291. pAlai

	vAnam peyal vaLam karappa, kAnam
	ulaRi ilai ilavAka, pala uTan
	ERuTai Ayattu inam paci teRuppa,
	kayan aRa vaRan'ta kOTaiyoTu n'ayan aRap
5	peru varai n'ivan'ta marugkil, koTu varip
	puliyoTu porutu cinam ciRan'tu, valiyOTu
	uravuk kaLiRu otugkiya marugkil, parUup paral,
	ciRu pal minmini kaTuppa, evvAyum
	n'iRaivana imaikkum n'irampA n'IL iTai
10	eruvai iruj ciRai irIiya, viri iNart
	tAtu uN tumpi mural icai kaTuppa,
	pariyinatu uyirkkum ampinar, veruvara
	uvalai cUTiya talaiyar, kavalai
	Arttu, uTan arum poruL vavvalin, yAvatum
15	cAttu iTai vazagkAc cEN cimai atara
	ciRiyilai n'ellit tIm cuvait tiraL kAy
	utirvana tAam attam tavirvu inRu,
	puLLi am piNai uNIiya uLLi,
	aRu maruppu ozitta talaiya, tOl poti,
20	maRu maruppu iLag kOTu atirak kUum
	cuTar teRa varun'tiya aruj curam iRan'tu, Agku
	uLLinai vAziya, n'ejcE! pOtu enap
	pulam kamaz n'ARRattu irum pal kUn'tal,
	n'al ezil, mazaik kaN, n'am kAtali
25	mel iRaip paNaittOL viLagkum mAN kavinE.

292.kuRijci

	kURAy, ceyvatu tOzi! vERu uNarn'tu,
	annaiyum poruL ukuttu alamarum; men muRic
	ciRu kuLaku arun'tu, tAy mulai peRAa,
	maRi kolaip paTuttal vENTi, veRi puri
5	Etil vElan kOtai tuyalvarat
	tUgkum Ayin, atUum n'ANuval;
	ilagku vaLai n'ekizn'ta cellal; pulam paTarn'tu,
	iravin mEyal marUum yAnaik
	kAl val iyakkam oRRi, n'aTu n'AL,
10	varaiyiTaik kazutin van kaik kAnavan
	kaTu vicaik kavaNin eRin'ta ciRu kal
	uTu uRu kaNaiyin pOki, cAral
	vEgkai viri iNar citaRi, tEn citaiyUu,
	palavin pazattuL tagkum
15	malai kezu n'ATan maNavAkkAlE!

293. pAlai

	ilai ozittu ulaRiya pun talai ulavai
	valai valan'tanaiya Aka, pala uTan
	cilampi cUzn'ta pulam keTu vaippin,
	tukil Ay ceykaip pA virin'tanna
5	veyil avirpu n'uTagkum vev veg kaLari,
	kuyiR kaN anna kurUuk kAy muRRi,
	maNik kAcu anna mAl n'iRa irug kani,
	ukAay men cinai utirvana kaziyum
	vEnil vej curam tamiyar tAmE,
10	celpa enpa tOzi! yAmE,
	paNpu il kOvalar tAy pirittu yAtta
	n'ejcu amar kuzavi pOla, n'on'tu n'on'tu,
	innA mozitum enpa;
	en mayagkinarkol, n'am kAtalOrE?

294. mullai

	magkul mA mazai viN atirpu muzagki,
	tuLLup peyal kazin'ta pinRai, pukaiuRap
	puLLi n'uN tuvalai pUvakam n'iRaiya,
	kAtalarp pirin'ta kaiyaRu makaLir
5	n'Ir vAr kaNNin karuviLai malara,
	tuyt talaip pUvin putal ivar Igkai
	n'eyt tOyttanna n'Ir n'anai am taLir
	iru vakir IruLin Iriya tuyalvara,
	avaraip paim pUp payila, akal vayal
10	katir vAr kAy n'el kaTku initu iRaijca,
	citar cinai tUgkum aRcira arai n'AL,
	'kAy cina vEn'tan pAcaRai n'ITi,
	n'am n'Oy aRiyA aRanilALar
	in' n'ilai kaLaiya varukuvarkol?' ena
15	AnAtu eRitarum vATaiyoTu
	n'OnEn tOzi! en tanimaiyAnE.

295. pAlai

	n'ilam n'Ir aRRu n'IL cunai vaRappa,
	kunRu kOTu akaiya, kaTug katir teRutalin,
	enRUz n'ITiya vEy paTu n'anan'talai,
	n'ilavu n'iRa maruppin perug kai cErtti,
5	vEgkai venRa veru varu paNait tOL
	Ogkal yAnai uyagki, matam tEmpi,
	pal mara oru ciRaip piTiyoTu vatiyum
	kalluTai atara kAnam n'In'ti,
	kaTal n'Ir uppin kaNam cAl umaNar
10	uyagku pakaTu uyirppa acaii, murampu iTittu
	akal iTam kuzitta akal vAyk kUval
	ARu cel vampalar acai viTa URum,
	puTaiyal am kazaR kAl pulli kunRattu,
	n'aTai arug kAnam vilagki, n'On cilait
15	toTai amai pakazit tuvanRu n'ilai vaTukar,
	pizi Ar makizar, kali ciRan'tuArkkum
	mozi peyar tEem iRan'tanar Ayinum,
	pazi tIr mAN n'alam tarukuvarmAtO
	mArip pittikattu Ir itaz puraiyum
20	am kaluz koNTa ceg kaTai mazaik kaN,
	maNam kamaz aimpAl, maTan'tai! n'in
	aNagku n'ilaipeRRa taTa men tOLE.

296. marutam

	kOtai iNara, kuRug kAl, kAjcip
	pOtu aviz n'aRun' tAtu aNin'ta kUn'tal,
	ari matar mazaik kaN, mAayOLoTu
	n'erun'aiyum kamaz pozil tujci, inRum
5	peru n'Ir vaiyai avaLoTu ATi,
	pularA mArpinai van'tu n'inRu, emvayin
	karattal kUTumO maRRE? parappil
	pal mIn koLpavar mukan'ta ippi
	n'Ar ari n'aRavin makiz n'oTaik kUTTum
10	pEr icaik koRkaip porun'an, ven vEl
	kaTum pakaTTu yAnai n'eTun' tEr ceziyan,
	malai purai n'eTu n'akark kUTal n'ITiya
	malitaru kampalai pOla,
	alar AkinRu, atu palar vAyp paTTE.

297. pAlai

	pAnAT kagkulum, perum pun mAlaiyum,
	AnA n'OyoTu azi paTark kalagki,
	n'amvayin inaiyum iTumpai kaimmika,
	ennai AkumO, n'ejcE! n'am vayin
5	irug kavin illAp perum pun tATi,
	kaTugkaN, maRavar pakazi mAyttena,
	marugkul n'uNukiya pEem mutir n'aTukal,
	peyar payam paTarat tOnRu kuyil ezuttu
	iyaipuTan n'OkkalcellAtu, acaivuTan
10	ARu cel vampalar viTTanar kaziyum
	cUr mutal irun'ta Omai am puRavin,
	n'Ir muL vElip pulavu n'ARu munRil,
	ezutiyanna koTi paTu verukin
	pULai anna pogku mayirp piLLai,
15	mati cUz mInin, tAy vazippaTUum
	ciRukuTi maRavar cEk kOL taNNumaikku
	eruvaic cEval iruj ciRai peyarkkum
	veru varu kAnam, n'ammoTu,
	'varuval' enROL makiz maTa n'OkkE?

298. kuRijci

	payam kezu tiruvin pal katir jAyiRu
	vayagku tozil tarIiyar, valan Erpu viLagki,
	malku kaTal tOnRiyAgku, malku paTa,
	maNi maruL mAlai, malarn'ta vEgkai
5	oN taLir avir varum oli kezu peruj cinait
	taN tuLi acaivaLi taivarum n'ATa!
	konRu cinam taNiyAtu, venRu muraN cAmpAtu,
	irum piTit tozutiyin inam talaimayagkAtu,
	perum peyaR kaTAam cerukki, vaLa malai
10	irug kaLiRu iyalvarum perug kATTu iyavin,
	Ar iruL tumiya veL vEl En'ti,
	tAz pUg kOtai Utu vaNTu irIi,
	men piNi avizn'ta arai n'AL iravu, ivaN
	n'I van'tataninum, initu AkinRE
15	tUval kaLLin tunai tEr, en'tai
	kaTiyuTai viyal n'akar OmpinaL uRaiyum
	yAy aRivuRutal ajci, pAnAL,
	kAval n'ejcamoTu kAmam ceppEn,
	yAn n'in koTumai kURa, n'inaipu Agku,
20	inaiyal vAzi, tOzi! n'at tuRan'tavar
	n'ITalar Aki varuvar, vallena;
	kagkul uyavut tuNai Akiya
	tujcAtu uRaivi ivaL uvan'tatuvE!

299. pAlai

	ellaiyum iravum, vinaivayin pirin'ta
	munnam, mun uRupu aTaiya uLLiya
	pati maRan'tu uRaital vallinam Ayinum,
	atu maRan'tu uRaital aritu AkinRE
5	kaTu vaLi eTutta kAl kazi tEkkilai
	n'eTu viLip parun'tin veRi ezun'tAgku,
	vicumpu kaN putaiyap pAay, pala uTan
	akal iTam cellun'ar aRivu keTat tAay,
	kavalai karakkum kATu akal attam,
10	cey poruL marugkin celavu tanakku uraittena,
	vaiku n'ilai matiyam pOla, paiyena,
	pulampu koL avalamoTu, putuk kavin izan'ta
	n'alam kezu tirumukam iRaijci, n'ilam kiLaiyA,
	n'IroTu poruta Ir itaz mazaik kaN
15	ikutaru teN pani Akattu uRaippa,
	kAl n'ilaicellAtu, kazi paTark kalagki,
	n'A n'aTukkuRRa n'avilAk kiLaviyoTu,
	aRal maruL kUn'talin maRaiyinaL,' tiRal mANTu
	tirun'tukamAtO, n'um celavu' ena veytu uyirA,
20	paruvaral evvamoTu azin'ta
	peru vituppuRuvi pEtuRu n'ilaiyE.

300. n'eytal

	n'AL valai mukan'ta kOL val paratavar
	n'uNagku maNal AgkaN uNagkap peymmAr,
	paRi koL koLLaiyar, maRuka ukka
	mIn Ar kurukin kAnal am perun' tuRai,
5	ellai taN pozil cenRena, celIiyar,
	tEr pUTTu ayara Eey, vAr kOl
	ceRi toTi tirutti, pARu mayir n'Ivi,
	'cel ini, maTan'tai! n'in tOziyoTu, manai' enac
	colliyaaLavai, tAn peritu kaluzn'tu,
10	tIgku AyinaL ivaL Ayin, tAgkAtu,
	n'otumalar pOlap piriyin, katumenap
	piRitu onRu Akalum ajcuval; atanAl,
	cENin varun'ar pOlap pENA,
	irug kali yANar em ciRu kuTit tOnRin,
15	val etir koNTu, mellitin vinaii,
	'tuRaiyum mAnRanRu pozutE; cuRavum
	Otam malkalin, mARu AyinavE;
	ellinRu; tOnRal! cellAtIm' ena,
	emar kuRai kURat tagki, EmuRa,
20	iLaiyarum puraviyum inpuRa, n'Iyum
	il uRai n'al virun'tu ayartal
	ollutum, peruma! n'I n'alkutal peRinE.