15. pAlai

	em veg kAmam iyaivatu Ayin,
	meym mali perum pUN, cemmaR kOcar
	kommaiam pacug kAyk kuTumi viLain'ta
	pAkal Arkaip paRaik kaT pIlit
5	tOkaik kAvin tuLun'ATTu anna,
	vaRug kai vampalart tAgkum paNpin
	ceRin'ta cEric cemmal mUtUr,
	aRin'ta mAkkaTTu Akukatilla
	tOzimArum yAnum pulampa,
10	cUzi yAnaic cuTarp pUN n'annan
	pAzi anna kaTiyuTai viyal n'akarc
	ceRin'ta kAppu ikan'tu, avanoTu pOki,
	atta iruppai Ar kazal putup pUt
	tuytta vAya, tukaL n'ilam parakka,
15	konRai am cinaik kuzaRpazam kozuti,
	van kai eNkin vaya n'irai parakkum
	in tuNaip paTarn'ta koLkaiyoTu orAgku
	kunRa vEyin tiraNTa en
	men tOL ajjai cenRa ARE!

55. pAlai

	kAyn'tu celaR kanali kal pakat teRutalin,
	In'tu kuruku urukum enRUz n'IL iTai,
	uLi muka vem paral aTi varuttuRAlin,
	viLi muRai aRiyA vEy kari kAnam,
5	vayak kaLiRRu anna kALaiyoTu en makaL
	kazin'tataRku azin'tanROilenE! ozin'tu yAm
	Utu ulaik kurukin uL uyirttu, acaii,
	vEvatu pOlum veyya n'ejcamoTu
	kaNpaTai peREn, kanava oN paTaik
10	karikAl vaLavanoTu veNNip paRan'talaip
	porutu puN n'ANiya cEralAtan
	azi kaLa marugkin vAL vaTakkirun'tena,
	innA in urai kETTa cAnROr
	arum peRal ulakattu avanoTu celIiyar,
15	perumpiRitu AkiyAgku pirin'tu ivaN
	kAtal vENTi, eR tuRan'tu
	pOtalcellA en uyiroTu pulan'tE.

105. pAlai

	akal aRai malarn'ta arumpu mutir vEgkai
	oL ilait toTalai taii, mellena
	n'al varai n'ATan taRpArATTa
	yAgku vallun'aLkol tAnE tEm peytu,
5	maNi cey maNTai tIm pAl En'ti,
	InAt tAyar maTuppavum uNNAL,
	n'izaR kayattanna n'IL n'akar varaippin
	emmuTaic celvamum uLLAL, poym maruNTu,
	pan'tu puTaippanna pANip pal aTic
10	cil parik kutirai, pal vEl ezini
	keTal arun' tuppin viTutozil muTimAr,
	kanai eri n'aTan'ta kal kAy kAnattu
	vinai val ampin vizut toTai maRavar
	tEm pizi n'aRug kaL makizin, munai kaTan'tu,
15	vIgku men curaiya ERRinam tarUum
	mukai talai tiRan'ta vEniR
	pakai talaimaNan'ta pal atarc celavE?

195. pAlai

	'aruj curam iRan'ta en perun' tOT kuRumakaL
	tirun'tuvEl viTalaiyoTu varum' ena, tAyE,
	punai mAN ijci pUval UTTi,
	manai maNal aTuttu, mAlai n'ARRi,
5	uvan'tu, initu ayarum enpa; yAnum,
	mAn piNai n'Okkin maTa n'allALai
	InRa n'aTpiRku aruLAn Ayinum,
	in n'akai muRuval Ezaiyaip pal n'AL,
	kUn'tal vAri, n'ucuppu ivarn'tu, Ompiya
10	n'alam punai utaviyum uTaiyanmannE;
	aHtu aRikiRpinO n'anRuman tilla;
	aRuvai tOyum oru perug kuTumi,
	ciRu pai n'ARRiya pal talaik koTug kOl,
	Akuvatu aRiyum mutuvAy, vEla!
15	kURukamAtO, n'in kazagkin tiTpam;
	mARA varupani kaluzum kagkulil,
	AnAtu tuyarum em kaN initu paTIiyar,
	em manai mun'tuRat tarumO?
	tan manai uykkumO? yAtu avan kuRippE?

203. pAlai

	'uvakkun'aL Ayinum, uTalun'aL Ayinum,
	yAy aRin'tu uNarka' ennAr, tI vAy
	alar vinai mEval ampaR peNTir,
	'innaL inaiyaL, n'in makaL' ena, pal n'AL
5	enakku van'tu uraippavum, tanakku uraippu aRiyEn,
	'n'ANuvaL ivaL' ena, n'ani karan'tu uRaiyum
	yAn iv vaRu manai oziya, tAnE,
	'annai aRiyin, ivaN uRai vAzkkai
	enakku eLitu Akal il' ena, kazaR kAl
10	min oLir n'eTu vEl iLaiyOn munnuRa,
	pal malai aruj curam pOkiya tanakku, yAn
	annEn anmai n'an vAyAka,
	mAn atar mayagkiya malaimutal ciRu n'eRi
	veytu iTaiyuRAatu eyti, munnarp
15	pullen mA malaip pulampu koL cIRUr,
	cel virun'tu ARRi, tuccil irutta,
	n'unai kuzaittu alamarum n'occi
	manai kezu peNTu yAn AkukamannE!

207. pAlai

	aNagkuTai mun'n'Ir paran'ta ceRuvin
	uNagku tiRam peyarn'ta veN kal amiztam
	kuTa pula marugkin uymmAr, puL Orttup
	paTai amaittu ezun'ta peruj cey ATavar
5	n'iraip parap poRaiya n'araip puRak kazutaik
	kuRaik kuLampu utaitta kal piRaz iyavin,
	vej curam pOzn'ta, ajcuvaru kavalai,
	mijiRu Ar kaTAam karan'tu viTu kavuLa,
	veyil tina varun'tiya, n'ITu maruppu oruttal
10	piNar azi perug kai puraNTa kUval
	teN kaN uvarik kuRaik kuTa mukavai,
	aRanilALan tONTa, veytu uyirttu,
	piRain'utal viyarppa, uNTanaLkollO
	tEm kalan'tu aLaiiya tIm pAl En'tik
15	kUzai uLarn'tu mOzaimai kURavum,
	maRutta collaL Aki,
	veRutta uLLamoTu uNNAtOLE?

219. pAlai

	cIr kezu viyan n'akarc cilampu n'aka iyali,
	Orai AyamoTu pan'tu ciRitu eRiyinum,
	'vArAyO!' enRu Etti, pEr ilaip
	pakanRai vAl malar pani n'iRain'tatu pOl
5	pAl pey vaLLam cAlkai paRRi,
	'en pATu uNTanaiAyin, oru kAl,
	n'un'tai pATum uN' enRu UTTi,
	'piRan'tataRkoNTum ciRan'tavai ceytu, yAn
	n'alam punain'tu eTutta en polan'toTik kuRumakaL
10	aRanilALanoTu iRan'tanaL, ini' ena,
	maRan'tu amain'tu irAa n'ejcam n'OvEn
	'pon vArn'tanna vai vAl eyiRRuc
	cen'n'Ay verIiya pukar uzai oruttal
	pori arai viLavin pun puRa viLai puzal,
15	azal eRi kOTai tUkkalin, kOvalar
	kuzal ena n'inaiyum n'Ir il n'IL iTai,
	maTat takai meliyac cAay,
	n'aTakkumkol? ena, n'Oval yAnE.

220. n'eytal

	Urum cEriyum uTan iyain'tu alar eza,
	tEroTu maRukiyum, paNi mozi payiRRiyum,
	keTAat tIyin uru kezu cellUr,
	kaTAa yAnaik kuzUuc camam tataiya,
5	man marugku aRutta mazu vAL n'eTiyOn
	mun muyanRu aritinin muTitta vELvi,
	kayiRu arai yAtta kAN taku vanappin,
	arug kaTi n'eTun' tUN pOla, yAvarum
	kANalAkA mAN ezil Akam
10	uLLutoRum panikkum n'ejcinai, n'IyE
	n'eTum puRa n'ilaiyinai, varun'tinaiAyin,
	muzagku kaTal Otam kAlaik koTkum,
	pazam pal n'ellin UNUr AgkaN,
	n'OlA irum puL pOla, n'ejcu amarn'tu,
15	kAtal mARAk kAmar puNarcciyin,
	irug kazi mukan'ta ceg kOl av valai
	muTagku puRa iRavoTu ina mIn ceRikkum
	n'eTug katirk kazanit taN cAykkAnattu,
	yANart taN paNai uRum ena, kAnal
20	Ayam Ayn'ta cAy iRaip paNait tOL
	n'al ezil citaiyA Emam
	col init teyya, yAm teLiyumARE.

263. pAlai

	tayagku tiraip perug kaTal, ulaku tozat tOnRi,
	vayagku katir virin'ta, uru kezu maNTilam
	kayam kaN vaRappap pAay, n'al n'ilam
	payam keTat tirukiya paitu aRu kAlai,
5	vERu pal kavalaiya veruvaru viyan kATTu,
	ARu cel vampalar varu tiRam kANmAr,
	vil val ATavar mEl AL oRRi,
	n'ITu n'ilai yAattuk kOTu koL aruj curam
	koNTanan kazin'ta vankaN kALaikku,
10	avaL tuNivu aRin'tanen Ayin, annO!
	oLiRu vEl kOtai Ompik kAkkum
	vajci anna en vaLa n'akar viLagka,
	initinin puNarkkuven mannO tuni inRu
	tiru n'utal polin'ta en pEtai
15	varu mulai muRRattu EmuRu tuyilE!

275. pAlai

	Ogku n'ilait tAzi malkac cArtti,
	kuTai aTai n'Irin maTaiyinaL eTutta
	pan'tar vayalai, pan'tu eRin'tu ATi,
	iLamait takaimaiyai vaLa manaik kizatti!
5	'pitirvai n'Irai veN n'IRu Aka' ena,
	yAm taR kazaRug kAlai, tAn tan
	mazalai in col, kazaRal inRi,
	in uyir kalappak kURi, n'annutal
	peruj cORRu illattu orugku ivaN irAaL,
10	EtilALan kAtal n'ampi,
	tiraL arai iruppait toLLai vAn pUk
	kuruLai eNkin irug kiLai kavarum
	vem malai aruj curam, n'am ivaN oziya,
	iru n'ilan uyirkkum innAk kAnam,
15	n'erun'aip pOkiya peru maTat takuvi
	aitu akal alkul tazai aNik kUTTum
	kUzai n'occik kIzatu, en makaL
	cem puTaic ciRu viral varitta
	vaNTalum kANTirO, kaN uTaiyIrE?

315. pAlai

	'kUzaiyum kuRu n'eRik koNTana; mulaiyum
	cUzi men mukam ceppuTan etirina;
	peN tuNai cAnRanaL, ivaL' enap pal mAN
	kaN tuNai Aka n'Okki, n'erun'aiyum,
5	ayirttanRumannE, n'ejcam; peyarttum,
	aRiyAmaiyin ceRiyEn, yAnE;
	perum peyar vazuti kUTal anna tan
	arug kaTi viyal n'akarc cilampum kaziyAL,
	cENuRac cenRu, vaRuj cunaikku olki,
10	puRavuk kuyinRu uNTa pun kAy n'ellik
	kOTai utirtta kuvi kaN pacug kAy,
	aRu n'Ul paLigkin tuLaik kAcu kaTuppa,
	vaRu n'ilattu utirum attam, katumena,
	kUr vEl viTalai poyppap pOki,
15	cEkkuvaL kollOtAnE tEkkin
	akal ilai kavitta putal pOl kurampai,
	Un puzukku ayarum munRil,
	kAn kezu vAzn'ar ciRukuTiyAnE.

383. pAlai

	taR puran'tu eTutta eR tuRan'tu uLLAL,
	Urum cEriyum OrAgku alar eza,
	kATum kAnamum avanoTu tuNin'tu,
	n'ATum tEyamum n'ani pala iRan'ta
5	ciRu vankaNNikku Er tERuvar ena,
	vATinai vAziyO, vayalai! n'ALtoRum,
	pal kiLaik koTik kompu alamara malarn'ta
	alkultalaik kUTTu am kuzai utaviya,
	vinai amai varal n'Ir vizut toTi tattak
10	kamajcUl peru n'iRai tayagka mukan'tu koNTu,
	Ay maTak kaNNaL tAy mukam n'Okki,
	pey cilampu olippap peyarvanaL, vaikalum,
	Ara n'Ir UTTip purappOr
	yAr maRRup peRukuvai? aLiyai n'IyE!

396. marutam

	toTuttEn, makizn'a! cellal koTit tErp
	polam pUN n'annan punanATu kaTin'tena,
	yAz icai maRukin pAzi AgkaN,
	'ajcal' enRa Aay eyinan
5	ikal aTu kaRpin mijiliyoTu tAkki,
	tan uyir koTuttanan, colliyatu amaiyAtu;
	teRal arug kaTavuL munnart tERRi,
	mel iRai munkai paRRiya col iRan'tu,
	Arva n'ejcam talaittalai ciRappa, n'in
10	mArpu tarukallAy; piRan AyinaiyE;
	ini yAn viTukkuven allen; man'ti,
	pani vAr kaNNaL, pala pulan'tu uRaiya,
	aTun' tiRal atti ATu aNi n'acaii,
	n'eTu n'Irk kAviri koNTu oLittAgku, n'in
15	manaiyOL vavvalum ajcuval; cinaii,
	Ariyar alaRat tAkki, pEr icait
	tonRu mutir vaTavarai vaNagku vil poRittu,
	vej cina vEn'taraip piNittOn
	vajci anna, en n'alam tan'tu cenmE!