcamoTu vazip paTarn'tu,
	uLLiyum aRitirO, em?' ena, yAza n'in
	muL eyiRRut tuvar vAy muRuval azugka,
	n'Oy mun'tuRuttu n'otumal moziyal; n'in
5	Ay n'alam maRappenO maRRE? cEN ikan'tu
	oli kazai picain'ta jeli cori oN poRi
	paTu jemal putaiyap potti, n'eTu n'ilai
	muLi pul mImicai vaLi cuzaRRuRAak
	kATu kavar perun' tI OTuvayin OTalin,
10	atar keTuttu alaRiya cAttoTu orAgku
	matar puli verIiya maiyal vEzattu
	inam talai mayagkiya n'anan' talaip perug kATTu,
	jAnRu tOnRu avir cuTar mAnRAl paTTena,
	kaL paTar Oti! n'iR paTarn'tu uLLi,
15	aruj celavu ARRA Ar iTai, jerErenap
	paran'tu paTu pAyal n'avvi paTTena,
	ilagku vaLai ceRiyA ikutta n'OkkamoTu,
	n'ilam kiLai n'inaivinai n'inRa n'iR kaNTu,
	'innakai'! inaiyam Akavum, emvayin
20	UTal yAgku van'tanRu?' ena, yAza n'in
	kOTu En'tu puruvamoTu kuvavu n'utal n'Ivi,
	n'aRug katuppu uLariya n'annar amaiyattu,
	vaRug kai kATTiya vAy al kanavin
	ERRu EkkaRRa ulamaral
25	pORRAy Akalin, pulattiyAl, emmE!

40. n'eytal

	kAnal, mAlaik kazip pUk kUmpa,
	n'Il n'iRap perug kaTal pATu ezun'tu olippa,
	mIn Ar kurukin men paRait tozuti
	kuvai irum punnaik kuTampai cEra,
5	acai vaNTu Arkkum alkuRukAlai,
	tAzai taLarat tUkki, mAlai
	azitaka van'ta koNTaloTu kazi paTark
	kAmar n'ejcam kaiyaRupu inaiya,
	tuyaram ceytu n'am aruLAr Ayinum
10	aRAaliyarO avaruTaik kENmai!
	aLi inmaiyin avaN uRai munaii,
	vAraRkatilla tOzi! kazani
	veNNel arin'ar pinRait tatumpum
	taNNumai verIiya taTan' tAL n'Arai
15	ceRi maTai vayirin piLiRRi, peNNai
	akamaTal cEkkum tuRaivan
	in tuyil mArpil cenRa en n'ejcE!

41. pAlai

	vaiku pular viTiyal, mai pulam parappa,
	karu n'anai avizn'ta UzuRu murukkin
	eri maruL pUj cinai inac citar Arppa,
	n'eTu n'el aTaicciya kazani Er pukuttu,
5	kuTumik kaTTiya paTappaiyoTu miLira,
	arikAl pOzn'ta teri pakaTTu uzavar
	Otait teL viLi pulamtoRum parappa,
	kOziNar etiriya maratta, kavini,
	kATu aNi koNTa kANtaku pozutil,
10	n'Am piri pulampin n'alam celac cAay,
	n'am piripu aRiyA n'alanoTu ciRan'ta
	n'al tOL n'ekiza, varun'tinaLkollO
	men ciRai vaNTin taN kamaz pUn' tuNar
	tAtu in tuvalai taLir vArn'tanna
15	am kaluz mAmai kiLaiiya,
	n'uN pal titti, mAayOLE?

42. kuRijci

	mali peyal kalitta mArip pittikattuk
	koyal aru n'ilaiiya peyal Er maNa mukaic
	cev verin' uRazum kozug kaTai mazaik kaN,
	taLir Er mEni, mAayOyE!
5	n'ATu vaRam kUra, n'Ajcil tujca,
	kOTai n'ITiya paitu aRu kAlai,
	kunRu kaNTanna kOTTa, yAvaiyum
	cenRu cEkkallAp puLLa, uL il
	enRUz viyankuLam n'iRaiya vIci,
10	perum peyal pozin'ta Ema vaikaRai,
	pallOr uvan'ta uvakai ellAm
	ennuL peytan'taRRE cEN iTai
	Ogkit tOnRum uyar varai
	vAn tOy veRpan van'tamARE

43. pAlai

	kaTal mukan'tu koNTa kamaj cUl mA mazai
	cuTar n'imir minnoTu valan Erpu, iragki,
	enRUz uzan'ta pun talai maTap piTi
	kai mAy n'Ittam kaLiRRoTu paTIiya,
5	n'ilanum vicumpum n'Ir iyain'tu onRi,
	kuRun'Irk kannal eNNun'ar allatu
	katir marugku aRiyAtu, ajcuvarap pAay,
	taLi mayagkinRE taN kural ezili; yAmE
	koy akai mullai kAloTu mayagki,
10	mai irug kAnam n'ARum n'aRu n'utal,
	pal irug kUn'tal, mel iyal maTan'tai
	n'al ezil Akam cErn'tanam; enRum
	aLiyarO aLiyartAmE aLi inRu
	Etil poruTpiNip pOki, tam
15	in tuNaip piriyum maTamaiyOrE!

44. mullai

	van'tu vinai muTittanan vEn'tanum; pakaivarum
	tam tiRai koTuttut tamar AyinarE;
	muraN ceRin'tirun'ta tAnai iraNTum
	onRu ena aRain'tana paNaiyE; n'in tEr
5	mun iyagku Urti pinnilai IyAtu,
	Urka, pAka! oru vinai, kaziya
	n'annan, ERRai, n'aRum pUN atti,
	tun arug kaTun' tiRaR kagkan, kaTTi,
	pon aNi valvil punRuRai, enRu Agku
10	anRu avar kuzIiya aLappu arug kaTTUr,
	parun'tu paTap paNNi, pazaiyan paTTena,
	kaNTatu n'OnAnAki, tiN tErk
	kaNaiyan akappaTa, kazumalam tan'ta
	piNaial am kaNNip perum pUT cenni
15	azumpil anna aRAa yANar,
	pazam pal n'ellin pal kuTip paravai,
	pogkaTi paTikayam maNTiya pacu miLai,
	taN kuTavAyil annOL
	paNpuTai Akattu in tuyil peRavE!

45. pAlai

	vATal uzujcil viLai n'eRRu am tuNar
	ATukaLap paRaiyin, arippana olippa,
	kOTai n'ITiya akan perug kunRattu,
	n'Ir il Ar ARRu n'ivappana kaLiRu aTTu,
5	AL il attattu uzuvai ukaLum
	kATu iRan'tanarE, kAtalar. mAmai,
	ari n'uN pacalai pAay, pIrattu
	ezil malar puraitalvENTum. alarE,
	anni kuRukkaip paRan'talai, titiyan
10	tol n'ilai muzumutal tumiyap paNNi,
	punnai kuRaitta jAnRai, vayiriyar
	in icai Arppinum peritE. yAnE,
	kAtalaR keTutta ciRumaiyoTu, n'Oy kUrn'tu,
	Atiman'ti pOla, pEtuRRu
15	alan'tanen uzalvenkollO polan'tAr,
	kaTal kAl kiLarn'ta venRi n'al vEl,
	vAnavarampan aTal munaik kalagkiya
	uTai matil Or araN pOla,
	ajcuvaru n'OyoTu, tujcAtEnE!

46. marutam

	cERRu n'ilai munaiiya ceg kaT kArAn
	Ur maTi kagkulil, n'On taLai parin'tu,
	kUr muL vEli kOTTin n'Ikki,
	n'Ir mutir pazanattu mIn uTan iriya
5	am tUmpu vaLLai mayakki, tAmarai
	vaNTu Utu pani malar Arum Ura!
	yAraiyO? n'iR pulakkEm. vAruRRu,
	uRai iRan'tu, oLirum tAz irug kUn'tal,
	piRarum, oruttiyai n'am manait tan'tu,
10	vatuvai ayarn'tanai enpa. aHtu yAm
	kUREm. vAziyar, en'tai! ceRun'ar
	kaLiRuTai aruj camam tataiya n'URum
	oLiRu vAT tAnaik koRRac ceziyan
	piNTa n'ellin aLLUr anna en
15	oN toTi n'ekizinum n'ekizka;
	cenRi, peruma! n'iR takaikkun'ar yArO?

47. pAlai

	azivu il uLLam vazivazic ciRappa
	vinai ivaN muTittanam Ayin, val virain'tu
	ezu ini vAziya n'ejcE! oli talai
	alagku kazai n'aralat tAkki, vilagku ezun'tu,
5	kaTu vaLi uruttiya koTi viTu kUr eri
	viTar mukai aTukkam pAytalin, uTan iyain'tu,
	amaik kaN viTu n'oTi kaNak kalai akaRRum
	vem munai aruj curam n'In'ti, kaimmikku,
	akan cuTar kal cErpu maRaiya, manaivayin
10	oN toTi makaLir veN tirik koLAalin,
	kuRu n'aTaip puRavin ceg kAR cEval
	n'eTu n'ilai viyal n'akar vIztuNaip payirum
	pulampoTu van'ta punkaN mAlai,
	'yANTu uLarkol?' enak kalizvOL eyti,
15	izai aNi n'eTun' tErk kai vaN ceziyan
	mazai viLaiyATum vaLam kezu ciRumalaic
	cilampin kUtaLag kamazum veRpin
	vEy purai paNait tOL, pAyum
	n'Oy acA vITa, muyagkukam palavE.

48. kuRijci

	'annAy! vAzi! vENTu, annai! n'in makaL,
	'pAlum uNNAL, pazagkaN koNTu,
	n'ani pacan'tanaL' ena vinavuti. atan tiRam
	yAnum teRRena uNarEn. mEl n'AL,
5	mali pUj cAral, en tOzimArOTu
	oli cinai vEgkai koykuvam cenRuzi,
	'puli puli!' ennum pUcal tOnRa
	oN cegkazun'Irk kaN pOl Ay itaz
	Uci pOkiya cUz cey mAlaiyan,
10	pakkam cErttiya ceccaik kaNNiyan,
	kuyam maNTu Akam cej cAn'tu n'Ivi,
	varipunai villan, orukaNai terin'tukoNTu,
	'yAtO, maRRu am mA tiRam paTar?' ena
	vinavi n'iRRan'tOnE. avaR kaNTu,
15	emmuL emmuL meym maRaipu oTugki,
	n'ANi n'inRanemAka, pENi,
	'aivakai vakutta kUn'tal Ay n'utal
	mai Ir Oti maTavIr! n'um vAyp
	poyyum uLavO?' enRanan. paiyenap
20	pari muTuku tavirtta tEran, etirmaRuttu,
	n'in makaL uNkaN pal mAN n'Okkic
	cenROnmanRa, ak kunRu kizavOnE.
	pakal mAy an'tip paTucuTar amaiyattu,
	avan maRai tEem n'Okki, 'maRRu ivan
25	makanE tOzi!' enRanaL.
	atan aLavu uNTu kOL, mativallOrkkE.

49. pAlai

	'kiLiyum, pan'tum, kazagkum, veyyOL
	aLiyum, anpum, cAyalum, iyalpum,
	munn'AL pOlAL; iRIiyar, en uyir' ena,
	koTun' toTaik kuzaviyoTu vayinmarattu yAtta
5	kaTug kaT kaRavaiyin ciRupuRam n'Okki,
	kuRuka van'tu, kuvavun'utal n'Ivi,
	mellenat tazIiyinEnAka, en makaL
	n'annar Akattu iTaimulai viyarppa,
	pal kAl muyagkinaLmannE! annO!
10	viRal miku n'eTun'takai pala pArATTi,
	vaRan n'izal acaii, vAn pulan'tu varun'tiya
	maTa mAn acA inam tiragku maral cuvaikkum
	kATu uTankazital aRiyin tan'tai
	alkupatam mikutta kaTiuTai viyal n'akar,
15	celvuzic celvuzi meyn'n'izal pOla,
	kOtai AyamoTu Orai tazIi,
	tOTu amai aric cilampu olippa, avaL
	ATuvazi ATuvazi, akalEnmannE!

50. n'eytal

	kaTalpATu avin'tu, tONi n'Igki,
	n'eTu n'Ir irug kazik kaTumIn kalippinum;
	vev vAyp peNTir kauvai tURRinum;
	mAN izai n'eTun' tEr pANi n'iRpa,
5	pakalum n'amvayin akalAnAkip
	payinRuvarum mannE, pani n'Irc cErppan,
	iniyE, maNapparug kAmam taNappa n'In'ti,
	'vArAtOr n'amakku yAar?' ennAtu,
	mallal mUtUr maRaiyinai cenRu,
10	collin evanO pANa! 'elli
	manai cEr peNNai maTi vAy anRil
	tuNai onRu piriyinum tujcAkAN' ena,
	kaN n'iRai n'Ir koTu karakkum,
	oN n'utal arivai, 'yAn enceykO?' enavE.

51. pAlai

	AL vazakku aRRa curattiTaik katir teRa,
	n'IL eri paran'ta n'eTun' tAL yAttu,
	pOz vaLi muzagkum, pullen uyarcinai,
	muTai n'acai irukkaip peTai mukam n'Okki,
5	Un patittanna veruvaru cej cevi
	eruvaic cEval karipu ciRai tIya,
	vEnil n'ITiya vEy uyar n'anan'talai,
	n'I uzan'tu eytum ceyvinaip poruT piNi
	pal itaz mazaik kaN mAayOLvayin
10	piriyin puNarvatuAyin piriyAtu,
	En'tu mulai muRRam vIgka, pal Uz
	cEyizai teLirppak kavaii, n'ALum
	manaimutal vinaiyoTum uvappa,
	n'inai mAN n'ejcam! n'Igkutal maRan'tE.

52. kuRijci

	'valan'ta vaLLi maran Ogku cAral,
	kiLarn'ta vEgkaic cEN n'eTum pogkarp
	pon n'Er putu malar vENTiya kuRamakaL
	innA icaiya pUcal payiRRalin,
5	"E kal aTukkattu iruL aLaic cilampin
	A koL vayap puli Akum aHtu" enat tam
	malai kezu cIRUr pulampa, kallenac
	cilaiyuTai iTattar pOtarum n'ATan
	n'ejcu amar viyal mArpu uTaittu ena annaikku
10	aRivippEmkol? aRiyalemkol?' ena
	irupAR paTTa cUzcci orupAl
	cErn'tanRu vAzi, tOzi! 'yAkkai
	in uyir kazivatuAyinum, n'in makaL
	Aymalar uNkaN pacalai
15	kAma n'Oy' enac ceppAtImE.

53. pAlai

	aRiyAy, vAzi tOzi! iruL aRa
	vicumpuTan viLagkum virai celal tikirik
	kaTug katir eRitta viTuvAy n'iRaiya,
	n'eTug kAl murugkai veN pUt tAay,
5	n'Ir aRa vaRan'ta n'irampA n'IL iTai,
	vaL eyiRRuc cen'n'Ay varun'tu pacip piNavoTu
	kaLLiam kATTa kaTattiTai uzijcil
	uLUn vATiya curimUkku n'oLLai
	pori arai putaitta pulampu koL iyavin,
10	vizut toTai maRavar vil iTa vIzn'tOr
	ezuttuTai n'aTukal in n'izal vatiyum
	aruj curak kavalai n'In'ti, enRum,
	'illOrkku il' enRu iyaivatu karattal
	vallA n'ejcam valippa, n'amminum
15	poruLE kAtalar kAtal;
	'aruLE kAtalar' enRi, n'IyE.

54. mullai

	virun'tin mannar arugkalam teRuppa,
	vEn'tanum vempakai taNin'tanan. tIm peyaR
	kArum Arkali talaiyinRu. tErum
	Ovattanna kOpac cen' n'ilam,
5	vaL vAy Azi uL uRupu uruLa,
	kaTavuka. kANkuvam pAka! matavu n'aTait
	tAmpu acai kuzavi vIgkucurai maTiya,
	kanaial am kurala kAR pari payiRRi,
	paTu maNi miTaRRa paya n'irai Ayam
10	koTu maTi uTaiyar kOR kaik kOvalar
	konRaiam kuzalar pinRait tUgka,
	manaimanaip paTarum n'anai n'aku mAlai,
	tanakkena vAzAp piRarkku uriyALan
	paNNan ciRukuTip paTappai n'uN ilaip
15	pun kAz n'ellippaig kAy tinRavar
	n'Ir kuTi cuvaiyin tIviya mizaRRi,
	'mukiz n'ilAt tikaztarum mUvAt tigkaL!
	ponnuTait tAli en makan oRRi,
	varukuvaiAyin, tarukuven pAl' ena,
20	vilagku amark kaNNaL viral viLi payiRRi,
	titalai alkul em kAtali
	putalvaR poykkum pUgkoTi n'ilaiyE.

55. pAlai

	kAyn'tu celaR kanali kal pakat teRutalin,
	In'tu kuruku urukum enRUz n'IL iTai,
	uLi muka vem paral aTi varuttuRAlin,
	viLi muRai aRiyA vEy kari kAnam,
5	vayak kaLiRRu anna kALaiyoTu en makaL
	kazin'tataRku azin'tanROilenE! ozin'tu yAm
	Utu ulaik kurukin uL uyirttu, acaii,
	vEvatu pOlum veyya n'ejcamoTu
	kaNpaTai peREn, kanava oN paTaik
10	karikAl vaLavanoTu veNNip paRan'talaip
	porutu puN n'ANiya cEralAtan
	azi kaLa marugkin vAL vaTakkirun'tena,
	innA in urai kETTa cAnROr
	arum peRal ulakattu avanoTu celIiyar,
15	perumpiRitu AkiyAgku pirin'tu ivaN
	kAtal vENTi, eR tuRan'tu
	pOtalcellA en uyiroTu pulan'tE.

56. marutam

	n'akai AkinRE tOzi! n'erun'al
	maNi kaNTanna tuNi kayam tuLagka,
	irumpu iyanRanna karug kOTTu erumai,
	Ampal mel aTai kiziya, kuvaLaik
5	kUmpu viTu pal malar mAn'ti, karaiya
	kAjci n'uN tAtu Irm puRattu uRaippa,
	melkiTu kavuLa alkun'ilai pukutarum
	taN tuRai Uran tiN tAr akalam
	vatuvai n'AL aNip putuvOrp puNariya,
10	parivoTu varUum pANan teruvil
	puniRRAp pAyn'tenak kalagki, yAz iTTu,
	em manaip pukutan'tOnE. atu kaNTu
	meymmali uvakai maRaiyinen etircenRu,
	'im manai anRu; aHtu um manai' enRa
15	ennum tannum n'Okki,
	mammar n'ejcinOn tozutu n'inRatuvE.

57. pAlai

	ciRu pain' tUvic ceg kAR pETai
	n'eTu n'Ir vAnattu, vAvup paRai n'In'ti,
	veyil avir uruppoTu van'tu, kani peRAatu,
	peRu n'AL yANar uLLi, paiyAn'tu,
5	pukal EkkaRRa pullen ulavaik
	kuRug kAl iRRip pun talai n'eTu vIz
	irum piNart tuRukal tINTi, vaLi pora,
	perug kai yAnai n'ivappin tUgkum
	kunRa vaippin enRUz n'IL iTai,
10	yAmE emiyam Aka, tAmE
	pacu n'ilA virin'ta pal katir matiyin
	peru n'al Ay kavin orIi, ciRu pIr
	vI Er vaNNam koNTanRukollO
	koy cuvaR puravik koTit tErc ceziyan
15	mutun'Ir muntuRai muciRi muRRi,
	kaLiRu paTa erukkiya kallen jATpin
	arum puN uRun'arin varun'tinaL, peritu azin'tu,
	pAnAT kagkulum pakalum
	AnAtu azuvOL Ay ciRu n'utalE?

58. kuRijci

	in icai urumoTu kanai tuLi talaii,
	man uyir maTin'ta pAnAT kagkul,
	kATu tEr vETTattu viLivu iTam peRAatu,
	vari ataL paTutta cEkkai, teri izait
5	tEn n'ARu katuppin koTicciyar tan'tai,
	kUtir, il ceRiyum kunRa n'ATa!
	vanain'tu varal iLa mulai jemugka, pal Uz
	viLagku toTi munkai vaLain'tu puRam cuRRa,
	n'in mArpu aTaitalin initu AkinRE
10	n'um il pulampin n'um uLLutoRum n'aliyum
	taNvaral acaiiya paNpu il vATai
	patam peRukallAtu iTam pArttu n'ITi,
	manaimaram ociya oRRip
	palar maTi kagkul, n'eTum puRan'ilaiyE.

59. pAlai

	taN kayattu amanRa vaNTu paTu tuNai malarp
	perun' takai izan'ta kaNNinai, peritum
	varun'tinai, vAziyar, n'IyE! vaTAatu
	vaN punal tozun'ai vAr maNal akan tuRai,
5	aNTar makaLir taN tazai uTIiyar
	maram cela mititta mAal pOla,
	pun talai maTap piTi uNIiyar, am kuzai,
	n'eTu n'ilai yAam oRRi, n'anai kavuL
	paTi jimiRu kaTiyum kaLiRE tOzi!
10	cUr marugku aRutta cuTar ilai n'eTu vEl,
	cinam miku murukan taN paragkunRattu,
	an'tuvan pATiya can'tu kezu n'eTu varai,
	in tIm paij cunai IraNip polin'ta
	taN n'aRug kazun'Irc ceN iyaR ciRupuRam
15	tAm pArATTiya kAlaiyum uLLAr
	vIgku iRaip paNait tOL n'ekiza, cEy n'ATTu
	aruj ceyaR poruTpiNi munni, n'ap
	pirin'tu, cEN uRain'ar cenRa ARE.

60. n'eytal

	perug kaTaR parappil cEyiRA n'aTugka,
	koTun' tozil mukan'ta ceg kOl av valai
	n'eTun' timil toziloTu vaikiya tan'taikku,
	uppu n'oTai n'ellin mUral veN cORu
5	ayilai tuzan'ta am puLic corin'tu,
	kozumIn taTiyoTu kuRumakaL koTukkum
	tiN tErp poRaiyan toNTi anna em
	oN toTi jemukkAtImO teyya;
	'Utai ITTiya uyar maNal aTaikarai,
10	kOtai AyamoTu vaNTal taii,
	Orai ATinum uyagkum n'in oLi' enak
	konnum civappOL kANin, ven vER
	koRRac cOzar kuTan'tai vaitta
	n'ATu taru n'itiyinum ceRiya
15	arug kaTip paTukkuvaL, aRan il yAyE.

61. pAlai

	'n'ORROrmanRa tAmE kURRam
	kOLuRa viLiyAr, piRar koLa viLin'tOr' enat
	tAL valampaTuppac cET pulam paTarn'tOr
	n'AL izai n'eTuj cuvar n'Okki, n'Oy uzan'tu
5	Azal vAzi, tOzi! tAzAtu,
	urum enac cilaikkum UkkamoTu paig kAl
	vari mAN n'On jAN van cilaik koLIi,
	aru n'iRattu azuttiya ampinar palaruTan
	aNNal yAnai veN kOTu koNTu,
10	n'aRavu n'oTai n'ellin n'AL makiz ayarum
	kazal punai tirun'tuaTik kaLvar kOmAn
	maza pulam vaNakkiya mA vaN pulli
	vizavuTai vizuc cIr vEgkaTam peRinum,
	pazakuvar AtalO aritE munAatu
15	muzavu uRaz tiNi tOL n'eTu vEL Avi
	ponnuTai n'eTu n'akarp potini anna n'in
	oN kEz vana mulaip polin'ta
	n'uN pUN Akam porun'tutal maRan'tE.

62. kuRijci

	ayattu vaLar paijcAy murun'tin anna
	n'akaip polin'tu ilagkum eyiRu kezu tuvar vAy,
	Akattu arumpiya mulaiyaL, paNait tOL,
	mAt tAT kuvaLai malar piNaittanna
5	mA itaz mazaik kaN, mAayOLoTu
	pEyum aRiyA maRai amai puNarcci
	pUcal tuTiyin puNarpu pirin'tu icaippa,
	karan'ta karappoTu n'Am celaRku arumaiyin,
	kaTum punal malin'ta kAvirip pEriyARRu
10	n'eTuj cuzi n'Ittam maNNun'aL pOla,
	n'aTugku ajar tIra muyagki, n'erun'al
	Akam aTaitan'tOLE ven vER
	kaLiRu kezu tAnaip poRaiyan kolli
	oLiRu n'Ir aTukkattu viyal akam poRpak
15	kaTavuL ezutiya pAvaiyin,
	maTavatu mANTa mAayOLE.