1. pAlai

	'vaNTu paTat tatain'ta kaNNi, oN kazal,
	uruvak kutirai mazavar OTTiya
	murukan n'aR pOr n'eTu vEL Avi,
	aRukOTTu yAnaip potini AgkaN,
5	ciRu kArOTan payinoTu cErttiya
	kal pOl piriyalam' enRa coltAm
	maRan'tanarkollO tOzi! ciRan'ta
	vEy maruL paNait tOL n'ekiza, cEy n'ATTup
	polagkala veRukkai tarumAr n'ilam paka,
10	azal pOl vegkatir paitu aRat teRutalin,
	n'izal tEyn'tu ulaRiya maratta; aRai kAypu,
	aRun'Irp paij cunai Am aRap pulartalin,
	uku n'el poriyum vemmaiya; yAvarum
	vazagkun'ar inmaiyin, vauvun'ar maTiya,
15	curam pullenRa ARRa; alagku cinai
	n'Ar il murugkai n'aviral vAn pUc
	cUral am kaTu vaLi eTuppa, AruRRu,
	uTai tiraip pitirvin pogki, mun
	kaTal pOl tOnRala kATu iRan'tOrE?

35. pAlai

	InRu puRan'tan'ta emmum uLLAL,
	vAn tOy ijci n'al n'akar pulampa
	tani maNi iraTTum tALuTaik kaTikai,
	n'uzai n'uti n'eTu vEl, kuRum paTai, mazavar
5	munai At tan'tu, murampin vIztta
	vil Er vAzkkai vizut toTai maRavar
	val AN patukkaik kaTavuT pENmAr,
	n'aTukal pIli cUTTi, tuTippaTuttu,
	tOppik kaLLoTu turUup pali koTukkum
10	pOkku arug kavalaiya pulavu n'ARu aruj curam
	tuNin'tu, piRaL AyinaL Ayinum, aNin'tu aNin'tu,
	Arva n'ejcamoTu Ay n'alan aLaii, tan
	mArpu tuNaiyAkat tuyiRRukatilla
	tujcA muzavin kOvaR kOmAn
15	n'eTun' tErk kAri koTugkAl muntuRai,
	peNNai am pEriyARRu n'uN aRal kaTukkum
	n'eRi irug katuppin en pEtaikku,
	aRiyAt tEettu ARRiya tuNaiyE!

91. pAlai

	viLagkupakal utaviya pal katir jAyiRu
	vaLam kezu mA malai payam keTat teRutalin,
	aruvi AnRa peru varai marugkil
	cUrc cunai tuzaii n'Irppayam kANAtu,
5	pAci tinRa paig kaN yAnai
	Oy pacip piTiyoTu orutiRan oTugka,
	vEy kaN uTain'ta veyil avir n'anan'talai
	arum poruL vETkaiyin akanRanar Ayinum,
	perum pEr anpinar tOzi!-irug kEz
10	iralai cEkkum, paral uyar patukkaik
	kaTugkaN mazavar kaLavu uzavu ezun'ta
	n'eTug kAl Acini oTugkATTu umpar,
	vicipiNi muzavin kuTTuvan kAppa,
	paci ena aRiyAp paNai payil irukkai,
15	taTa maruppu erumai tAmarai munaiyin,
	muTam mutir palavin kozu n'izal vatiyum,
	kuTan'ATu peRinum taviralar
	maTamAn n'Okki! n'in mAN n'alam maRan'tE.

101. pAlai

	amma vAzi, tOzi! 'immai
	n'anRu cey marugkil tItu il' ennum
	tonRupaTu pazamozi inRu poyttanRukol?
	takar maruppu Eyppac cuRRupu, curin'ta
5	cuval mAy pittai, ceg kaN, mazavar
	vAyp pakai kaTiyum maNNoTu kaTun' tiRal
	tIp paTu ciRu kOl villoTu paRRi,
	n'urai teri mattam koLIi, n'iraip puRattu
	aTi putai toTutOl paRaiya Eki,
10	kaTi pulam kavarn'ta kanRuTaik koLLaiyar,
	inam talaipeyarkkum n'anan'talaip perug kATTu,
	akal iru vicumpiRku OTam pOla,
	pakaliTai n'inRa pal katir jAyiRRu
	uruppu avirpu uLariya cuzanRu varu kOTai,
15	pun kAl murugkai Uz kazi pal malar,
	taN kAr Aliyin, tAvana utirum
	pani paTu pal malai iRan'tOrkku
	munitaku paNpu yAm ceytanROilamE!

119. pAlai

	'n'utalum tOLum, titalai alkulum,
	vaNNamum, vanappum, variyum, vATa
	varun'tuvaL, ivaL' enat tirun'tupu n'Okki,
	'varaivu n'anRu' ennAtu akalinum, avar vaRitu,
5	ARu cel mAkkaL aRutta piraNTai,
	ERu peRu pAmpin pain' tuNi kaTuppa,
	n'eRi ayal tiragkum attam, veRi koLa,
	umaN cAttu iRan'ta ozi kal aTuppil
	n'On cilai mazavar Un puzukku ayarum
10	curan vazakku aRRatu ennAtu, uram ciRan'tu,
	n'eytal uruvin aitu ilagku akal ilai,
	toTai amai pIlip polin'ta kaTikai,
	maTai amai tiN curai, mAk kAz vEloTu
	taNi amar azuvam tammoTu tuNaippa,
15	tuNikuvarkollO tAmE tuNikoLa
	maRap puli uzan'ta vaci paTu cenni
	uRun'Oy varuttamoTu uNIiya maNTi,
	paTi muzam UnRiya n'eTu n'al yAnai
	kai tOyttu uyirkkum vaRuj cunai,
20	mai tOy cimaiya, malaimutal ARE?

127. pAlai

	ilagku vaLai n'ekizac cAay, alkalum,
	kalagkuajar uzan'tu, n'Am ivaN oziya
	valam paTu muraciR cEralAtan
	mun'n'Ir OTTik kaTampu aRuttu, imayattu
5	munnOr maruLa vaNagkuvil poRittu,
	n'al n'akar maran'tai muRRattu onnAr
	paNi tiRai tan'ta pATucAl n'ankalam
	poncey pAvai vayiramoTu Ampal
	onRu vAy n'iRaiyak kuvaii, anRu avaN
10	n'ilam tinat tuRan'ta n'itiyattu anna
	oru n'AL oru pakaR peRinum, vazin'AL
	tagkalar vAzi, tOzi! ceg kOR
	karug kAl marAttu vAal mel iNar
	curin'tu vaNar pittai poliyac cUTi,
15	kallA mazavar vil iTam tazIi,
	varun'arp pArkkum veruvaru kavalai
	mozi peyar tEettar Ayinum,
	pazi tIr kAtalar cenRa n'ATTE.

129. pAlai

	'uLLal vENTum ozin'ta pin' ena
	n'aLLen kagkul n'aTugku tuNai Ayavar
	n'in maRan'tu uRaital yAvatu? 'pul maRain'tu
	alagkal vAn kazai utirn'el n'Okki,
5	kalai piNai viLikkum kAnattu AgkaN,
	kal cErpu irun'ta katuvAyk kurampait
	tAzimutaR kalitta kOzilaip paruttip
	poti vayiRRu iLag kAy pETai UTTi,
	pOkil piLan'tiTTa pogkal veN kAz
10	n'alkUr peNTir alkaR kUTTum
	kalagkumunaic cIRUr kai talaivaippa,
	kozuppu A tinRa kUrm paTai mazavar,
	ceruppuTai aTiyar, teN cunai maNTum
	aruj curam ariyaalla; vAr kOl
15	tirun'tu izaip paNait tOL, tEn n'ARu katuppin,
	kuvaLai uNkaN, ivaLoTu celaRku' ena
	n'ejcu vAy avizn'tanar kAtalar
	am cil Oti Ayizai! n'amakkE.

187. pAlai

	tOL pulampu akalat tujci, n'ammoTu
	n'AL pala n'ITiya karan'tu uRai puNarcci
	n'AN uTaimaiyin n'Igki, cEy n'ATTu
	arum poruL valitta n'ejcamoTu Eki,
5	n'am uyarvu uLLinar kAtalar kaRuttOr
	tem munai citaitta, kaTum parip puravi,
	vAr kazaR polin'ta vankaN mazavar
	pUn' toTai vizavin talai n'AL anna,
	taru maNal jemiriya tiru n'akar muRRam
10	pulampuRumkollO tOzi! cEN Ogku
	alan'talai jemaiyattu AL il AgkaN,
	kal cErpu irun'ta cil kuTip pAkkattu,
	el virun'tu ayara, Emattu alki,
	manai uRai kOzi aNal tAzpu anna
15	kavai oN taLira karugkAl yAattu
	vEnil veRpin kAnam kAya,
	munai ezun'tu OTiya keTu n'ATTu Ar iTai,
	panai veLiRu arun'tu paig kaN yAnai
	oN cuTar mutirA iLag katir amaiyattu,
20	kaNpaTu pAyal kai oTugku acai n'ilai
	vAL vAyc cuRavin panit tuRai n'In'ti,
	n'AL vETTu ezun'ta n'ayan il paratavar
	vaiku kaTal ampiyin tOnRum
	mai paTu mA malai vilagkiya curanE?

249. pAlai

	amma vAzi, tOzi! pal n'AL
	iv Ur ampal evanO? vaL vAr
	vici piNittu yAtta ari kOl teN kiNai
	in kural akavun'ar irappin, n'AToRum
5	pon kOTTuc ceRittu, polan'tAr pUTTi,
	cAn'tam putaitta En'tu tuLagku ezil imil
	ERu mun'tuRuttu, cAl patam kuvaii,
	n'eTun' tEr kaLiRRoTu curakkum koTum pUN
	pal vEl mucuNTai vEmpi anna en
10	n'al ezil iLa n'alam tolaiyinum, n'alkAr
	pal pUg kAnattu alku n'izal acaii,
	tOkait tUvit toTait tAr mazavar
	n'Aku A vIzttu, tiRRi tinRa
	pulavuk kaLam tuzaiiya tukaL vAyk kOTai
15	n'IL varaic cilampin irai vETTu ezun'ta
	vAL vari vayap puli tINTiya viLi cettu,
	vERu vERu kavalaiya ARu parin'tu, alaRi,
	uzai mAn ina n'irai OTum
	kazai mAy piRagkal malai iRan'tOrE.

269. pAlai

	toTi tOL ivarka! evvamum tIrka!
	n'eRi irug katuppin kOtaiyum punaika!
	ERuTai ina n'irai peyara, peyarAtu,
	ceRi curai veL vEl mazavart tAgkiya
5	taRukaNALar n'al icai n'iRumAr,
	piTi maTin'tanna kuRumpoRai marugkin,
	n'aTTa pOlum n'aTAa n'eTug kal
	akal iTam kuyinRa pal peyar maNNi,
	n'aRu virai majcaL Irm puRam poliya
10	ampu koNTu aRutta Ar n'Ar urivaiyin
	cem pUg karan'tai punain'ta kaNNi
	vari vaNTu Arppac cUTTi, kazaR kAl
	iLaiyar patip peyarum aruj curam iRan'tOr,
	taii n'inRa taN peyal kaTai n'AL,
15	polagkAcu n'iraitta kOTu En'tu alkul
	n'alam kEz mAk kural kuzaiyoTu tuyalvara,
	pATu Urpu ezutarum paku vAy maNTilattu
	vayir iTaippaTTa teL viLi iyampa,
	vaNTaR pAvai uNtuRait tarIi,
20	tiru n'utal makaLir kuravai ayarum
	peru n'Irk kAnal tazIiya irukkai,
	vANan ciRukuTi, vaNagku katir n'ellin
	yANart taN paNaip pOtu vAy avizn'ta
	oN ceg kazun'Ir anna, n'in
25	kaN pani tuTaimAr van'tanar, virain'tE.

309. pAlai

	vaya vAL eRin'tu, villin n'Ikki,
	payam n'irai tazIiya kaTugkaN mazavar,
	ampu cEN paTuttu vanpulattu uyttena,
	teyvam cErn'ta parArai vEmpil
5	kozuppu A eRin'tu, kuruti tUuy,
	pulavup puzukku uNTa vAn kaN akal aRai,
	kaLiRu puRam urijciya karug kAl ilavattu
	aralai veN kAz Aliyin tAam
	kATu mika n'eTiya ennAr, kOTiyar
10	perum paTaik kutirai, n'al pOr, vAnavan
	tirun'tu kazaR cEvaTi n'acaiip paTarn'tAgku,
	n'Am celin, evanO tOzi! kAmpin
	vanai kazai uTain'ta kavaN vicaik kaTi iTik
	kanai cuTar amaiyattu vazagkal cellAtu,
15	iravup punam mEyn'ta uravuc cina vEzam
	taN peru paTAar verUum
	kunRu vilagku iyavin, avar cenRa, n'ATTE?

337. pAlai

	'cAral yAattu uyar cinai kuzaitta
	mAri Irn' taLir anna mEni,
	pEr amar mazaik kaN, pulampu koNTu oziya,
	Igkup pirin'tu uRaital initu anRu; Akalin
5	avaNatu Aka, poruL' enRu, umaNar
	kaNa n'irai anna, pal kAl, kuRumpoRai,
	tUtu oy pArppAn maTi veL Olaip
	paTaiyuTaik kaiyar varu toTar n'Okki,
	'uNNA marugkul innOn kaiyatu
10	pon Akutalum uNTu' ena, konnE
	taTin'tu uTan vIztta kaTugkaN mazavar,
	tiRan il citAar vaRumai n'Okki,
	ceg kOl ampinar kain' n'oTiyAp peyara,
	koTi viTu kurutit tUgku kuTar kaRIi,
15	vari maral iyavin oru n'ari ERRai,
	veN paral imaikkum kaN paRi kavalai,
	kaLLi n'Izal kataRupu vatiya,
	mazai kaNmARiya veg kATTu Ar iTai,
	emiyam kazitan'tOyE pani iruL
20	perug kali vAnam talaiiya
	irug kuLir vATaiyoTu varun'tuvaL enavE!