91. pAlai

	viLagkupakal utaviya pal katir jAyiRu
	vaLam kezu mA malai payam keTat teRutalin,
	aruvi AnRa peru varai marugkil
	cUrc cunai tuzaii n'Irppayam kANAtu,
5	pAci tinRa paig kaN yAnai
	Oy pacip piTiyoTu orutiRan oTugka,
	vEy kaN uTain'ta veyil avir n'anan'talai
	arum poruL vETkaiyin akanRanar Ayinum,
	perum pEr anpinar tOzi!-irug kEz
10	iralai cEkkum, paral uyar patukkaik
	kaTugkaN mazavar kaLavu uzavu ezun'ta
	n'eTug kAl Acini oTugkATTu umpar,
	vicipiNi muzavin kuTTuvan kAppa,
	paci ena aRiyAp paNai payil irukkai,
15	taTa maruppu erumai tAmarai munaiyin,
	muTam mutir palavin kozu n'izal vatiyum,
	kuTan'ATu peRinum taviralar
	maTamAn n'Okki! n'in mAN n'alam maRan'tE.

212. kuRijci

	tA il n'al pon taiiya pAvai
	viN tavaz iLa veyiR koNTu n'inRanna,
	miku kavin eytiya, tokukural aimpAl,
	kiLaiaril n'ANaR kizagku maNaRku InRa
5	muLai Oranna muL eyiRRut tuvar vAy,
	n'ayavan taivarum cevvazi n'al yAz
	icai Orttanna in tIm kiLavi,
	aNagku cAl arivaiyai n'acaii, perug kaLiRRu
	inam paTi n'Irin kalagkiya pozutil,
10	peRal arug kuraiyaL ennAy, vaikalum,
	innA aruj curam n'In'ti, n'IyE
	ennai innaR paTuttanai; minnu vacipu
	uravuk kAr kaTuppa maRali main'tuRRu,
	viravu mozik kaTTUr vENTuvazik koLIi,
15	paTai n'ilA ilagkum kaTal maruL tAnai
	maTTu aviz teriyal maRap pOrk kuTTuvan
	poru muraN peRAatu vilagku cinam ciRan'tu,
	ceruc cey munpoTu mun'n'Ir muRRi,
	Ogkutiraip pauvam n'Igka OTTiya
20	n'Ir mAN eHkam n'iRattuc cenRu azun'tak
	kUr matan aziyarO n'ejcE! AnAtu
	eLiyaL allOT karuti,
	viLiyA evvam talait tan'tOyE.

270. n'eytal

	irug kazi malarn'ta vaL itaz n'Ilam,
	pulAal maRukin ciRukuTip pAkkattu
	ina mIn vETTuvar, jAzaloTu milaiyum
	mel am pulampa! n'ekizn'tana, tOLE;
5	cEyiRAt tuzan'ta n'urai pitirp paTu tirai
	parAaraip punnai vAgku cinait tOyum
	kAnal am perun' tuRai n'Okki, ivaLE,
	koy cuvaR puravik kai vaN kOmAn
	n'al tErk kuTTuvan kazumalattu anna,
10	am mA mEni tol n'alam tolaiya,
	tujcAk kaNNaL alamarum; n'IyE,
	kaTavuL maratta muL miTai kuTampaic
	cEvaloTu puNarAc ciRu karum pETai
	innAtu uyagkum kagkulum,
15	n'um Ur uLLuvai; n'OkO, yAnE.

290. n'eytal

	kuTumik kokkin paig kAR pETai,
	iruj cERRu aLLal n'AT pulam pOkiya
	kozu mIn valcip pun talaic ciRAar,
	n'uN jAN av valaic cEval paTTena,
5	alkuRu pozutin melku irai micaiyAtu,
	paital piLLai tazIi, oyyena,
	am kaN peNNai anpuRa n'aralum
	ciRu pal tol kuTip peru n'Irc cErppan,
	kazi cEr punnai azi pUg kAnal,
10	taNavA n'ejcamoTu tamiyan van'tu, n'am
	maNavA munnum evanO tOzi!
	veN kOTTu yAnai viRaR pOrk kuTTuvan
	teN tiraip parappin toNTi muntuRai,
	curumpu uNa malarn'ta perun' taN n'eytal
15	maNi Er mAN n'alam orIi,
	pon n'Er vaNNam koNTa en kaNNE?

376. marutam

	cellal, makizn'a! n'iR cey kaTan uTaiyenman
	kallA yAnai kaTi punal kaRRena,
	mali punal poruta marutu Ogku paTappai,
	oli katirk kazani, kazAar muntuRai,
5	kali koL cuRRamoTu karikAl kANa,
	taN patam koNTu, tavirn'ta in icai
	oN poRip punai kazal cEvaTip puraLa,
	karug kaccu yAtta kANpin av vayiRRu,
	irum polam pANTil, maNiyoTu teLirppa,
10	punal n'ayan'tu ATum atti aNi n'ayan'tu,
	kAviri koNTu oLittAgkum annO!
	n'umvayin pulattal cellEm; emvayin
	pacan'tanRu, kANTicin n'utalE; acumpin
	am tUmpu vaLLai azaR koTi mayakki,
15	vaN tOTTu n'ellin vAgku pIL viriya,
	tuyt talai muTagku iRAt teRikkum, poRpuTaik
	kuragkuuLaip puravik kuTTuvan
	maran'tai anna, en n'alam tan'tu cenmE!