erumai

36. marutam
pakuvAy varAaR pal vari irum pOttuk
koTu vAy irumpin kOL irai tuRRi,
Ampal mel aTai kiziya, kuvaLaik
kUmpu viTu pal malar citaiyap pAyn'tu, ezun'tu,
5
aril paTu vaLLai Ay koTi mayakki,
tUNTil vETTuvan vAgka vArAtu,
kayiRu iTu katac cEp pOla, matam mikku,
n'AL, kayam uzakkum pUk kEz Ura!
varu punal vaiyai vAr maNal akan tuRai,
10
tiru marutu Ogkiya viri malark kAvil,
n'aRum pal kUn'taR kuRun' toTi maTan'taiyoTu
vatuvai ayarn'tanai enpa. alarE,
koy cuval puravik koTit tErc ceziyan
AlagkAnattu akan talai civappa,
15
cEral, cempiyan, cinam kezu titiyan,
pOr val yAnaip polam pUN ezini,
n'Ar ari n'aRavin erumaiyUran,
tEm kamaz akalattup pularn'ta cAn'tin
irugkO vENmAn, iyal tErp porun'an, enRu
20
ezuvar n'al valam aTagka, oru pakal
muraicoTu veNkuTai akappaTuttu, urai cela,
konRu, kaLamvETTa jAnRai,
venRi koL vIrar Arppinum peritE!

talaimakaL parattaiyiR pirin'tu van'ta talaimakanoTu pulan'tu colliyatu. - maturai n'akkIrar

115. pAlai
aziyA vizavin, ajcuvaru mUtUrp
pazi ilar Ayinum, palar puRagkURum
ampal ozukkamum Akiyar; vej col
cEriam peNTir eLLinum eLLuka;
5
n'uN pUN erumai kuTa n'ATTanna en
Ayn'alam tolaiyinum tolaika; enRum
n'Oy ilarAka, n'am kAtalar vAy vAL
evvi vIzn'ta ceruvil pANar
kaitozu marapin mun parittu iTUup pazicciya
10
vaL uyir vaNar maruppu anna, oL iNarc
cuTarp pUg konRai UzuRu viLain'eRRu
aRaimicait tAam atta n'ILiTai,
piRai maruL vAn kOTTu aNNal yAnai,
cinam miku munpin, vAm mAn, ajci
15
inam koNTu oLikkum ajcuvaru kavalai,
n'annar Aykavin tolaiya, cEy n'ATTu,
n'am n'Ittu uRaiyum poruTpiNik
kUTAmaiyin, n'ITiyOrE.

piriviTai vaRpuRukkum tOzikkut talaimakaL colliyatu. - mAmUlanAr

253. pAlai
'vaikaltORum pacalai pAya, en
meyyum perumpiRitu AkinRu, oyyena;
annaiyum amarA mukattinaL; alarE,
vATAp pUvin kogkar OTTi,
5
n'ATu pala tan'ta pacum pUT pANTiyan
pon mali n'eTu n'akark kUTal ATiya
in icai Arppinum peritE; Igku yAn
cila n'AL uyyalen pOnm' enap pala n'inain'tu,
Azal vAzi, tOzi! vaTAatu,
10
Ar iruL n'aTu n'AL Er A uyya,
pakai munai aRuttup pal inam cAay,
kaNamcAl kOvalar n'eTu viLip payir aRin'tu,
inam talait tarUum tuLagku imil n'al ERRut
tazUup piNar eruttam tAzap pUTTiya
15
am tUmpu akal amaik kamajcelap peyta
tuRu kAz valciyar tozu aRai vauvi,
kanRuTaip peru n'irai manRu n'iRai tarUum
n'ErA van tOL vaTukar peru makan,
pEr icai erumai n'al n'ATTu uLLatai
20
ayiri yARu iRan'tanar Ayinum, mayar iRan'tu
uLLupatilla tAmE paNait tOL,
kurumpai men mulai, arumpiya cuNagkin,
n'ucuppu azittu olivarum tAz irug kUn'tal,
mAka vicumpin tilakamoTu patitta
25
tigkaL anna n'in tiru mukattu,
oN cUTTu avir kuzai malain'ta n'OkkE.

talaimakan pirivinkaN vERupaTTa talaimakaTkut tOzi colliyatu. - n'akkIrar