1. pAlai

	'vaNTu paTat tatain'ta kaNNi, oN kazal,
	uruvak kutirai mazavar OTTiya
	murukan n'aR pOr n'eTu vEL Avi,
	aRukOTTu yAnaip potini AgkaN,
5	ciRu kArOTan payinoTu cErttiya
	kal pOl piriyalam' enRa coltAm
	maRan'tanarkollO tOzi! ciRan'ta
	vEy maruL paNait tOL n'ekiza, cEy n'ATTup
	polagkala veRukkai tarumAr n'ilam paka,
10	azal pOl vegkatir paitu aRat teRutalin,
	n'izal tEyn'tu ulaRiya maratta; aRai kAypu,
	aRun'Irp paij cunai Am aRap pulartalin,
	uku n'el poriyum vemmaiya; yAvarum
	vazagkun'ar inmaiyin, vauvun'ar maTiya,
15	curam pullenRa ARRa; alagku cinai
	n'Ar il murugkai n'aviral vAn pUc
	cUral am kaTu vaLi eTuppa, AruRRu,
	uTai tiraip pitirvin pogki, mun
	kaTal pOl tOnRala kATu iRan'tOrE?

6. marutam

	ari pey cilampin Ampal am toTalai,
	aram pOz av vaLaip polin'ta munkai,
	izai aNi paNait tOL, aiyai tan'tai,
	mazai vaLam tarUum mA vaN tittan,
5	piNTa n'ellin uRan'tai AgkaN
	kazai n'ilai peRAak kAviri n'Ittam,
	kuzai mAN oL izai n'I veyyOLoTu,
	vEza veN puNai tazIi, pUziyar
	kayam n'ATu yAnaiyin mukan amarn'tAagku,
10	En'tu ezil Akattup pUn' tAr kuzaiya,
	n'erun'al ATinai, punalE; inRu van'tu,
	'Aka vana mulai arumpiya cuNagkin,
	mAcu il kaRpin, putalvan tAy!' ena,
	mAyap poymmozi cAyinai payiRRi, em
15	mutumai eLLal; aHtu amaikum tilla!
	cuTarp pUn' tAmarai n'Ir mutir pazanattu,
	am tUmpu vaLLai Ay koTi mayakki,
	vALai mEyn'ta vaL eyiRRu n'Irn'Ay,
	muL araip pirampin mUtaril ceRiyum,
20	pal vEl matti, kazAar anna em
	iLamai cenRu tavat tollaHtE;
	inimai evan ceyvatu, poymmozi, emakkE?

13. pAlai

	tan kaTaR piRan'ta muttin Aramum,
	munai tiRai koTukkum tuppin, tan malait
	teRal aru marapin kaTavuT pENi,
	kuRavar tan'ta can'tin Aramum,
5	iru pEr Aramum ezil peRa aNiyum
	tiru vIz mArpin tennavan maRavan
	kuziyil koNTa marAa yAnai
	moziyin uNarttum ciRu varai allatu,
	varai n'ilai inRi iravalarkku Iyum,
10	vaL vAy ampin, kOTaip porun'an
	paNNi taiiya payam kezu vELviyin,
	vizumitu n'ikazvatu Ayinum teRku Erpu,
	kazi mazai pozin'ta pozutu koL amaiyattu,
	cAyal in tuNai ivaT pirin'tu uRaiyin,
15	n'Oy inRAka ceyporuL! vayiRpaTa
	mAcu il tU maTi virin'ta cEkkai,
	kavavu inpuRAmaik kazika vaLa vayal,
	azal n'uti anna tOkai InRa
	kazani n'el In kavaimutal alagkal
20	n'irampu akan ceRuvil varampu aNaiyAt tuyalvara,
	pulampoTu van'ta pozutu koL vATai,
	ilagku pUg karumpin Er kazai irun'ta
	veN kuruku n'arala, vIcum
	n'uN pal tuvalaiya taN pani n'ALE!

40. n'eytal

	kAnal, mAlaik kazip pUk kUmpa,
	n'Il n'iRap perug kaTal pATu ezun'tu olippa,
	mIn Ar kurukin men paRait tozuti
	kuvai irum punnaik kuTampai cEra,
5	acai vaNTu Arkkum alkuRukAlai,
	tAzai taLarat tUkki, mAlai
	azitaka van'ta koNTaloTu kazi paTark
	kAmar n'ejcam kaiyaRupu inaiya,
	tuyaram ceytu n'am aruLAr Ayinum
10	aRAaliyarO avaruTaik kENmai!
	aLi inmaiyin avaN uRai munaii,
	vAraRkatilla tOzi! kazani
	veNNel arin'ar pinRait tatumpum
	taNNumai verIiya taTan' tAL n'Arai
15	ceRi maTai vayirin piLiRRi, peNNai
	akamaTal cEkkum tuRaivan
	in tuyil mArpil cenRa en n'ejcE!

44. mullai

	van'tu vinai muTittanan vEn'tanum; pakaivarum
	tam tiRai koTuttut tamar AyinarE;
	muraN ceRin'tirun'ta tAnai iraNTum
	onRu ena aRain'tana paNaiyE; n'in tEr
5	mun iyagku Urti pinnilai IyAtu,
	Urka, pAka! oru vinai, kaziya
	n'annan, ERRai, n'aRum pUN atti,
	tun arug kaTun' tiRaR kagkan, kaTTi,
	pon aNi valvil punRuRai, enRu Agku
10	anRu avar kuzIiya aLappu arug kaTTUr,
	parun'tu paTap paNNi, pazaiyan paTTena,
	kaNTatu n'OnAnAki, tiN tErk
	kaNaiyan akappaTa, kazumalam tan'ta
	piNaial am kaNNip perum pUT cenni
15	azumpil anna aRAa yANar,
	pazam pal n'ellin pal kuTip paravai,
	pogkaTi paTikayam maNTiya pacu miLai,
	taN kuTavAyil annOL
	paNpuTai Akattu in tuyil peRavE!

46. marutam

	cERRu n'ilai munaiiya ceg kaT kArAn
	Ur maTi kagkulil, n'On taLai parin'tu,
	kUr muL vEli kOTTin n'Ikki,
	n'Ir mutir pazanattu mIn uTan iriya
5	am tUmpu vaLLai mayakki, tAmarai
	vaNTu Utu pani malar Arum Ura!
	yAraiyO? n'iR pulakkEm. vAruRRu,
	uRai iRan'tu, oLirum tAz irug kUn'tal,
	piRarum, oruttiyai n'am manait tan'tu,
10	vatuvai ayarn'tanai enpa. aHtu yAm
	kUREm. vAziyar, en'tai! ceRun'ar
	kaLiRuTai aruj camam tataiya n'URum
	oLiRu vAT tAnaik koRRac ceziyan
	piNTa n'ellin aLLUr anna en
15	oN toTi n'ekizinum n'ekizka;
	cenRi, peruma! n'iR takaikkun'ar yArO?

60. n'eytal

	perug kaTaR parappil cEyiRA n'aTugka,
	koTun' tozil mukan'ta ceg kOl av valai
	n'eTun' timil toziloTu vaikiya tan'taikku,
	uppu n'oTai n'ellin mUral veN cORu
5	ayilai tuzan'ta am puLic corin'tu,
	kozumIn taTiyoTu kuRumakaL koTukkum
	tiN tErp poRaiyan toNTi anna em
	oN toTi jemukkAtImO teyya;
	'Utai ITTiya uyar maNal aTaikarai,
10	kOtai AyamoTu vaNTal taii,
	Orai ATinum uyagkum n'in oLi' enak
	konnum civappOL kANin, ven vER
	koRRac cOzar kuTan'tai vaitta
	n'ATu taru n'itiyinum ceRiya
15	arug kaTip paTukkuvaL, aRan il yAyE.

61. pAlai

	'n'ORROrmanRa tAmE kURRam
	kOLuRa viLiyAr, piRar koLa viLin'tOr' enat
	tAL valampaTuppac cET pulam paTarn'tOr
	n'AL izai n'eTuj cuvar n'Okki, n'Oy uzan'tu
5	Azal vAzi, tOzi! tAzAtu,
	urum enac cilaikkum UkkamoTu paig kAl
	vari mAN n'On jAN van cilaik koLIi,
	aru n'iRattu azuttiya ampinar palaruTan
	aNNal yAnai veN kOTu koNTu,
10	n'aRavu n'oTai n'ellin n'AL makiz ayarum
	kazal punai tirun'tuaTik kaLvar kOmAn
	maza pulam vaNakkiya mA vaN pulli
	vizavuTai vizuc cIr vEgkaTam peRinum,
	pazakuvar AtalO aritE munAatu
15	muzavu uRaz tiNi tOL n'eTu vEL Avi
	ponnuTai n'eTu n'akarp potini anna n'in
	oN kEz vana mulaip polin'ta
	n'uN pUN Akam porun'tutal maRan'tE.

78. kuRijci

	'n'anan'talaik kAnattu ALi ajci,
	inam talaittarUum eRuz kiLar munpin,
	vari jimiRu Arkkum, vAy puku, kaTAttu,
	poRi n'utaR polin'ta vayak kaLiRRu oruttal
5	irum piNart taTak kaiyin, EmuRat tazuva,
	kaTujcUl maTap piTi n'aTugkum cAral,
	tEm pizi n'aRavin kuRavar munRil,
	mun'tUz Ay malar utira, kAn'taL
	n'ITu itaz n'eTun' tuTuppu ociya, taNNena
10	vATai tUkkum varupani aRciram,
	n'am il pulampin, tam Urt tamiyar
	en Akuvarkol aLiyartAm?' ena,
	em viTTu akanRa cil n'AL, ciRitum,
	uLLiyum aRitirO Ogkumalain'ATa!
15	ulakuTan tiritarum palar pukaz n'al icai
	vAymozik kapilan cUza, cEy n'inRu
	cezuj ceyn' n'ellin viLaikatir koNTu,
	taTan' tAL Ampal malaroTu kUTTi,
	yANTu pala kaziya, vENTuvayiR pizaiyAtu,
20	AL iTUuk kaTan'tu, vAL amar uzakki,
	En'tukOTTu yAnai vEn'tar OTTiya,
	kaTum parip puravik kai vaN pAri
	tIm perum paij cunaip pUtta
	tEm kamaz putu malar n'ARum ivaL n'utalE?

86. marutam

	uzun'tu talaippeyta kozug kaLi mitavai
	peruj cORRu amalai n'iRpa, n'irai kAl
	taN perum pan'tart taru maNal jemiri
	manai viLakkuRuttu, mAlai toTari,
5	kanai iruL akanRa kavinpeRukAlai;
	kOL kAl n'Igkiya koTu veN tigkaL
	kETu il vizup pukaz n'AL talaivan'tena,
	uccik kuTattar, puttakal maNTaiyar,
	potu cey kampalai mutu cem peNTir
10	munnavum pinnavum muRai muRai tarattara,
	putalvaR payan'ta titalai av vayiRRu
	vAl izai makaLir n'Alvar kUTi,
	'kaRpinin vazAa, n'aR pala utavip
	peRROR peTkum piNaiyai Aka!' ena,
15	n'IroTu corin'ta Ir itaz alari
	pal irug katuppin n'elloTu tayagka,
	vatuvai n'al maNam kazin'ta pinRai,
	kallen cummaiyar, jerErenap pukutan'tu,
	'pEr iRkizatti Aka' enat tamar tara,
20	Or iR kUTiya uTan puNar kagkul,
	koTum puRam vaLaii, kOTik kaligkattu
	oTugkinaL kiTan'ta Or puRam tazIi,
	muyagkal viruppoTu mukam putai tiRappa,
	ajcinaL uyirttakAlai, 'yAza n'in
25	n'ejcam paTarn'tatu ejcAtu urai' ena,
	in n'akai irukkai, pin yAn vinavalin,
	cej cUTTu oN kuzai vaN kAtu tuyalvara,
	akam mali uvakaiyaL Aki, mukan ikuttu,
	oyyena iRaijciyOLE mAvin
30	maTam koL mataiiya n'Okkin,
	oTugku Ir Oti, mAayOLE.

96. marutam

	n'aRavu uN maNTai n'uTakkalin, iRavuk kalittu,
	pUTTu aRu villin kUTTumutal teRikkum
	pazanap poykai aTaikaraip pirampin
	ara vAy anna am muL n'eTug koTi
5	aruvi Ampal akal aTai tuTakki,
	acaivaral vATai tUkkalin, Utuulai
	vicai vAgku tOlin, vIgkupu jekizum
	kazaniam paTappaik kAjci Ura!
	'oN toTi AyattuLLum n'I n'ayan'tu
10	koNTanai' enpa 'Or kuRumakaL' atuvE
	cempoR cilampin, ceRin'ta kuRagkin,
	am kaluz mAmai, aHtai tan'tai,
	aNNal yAnai aTu pOrc cOzar,
	veNNel vaippin paruvUrp paRan'talai,
15	iru peru vEn'tarum porutu kaLattu oziya,
	oLiRu vAL n'al amark kaTan'ta jAnRai,
	kaLiRu kavar kampalai pOla,
	alar AkinRatu, palar vAyp paTTE.

116. marutam

	eri akain'tanna tAmarai iTai iTai
	arin'tu kAl kuvitta cen' n'el vinaijar
	kaL koNTu maRukum cAkATu aLaRRu uRin,
	Ay karumpu aTukkum pAypunal Ura!
5	periya n'AN ilaimanRa; 'pori enap
	punku aviz akantuRaip poliya, oL n'utal,
	n'aRu malarkkAN varum kuRum pal kUn'tal,
	mAzai n'Okkin, kAz iyal vana mulai,
	eHkuTai ezil n'alattu, oruttiyoTu n'erun'ai
10	vaikupunal ayarn'tanai' enpa; atuvE,
	poy puRam potin'tu, yAm karappavum, kaiyikan'tu
	alar AkinRAl tAnE; malartAr,
	mai aNi yAnai, maRap pOrc ceziyan
	poyyA vizavin kUTaR paRan'talai,
15	uTan iyain'tu ezun'ta iru peru vEn'tar
	kaTal maruL perum paTai kalagkat tAkki,
	iragkuicai muracam oziya, paran'tu avar
	OTupuRam kaNTa jAnRai,
	ATu koL viyan kaLattu Arppinum peritE.

126. marutam

	n'in vAy cettu n'I pala uLLi,
	perum pun paitalai varun'tal anRiyum,
	malaimicait toTutta malin'tu celal n'Ittam
	talai n'AL mA malar taN tuRait tayagkak
5	kaTaRkarai melikkum kAvirip pEriyARRu
	aRal vAr n'eTug kayattu aru n'ilai kalagka,
	mAl iruL n'aTun'AT pOki, tan aiyar
	kAlait tan'ta kaNaik kOTTu vALaikku,
	av vAgku un'ti, am col, pANmakaL,
10	n'eTug koTi n'uTagkum n'aRavu mali maRukil
	pazaj cen' n'ellin mukavai koLLAL,
	kazagku uRaz muttamoTu n'ankalam peRUum
	payam kezu vaippiR pal vEl evvi
	n'ayam puri n'an mozi aTakkavum aTagkAn,
15	pon iNar n'aRu malarp punnai veHki,
	titiyanoTu poruta anni pOla
	viLikuvaikollO, n'IyE kiLi enac
	ciRiya mizaRRum cev vAy, periya
	kayal ena amartta uNkaN, puyal enap
20	puRam tAzpu iruLiya piRagku kural aimpAl,
	min n'Er marugkul, kuRumakaL
	pinnilai viTAa maTam kezu n'ejcE?

140. n'eytal

	perug kaTal vETTattuc ciRukuTip paratavar
	irug kazic ceRuvin uzAatu ceyta
	veN kal uppin koLLai cARRi,
	enRUz viTara kunRam pOkum
5	kataz kOl umaNar kAtal maTamakaL
	cil kOl el vaLai teLirppa vIci,
	'n'ellin n'ErE veN kal uppu' enac
	cEri vilaimARu kURalin, manaiya
	viLi aRi jamali kuraippa, verIiya
10	matar kayal malaippin anna kaN emakku,
	itai muyal punavan pukain'izal kaTukkum
	mA mUtaLLal azun'tiya cAkATTu
	evvam tIra vAgkum tan'tai
	kai pUN pakaTTin varun'ti,
15	veyya uyirkkum n'Oy AkinRE.

141. pAlai

	amma vAzi, tOzi! kaimmikak
	kanavum kagkultORu iniya; n'anavum
	punai vinai n'al il puLLum pAgkina;
	n'ejcum n'anipukanRu uRaiyum; ejcAtu
5	ulaku tozil ulan'tu, n'Ajcil tujci,
	mazai kAln'Igkiya mAka vicumpil
	kuRu muyal maRu n'iRam kiLara, mati n'iRain'tu,
	aRumIn cErum akal iruL n'aTu n'AL;
	maRuku viLakkuRuttu, mAlai tUkki,
10	paza viRal mUtUrp palaruTan tuvanRiya
	vizavu uTan ayara, varukatil amma!
	tuvarap pularn'tu tU malar kajali,
	takaram n'ARum taN n'aRug katuppin
	putu maNa makaTUu ayiniya kaTi n'akarp
15	pal kOTTu aTuppil pAl ulai irIi,
	kUzaik kUn'taR kuRun' toTi makaLir
	peruj cey n'ellin vAgkukatir muRittu,
	pAcaval iTikkum irug kAz ulakkaik
	kaTitu iTi verIiya kamajcUl veN kuruku
20	tIm kulai vAzai Ogku maTal irAtu;
	n'eTug kAl mAattuk kuRum paRai payiRRum
	cel kuTi n'iRutta perum peyark karikAl
	vel pOrc cOzan iTaiyARRu anna
	n'al icai veRukkai tarumAr, pal poRip
25	pulik kEz uRRa pUviTaip peruj cinai
	n'aran'ta n'aRum pU n'AL malar utira,
	kalai pAyn'tu ukaLum, kal cEr vEgkai,
	tEm kamaz n'eTu varaip piRagkiya
	vEgkaTa vaippiR curan iRan'tOrE.

156. marutam

	muracuTaic celvar puravic cUTTum
	mUTTuRu kavari tUkkiyanna,
	cezuj cey n'ellin cEyarip puniRRuk katir
	mUtA tinRal ajci, kAvalar
5	pAkal AykoTip pakanRaiyoTu parIi,
	kAjciyin akattu, karumpu arutti, yAkkum
	tIm punal Ura! tiRavatAkak
	kuvaLai uNkaN ivaLum yAnum
	kazani Ampal muzun'eRip pain' tazai,
10	kAyA jAyiRRAka, talaippeya,
	'poytal ATip polika!' ena van'tu,
	n'in n'akAp pizaitta tavaRO peruma!
	kaLLum kaNNiyum kaiyuRaiyAka
	n'ilaik kOTTu veLLai n'Alcevik kiTAay
15	n'ilaittuRaik kaTavuTku uLappaTa Occi,
	taNi marugku aRiyAL, yAy aza,
	maNi maruL mEni pon n'iRam koLalE?

166. marutam

	'n'al maram kuzIiya n'anai mutir cATi
	pal n'AL aritta kOoy uTaippin,
	mayagkumazait tuvalaiyin maRuku uTan panikkum
	pazam pal n'ellin vELUrvAyil,
5	n'aRu virai teLitta n'ARuiNar mAlai,
	poRi vari ina vaNTu Utala kaziyum
	uyar pali peRUum uru kezu teyvam,
	punai irug katuppin n'I kaTuttOLvayin
	anaiyEn Ayin, aNagkuka, en!' ena
10	manaiyOT tERRum makizn'an Ayin,
	yArkol vAzi, tOzi! n'erun'al
	tAr pUN kaLiRRin talaip puNai tazIi,
	vatuvai Ir aNip polin'tu, n'ammoTu,
	putuvatu van'ta kAvirik
15	kOTu tOy malirn'iRai, ATiyOrE?

176. marutam

	kaTal kaNTanna kaN akan parappin
	n'ilam paka vIzn'ta vEr mutir kizagkin
	kazai kaNTanna tUmpuTait tiraL kAl,
	kaLiRRuc cevi anna pAcaTai marugkil,
5	kazu n'ivan'tanna kozu mukai iTai iTai
	muRuval mukattin pal malar tayagka,
	pUtta tAmaraip puL imiz pazanattu,
	vEppu n'anai anna n'eTug kaN n'IrjeNTu
	irai tEr veN kuruku ajci, ayalatu
10	olitta pakanRai iruj cERRu aLLal,
	titalaiyin varippa OTi, virain'tu tan
	n'Ir mali maN aLaic ceRiyum Ura!
	manai n'aku vayalai maran ivar kozug koTi
	ari malar AmpaloTu Artazai taii,
15	vizavu ATu makaLiroTu tazUu aNip polin'tu,
	malar Er uNkaN mAN izai munkaik
	kuRun' toTi tuTakkiya n'eTun' toTar viTuttatu
	uTanRanaL pOlum, n'in kAtali? em pOl
	pul uLaik kuTumip putalvaR payan'tu,
20	n'elluTai n'eTu n'akar n'in inRu uRaiya,
	enna kaTattaLO, maRRE? tan mukattu
	ezutu ezil citaiya azutanaL Egki,
	aTittena urutta tittip pal Uz
	n'oTittenac civan'ta mel viral tirukupu,
25	kUrn'unai mazukiya eyiRRaL
	Ur muzutum n'uvalum n'iR kANiya cenmE.

204. mullai

	ulaku uTan n'izaRRiya tolaiyA veNkuTai,
	kaTal pOl tAnai, kalimA, vazuti
	venRu amar uzan'ta viyan perum pAcaRaic
	cenRu, vinai muTittanam Ayin, inRE
5	kArp peyaRku etiriya kANtaku puRavil,
	kaNam koL vaNTin am ciRait tozuti
	maNam kamaz mullai mAlai Arppa,
	utukkAN van'tanRu pozutE; val virain'tu,
	celka, pAka! n'in n'al vinai n'eTun' tEr
10	veNNel arin'ar maTi vAyt taNNumai
	pal malarp poykaip paTu puL Oppum
	kAy n'el paTappai vANan ciRukuTit
	taNTalai kamazum kUn'tal,
	oN toTi maTan'tai tOL iNai peRavE.

211. pAlai

	kELAy, ella! tOzi! vAliya
	cutai virin'tanna pal pU marAam
	paRai kaNTanna pA aTi n'On tAL
	tiN n'ilai maruppin vayak kaLiRu urijutoRum,
5	taN mazai Aliyin tAay, uzavar
	veNNel vittin aRaimicai uNagkum
	pani paTu cOlai vEgkaTattu umpar,
	mozi peyar tEettar Ayinum, n'alkuvar
	kuziyiTaik koNTa kanRuTaip peru n'irai
10	piTi paTu pUcalin eytAtu oziya,
	kaTuj cina vEn'tan Evalin eyti,
	n'eTuj cEN n'ATTil talaittArp paTTa
	kallA ezini pal eRin'tu azuttiya
	vankaN katavin veNmaNi vAyil,
15	matti n'ATTiya kal kezu panit tuRai,
	n'Ir olittanna pEer
	alar n'amakku oziya, azap pirin'tOrE.

220. n'eytal

	Urum cEriyum uTan iyain'tu alar eza,
	tEroTu maRukiyum, paNi mozi payiRRiyum,
	keTAat tIyin uru kezu cellUr,
	kaTAa yAnaik kuzUuc camam tataiya,
5	man marugku aRutta mazu vAL n'eTiyOn
	mun muyanRu aritinin muTitta vELvi,
	kayiRu arai yAtta kAN taku vanappin,
	arug kaTi n'eTun' tUN pOla, yAvarum
	kANalAkA mAN ezil Akam
10	uLLutoRum panikkum n'ejcinai, n'IyE
	n'eTum puRa n'ilaiyinai, varun'tinaiAyin,
	muzagku kaTal Otam kAlaik koTkum,
	pazam pal n'ellin UNUr AgkaN,
	n'OlA irum puL pOla, n'ejcu amarn'tu,
15	kAtal mARAk kAmar puNarcciyin,
	irug kazi mukan'ta ceg kOl av valai
	muTagku puRa iRavoTu ina mIn ceRikkum
	n'eTug katirk kazanit taN cAykkAnattu,
	yANart taN paNai uRum ena, kAnal
20	Ayam Ayn'ta cAy iRaip paNait tOL
	n'al ezil citaiyA Emam
	col init teyya, yAm teLiyumARE.

236. marutam

	maNi maruL malara muLLi amanRa,
	tuNi n'Ir, ilajcik koNTa peru mIn
	ari n'iRak kozug kuRai vauvinar mAn'ti,
	veNNel arin'ar peyarn'ilaip pinRai,
5	iTai n'ilam n'eritaru n'eTug katirp pal cUTTup
	pani paTu cAyp puRam parippa, kazanik
	karug kOTTu mAattu alagku cinaip putup pU
	mayagku mazait tuvalaiyin tAam Uran
	kAmam perumai aRiyEn, n'anRum
10	uyn'tanen vAzi, tOzi! alkal
	aNi kiLar cAn'tin am paTTu imaippa,
	koTug kuzai makaLirin oTugkiya irukkai
	aRiyAmaiyin azin'ta n'ejcin,
	'ERRu iyal ezil n'aTaip polin'ta moympin,
15	tOTTu iruj curiyal maNan'ta pittai,
	ATTan attiyaik kANIrO?' ena
	n'ATTin n'ATTin, Urin Urin,
	'kaTal koNTanRu' ena, 'punal oLittanRu' ena,
	kaluzn'ta kaNNaL, kAtalaR keTutta
20	Atiman'ti pOla,
	Etam colli, pEtu peritu uRalE.

243. pAlai

	avarai Ay malar utira, tuvarina
	vAgku tuLait tukirin Igkai pUppa,
	iRagku pOtu avizn'ta Irm putal pakanRaik
	kaRagku n'uN tuvalaiyin Uruzai aNiya,
5	peyal n'Ir putu varal tavira, cinai n'Erpu
	pIL virin'tu iRaijciya piRagku katirk kazani
	n'el oli pAcaval tuzaii, kallenak
	kaTitu van'tu iRutta kaN il vATai!
	'n'eTitu van'tanai' ena n'illAtu Egkip
10	pala pulan'tu uRaiyum tuNai il vAzkkai
	n'amvalattu anmai kURi, avar n'ilai
	aRiyun'am Ayin, n'anRuman tilla;
	pani vAr kaNNEm Aki, ini atu
	n'amakkE evvam AkinRu;
15	anaittAl tOzi! n'am tol vinaip payanE!

267. pAlai

	'n'ejcu n'ekiztakun'a kURi, anpu kalan'tu,
	aRAa vajcinam ceytOr, vinai purin'tu,
	tiRam vERu Akal eRRu?' enRu oRRi,
	inaital AnRicin, n'IyE; cinai pAyn'tu,
5	utirtta kOTai, uTku varu kaTattiTai,
	verukku aTi anna kuvi mukiz iruppai,
	maruppuk kaTain'tanna, koLLai vAn pU
	mayirk kAl eNkin Ir inam kavara,
	mai paTTanna mA muka mucuvinam
10	paitu aRu n'eTug kazai pAytalin, oyyena
	vetir paTu veNNel vev aRait tAay,
	ukir n'eri Ocaiyin pogkuvana poriyum
	Ogkal veRpin curam pala iRan'tOr
	tAm pazi uTaiyar allar; n'ALum
15	n'ayan'tOrp piNittal tERRA, vayagku vinai
	vAL Er el vaLai n'ekiztta,
	tOLE tOzi! tavaRu uTaiyavvE!

269. pAlai

	toTi tOL ivarka! evvamum tIrka!
	n'eRi irug katuppin kOtaiyum punaika!
	ERuTai ina n'irai peyara, peyarAtu,
	ceRi curai veL vEl mazavart tAgkiya
5	taRukaNALar n'al icai n'iRumAr,
	piTi maTin'tanna kuRumpoRai marugkin,
	n'aTTa pOlum n'aTAa n'eTug kal
	akal iTam kuyinRa pal peyar maNNi,
	n'aRu virai majcaL Irm puRam poliya
10	ampu koNTu aRutta Ar n'Ar urivaiyin
	cem pUg karan'tai punain'ta kaNNi
	vari vaNTu Arppac cUTTi, kazaR kAl
	iLaiyar patip peyarum aruj curam iRan'tOr,
	taii n'inRa taN peyal kaTai n'AL,
15	polagkAcu n'iraitta kOTu En'tu alkul
	n'alam kEz mAk kural kuzaiyoTu tuyalvara,
	pATu Urpu ezutarum paku vAy maNTilattu
	vayir iTaippaTTa teL viLi iyampa,
	vaNTaR pAvai uNtuRait tarIi,
20	tiru n'utal makaLir kuravai ayarum
	peru n'Irk kAnal tazIiya irukkai,
	vANan ciRukuTi, vaNagku katir n'ellin
	yANart taN paNaip pOtu vAy avizn'ta
	oN ceg kazun'Ir anna, n'in
25	kaN pani tuTaimAr van'tanar, virain'tE.

294. mullai

	magkul mA mazai viN atirpu muzagki,
	tuLLup peyal kazin'ta pinRai, pukaiuRap
	puLLi n'uN tuvalai pUvakam n'iRaiya,
	kAtalarp pirin'ta kaiyaRu makaLir
5	n'Ir vAr kaNNin karuviLai malara,
	tuyt talaip pUvin putal ivar Igkai
	n'eyt tOyttanna n'Ir n'anai am taLir
	iru vakir IruLin Iriya tuyalvara,
	avaraip paim pUp payila, akal vayal
10	katir vAr kAy n'el kaTku initu iRaijca,
	citar cinai tUgkum aRcira arai n'AL,
	'kAy cina vEn'tan pAcaRai n'ITi,
	n'am n'Oy aRiyA aRanilALar
	in' n'ilai kaLaiya varukuvarkol?' ena
15	AnAtu eRitarum vATaiyoTu
	n'OnEn tOzi! en tanimaiyAnE.

303. pAlai

	iTai piRar aRital ajci, maRai karan'tu,
	pEey kaNTa kanavin, pal mAN
	n'uNNitin iyain'ta kAmam ven vEl,
	maRam miku tAnai, pacumpUN, poRaiyan
5	kAr pukanRu eTutta cUr pukal n'anan'talai
	mA irug kolli uccit tAay,
	tatain'tu cel aruviyin alar ezap pirin'tOr
	pulam kan'tAka iravalar celinE,
	varai purai kaLiRRoTu n'an kalan Iyum
10	urai cAl vaN pukazp pAri paRampin
	n'irai paRaik kurIiyinam kAlaip pOki,
	muTagku puRac cen'n'el tarIiyar, OrAgku
	irai tEr koTpin Aki, pozutu paTap
	paTar koL mAlaip paTartan'tAgku,
15	varuvar enRu uNarn'ta, maTam kezu, n'ejcam!
	aiyam teLiyarO, n'IyE; pala uTan
	vaRal maram porun'tiya ciLvITu, umaNar
	kaNa n'irai maNiyin, Arkkum curan iRan'tu,
	azi n'Ir mIn peyarn'tAgku, avar
20	vazi n'aTaic cERal valitticin, yAnE.

306. marutam

	perum peyar makizn'a! pENAtu akanmO!
	paran'ta poykaip pirampoTu n'ITiya
	muT kompu Igkait tuyt talaip putu vI
	InRa mAttin iLan' taLir varuTa,
5	vAr kuruku uRagkum n'Ir cUz vaLa vayal
	kazanik karumpin cAyp puRam Urn'tu,
	pazana yAmai pacu veyil koLLum
	n'elluTai maRukin n'annar Ura!
	ituvO maRRu n'in cemmal? mANTa
10	mati Er oL n'utal vayagku izai orutti
	ikazn'ta collum colli, civan'ta
	Ay itaz mazaik kaN n'Oy uRa n'Okki,
	taN n'aRug kamaz tAr parIiyinaL, n'ummoTu
	UTinaL ciRu tuni ceytu em
15	maNal mali maRukin iRan'ticinOLE.

340. n'eytal

	pal n'AL evvam tIra, pakal van'tu,
	punnai am potumpin in n'izal kazippi,
	mAlai mAl koLa n'Okki, paN Ayn'tu,
	valavan vaN tEr iyakka, n'Iyum
5	celavu viruppuRutal ozikatil amma
	'cellA n'al icai, polam pUN, tiraiyan
	pal pUg kAnaR pavattiri anna ivaL
	n'al ezil iLa n'alam tolaiya, ollena,
	kaziyE Otam malkinRu; vaziyE
10	vaL eyiRRu aravoTu vaya mIn koTkum;
	cenROr manRa; mAnRanRu pozutu' ena,
	n'in tiRattu avalam vITa, inRu ivaN
	cEppin evanO pUk kEz pulampa!
	pacu mIn n'oTutta veN n'el mAat
15	tayir miti mitavai Arttuvam n'inakkE;
	vaTavar tan'ta vAn kEz vaTTam
	kuTa pula uRuppin kUTTupu n'ikazttiya
	vaNTu imir n'aRuj cAn'tu aNikuvam tiN timil
	ellut tozil maTutta val vinaip paratavar
20	kUr uLik kaTu vicai mATTalin, pAypu uTan,
	kOT cuRAk kizitta koTu muTi n'eTu valai
	taN kaTal acaivaLi eRitoRum, vinai viTTu,
	munRil tAzait tUgkum
	teN kaTaR parappin, em uRaivu in, UrkkE?

346.marutam

	n'akai n'anRu amma tAnE iRai micai
	mAric cutaiyin Irm puRattu anna
	kUral kokkin kuRum paRaic cEval,
	veLLi veN tOTu anna, kayal kuRittu,
5	kaL Ar uvakaik kali makiz uzavar
	kAjci am kuRun' taRi kutti, tIm cuvai
	men kazaik karumpin n'an pala miTain'tu,
	peruj cey n'ellin pAcu aval potti,
	varuttik koNTa val vAyk koTuj ciRai
10	mItu azi kaTu n'Ir n'Okki, paippayap
	pArval irukkum payam kEz Ura!
	yAm atu pENinRO ilamE n'I n'in
	paN amai n'al yAzp pANanoTu, vici piNi,
	maN Ar, muzavin kaN atirn'tu iyampa,
15	makiz tuNaic cuRRamoTu maTTu mAn'ti,
	em manai vArAyAki, mun n'AL,
	n'um manaic cErn'ta jAnRai, am manaik
	kuRun' toTi maTan'tai uvan'tanaL n'eTun' tEr,
	izai aNi yAnaip pazaiyan mARan,
20	mATa mali maRukin kUTal AgkaN,
	veLLat tAnaiyoTu vERu pulattu iRutta
	kiLLi vaLavan n'al amar cAay,
	kaTum parip puraviyoTu kaLiRu pala vavvi,
	Etil mannar Ur koLa,
25	kOtai mArpan uvakaiyin peritE.

356.marutam

	mEl tuRaik koLIiya kazAlin kIzt tuRai
	uku vAr arun'ta, paku vAy yAmai
	kampuL iyavan Aka, vici piNit
	teN kaN kiNaiyin piRazum Uran
5	iTai n'eTun' teruvil katumenak kaNTu, en
	poR toTi munkai paRRinanAka,
	'annAy!' enRanen; avan kai viTTananE,
	tol n'acai cAlAmai, n'annan paRampil
	ciRukArOTan payinoTu cErttiya
10	kaR pOl n'AvinEnAki, maRRu atu
	ceppalen mannAl, yAykkE; n'al tErk
	kaTum pakaTTu yAnaic cOzar marukan
	n'eTug katir n'ellin vallam kizavOn
	n'allaTi uLLAnAkavum, ollAr
15	katavam muyaRalum muyalpa; atAanRu,
	oli pal kUn'tal n'amvayin aruLAtu,
	konRanan Ayinum kolai pazutu anRE
	aruvi Ampal kalitta muntuRai
	n'annan Aay pirampu anna
20	min Ir Oti! ennai, n'in kuRippE?

376. marutam

	cellal, makizn'a! n'iR cey kaTan uTaiyenman
	kallA yAnai kaTi punal kaRRena,
	mali punal poruta marutu Ogku paTappai,
	oli katirk kazani, kazAar muntuRai,
5	kali koL cuRRamoTu karikAl kANa,
	taN patam koNTu, tavirn'ta in icai
	oN poRip punai kazal cEvaTip puraLa,
	karug kaccu yAtta kANpin av vayiRRu,
	irum polam pANTil, maNiyoTu teLirppa,
10	punal n'ayan'tu ATum atti aNi n'ayan'tu,
	kAviri koNTu oLittAgkum annO!
	n'umvayin pulattal cellEm; emvayin
	pacan'tanRu, kANTicin n'utalE; acumpin
	am tUmpu vaLLai azaR koTi mayakki,
15	vaN tOTTu n'ellin vAgku pIL viriya,
	tuyt talai muTagku iRAt teRikkum, poRpuTaik
	kuragkuuLaip puravik kuTTuvan
	maran'tai anna, en n'alam tan'tu cenmE!

390. n'eytal

	uvar viLai uppin koLLai cARRi,
	atar paTu pUziya cEN pulam paTarum
	tatar kOl umaNar pati pOku n'eTu n'eRik
	kaNa n'irai vAzkkaitAn n'anRukollO?
5	vaNar curi mucci muzutum man puraLa,
	aitu akal alkul kavin peRap punain'ta
	pal kuzait toTalai olkuvayin olki,
	' ''n'ellum uppum n'ErE; UrIr!
	koLLIrO'' enac cEritoRum n'uvalum,
10	av vAgku un'ti, amait tOLAy! n'in
	mey vAz uppin vilai eyyAm' ena,
	ciRiya vilagkinamAka, periya tan
	ari vEy uNkaN amarttanaL n'Okki,
	'yArIrO, em vilagkiyIir?' ena,
15	mUral muRuvalaL pErvanaL n'inRa
	cil n'irai vAl vaLaip polin'ta
	pal mAN pEtaikku ozin'tatu, en n'ejcE!