301. pAlai

	'vaRan uRu ceyyin vATupu varun'ti,
	paTar mikap pirin'tOr uLLupu n'inaital
	ciRu n'ani AnRikam' enRi tOzi!
	n'alkun'ar ozitta kUlic cil patam
5	oTivai inRi OmpAtu uNTu,
	n'Ir vAz mutalai Avittanna
	Arai vEyn'ta aRai vAyc cakaTattu,
	Ur iHtu ennAar, tItu il vAzkkai,
	curamutal varuttam maramutal vITTi,
10	pATu in teN kiNai kaRagka, kANvara,
	kuvi iNar erukkin tatar pUg kaNNi
	ATUuc cennit takaippa, makaTUu,
	muLarit tIyin muzagku azal viLakkattuk
	kaLari Aviraik kiLar pUg kOtai,
15	vaNNa mArpin vana mulait tuyalvara,
	ceRi n'aTaip piTiyoTu kaLiRu puNarn'tennak
	kuRu n'eTun' tUmpoTu muzavup puNarn'tu icaippa,
	kAr vAn muzakkin n'Irmicait tevuTTum
	tErai oliyin mANa, cIr amaittu,
20	cil ari kaRagkum ciRu pal iyattoTu
	pal Ur peyarvanar ATi, ollena,
	talaip puNarttu acaitta pal tokaik kalap paiyar,
	irum pEr okkal kOTiyar iRan'ta
	pun talai manRam kANin, vazi n'AL,
25	azugkal mUtUrkku innAtAkum;
	atuvE maruvinam, mAlai; atanAl,
	kAtalar ceyta kAtal
	n'ITu inRu maRattal kUTumO, maRRE?

302. kuRijci

	cilampil pOkiya cem muka vAzai
	alagkal am tOTu, acaivaLi uRutoRum,
	paLLi yAnaip parUup puRam taivarum
	n'al varai n'ATanoTu aruvi ATiyum,
5	pal itaz n'Ilam paTu cunaik kuRRum,
	n'aRu vI vEgkai ina vaNTu Arkkum
	veRi kamaz cOlai n'ayan'tu viLaiyATalum
	ariya pOlum kAtal am tOzi!
	irug kal aTukkattu ennaiyar uzuta
10	karumpu enak kaviniya perug kural Enal,
	kiLi paTa viLain'tamai aRin'tum,' celka' ena,
	n'am avaN viTun'aL pOlAL, kaimmikac
	cil cuNagku aNin'ta, ceRin'tu vIgku, iLa mulai,
	mel iyal olivarum katuppoTu,
15	pal kAl n'Okkum aRan il yAyE.

303. pAlai

	iTai piRar aRital ajci, maRai karan'tu,
	pEey kaNTa kanavin, pal mAN
	n'uNNitin iyain'ta kAmam ven vEl,
	maRam miku tAnai, pacumpUN, poRaiyan
5	kAr pukanRu eTutta cUr pukal n'anan'talai
	mA irug kolli uccit tAay,
	tatain'tu cel aruviyin alar ezap pirin'tOr
	pulam kan'tAka iravalar celinE,
	varai purai kaLiRRoTu n'an kalan Iyum
10	urai cAl vaN pukazp pAri paRampin
	n'irai paRaik kurIiyinam kAlaip pOki,
	muTagku puRac cen'n'el tarIiyar, OrAgku
	irai tEr koTpin Aki, pozutu paTap
	paTar koL mAlaip paTartan'tAgku,
15	varuvar enRu uNarn'ta, maTam kezu, n'ejcam!
	aiyam teLiyarO, n'IyE; pala uTan
	vaRal maram porun'tiya ciLvITu, umaNar
	kaNa n'irai maNiyin, Arkkum curan iRan'tu,
	azi n'Ir mIn peyarn'tAgku, avar
20	vazi n'aTaic cERal valitticin, yAnE.

304. mullai

	iru vicumpu ivarn'ta karuvi mA mazai,
	n'Ir ceRi n'ugkin kaN citarn'tavai pOl,
	cUr panippanna taN varal AliyoTu
	parUup peyal azi tuLi talaii, vAn n'avinRu,
5	kurUut tuLi pozin'ta perum pular vaikaRai,
	ceytu viTTanna cen' n'ila marugkil,
	ceRittu n'iRuttanna teL aRal paruki,
	ciRu maRi tazIiya teRin'aTai maTap piNai,
	valam tiri maruppin aNNal iralaiyoTu,
10	alagku cinaik kurun'tin alku n'izal vatiya,
	curumpu imirpu Uta, piTavut taLai aviza,
	arum poRi majjai Ala, vari maNal
	maNi miTai pavaLam pOla, aNi mikak
	kAyAj cemmal tAay, pala uTan
15	Iyal mUtAy Irm puRam varippa,
	pulan aNi koNTa kAr etir kAlai,
	'En'tu kOTTu yAnai vEn'tan pAcaRai
	vinaiyoTu vERu pulattu alki, n'anRum
	aRavar allar, n'am aruLAtOr' ena,
20	n'am n'Oy tanvayin aRiyAL,
	em n'on'tu pulakkumkol, mAayOLE?

305. pAlai

	pakalinum akalAtAki, yAmam
	taval il n'IttamoTu aiyenak kaziya,
	taLi mazai pozin'ta taN varal vATaiyoTu
	pani mIkkUrum paital pAnAL,
5	pal paTai n'ivan'ta vaRumai il cEkkai,
	parukuvanna kAtaloTu tiruki,
	mey pukuvanna kai kavar muyakkattu,
	Or uyir mAkkaLum pulampuvarmAtO;
	aruLilALar poruLvayin akala,
10	evvam tAgkiya iTumpai n'ejcattu
	yAn evan uLenO tOzi! tAnE
	parAraip peNNaic cEkkum, kUrvAy,
	oru tani anRil uyavuk kural kaTaiiya,
	uLLE kanalum uLLam mellenak
15	kanai eri piRappa Utum
	n'inaiyA mAkkaL tIm kuzal kETTE?

306. marutam

	perum peyar makizn'a! pENAtu akanmO!
	paran'ta poykaip pirampoTu n'ITiya
	muT kompu Igkait tuyt talaip putu vI
	InRa mAttin iLan' taLir varuTa,
5	vAr kuruku uRagkum n'Ir cUz vaLa vayal
	kazanik karumpin cAyp puRam Urn'tu,
	pazana yAmai pacu veyil koLLum
	n'elluTai maRukin n'annar Ura!
	ituvO maRRu n'in cemmal? mANTa
10	mati Er oL n'utal vayagku izai orutti
	ikazn'ta collum colli, civan'ta
	Ay itaz mazaik kaN n'Oy uRa n'Okki,
	taN n'aRug kamaz tAr parIiyinaL, n'ummoTu
	UTinaL ciRu tuni ceytu em
15	maNal mali maRukin iRan'ticinOLE.

307. pAlai

	'ciRu n'utal pacan'tu, perun' tOL cAay,
	akal ezil alkul av vari vATa,
	pakalum kagkulum mayagki, paiyena,
	peyal uRu malarin kaN pani vAra,
5	Igku ivaL uzakkum' ennAtu, vinai n'ayan'tu,
	n'Igkal ollumO aiya! vEgkai
	aTu muraN tolaitta n'eTu n'al yAnai
	maiyal am kaTAam cerukki, matam ciRan'tu,
	iyagkun'arc cekukkum ey paTu n'anan'talai,
10	perug kai eNkinam kurumpi tErum
	puRRuTaic cuvara putal ivar potiyil,
	kaTavuL pOkiya karun' tAT kan'tattu
	uTan uRai pazamaiyin tuRattalcellAtu,
	irum puRAp peTaiyoTu payirum
15	perug kal vaippin malaimutal ARE?

308. kuRijci

	uzuvaiyoTu uzan'ta uyagku n'aTai oruttal
	n'eTu vakir vizup puN kazAa, kagkul
	Ali azi tuLi pozin'ta vaikaRai,
	vAl veL aruvip punal malin'tu ozukalin,
5	ilagku malai putaiya veN mazai kavaii,
	kalam cuTu pukaiyin tOnRum n'ATa!
	iravin varutal evanO? pakal varin,
	tolaiyA vElin vaN makiz en'tai
	kaLiRu aNan'tu eytAk kal mukai itaNattu,
10	ciRu tinaip paTu kiLi emmoTu Oppi,
	mallal aRaiya malir cunaik kuvaLait
	tEm pAy oN pU n'aRum pala aTaicciya
	kUn'tal mel aNait tujci, pozutu paTa,
	kAvalark karan'tu, kaTi punam tuzaiiya
15	perug kaLiRRu oruttalin, peyarkuvai,
	karug kOR kuRijci, n'um uRaivu in, UrkkE.

309. pAlai

	vaya vAL eRin'tu, villin n'Ikki,
	payam n'irai tazIiya kaTugkaN mazavar,
	ampu cEN paTuttu vanpulattu uyttena,
	teyvam cErn'ta parArai vEmpil
5	kozuppu A eRin'tu, kuruti tUuy,
	pulavup puzukku uNTa vAn kaN akal aRai,
	kaLiRu puRam urijciya karug kAl ilavattu
	aralai veN kAz Aliyin tAam
	kATu mika n'eTiya ennAr, kOTiyar
10	perum paTaik kutirai, n'al pOr, vAnavan
	tirun'tu kazaR cEvaTi n'acaiip paTarn'tAgku,
	n'Am celin, evanO tOzi! kAmpin
	vanai kazai uTain'ta kavaN vicaik kaTi iTik
	kanai cuTar amaiyattu vazagkal cellAtu,
15	iravup punam mEyn'ta uravuc cina vEzam
	taN peru paTAar verUum
	kunRu vilagku iyavin, avar cenRa, n'ATTE?

310. n'eytal

	kaTun' tEr iLaiyaroTu n'Ikki, n'inRa
	n'eTun' takai n'Irmaiyai anRi, n'Iyum,
	tozutaku meyyai, azivu mun'tuRuttu,
	pal n'AL van'tu, paNi mozi payiRRalin,
5	kuvaLai uNkaN kaluza, n'inmATTu
	ivaLum perum pEtuRRanaL; Orum
	tAyuTai n'eTu n'akart tamar pArATTa,
	kAtalin vaLarn'ta mAtar Akalin,
	peru maTam uTaiyarO, ciRitE; atanAl,
10	kunRin tOnRum kuvavu maNaR cErppa!
	inRu ivaN virumpAtImO! cenRu, ap
	pU viri punnaimItu tOnRu peNNaik
	kUum kaNNaHtE teyya Agka
	uppu oy umaNar ozukaiyoTu van'ta
15	iLaip paTu pETai iriya, kuraittu ezun'tu
	urum icaip puNari uTaitarum
	perun'Ir vEli em ciRu n'al UrE.

311. pAlai

	irum piTip paricilar pOlak kaTai n'inRu,
	arug kaTik kAppin akal n'akar oru ciRai,
	ezutiyanna tiN n'ilaik katavam
	kazutu vazagku arai n'AL, kAvalar maTin'tena,
5	tiRan'tu n'ap puNarn'tu, 'n'ummin ciRan'tOr
	immai ulakattu il' enap pal n'AL
	pommal Oti n'Iviya kAtaloTu,
	payam talaippeyarn'tu mAtiram vempa,
	varuvazi vampalarp pENi, kOvalar
10	maza viTaip pUTTiya kuzAayt tIm puLi
	cevi aTai tIrat tEkkilaip pakukkum
	pulli n'al n'ATTu umpar, cel aruj
	curam iRan'tu Ekinum, n'ITalar
	aruL mozit tERRi, n'am akanRicinOrE.

312. kuRijci

	n'ejcu uTampaTutalin onRu purin'tu aTagki,
	iravin varUum iTumpai n'Igka,
	varaiyak karutum Ayin, peritu uvan'tu,
	Ogku varai izitarum vIgku peyal n'Ittam,
5	kAn'taL am ciRukuTik kauvai pENAtu,
	ari matar mazaik kaN civappa, n'ALaip
	peru malai n'ATan mArpu puNai Aka,
	ATukam vammO kAtal am tOzi!
	vEy payil aTukkam putaiyak kAl vIzttu,
10	in icai muracin iragki, onnAr
	OTu puRam kaNTa, tAL tOy taTak kai,
	vel pOr vazuti cel camattu uyartta
	aTu pukaz eHkam pOla,
	koTi paTa minnip pAyinRAl, mazaiyE!

313. pAlai

	'inip piRitu uNTO? ajcal Ompu!' ena
	aNik kavin vaLara muyagki, n'ejcam
	piNittOr cenRa ARu n'inain'tu, alkalum,
	kuLittup poru kayalin kaN pani malka,
5	aiya Aka veyya uyirA,
	iravum ellaiyum paTar aTa varun'ti,
	aravu n'ugku matiyin n'utal oLi karappa,
	tam alatu illA n'am ivaN oziya,
	poruL purin'tu akanRanar Ayinum, aruL purin'tu,
10	varuvar vAzi, tOzi! periya
	n'itiyam corin'ta n'Ivi pOlap
	pAmpu Un tEmpum vaRam kUr kaTattiTai,
	n'IgkA vampalar kaNai iTat tolain'tOr
	vaci paTu puNNin kuruti mAn'ti,
15	oRRuc cel mAkkaLin oTugkiya kurala,
	il vazip paTUum kAkkaik
	kal uyar piRagkal malai iRan'tOrE.

314. mullai

	'n'Ilattu anna n'Ir poti karuvin,
	mA vicumpu atira muzagki, Aliyin
	n'ilam taNNenRu kAnam kuzaippa,
	inam tEr uzavar in kural iyampa,
5	maRiyuTai maTap piNai tazIi, puRavin
	tirimaruppu iralai paim payir ukaLa,
	Ar peyal utaviya kAr cey kAlai,
	n'Ul n'eRi n'uNagkiya kAl n'avil puravi
	kallenak kaRagku maNi iyampa, vallOn
10	vAc cela vaNakkiya tAp pari n'eTun' tEr
	Irm puRavu iyagku vazi aRuppa, tIm toTaip
	paiyuL n'al yAz cevvazi piRappa,
	in' n'ilai vArAr Ayin, tam n'ilai
	evankol? pANa! uraitticin, ciRitu' ena,
15	kaTavuT kaRpin maTavOL kURa,
	cey vinai azin'ta maiyal n'ejcin
	tuni koL paruvaral tIra, van'tOy!
	initu ceytanaiyAl; vAzka, n'in kaNNi!
	vEli cuRRiya vAl vI mullaip
20	perun' tAr kamazum, virun'tu oli, katuppin
	in n'akai iLaiyOL kavava,
	mannuka, peruma! n'in malarn'ta mArpE!

315. pAlai

	'kUzaiyum kuRu n'eRik koNTana; mulaiyum
	cUzi men mukam ceppuTan etirina;
	peN tuNai cAnRanaL, ivaL' enap pal mAN
	kaN tuNai Aka n'Okki, n'erun'aiyum,
5	ayirttanRumannE, n'ejcam; peyarttum,
	aRiyAmaiyin ceRiyEn, yAnE;
	perum peyar vazuti kUTal anna tan
	arug kaTi viyal n'akarc cilampum kaziyAL,
	cENuRac cenRu, vaRuj cunaikku olki,
10	puRavuk kuyinRu uNTa pun kAy n'ellik
	kOTai utirtta kuvi kaN pacug kAy,
	aRu n'Ul paLigkin tuLaik kAcu kaTuppa,
	vaRu n'ilattu utirum attam, katumena,
	kUr vEl viTalai poyppap pOki,
15	cEkkuvaL kollOtAnE tEkkin
	akal ilai kavitta putal pOl kurampai,
	Un puzukku ayarum munRil,
	kAn kezu vAzn'ar ciRukuTiyAnE.

316. marutam

	'tuRai mIn vazagkum peru n'Irp poykai,
	ari malar Ampal mEyn'ta n'eRi maruppu
	Irn' taN erumaic cuval paTu mutu pOttu,
	tUgku cERRu aLLal tujci, pozutu paTa,
5	pain' n'iNa varAal kuRaiyap peyartan'tu,
	kurUuk koTip pakanRai cUTi, mUtUrp
	pOr ceRi maLLarin pukutarum Uran
	tEr tara van'ta, teriizai, n'ekiz tOL,
	Ur koLkallA, makaLir tarat tara,
10	parattaimai tAgkalO ilen' ena vaRitu n'I
	pulattal ollumO? manai kezu maTan'tai!
	atu pulan'tu uRaital valliyOrE,
	ceyyOL n'Igka, cil patam kozittu,
	tAm aTTu uNTu, tamiyar Aki,
15	tE mozip putalvar tiragku mulai cuvaippa,
	vaikun'ar Akutal aRin'tum,
	aRiyAr amma, aHtu uTalumOrE!

317. pAlai

	' "mAka vicumpin mazai tozil ulan'tena,
	pAay anna pakal iruL parappi,
	pukai n'iRa uruvin aRciram n'Igka,
	kuvimukai murukkin kUr n'unai vai eyiRRu
5	n'akai muka makaLir UTTu ukir kaTukkum
	mutirAp pal itaz utirap pAyn'tu, uTan
	malar uN vETkaiyin citar citarn'tu ukuppa,
	pon cey kannam poliya, veLLi
	n'uN kOl aRai kuRain'tu utirvana pOla,
10	arava vaNTinam UtutoRum kuravattu
	Ogku cinai n'aRu vI kOgku alar uRaippa,
	tuvaittu ezu tumpi, tavir icai viLari
	putaittu viTu n'arampin, immena imirum
	An EmuRRa kAmar vEnil,
15	veyil avir puraiyum vI tatai marAattuk
	kuyil iTu pUcal emmoTu kETpa
	varuvEm" enRa paruvam ANTai
	illaikol?' ena mella n'Okki,
	n'inain'tanam irun'tanamAka, n'ayan'tu Agku
20	uLLiya marugkin uLLam pOla,
	van'tu n'inRanarE kAtalar; n'an' tuRan'tu
	ennuziyatukol tAnE pal n'AL
	annaiyum aRivuRa aNagki,
	n'al n'utal pAaya pacalai n'OyE?

318. kuRijci

	kAna mAn atar yAnaiyum vazagkum;
	vAna mImicai urumum n'ani uraRum;
	aravum puliyum ajcutakavu uTaiya;
	ira vazagku ciRu n'eRi tamiyai varuti
5	varai izi aruvip pATToTu piracam
	muzavu cEr n'arampin immena imirum,
	paza viRal n'anan'talaip paya malai n'ATa!
	manRal vENTinum peRukuvai; onRO
	inRu talaiyAka vAral; varinE,
10	Em uRu tuyaramoTu yAm ivaN oziya,
	ek kaNTu peyarug kAlai, yAza n'in
	kal kezu ciRukuTi eytiya pinRai,
	Utal vENTumAl ciRitE vETToTu
	vEy payil azuvattup pirin'ta n'in
15	n'Ay payir kuRi n'ilai koNTa kOTE!

319. pAlai

	maNi vAyk kAkkai mA n'iRap perug kiLai
	piNi vIz Alattu alagku cinai ERi,
	koTu vil eyinar kuRumpiRku Ukkum
	kaTu vinai maRavar villiTat tolain'tOr
5	paTu piNam kavarum pAz paTu n'anan'talai,
	aNagku ena urutta n'Okkin, aiyena
	n'uNagkiya n'ucuppin, n'uN kEz mAmai,
	pon vI vEgkaip putu malar puraiya
	n'al n'iRattu ezun'ta, cuNagku aNi vana mulai,
10	curumpu Ar kUn'tal, perun' tOL, ivaLvayin
	pirin'tanir akaRal cUzin, arum poruL
	eytukamAtO n'umakkE; koy tazait
	taLir Er anna, tAgku aru matukaiyaL,
	melliyaL, iLaiyaL, n'ani pEr anpinaL,
15	'celvEm' ennum n'um etir,
	'ozivEm' ennum oNmaiyO ilaLE!

320. n'eytal

	Ogku tiraip parappin vAgku vicaik koLIi,
	timilOn tan'ta kaTug kaN vaya mIn,
	tazai aNi alkul celvat tagkaiyar,
	vizavu ayar maRukin vilai enap pakarum
5	kAnal am ciRukuTi, peru n'Irc cErppa!
	malar Er uNkaN em tOzi evvam
	alar vAy n'Igka, n'I aruLAy poyppinum,
	n'eTug kazi tuzaiiya kuRug kAl annam
	aTumpu amar ekkar am ciRai uLarum,
10	taTavu n'ilaip punnait tAtu aNi, perun' tuRai
	n'aTugku ayir pOzn'ta koTujci n'eTun' tEr
	vaNTaR pAvai citaiya van'tu, n'I
	tOL putitu uNTa jAnRai,
	cULum poyyO, kaTal aRi kariyE?

321. pAlai

	pacitta yAnaip pazagkaN anna
	vaRuj cunai mukan'ta kOTait teL viLi
	vicittu vAgku paRaiyin viTarakattu iyampa,
	katirk kAl am piNai uNIiya, pukal ERu
5	kutirk kAl iruppai veN pU uNNAtu,
	AN kural viLikkum cEN pAl viyan curaip
	paTu maNi ina n'irai uNIiya, kOvalar
	viTu n'ilam uTaitta kaluz kaN kUval,
	kanRuTai maTap piTi kaLiRoTu taTavarum
10	pun talai manRattu am kuTic cIRUr,
	tuNaiyoTu tuccil irukkumkollO?
	kaNaiyOr ajcAk kaTugkaN kALaiyoTu
	elli munnuRac cellumkollO?
	ev vinai ceyugkol? n'OkO yAnE!
15	ari peytu potin'ta teri cilampu kazIi,
	yAy aRivuRutal ajci,
	vEy uyar piRagkal malai iRan'tOLE.

322. kuRijci

	vayagku veyil jemiyap pAay, minnu vacipu,
	mayagku tuLi pozin'ta pAnAT kagkul;
	ArAk kAmam aTUu n'inRu alaippa,
	iRu varai vIzn'arin n'aTugki, teRuvara,
5	pAmpu eRi kOlin tamiyai vaiki,
	5
	tEmputikollO? n'ejcE! urum icaik
	kaLiRu kaNkUTiya vAL mayagku jATpin,
	oLiRu vER tAnaik kaTun' tErt titiyan
10	varu punal izitaru maram payil iRumpil,
	piRai uRaz maruppin, kaTug kaN, panRik
	kuRai Ar koTuvari kuzumum cAral,
	aRai uRu tIm tEn kuRavar aRuppa
	muyalun'ar muRRA ERRu aru n'eTuj cimai,
15	pukal arum, potiyil pOlap
	peRal arugkuraiyaL, em aNagkiyOLE!

323. pAlai

	immen pEr alar, iv Ur, n'amvayin
	ceyvOr Ec col vATa, kAtalar
	varuvar enpatu vAyvatAka,
	aiya, ceyya, matan ila, ciRiya n'in
5	aTi n'ilan uRutal ajci, paiyat
	taTavaral otukkam takaikoLa iyali,
	kANiya vammO? kaRpu mEmpaTuvi!
	palavup pala taTaiiya vEy payil aTukkattu,
	yAnaic cel inam kaTuppa, vAnattu
10	vayagku katir mazugkap pAay, pAmpin
	pai paTa iTikkum kaTug kural ERRoTu
	Ali azi tuLi talaiik
	kAl vIzttanRu, n'in katuppu uRaz puyalE!

324. mullai

	virun'tum peRukun'aL pOlum, tirun'tu izait
	taTa men paNait tOL, maTa mozi arivai
	taLir iyal kiLLai ini tinin eTutta
	vaLarAp piLLait tUvi anna,
5	uLar peyal vaLartta, paim payirp puRavil
	paRaik kaN anna n'iRaic cunai tORum
	tuLi paTu mokkuL tuLLuvana cAla,
	toLi poru pokuTTut tOnRuvana mAya,
	vaLi cinai utirttalin, veRi koLpu tAay,
10	ciraR ciRaku Eyppa aRaRkaN varitta
	vaNTu uN n'aRu vI tumitta n'Emi
	taN n'ila marugkil pOzn'ta vaziyuL,
	n'irai cel pAmpin viraipu n'Ir muTuka,
	cellum, n'eTun'takai tErE
15	mullai mAlai n'akar pukal Ayn'tE!

325. pAlai

	amma! vAzi, tOzi! kAtalar,
	'veN maNal n'ivan'ta polag kaTai n'eTu n'akar,
	n'aLi irug kagkul puNar kuRi vAytta
	kaLavum kaimmika alarn'tanRu; annaiyum
5	uTkoNTu OvAL kAkkum; pin peritu
	ivaN uRaipu evanO? aLiyaL!' enRu aruLi,
	'ATu n'aTaip polin'ta pukaRciyin, n'ATu kOL
	aLLanaip paNitta atiyan pinRai,
	vaL uyir mAk kiNai kaN avin'tAgku,
10	malai kavin azin'ta kanai kaTaRRu aruj curam
	veyyamanRa; n'in vai eyiRu uNIiya,
	taN mazai oru n'AL talaiyuka! oL n'utal,
	olku iyal, arivai! n'innoTu celkam;
	cil n'AL AnRanaiAka' ena, pal n'AL,
15	ulaivu il uLLamoTu vinai vali uRIi,
	ellAm perum piRitAka, vaTAatu,
	n'al vER pANan n'al n'ATTu uLLatai,
	vAL kaN vAnattu enRUz n'IL iTai,
	AL kol yAnai atar pArttu alkum
20	cOlai attam mAlaip pOki,
	oziyac cenROrmanRa;
	pazi evan Amkol, n'Oy taru pAlE?

326. marutam

	Ural av vAy urutta titti,
	pEr amar mazaik kaN, perun' tOL, ciRu n'utal,
	n'allaL amma, kuRumakaL celvar
	kaTun' tEr kuzitta jeLLal AgkaN,
5	n'eTug koTi n'uTagkum maTTa vAyil,
	irug katirk kazanip perug kavin anna
	n'alam pArATTi, n'aTai ezil polin'tu,
	vizavil celIiyar vENTum ven vEl
	izai aNi yAnaic cOzar maRavan
10	kazai aLan'tu aRiyAk kAvirip paTappai,
	punal mali putavin, pOor kizavOn,
	pazaiyan Okkiya vEl pOl,
	pizaiyala kaN, avaL n'OkkiyOr tiRattE!

327. pAlai

	'inpamum iTumpaiyum, puNarvum pirivum,
	n'anpakal amaiyamum iravum pOla,
	vERu vERu iyala Aki, mARu etirn'tu,
	uLa' ena uNarn'tanaiAyin, orUum
5	innA vej curam, n'al n'acai turappa,
	tunnalum takumO? tuNivu il n'ejcE!
	n'I cela valittanaiAyin, yAvatum
	n'inaitalum ceytiyO emmE kanai katir
	Avi av vari n'Ir ena n'acaii,
10	mA tavap parikkum maral tiragku n'anan'talai,
	kaLar kAl yAtta kaN akal parappin
	cev varai kozi n'Ir kaTuppa, aravin
	av vari urivai aNavarum marugkin,
	puRRu arai yAtta pular cinai maratta,
15	main' n'iRa uruvin, maNik kaN, kAkkai
	pain' n'iNam kavarum paTu piNak kavalaic
	cenROr celpuRattu iragkAr konROr,
	kOl kazipu iragkum atara,
	vEy payil azuvam iRan'ta pinnE?

328. kuRijci

	vazai amal aTukkattu, valan Erpu, vayiriyar
	muzavu atirn'tanna muzakkattu EROTu,
	uravup peyal pozin'ta n'aLLen yAmattu,
	aravin pain' talai iTaRi, pAnAL
5	iravin van'tu, em iTaimulai muyagki,
	tuni kaN akala aLaii, kagkulin
	initin iyain'ta n'aNpu, avar munital
	teRRu Akutal n'aRku aRin'tanam Ayin,
	ilagku vaLai n'ekiza, paran'tu paTar alaippa, yAm
10	muyagkutoRum muyagkutoRum uyagka mukan'tu koNTu
	aTakkuvammannO tOzi! maTap piTi
	mazai tavaz cilampil kaTujcUl InRu,
	kazai tin yAkkai vizai kaLiRu taivara,
	vAzai am cilampil tujcum
15	cAral n'ATan cAyal mArpE!

329. pAlai

	pUg kaNum n'utalum pacappa, n'Oy kUrn'tu,
	Igku yAn varun'tavum, n'Igkutal tuNin'tu,
	vAztal vallun'ar Ayin, kAtalar
	kuvin'ta kurampai am kuTic cIRUr,
5	paTu maNi iyampap pakal iyain'tu, umaNar
	koTu n'ukam piNitta ceg kayiRRu ozukaip
	pakaTu ayAk koLLum vem munait tukaL tokuttu,
	eRi vaLi cuzaRRum attam, ciRitu acain'tu,
	EkuvarkollO tAmE pAy koLpu,
10	uRu verin' oTikkum ciRu varik kuru
	n'eTu n'al yAnai n'Ir n'acaikku iTTa
	kai kaRittu uraRum mai tUgku iRumpil,
	puli pukku Inum vaRuj cunai,
	pani paTu cimaiyap pal malai iRan'tE?

330. n'eytal

	kazip pUg kuRRum, kAnal alkiyum,
	vaNTaR pAvai vari maNal ayarn'tum,
	inpuRap puNarn'tum, iLi varap paNin'tum,
	tan tuyar veLippaTat tavaRi, n'am tuyar
5	aRiyAmaiyin, ayarn'ta n'ejcamoTu
	cellum, annO; mel am pulampan!
	celvOn peyar puRattu iragki, mun n'inRu,
	takaiiya cenRa en n'iRai il n'ejcam
	eytinRukollO tAnE? eytiyum,
10	kAmam ceppa, n'AN inRukollO?
	utuva kAN, avar Urn'ta tErE;
	kuppai veN maNaR kuvavumicaiyAnum,
	ekkart tAzai maTalvayinAnum,
	Ay koTip pAcaTumpu pariya Urpu izipu,
15	ciRukuTip paratavar perug kaTal maTutta
	kaTuj celal koTun' timil pOla,
	n'ivan'tu paTu tORRamoTu ikan'tu mAyummE!

331. pAlai

	n'ITu n'ilai araiya ceg kuzai iruppai,
	kOTu kaTain'tanna, koLLai vAn pU,
	ATu paran'tanna, Inal eNkin
	tOTu cinai urIi uNTa miccil
5	paig kuzait tazaiyar pazaiyar makaLir
	kaN tiraL n'IL amaik kaTippin tokuttu,
	kunRakac ciRukuTi maRukutoRum maRukum
	cIRUr n'ATu pala piRakku oziya,
	cenROr anpu ilar tOzi!enRum,
10	arun' tuRai muRRiya karug kOTTuc cIRiyAzp
	pANar Arppa, pal kalam utavi,
	n'ALavai irun'ta n'anai makizt titiyan,
	vELiroTu porIiya, kazitta
	vAL vAy anna vaRuj curam iRan'tE!

332. kuRijci

	muLai vaLar mutala mUgkil murukki,
	kiLaiyoTu mEyn'ta kEz kiLar yAnai,
	n'Ir n'acai marugkin n'iRam pArttu oTugkiya,
	poru muraN uzuvai tolaicci, kUr n'unaik
5	kurutic ceg kOTTu azi tuLi kazAa,
	kal mukai aTukkattu menmela iyali,
	ceRu pakai vATTiya cemmaloTu, aRu kAl
	yAz icaip paRavai imira, piTi puNarn'tu,
	vAzai am cilampil tujcum n'ATan
10	n'in purai takka cAyalan ena, n'I
	anpu uraittu aTagkak kURiya in col
	vAyttana vAzi, tOzi! vETTOrkku
	amiztattu anna kamaz tAr mArpin
	vaNTu iTaip paTAa muyakkamum,
15	taNTAk kAtalum, talai n'AL pOnmE!

333. pAlai

	'yAa oN taLir arakku vitirttanna n'in
	Aka mEni am pacappu Ura,
	azivu peritu uTaiyaiyAki, avarvayin
	pazi talaittarutal vENTuti; mozi koNTu
5	tAgkal ollumO maRRE; Agku n'in
	evvam perumai uraippin; cey poruL
	vayagkAtuAyinum payam keTat tUkki,
	n'ITalar vAzi, tOzi! kOTaiyil,
	kuruttu iRupu ukka varuttam colAtu,
10	tUmpuTait tuyt talai kUmpupu tiragkiya,
	vEnil, veLiRRup panai pOlak kai eTuttu,
	yAnaip peru n'irai vAnam payirum
	malai cEN ikan'tanar Ayinum, n'ilai peyarn'tu,
	n'AL iTaippaTAmai varuvar, n'amar' ena,
15	payam taru koLkaiyin n'ayam talaitiriyA
	n'in vAy in mozi n'al vAyAka
	varuvar AyinO n'anRE; vArAtu,
	avaNar kAtalar Ayinum, ivaN n'am
	pacalai mAytal eLituman tilla
20	cenRa tEettuc cey vinai muRRi,
	maRutaral uLLattar eninum,
	kuRuku peru n'acaiyoTu tUtu varappeRinE.

334. mullai

	OTA n'al ERRu urivai taiiya
	ATu koL muracam izumena muzagka,
	n'ATu tiRai koNTanam Ayin pAka!
	pATu imiz kaTalin ezun'ta cummaiyoTu
5	perug kaLiRRut taTak kai puraiyak kAl vIzttu,
	irum piTit tozutiyin INTuvana kuzIi,
	vaNagku iRai makaLir ayarn'tanar ATum
	kazagku uRaz AliyoTu kataz uRai citaRi,
	peyal toTagkinRAl, vAnam; vAnin
10	vayagku ciRai annattu n'irai paRai kaTuppa,
	n'Alku uTan pUNTa kAl n'avil puravik
	koTijci n'eTun' tEr kaTum pari tavirAtu,
	ina mayil akavum kAr koL viyan punattu,
	n'On cUTTu Azi Ir n'ilam tumippa,
15	INTE kANak kaTavumati pUg kEzp
	polivana amartta uNkaN,
	oli pal kUn'tal Ay ciRu n'utalE!

335. pAlai

	iruL paTu n'ejcattu iTumpai tIrkkum
	aruL n'anku uTaiyar Ayinum Ital
	poruL illOrkku aHtu iyaiyAtuAkutal
	yAnum aRivenmannE; yAnai tan
5	kol maruppu oTiyak kutti, cinam ciRan'tu,
	innA vEnil in tuNai Ara,
	muLi cinai marAattup poLi piLan'tu UTTa,
	pulampu vIRRirun'ta n'ilam paku vej curam
	ariya allaman, n'amakkE viri tAr
10	ATu koL muracin aTu pOrc ceziyan
	mATa mUtUr matiRpuRam tazIi,
	n'ITu veyil uzan'ta kuRiyiRaik kaNaik kAl,
	toTai amai pan malart tOTu potin'tu yAtta
	kuTai Oranna kOL amai eruttin
15	pALai paRRu azin'tu oziya, puRam cErpu,
	vAL vaTittanna vayiRuTaip potiya,
	n'AL uRat tOnRiya n'ayavaru vanappin,
	Arattu anna aNi kiLar putup pU
	vAr uRu kavariyin vaNTu uNa viriya,
20	muttin anna veL vI tAay,
	alakin anna ari n'iRattu Ali
	n'akai n'ani vaLarkkum ciRappin, takai mikap
	pUvoTu vaLarn'ta mUvAp pacug kAy
	n'Irinum iniya Aki, kUr eyiRRu
25	amiztam URum cev vAy,
	oN toTi, kuRumakaT koNTanam celinE!

336. marutam

	kuzaR kAl cEmpin kozu maTal akal ilaip
	pAcip parappil paRazoTu vatin'ta
	uNNAp piNavin uyakkam coliya,
	n'AL irai tarIiya ezun'ta n'Ir n'Ay
5	vALaiyoTu uzappa, tuRai kaluzn'tamaiyin,
	teN kaT tERal mAn'ti, makaLir
	n'uN ceyal am kuTam irIi, paNpin
	makizn'an parattaimai pATi, aviz iNark
	kAjci n'Izal kuravai ayarum
10	tIm perum poykait tuRai kEz Uran
	tEr tara van'ta n'Er izai makaLir
	Ecupa enpa, en n'alanE; atuvE
	pAkan n'eTitu uyir vAztal kAy cinak
	kol kaLiRRu yAnai n'alkalmARE;
15	tAmum piRarum uLarpOl cERal
	muzavu imiz tuNagkai tUgkum vizavin,
	yAn avaN vArAmARE; varinE, vAniTaic
	cuTaroTu tiritarum n'erujci pOla,
	ennoTu tiriyAnAyin, ven vEl
20	mAri ampin mazait tOR cOzar
	vil INTu kuRumpin vallattup puRa miLai,
	Ariyar paTaiyin uTaika, en
	n'Er iRai munkai vIgkiya vaLaiyE!

337. pAlai

	'cAral yAattu uyar cinai kuzaitta
	mAri Irn' taLir anna mEni,
	pEr amar mazaik kaN, pulampu koNTu oziya,
	Igkup pirin'tu uRaital initu anRu; Akalin
5	avaNatu Aka, poruL' enRu, umaNar
	kaNa n'irai anna, pal kAl, kuRumpoRai,
	tUtu oy pArppAn maTi veL Olaip
	paTaiyuTaik kaiyar varu toTar n'Okki,
	'uNNA marugkul innOn kaiyatu
10	pon Akutalum uNTu' ena, konnE
	taTin'tu uTan vIztta kaTugkaN mazavar,
	tiRan il citAar vaRumai n'Okki,
	ceg kOl ampinar kain' n'oTiyAp peyara,
	koTi viTu kurutit tUgku kuTar kaRIi,
15	vari maral iyavin oru n'ari ERRai,
	veN paral imaikkum kaN paRi kavalai,
	kaLLi n'Izal kataRupu vatiya,
	mazai kaNmARiya veg kATTu Ar iTai,
	emiyam kazitan'tOyE pani iruL
20	perug kali vAnam talaiiya
	irug kuLir vATaiyoTu varun'tuvaL enavE!

338. kuRijci

	kunRu Ogku vaippin n'ATu mIkkURum
	maRam kezu tAnai aracaruLLum,
	aRam kaTaippiTitta cegkOluTan, amar
	maRam cAyttu ezun'ta valan uyar tiNi tOL,
5	palar pukaz tiruvin, pacum pUT pANTiyan
	aNagkuTai uyar n'ilaip poruppin kavAan,
	cinai oL kAn'taL n'ARum n'aRu n'utal,
	tuNai Ir Oti mAayOLvayin,
	n'uN kOl avir toTi vaN puRam cuRRa
10	muyagkal iyaiyAtuAyinum, enRum,
	vayavu uRu n'ejcattu uyavut tuNaiyAka,
	onnAr tEem pAz paTa n'URum
	tun arun' tuppin ven vER poRaiyan
	akal irug kAnattuk kolli pOla,
15	tavAaliyarO, n'aTpE! avaLvayin
	aRAaliyarO, tUtE poRAar
	viN porak kazitta tiN piTi oL vAL,
	puniRRu An taravin, iLaiyar perumakan,
	toku pOrc cOzan, poruL mali pAkkattu,
20	vazagkal AnAp perun' tuRai
	muzagku iru mun'n'Irt tiraiyinum palavE!

339. pAlai

	vIgku vicai, piNitta virai pari, n'eTun' tEr
	n'On katir cuman'ta Azi Az marugkil,
	pAmpu ena muTukun'Ir OTa, kUmpip
	paRRu viTu viralin payaRu kAy Uzppa,
5	aRciram n'inRanRAl, pozutE; muRpaTa
	ALvinaikku ezun'ta acaivu il uLLattu
	ANmai vAgka, kAmam taTpa,
	kavai paTu n'ejcam! kaNkaN akaiya,
	iru talaik koLLi iTai n'inRu varun'ti,
10	oru talaip paTAa uRavi pOnRanam;
	n'Omkol? aLiyaL tAnE yAkkaikku
	uyir iyain'tanna n'aTpin, av uyir
	vAztal anna kAtal,
	cAtal anna pirivu ariyOLE!

340. n'eytal

	pal n'AL evvam tIra, pakal van'tu,
	punnai am potumpin in n'izal kazippi,
	mAlai mAl koLa n'Okki, paN Ayn'tu,
	valavan vaN tEr iyakka, n'Iyum
5	celavu viruppuRutal ozikatil amma
	'cellA n'al icai, polam pUN, tiraiyan
	pal pUg kAnaR pavattiri anna ivaL
	n'al ezil iLa n'alam tolaiya, ollena,
	kaziyE Otam malkinRu; vaziyE
10	vaL eyiRRu aravoTu vaya mIn koTkum;
	cenROr manRa; mAnRanRu pozutu' ena,
	n'in tiRattu avalam vITa, inRu ivaN
	cEppin evanO pUk kEz pulampa!
	pacu mIn n'oTutta veN n'el mAat
15	tayir miti mitavai Arttuvam n'inakkE;
	vaTavar tan'ta vAn kEz vaTTam
	kuTa pula uRuppin kUTTupu n'ikazttiya
	vaNTu imir n'aRuj cAn'tu aNikuvam tiN timil
	ellut tozil maTutta val vinaip paratavar
20	kUr uLik kaTu vicai mATTalin, pAypu uTan,
	kOT cuRAk kizitta koTu muTi n'eTu valai
	taN kaTal acaivaLi eRitoRum, vinai viTTu,
	munRil tAzait tUgkum
	teN kaTaR parappin, em uRaivu in, UrkkE?

341. pAlai

	uy takai inRAl tOzi! paipaya,
	kOgkum koy kuRai uRRana; kuyilum
	tEm pAy mAattu Ogku cinai viLikkum;
	n'ATu Ar kAvirik kOTu tOy malir n'iRaik
5	kazai azi n'Ittam cAaya vazi n'AL,
	mazai kazin'tanna mAk kAl mayagku aRal,
	patavu mEyal arun'tu tuLagku imil n'al ERu,
	matavuTai n'Ak koTu acai vITap paruki,
	kuRug kAR kAjcik kOtai mel iNarp
10	pon takai n'uN tAtu uRaippa, tokku uTan,
	kuppai vAr maNal ekkart tujcum,
	yANar vEnilman, itu
	mAN n'alam n'ukarum tuNai uTaiyOrkkE?

342. kuRijci

	oRuppa Ovalai; n'iRuppa n'illalai;
	puNarn'tOr pOlap pORRumati! n'inakku yAn
	kiLaijan allenO? n'ejcE! tenAatu
	vel pOrk kavuriyar n'al n'ATTu uLLatai
5	maN koL puRRattu aruppu uzai tiRappin
	A koL mUtUrk kaLvar perumakan,
	Eval iLaiyar talaivan, mEvAr
	arug kuRumpu eRin'ta ARRaloTu, parun'tu paTap
	pal ceruk kaTan'ta cel uRaz taTak kai,
10	keTAa, n'al icait tennan, toTAa
	n'Ir izi marugkil kal aLaik karan'ta av
	varaiyaramakaLirin ariyaL,
	av vari alkul aNaiyAkkAlE!

343. pAlai

	vAgku amai puraiyum vIgku iRaip paNait tOL,
	cil cuNagku aNin'ta, pal pUN, men mulai,
	n'al ezil, Akam pullutal n'ayan'tu,
	maram kOL umaN makan pErum parutip
5	pun talai citaitta van talai n'aTukal
	kaNNi vATiya maNNA marugkul,
	kUr uLi kuyinRa kOTu mAy ezuttu, av
	ARu cel vampalar vERu payam paTukkum
	kaN pori kavalaiya kAnattu AgkaN,
10	n'anan'talai yAattu am taLirp peruj cinai,
	il pOl n'Izal cel veyil ozimAr,
	n'eTuj cevik kazutaik kuRug kAl ERRaip
	puRam n'iRai paNTattup poRai acAak kaLain'ta
	peyar paTai koLLArkku uyavut tuNai Aki,
15	uyarn'ta ALvinai purin'tOy; peyarn'tu n'inRu
	uLLinai vAzi, en n'ejcE! kaLLin
	makizin makizn'ta ari matar mazaik kaN,
	cil mozip polin'ta tuvar vAy,
	pal mAN pEtaiyin pirin'ta n'IyE.

344. mullai

	vaLa mazai pozin'ta vAl n'iRak kaLari,
	uLartaru taN vaLi uRutoRum, n'ilavu enat
	toku mukai virin'ta muTak kAR piTavin,
	vai Er vAl eyiRRu, oL n'utal, makaLir
5	kai mAN tONi kaTuppa, paiyena,
	mayilinam payilum maram payil kAnam
	el iTai uRAa aLavai, vallE,
	kazal oli n'Avin teN maNi kaRagka,
	n'izal oLippanna n'imir parip puravi
10	vayakku uRu koTijci poliya, vaLpu Ayn'tu,
	iyakkumati vAziyO, kaiyuTai valava!
	payappuRu paTar aTa varun'tiya
	n'ayappu in kAtali n'akai mukam peRavE!

345. pAlai

	'vicumpu taLi pozin'tu, vemmai n'Igki,
	taN patam paTutal celka!' enap pal mAN
	n'Am cela vizain'tanamAka, 'Ogku pukazk
	kAn amar celvi aruLalin, veN kAl,
5	pal paTaip puravi eytiya tol icai
	n'uNagku n'uN panuvaR pulavan pATiya
	ina mazai tavazum EziR kunRattu,
	karug kAl vEgkaic cem pUm piNaiyal
	aitu En'tu alkul yAm aNin'tu uvakkum
10	cil n'AL kazika!' enRu mun n'AL
	n'ammoTu poyttanar Ayinum, tammoTu
	tirun'tu vEl iLaiyar curumpu uNa malaimAr,
	mA muRi InRu marak kompu akaippa,
	uRai kazin'tu ulan'ta pinRai, poRaiya
15	ciRu veL aruvit tuvalaiyin malarn'ta
	karug kAl n'uNavin peruj cinai vAn pUc
	cem maNaR ciRu n'eRi kammena varippa,
	kATu kavin peRuka tOzi! ATu vaLikku
	olku n'ilai iRRi oru tani n'eTu vIz
20	kal kaN cIkkum attam,
	alku veyil n'Izal acain'tanar celavE!

346.marutam

	n'akai n'anRu amma tAnE iRai micai
	mAric cutaiyin Irm puRattu anna
	kUral kokkin kuRum paRaic cEval,
	veLLi veN tOTu anna, kayal kuRittu,
5	kaL Ar uvakaik kali makiz uzavar
	kAjci am kuRun' taRi kutti, tIm cuvai
	men kazaik karumpin n'an pala miTain'tu,
	peruj cey n'ellin pAcu aval potti,
	varuttik koNTa val vAyk koTuj ciRai
10	mItu azi kaTu n'Ir n'Okki, paippayap
	pArval irukkum payam kEz Ura!
	yAm atu pENinRO ilamE n'I n'in
	paN amai n'al yAzp pANanoTu, vici piNi,
	maN Ar, muzavin kaN atirn'tu iyampa,
15	makiz tuNaic cuRRamoTu maTTu mAn'ti,
	em manai vArAyAki, mun n'AL,
	n'um manaic cErn'ta jAnRai, am manaik
	kuRun' toTi maTan'tai uvan'tanaL n'eTun' tEr,
	izai aNi yAnaip pazaiyan mARan,
20	mATa mali maRukin kUTal AgkaN,
	veLLat tAnaiyoTu vERu pulattu iRutta
	kiLLi vaLavan n'al amar cAay,
	kaTum parip puraviyoTu kaLiRu pala vavvi,
	Etil mannar Ur koLa,
25	kOtai mArpan uvakaiyin peritE.

347. pAlai

	tOLum tol kavin tolaiya, n'ALum
	n'alam kavar pacalai n'alkinRu n'aliya,
	cAl perun' tAnaic cEralAtan
	mAl kaTal OTTi, kaTampu aRuttu, iyaRRiya
5	paN amai muracin kaN atirn'tanna,
	kavvai tURRum vev vAyc cEri
	ampal mUtUr alar n'amakku oziya,
	cenRanar Ayinum, ceyvinai avarkkE
	vAykkatil vAzi, tOzi! vAyAtu,
10	mazai karan'tu oLitta kazai tiragku aTukkattu,
	oN kEz vayap puli pAyn'tena, kuvavu aTi
	veN kOTTu yAnai muzakku icai verIi,
	kanRu ozittu OTiya pun talai maTap piTi
	kai talai vaitta maiyal vituppoTu,
15	keTu makap peNTirin tErum
	n'eTu mara marugkin malai iRan'tOrE!

348. kuRijci

	en Avatukol tAnE munRil,
	tEn tEr cuvaiya, tiraL arai, mAattu,
	kOTaikku Uztta, kamaz n'aRun' tIm kani,
	payirppuRap palavin etirc cuLai aLaii,
5	iRAloTu kalan'ta, vaNTu mUcu, ariyal
	n'eTug kaN ATu amaip pazun'i, kaTun' tiRal
	pAppuk kaTuppu anna tOppi vAn kOTTuk
	kaTavuL Ogku varaikku Okki, kuRavar,
	muRit tazai makaLir maTuppa, mAn'ti,
10	aTukkal Enal irum punam maRan'tuzi,
	'yAnai vavvina tinai' ena, n'OnAtu,
	iLaiyarum mutiyarum kiLaiyuTan kuzIi,
	cilai Ayn'tu tiritarum n'ATan
	n'ilaiyA n'al mozi tERiya n'ejcE?

349. pAlai

	aram pOz av vaLai ceRin'ta munkai
	varain'tu tAm piNitta tol kavin tolaiya,
	evan Ayn'tanarkol tOzi! jemann
	teri kOl anna ceyir tIr cem mozi,
5	ulain'ta okkal, pATun'ar celinE,
	uran mali uLLamoTu munai pAzAka,
	arug kuRumpu eRin'ta perug kala veRukkai
	cUzAtu curakkum n'annan n'al n'ATTu,
	eziR kunRattuk kavAan, kEz koLa,
10	tirun'tu arai n'ivan'ta karug kAl vEgkai
	eri maruL kavaLam mAn'ti, kaLiRu tan
	vari n'utal vaitta vali tEmpu taTak kai
	kal Ur pAmpin tOnRum
	col peyar tEetta curan iRan'tOrE?

350. n'eytal

	kaziyE, ciRu kural n'eytaloTu kAvi kUmpa,
	eRi tirai Otam taral AnAtE;
	tuRaiyE, marugkin pOkiya mAk kavai maruppin
	iruj cERRu Ir aLai alavan n'Ippa,
5	vazagkun'ar inmaiyin pATu AnRanRE;
	koTu n'ukam n'uzain'ta kaNaik kAl attiri
	vaTi maNi n'eTun' tEr pUNa EvAtu,
	En'tu ezil mazaik kaN ivaL kuRaiyAkac
	cEn'tanai cenmO peru n'Irc cErppa!
10	ilagku irum parappin eRi cuRA n'Ikki,
	valampuri mUzkiya vAn timiR paratavar
	oli talaip paNilam Arppa, kallena,
	kali kezu koRkai etirkoLa, izitarum
	kuvavu maNal n'eTug kOTTu AgkaN,
15	uvakkAN tOnRum, em ciRu n'al UrE!

351. pAlai

	vERRu n'ATTu uRaiyuL viruppuRap pENi,
	peRal arug kELir pin van'tu viTuppa,
	poruL akappaTutta pukal mali n'ejcamoTu
	kuRai vinai muTitta n'iRaivu in iyakkam
5	aRivuRUumkollO tAnE katir teRa,
	kazal ilai ukutta kAl poru tAz cinai,
	azal akain'tanna am kuzaip potumpil,
	puzal vI iruppaip pun kATTu attam,
	maRutaral uLLamoTu kuRuka, tORRiya
10	cey kuRi Azi vaikaltORu eNNi,
	ezutu cuvar n'inain'ta azutu vAr mazaik kaN
	vilagku vIz arip pani polag kuzait teRippa,
	tirun'tuizai munkai aNal acaittu UnRi,
	irun'tu aNai mItu, porun'tuzik kiTakkai,
15	varun'tu tOL pUcal kaLaiyum marun'tu ena
	uLLutoRu paTUum palli,
	puLLut tozutu uRaivi cevimutalAnE?

352. kuRijci

	'muTavu mutir palavin kuTam maruL perum pazam
	pal kiLait talaivan kallAk kaTuvan,
	pATu imiz aruvip pARai marugkin,
	ATu mayil munnatu Aka, kOTiyar
5	vizavu koL mUtUr viRali pinRai
	muzavan pOla akappaTat tazIi,
	in tuNaip payirum kunRa n'ATan
	kuTi n'anku uTaiyan; kUTun'arp piriyalan;
	keTu n'A moziyalan; anpinan' ena, n'I
10	valla kURi, vAyvatin puNarttOy;
	n'allai; kAN, ini kAtal am tOzIi!
	kaTum parip puravi n'eTun' tEr ajci,
	n'al icai n'iRutta n'ayam varu panuval,
	tol icai n'iRIiya urai cAl pANmakan
15	eNNu muRai n'iRutta paNNinuLLum,
	putuvatu punain'ta tiRattinum,
	vatuvai n'ALinum, iniyanAl emakkE.

353. pAlai

	ALvinaip piritalum uNTO? piriyinum,
	kEL, ini vAziya, n'ejcE! n'ALum
	kanavuk kazin'tanaiyavAki, n'anavin,
	n'ALatu celavum, mUppinatu varavum,
5	aritu peRu ciRappin kAmattu iyaRkaiyum,
	in' n'ilai aRiyAy Ayinum, cen' n'ilai
	amai ATu am kazai tINTi, kallena
	jemai ilai utirtta eri vAyk kOTai
	n'eTu veN kaLari n'IRu mukan'tu cuzala,
10	kaTu veyil tirukiya vEnil veg kATTu,
	uyagku n'aTai maTap piNai tazIiya, vayagku poRi,
	aRu kOTTu, eziR kalai aRukayam n'Okki,
	teN n'Ir vETTa ciRumaiyin, tazai maRan'tu,
	uNn'Ir inmaiyin, olkuvana taLara,
15	maram n'izal aRRa iyavin curan iRan'tu,
	uLLuvai allaiyO maRRE uLLiya
	virun'tu ozivu aRiyAp perun' taN pan'tar,
	varun'ti varun'ar Ompi, taNNenat
	tAtu tukaL utirtta tAzai am kUn'tal
20	vIz itaz alari mel akam cErtti,
	makiz aNi muRuval mANTa cEkkai,
	n'ammoTu n'an mozi n'avilum
	pommal Otip punaiyizai kuNanE?

354. mullai

	mata vali yAnai maRaliya pAcaRai,
	iTi umiz muracam poru kaLattu iyampa,
	venRu koTi eTuttanan, vEn'tanum; kanRoTu
	kaRavaip pullinam puRavutoRu ukaLa,
5	kuzal vAy vaittanar kOvalar, val virain'tu,
	iLaiyar Ekuvanar pariya, viri uLaik
	kaTu n'aTaip puravi vazivAy OTa,
	valavan vaLpu vali uRuppa, pulavar
	pukaz kuRi koNTa polan'tAr akalattu,
10	taN kamaz cAn'tam n'uN tukaL aNiya,
	venRi koL uvakaiyoTu pukutal vENTin,
	yANTu uRaivatukol tAnE mANTa
	pOtu uRaz koNTa uNkaN
	tItilATTi tiru n'utaR pacappE?

355. pAlai

	mAvum vaN taLir InRana; kuyilum
	in tIm pal kural kompar n'uvalum;
	mUtilai ozitta pOtu aviz peruj cinai,
	vallOn taivarum vaL uyirp pAlai
5	n'arampu Arttanna vaNTinam muralum;
	tuNi kayam tunniya tU maNal ekkar,
	tAtu uku taN pozil alki, kAtalar
	cezu manai maRakkum cevvi vEnil
	tAnE van'tanRuAyin, AnAtu
10	ilagku vaLai n'ekizn'ta evvam kATTip
	pulan'tanam varukam; cenmO tOzi!
	'yAmE emiyam Aka, n'IyE
	pon n'ayan'tu aruL ilaiyAki,
	innai Akutal ottanRAl' enavE.

356.marutam

	mEl tuRaik koLIiya kazAlin kIzt tuRai
	uku vAr arun'ta, paku vAy yAmai
	kampuL iyavan Aka, vici piNit
	teN kaN kiNaiyin piRazum Uran
5	iTai n'eTun' teruvil katumenak kaNTu, en
	poR toTi munkai paRRinanAka,
	'annAy!' enRanen; avan kai viTTananE,
	tol n'acai cAlAmai, n'annan paRampil
	ciRukArOTan payinoTu cErttiya
10	kaR pOl n'AvinEnAki, maRRu atu
	ceppalen mannAl, yAykkE; n'al tErk
	kaTum pakaTTu yAnaic cOzar marukan
	n'eTug katir n'ellin vallam kizavOn
	n'allaTi uLLAnAkavum, ollAr
15	katavam muyaRalum muyalpa; atAanRu,
	oli pal kUn'tal n'amvayin aruLAtu,
	konRanan Ayinum kolai pazutu anRE
	aruvi Ampal kalitta muntuRai
	n'annan Aay pirampu anna
20	min Ir Oti! ennai, n'in kuRippE?

357. pAlai

	koTu muL Igkai cUraloTu miTain'ta
	vAn mukai iRumpin vayavoTu vatin'ta
	uNNAp piNavin uyakkam tIriya,
	taTa maruppu yAnai valam paTat tolaicci,
5	viyal aRai civappa vAgki, muNagku n'imirn'tu,
	pulavup puli puraNTa pul cAy ciRu n'eRi
	payil irug kAnattu vazagkalcellAtu,
	perug kaLiRRu ina n'irai kai toTUup peyarum,
	tIm cuLaip palavin tozuti, umpaR
10	perug kATu iRan'tanar Ayinum, yAza n'in
	tirun'tu izaip paNait tOL varun'ta n'ITi,
	uLLAtu amaitalO ilarE; n'alkuvar
	miku peyal n'ilaiiya tIm n'Irp poykai
	aTai iRan'tu avizn'ta taN kamaz n'Ilam
15	kAloTu tuyalvan'tanna, n'in
	Ay itaz mazaik kaN amartta n'OkkE.

358. kuRijci

	n'Ilattu anna n'iRam kiLar eruttin,
	kAmar pIli, Ay mayil tOkai
	in tIm kurala tuvanRi, men cIr
	ATu takai ezil n'alam kaTuppak kUTi,
5	kaN n'Er itaza, taN n'aRug kuvaLaik
	kuRun' toTar aTaicciya n'aRum pal kUzai
	n'ITu n'Ir n'eTuj cunai AyamoTu ATAy,
	uyagkiya manattaiyAki, pulampu koNTu,
	innai Akiya n'in n'iRam n'Okki,
10	annai vinavinaL Ayin, annO!
	en ena uraikkO yAnE tunniya
	peru varai izitarum n'eTu veL aruvi,
	OTai yAnai uyar micai eTutta
	ATu koTi kaTuppa, tOnRum
15	kOTu uyar veRpan uRIiya n'OyE?

359. pAlai

	'pani vAr uNkaNum, pacan'ta tOLum,
	n'ani piRar aRiyac cAay, n'ALum,
	karan'tanam uRaiyum n'am paNpu aRiyAr,
	n'ITinarmannO, kAtalar' ena n'I
5	evan kaiyaRRanai? ikuLai! avarE
	vAnavarampan veLiyattu anna n'am
	mAN n'alam tammoTu koNTanar munAatu,
	aruj curak kavalai acaiiya kOTiyar,
	perug kal mImicai, iyam ezun'tAgku,
10	vIz piTi keTutta n'eTun' tAL yAnai
	cUr pukal aTukkattu mazai mARu muzagkum,
	poyyA n'al icai mA vaN pulli,
	kavaik katir varakin yANarp pain' tAL
	mutait cuval mUzkiya, kAn cuTu kurUup pukai
15	aruvit tuvalaiyoTu mayagkum
	peru varai attam iyagkiyOrE!

360. n'eytal

	pal pUn' taN pozil, pakal uTan kazippi,
	oru kAl Urtip paruti am celvan
	kuTavayin mA malai maRaiya, koTug kazit
	taN cERRu aTaiiya kaNaik kAl n'eytal
5	n'uN tAtu uNTu vaNTinam tuRappa,
	veruvaru kaTun' tiRal iru perun' teyvattu
	uru uTan iyain'ta tORRam pOla,
	an'ti vAnamoTu kaTal aNi koLAa,
	van'ta mAlai peyarin, maRRu ivaL
10	perum pulampinaLE teyya; atanAl,
	pANi pizaiyA mAN vinaik kali mA
	tujcu Ur yAmattut teviTTal Ompi,
	n'eTun' tEr akala n'Ikki, paiyenak
	kunRu izi kaLiRRin kuvavu maNal n'In'ti,
15	iravin vammO uravu n'Irc cErppa!
	ina mIn arun'tu n'AraiyoTu panaimicai
	anRil cEkkum munRil, pon ena
	n'al malar n'aRu vI tAam
	punnai n'aRum pozil ceyta n'am kuRiyE.

361. pAlai

	'tU malart tAmaraip pUvin am kaN,
	mA itazk kuvaLai malar piNaittanna,
	tiru mukattu alamarum peru matar mazaik kaN,
	aNi vaLai munkai, Ay itaz maTan'tai
5	vAr mulai muRRattu n'Ul iTai vilagkinum,
	kavavup pulan'tu uRaiyum kazi perug kAmattu
	inpuRu n'ukarcciyin ciRan'tatu onRu il' ena
	anpAl mozin'ta en mozi koLLAy,
	poruL purivuNTa maruLi n'ejcE!
10	kariyAp pUvin periyOr Ara,
	azal ezu tittiyam aTutta yAmai
	n'izaluTai n'eTug kayam pukal vETTAagku,
	uLLutal Ompumati, ini n'I, muL eyiRRu,
	cil mozi, arivai tOLE pal malai
15	vev aRai marugkin viyan curam,
	evvam kUra, iRan'tanam, yAmE.

362. kuRijci

	pAmpuTai viTara pani n'Ir iTTut tuRait
	tEm kalan'tu ozuka, yARu n'iRain'tanavE;
	veN kOTTu yAnai poruta puN kUrn'tu,
	paig kaN valliyam kal aLaic ceRiya,
5	murukku arumpu anna vaL ukir vayap piNavu
	kaTi koLa, vazagkAr ARE; AyiTai
	elliRRu ennAn, ven vEl En'ti,
	n'acai tara van'ta n'annarALan
	n'ejcu pazutAka, vaRuviyan peyarin,
10	inRu ippozutum yAn vAzalenE;
	evankol? vAzi, tOzi! n'am iTai mulaic
	cuNagku aNi muRRattu Aram pOlavum,
	cilampu n'ITu cOlaic citar tUgku n'aLippin
	ilagku veL aruvi pOlavum,
15	n'ilam koNTanavAl, tigkaL am katirE!

363. pAlai

	n'irai celal ivuLi viraivuTan kaTaii,
	akal iru vicumpil pakal celac cenRu,
	mazuku cuTar maNTilam mA malai maRaiya,
	pozutu kazi malarin, punaiyizai! cAay,
5	aNai aNain'tu inaiyai Akal kaNai araip
	pul ilai n'ellip pukar il pacug kAy
	kal atar marugkil kaTu vaLi utirppa,
	polam cey kAcin poRpat tAam
	attam n'aNNi, atar pArttu irun'ta
10	kolai veg koLkaik koTun' tozil maRavar
	ARu cel mAkkaL aru n'iRattu eRin'ta
	eHku uRu vizuppuN kUrn'tOr eytiya,
	vaLai vAyp parun'tin, vaL ukirc cEval
	kiLai taru teL viLi kezu muTaip payirum
15	innA vej curam iRan'tOr, munniya
	cey vinai valattar Aki, ivaN n'ayan'tu,
	eyta van'tanarE tOzi! mai ezil
	tuNai Er etir malar uNkaN
	piNai Er n'Okkam perug kavin koLavE.

364. mullai

	mAtiram putaiyap pAay, kAl vIzttu,
	ERuTaip peru mazai pozin'tena, avaltORu
	ATu kaLap paRaiyin vari n'uNal kaRagka,
	Ay pon avir izai tUkkiyanna
5	n'ITu iNark konRai kavin peRa, kATu uTan
	cuTar purai tOnRip putal talaik koLAa,
	mullai illamoTu malara, kalla
	paku vAyp paij cunai mA uNa malira,
	kAr toTagkinRE kAlai; kAtalar
10	vej cina vEn'tan viyan perum pAcaRai,
	venRi vETkaiyoTu n'ammum uLLAr;
	yAtu ceyvAmkol? tOzi! n'Otakak
	kolai kuRittanna mAlai
	tunaitaru pOztin, n'In'talO aritE!

365. pAlai

	akal vAy vAnam mAl iruL parappa,
	pakal ARRuppaTutta paiyen tORRamoTu
	cinaval pOkiya punkaN mAlai,
	atta n'aTukal AL ena utaitta
5	kAna yAnaik katuvAy vaL ukir,
	irum panai itakkaiyin, oTiyum AgkaN,
	kaTugkaN ATavar E muyal kiTakkai,
	varun'ar inmaiyin kaLaiyun'ark kANA
	enRUz vej curam tan'ta n'IyE
10	tuyar ceytu ARRAyAki, peyarpu, Agku
	uLLinai vAziya, n'ejcE! ven vEl
	mA vaN kazuvuL kAmUr AgkaN,
	pUtam tan'ta pori arai vEgkait
	taN kamaz putu malar n'ARum
15	am cil Oti Ay maTat takaiyE.

366. marutam

	tAz cinai marutam takai peRak kaviniya
	n'Ir cUz viyan kaLam poliya, pOrpu azittu,
	kaL Ar kaLamar pakaTu talai mARRi,
	kaTug kARRu eRiya, pOkiya turumpu uTan
5	kAyal ciRu taTik kaN keTap pAytalin,
	iru n'Irp parappin panit tuRaip paratavar
	tIm pozi veL uppuc citaitalin, cinaii,
	kazani uzavaroTu mARu etirn'tu, mayagki,
	iruj cERRu aLLal eRi ceruk kaNTu,
10	n'arai mUtALar kai piNi viTuttu,
	n'anai mutir tERal n'uLaiyarkku Iyum
	polam pUN evvi n'Izal anna,
	n'alam peRu paNait tOL, n'al n'utal arivaiyoTu,
	maNam kamaz taN pozil alki, n'erun'ai
15	n'I taR pizaittamai aRin'tu,
	kaluzn'ta kaNNaL, em aNagku annALE.