3. pAlai

	irug kazi mutalai mEen'tOl anna
	karug kAl Omaik kANpu in peruj cinaik
	kaTiyuTai n'anan'talai, InRu iLaippaTTa,
	koTu vAyp pETaikku alkuirai tarIiya,
5	mAnRu vETTu ezun'ta cej cevi eruvai
	vAn tOy cimaiya viRal varaik kavAan,
	tuLagku n'aTai maraiyA valam paTat tolaicci,
	oN ceg kuruti uvaRRi uNTu arun'tupu,
	pulavup puli tuRan'ta kalavuk kazi kaTu muTai,
10	koLLai mAn'tarin AnAtu kavarum
	pul ilai marAatta akan cEN attam,
	kalam taral uLLamoTu kaziyak kATTi,
	pin n'inRu turakkum n'ejcam! n'in vAy
	vAypOl poymmozi evvam en kaLaimA
15	kavir itaz anna kANpu in cev vAy,
	am tIm kiLavi, Ay izai, maTan'tai
	koTug kuzaikku amartta n'Okkam
	n'eTuj cEN Ar iTai vilagkum jAnRE?

4. mullai

	mullai vain' n'unai tOnRa, illamoTu
	paig kAR konRai men piNi aviza,
	irumpu tirittanna mA iru maruppin,
	paral aval aTaiya, iralai, teRippa,
5	malarn'ta jAlam pulampu puRakkoTuppa,
	karuvi vAnam kataz uRai citaRi,
	kAr ceytanRE, kavin peRu kAnam.
	kuragku uLaip polin'ta koycuvaR puravi,
	n'arampu Arttanna, vAgku vaLpu ariya,
10	pUtta pogkart tuNaiyoTu vatin'ta
	tAtu uN paRavai pEtuRal ajci,
	maNi n'A Artta mAN vinait tEran,
	uvakkAN tOnRum kuRum poRai n'ATan,
	kaRagku icai vizavin uRan'taik kuNAtu,
15	n'eTum perug kunRattu amanRa kAn'taT
	pOtu aviz alarin n'ARum
	Ay toTi arivai! n'in mAN n'alam paTarn'tE.

7. pAlai

	'mulai mukamceytana; muL eyiRu ilagkina;
	talai muTicAnRa; taN tazai uTaiyai;
	alamaral AyamoTu yAgkaNum paTAal;
	mUppuTai mutu pati tAkkuaNagku uTaiya;
5	kAppum pUNTicin; kaTaiyum pOkalai;
	pEtai allai mEtaiam kuRumakaL!
	petumpaip paruvattu otugkinai, puRattu' ena,
	oN cuTar n'al il arug kaTi n'Ivi,
	tan citaivu aRital ajci in cilai
10	ERuTai inatta, n'ARu uyir n'avvi!
	valai kAN piNaiyin pOki, Igku Or
	tolaivu il veL vEl viTalaiyoTu, en makaL
	ic curam paTartan'tOLE. AyiTai,
	attak kaLvar A tozu aRuttena,
15	piRpaTu pUcalin vazivazi OTi,
	meyt talaippaTutalcellEn; it talai,
	n'innoTu vinaval kELAy! ponnoTu
	pulip pal kOtta pulampu maNit tAli,
	olik kuzaic ceyalai uTai mAN alkul,
20	Ay cuLaip palavin mEy kalai utirtta
	tuyt talai veN kAz peRUum
	kal kezu ciRukuTik kAnavan makaLE.

14. mullai

	'arakkattu anna cen' n'ilap peru vazi,
	kAyAj cemmal tAay, pala uTan
	Iyal mUtAy varippa, pavaLamoTu
	maNi miTain'tanna kunRam kavaiiya
5	am kATTu Ar iTai, maTap piNai tazIi,
	tiri maruppu iralai pul arun'tu ukaLa,
	mullai viyan pulam parappi, kOvalar
	kuRum poRai marugkin n'aRum pU ayara,
	patavu mEyal arun'tu matavu n'aTai n'al An
10	vIgku mAN ceruttal, tIm pAl piliRRa,
	kanRu payir kurala, manRu n'iRai pukutarum
	mAlaiyum uLLAr Ayin, kAlai
	yAgku Akuvamkol? pANa!' enRa
	manaiyOL col etir collalcellEn,
15	cevvazi n'al yAz icaiyinen, paiyena,
	kaTavuL vAztti, paiyuL meyn' n'iRuttu,
	avar tiRam celvEn kaNTanen, yAnE
	viTu vicaik kutirai vilagku pari muTuka,
	kal porutu iragkum pal Ar n'Emik
20	kAr mazai muzakku icai kaTukkum,
	munai n'al Uran, punai n'eTun' tErE.

23. pAlai

	maNkaN kuLirppa, vIcit taN peyal,
	pATu ulan'tanRE, paRaik kural ezili;
	putalmicait taLavin ital muT cen' n'anai
	n'erugku kulaip piTavamoTu orugku piNi aviza,
5	kATE kammenRanRE; avala,
	kOTu uTain'tanna kOTaR paim payir,
	patavin pAvai, munaii, matavu n'aTai
	aNNal iralai amar piNai tazIi,
	taN aRal parukit tAzn'tupaTTanavE;
10	anaiyakol vAzi, tOzi! manaiya
	tAzvin n'occi, cUzvana malarum
	mauval, mAc cinai kATTi,
	av aLavu enRAr, ANTuc cey poruLE!

32. kuRijci

	n'erun'al ellai Enal tOnRi,
	tiru maNi oLirvarum pUNan van'tu,
	puravalan pOlum tORRam uRazkoLa,
	iraval mAkkaLin paNimozi payiRRi,
5	ciRu tinaip paTu kiLi kaTIiyar, pal mAN
	kuLir koL taTTai matan ila puTaiyA,
	'cUraramakaLirin n'inRa n'I maRRu
	yAraiyO? em aNagkiyOy! uNku' enac
	ciRupuRam kavaiyinanAka, ataRkoNTu
10	iku peyal maNNin jekizpu, ajar uRRa en
	uL avan aRital ajci, uL il
	kaTiya kURi, kai piNi viTAa,
	verUum mAn piNaiyin orIi, n'inRa
	en urat takaimaiyin peyarttu, piRitu envayin
15	colla valliRRum ilanE; allAn'tu,
	inam tIr kaLiRRin peyarn'tOn inRum
	tOlAvARu illai tOzi! n'Am cenmO.
	cAy iRaip paNait tOT kizamai tanakkE
	mAcu inRAtalum aRiyAn, EcaRRu,
20	en kuRaip puRanilai muyalum
	aNkaNALanai n'akukam, yAmE.

34. mullai

	ciRu karum piTavin veN talaik kuRum putal
	kaNNiyin malarum taN n'aRum puRavil,
	toTutOR kAnavan kavai poRuttanna
	iru tiri maruppin aNNal iralai
5	ceRi ilaip patavin ceg kOl men kural
	maRi ATu marugkin maTap piNai arutti,
	teL aRal tazIiya vAr maNal aTaikarai,
	melkiTu kavuLa tujcu puRam kAkkum
	perun'takaikku uTain'ta n'ejcam EmuRa,
10	celka, tErE n'al valam peRun'a!
	pacai kol mel viral, perun' tOL, pulaitti
	tuRai viTTanna tU mayir ekinam
	tuNaiyoTu tiLaikkum kAppuTai varaippil,
	cen' tArp paig kiLi munkai En'ti,
15	'inRu varal uraimO, cenRicinOr tiRattu' ena,
	illavar aRital ajci, mellena
	mazalai in col payiRRum
	n'ANuTai arivai mAN n'alam peRavE.

39. pAlai

	'ozittatu pazitta n'ejcamoTu vazip paTarn'tu,
	uLLiyum aRitirO, em?' ena, yAza n'in
	muL eyiRRut tuvar vAy muRuval azugka,
	n'Oy mun'tuRuttu n'otumal moziyal; n'in
5	Ay n'alam maRappenO maRRE? cEN ikan'tu
	oli kazai picain'ta jeli cori oN poRi
	paTu jemal putaiyap potti, n'eTu n'ilai
	muLi pul mImicai vaLi cuzaRRuRAak
	kATu kavar perun' tI OTuvayin OTalin,
10	atar keTuttu alaRiya cAttoTu orAgku
	matar puli verIiya maiyal vEzattu
	inam talai mayagkiya n'anan' talaip perug kATTu,
	jAnRu tOnRu avir cuTar mAnRAl paTTena,
	kaL paTar Oti! n'iR paTarn'tu uLLi,
15	aruj celavu ARRA Ar iTai, jerErenap
	paran'tu paTu pAyal n'avvi paTTena,
	ilagku vaLai ceRiyA ikutta n'OkkamoTu,
	n'ilam kiLai n'inaivinai n'inRa n'iR kaNTu,
	'innakai'! inaiyam Akavum, emvayin
20	UTal yAgku van'tanRu?' ena, yAza n'in
	kOTu En'tu puruvamoTu kuvavu n'utal n'Ivi,
	n'aRug katuppu uLariya n'annar amaiyattu,
	vaRug kai kATTiya vAy al kanavin
	ERRu EkkaRRa ulamaral
25	pORRAy Akalin, pulattiyAl, emmE!

49. pAlai

	'kiLiyum, pan'tum, kazagkum, veyyOL
	aLiyum, anpum, cAyalum, iyalpum,
	munn'AL pOlAL; iRIiyar, en uyir' ena,
	koTun' toTaik kuzaviyoTu vayinmarattu yAtta
5	kaTug kaT kaRavaiyin ciRupuRam n'Okki,
	kuRuka van'tu, kuvavun'utal n'Ivi,
	mellenat tazIiyinEnAka, en makaL
	n'annar Akattu iTaimulai viyarppa,
	pal kAl muyagkinaLmannE! annO!
10	viRal miku n'eTun'takai pala pArATTi,
	vaRan n'izal acaii, vAn pulan'tu varun'tiya
	maTa mAn acA inam tiragku maral cuvaikkum
	kATu uTankazital aRiyin tan'tai
	alkupatam mikutta kaTiuTai viyal n'akar,
15	celvuzic celvuzi meyn'n'izal pOla,
	kOtai AyamoTu Orai tazIi,
	tOTu amai aric cilampu olippa, avaL
	ATuvazi ATuvazi, akalEnmannE!

69. pAlai

	Ayn'alam tolain'ta mEniyum, mA malart
	takai vanappu izan'ta kaNNum, vakai ila
	vaNNam vATiya variyum, n'Okki,
	Azal AnRicin n'IyE. uritinin
5	Ital inpam veHki, mEvarac
	cey poruL tiRavar Aki, pul ilaip
	parArai n'elli am puLit tiraL kAy
	kAna maTa maraik kaNan'irai kavarum
	vEnil attam ennAtu, EmuRRu,
10	viN poru n'eTug kuTai iyal tEr mOriyar
	pon punai tikiri tiritarak kuRaitta
	aRai iRan'tu akanRanar Ayinum, enaiyatUum
	n'ITalar vAzi, tOzi! ATu iyal
	maTa mayil ozitta pIli vArn'tu, tam
15	cilai mAN val vil cuRRi, pala mAN
	ampuTaik kaiyar araN pala n'URi,
	n'ankalam tarUum vayavar perumakan
	cuTar maNip perum pUN Aay kAnattut
	talai n'AL alarin n'ARum n'in
20	alar mulai Akattu in tuyil maRan'tE.

71. pAlai

	n'iRain'tOrt tErum n'ejcamoTu, kuRain'tOr
	payan inmaiyin paRRu viTTu, orUum
	n'ayan il mAkkaL pOla, vaNTinam
	cunaip pU n'Ittu, cinaip pUp paTara,
5	mai il mAn inam maruLa, paiyena
	ven'tu ARu ponnin an'ti pUppa,
	aiyaRivu akaRRum kaiyaRu paTarOTu
	akal iru vAnam am majcu Ina,
	pakal ARRuppaTutta pazagkaN mAlai,
10	kAtalarp pirin'ta pulampin n'Otaka,
	Ar ajar uRun'ar aru n'iRam cuTTik
	kUr eHku eRijarin alaittal AnAtu,
	eL aRa iyaRRiya n'izal kAN maNTilattu
	uL Utu Aviyin paippaya n'uNuki,
15	matukai mAytal vENTum peritu azin'tu,
	itu kol vAzi, tOzi! en uyir
	vilagku veg kaTu vaLi eTuppat
	tuLagku marap puLLin tuRakkum pozutE?

74. mullai

	vinai valampaTutta venRiyoTu makiz ciRan'tu,
	pOr val iLaiyar tAL valam vAztta,
	taN peyal pozin'ta paituRu kAlai,
	kuruti uruvin oN cem mUtAy
5	peru vazi marugkil ciRu pala varippa,
	paig koTi mullai men patap putu vI
	veN kaLar arimaNal n'an pala tAay,
	vaNTu pOtu avizkkum taN kamaz puRavil,
	karug kOTTu iralaik kAmar maTap piNai
10	maruNTa mAn n'Okkam kANtoRum, 'n'in n'inain'tu
	"tiN tEr valava! kaTavu" enak kaTaii,
	inRE varuvar; AnRikam pani' ena,
	vanpuRai in col n'an pala payiRRum
	n'in valittu amaikuvenmannO alkal
15	punkaN mAlaiyoTu porun'ti, koTug kOR
	kallAk kOvalar Utum
	val vAyc ciRu kuzal varuttAkkAlE!

82. kuRijci

	ATu amaik kuyinRa avir tuLai marugkin
	kOTai av vaLi kuzalicai Aka,
	pATu in aruvip pani n'Ir in icai
	tOTu amai muzavin tutai kural Aka,
5	kaNak kalai ikukkum kaTug kuraR tUmpoTu,
	malaip pUj cAral vaNTu yAz Aka,
	in pal imiz icai kETTu, kali ciRan'tu,
	man'ti n'al avai maruLvana n'Okka,
	kazai vaLar aTukkattu, iyali ATu mayil
10	n'anavup puku viRaliyin tOnRum n'ATan
	uruva val viR paRRi, ampu terin'tu,
	ceruc cey yAnai cel n'eRi vinAay,
	pular kural EnaR puzaiyuTai oru ciRai,
	malar tAr mArpan, n'inROR kaNTOr
15	palartil, vAzi tOzi! avaruL,
	Ar iruT kagkul aNaiyoTu porun'ti,
	Or yAn Akuvatu evankol,
	n'Ir vAr kaNNoTu, n'ekiz tOLEnE?

86. marutam

	uzun'tu talaippeyta kozug kaLi mitavai
	peruj cORRu amalai n'iRpa, n'irai kAl
	taN perum pan'tart taru maNal jemiri
	manai viLakkuRuttu, mAlai toTari,
5	kanai iruL akanRa kavinpeRukAlai;
	kOL kAl n'Igkiya koTu veN tigkaL
	kETu il vizup pukaz n'AL talaivan'tena,
	uccik kuTattar, puttakal maNTaiyar,
	potu cey kampalai mutu cem peNTir
10	munnavum pinnavum muRai muRai tarattara,
	putalvaR payan'ta titalai av vayiRRu
	vAl izai makaLir n'Alvar kUTi,
	'kaRpinin vazAa, n'aR pala utavip
	peRROR peTkum piNaiyai Aka!' ena,
15	n'IroTu corin'ta Ir itaz alari
	pal irug katuppin n'elloTu tayagka,
	vatuvai n'al maNam kazin'ta pinRai,
	kallen cummaiyar, jerErenap pukutan'tu,
	'pEr iRkizatti Aka' enat tamar tara,
20	Or iR kUTiya uTan puNar kagkul,
	koTum puRam vaLaii, kOTik kaligkattu
	oTugkinaL kiTan'ta Or puRam tazIi,
	muyagkal viruppoTu mukam putai tiRappa,
	ajcinaL uyirttakAlai, 'yAza n'in
25	n'ejcam paTarn'tatu ejcAtu urai' ena,
	in n'akai irukkai, pin yAn vinavalin,
	cej cUTTu oN kuzai vaN kAtu tuyalvara,
	akam mali uvakaiyaL Aki, mukan ikuttu,
	oyyena iRaijciyOLE mAvin
30	maTam koL mataiiya n'Okkin,
	oTugku Ir Oti, mAayOLE.

91. pAlai

	viLagkupakal utaviya pal katir jAyiRu
	vaLam kezu mA malai payam keTat teRutalin,
	aruvi AnRa peru varai marugkil
	cUrc cunai tuzaii n'Irppayam kANAtu,
5	pAci tinRa paig kaN yAnai
	Oy pacip piTiyoTu orutiRan oTugka,
	vEy kaN uTain'ta veyil avir n'anan'talai
	arum poruL vETkaiyin akanRanar Ayinum,
	perum pEr anpinar tOzi!-irug kEz
10	iralai cEkkum, paral uyar patukkaik
	kaTugkaN mazavar kaLavu uzavu ezun'ta
	n'eTug kAl Acini oTugkATTu umpar,
	vicipiNi muzavin kuTTuvan kAppa,
	paci ena aRiyAp paNai payil irukkai,
15	taTa maruppu erumai tAmarai munaiyin,
	muTam mutir palavin kozu n'izal vatiyum,
	kuTan'ATu peRinum taviralar
	maTamAn n'Okki! n'in mAN n'alam maRan'tE.

97. pAlai

	'kaLLi am kATTa puLLi am poRik kalai
	vaRan uRal am kOTu utira, valam kaTan'tu,
	pulavup puli tuRan'ta kalavuk kazi kaTu muTai,
	iravuk kuRumpu alaRa n'URi, n'irai pakuttu,
5	irug kal muTukkart tiRRi keNTum
	kolai vil ATavar pOla, palavuTan
	perun' talai eruvaiyoTu parun'tu van'tu iRukkum
	aruj curam iRan'ta koTiyOrkku alkalum,
	irug kazai iRumpin Ayn'tu koNTu aRutta
10	n'uNagku kaN ciRu kOl vaNagkuiRai makaLiroTu
	akavun'arp puran'ta anpin, kazal toTi,
	n'aRavu makiz irukkai, n'annan vENmAn
	vayalai vEli viyalUr anna, n'in
	alarmulai Akam pulampa, pala n'inain'tu,
15	Azal' enRi tOzi! yAza en
	kaN pani n'iRuttal eLitO kuravu malarn'tu,
	aRciram n'Igkiya arum pata vEnil
	aRal avir vAr maNal akalyARRu aTaikarai,
	tuRai aNi marutamoTu ikal koLa Ogki,
20	kaliz taLir aNin'ta iruj cinai mAattu
	iNar tatai putup pU n'iraitta pogkar,
	pukai purai am majcu Ura,
	n'ukar kuyil akavum kural kETpOrkkE?

107. pAlai

	n'I celavu ayarak kETToRum, pala n'inain'tu,
	anpin n'ejcattu, ayAap poRai melin'ta
	en akattu iTumpai kaLaimAr, n'innoTu
	karug kal viyal aRaik kiTappi, vayiRu tinRu
5	irum puli tuRan'ta ERRumAn uNagkal,
	n'eRi cel vampalar uvan'tanar AgkaN,
	olikazai n'ellin ariciyoTu OrAgku
	An n'ilaip paLLi aLai peytu aTTa
	vAl n'iNam urukkiya vAal veN cORu
10	pukar arait tEkkin akal ilai mAn'tum
	kallA n'IL mozik kata n'Ay vaTukar
	val AN aru munai n'In'ti, allAn'tu,
	uku maN URu ajcum oru kAR paTTattu
	innA ERRattu izukki, muTam kUrn'tu,
15	oru tanittu ozin'ta uranuTai n'On pakaTu
	am kuzai iruppai aRai vAy vAn puzal
	pul uLaic ciRAar villin n'Ikki,
	marai kaTin'tu UTTum varaiakac cIRUr
	mAlai in tuNaiAki, kAlaip
20	pacu n'anai n'aRu vIp parUup paral uRaippa,
	maNa manai kamazum kAnam
	tuNai Ir Oti en tOziyum varumE.

112. kuRijci

	kUnal eNkin kuRu n'aTait tozuti
	citalai ceyta cen' n'ilaip puRRin
	maN punai n'eTug kOTu uTaiya vAgki,
	irai n'acaiip parikkum arain'AT kagkul
5	InRu aNi vayavup piNap pacittena, maRap puli
	oLiRu En'tu maruppin kaLiRu aTTuk kuzumum
	pani iruj cOlai, 'emiyam' ennAy,
	tIgku ceytanaiyE, Igku van'tOyE;
	n'AL iTaippaTin, en tOzi vAzAL;
10	tOLiTai muyakkam n'Iyum veyyai;
	kaziyak kAtalar Ayinum, cAnROr
	paziyoTu varUum inpam veHkAr;
	varaiyin evanO? vAn tOy veRpa!
	kaNak kalai ikukkum kaRi ivar cilampin
15	maNappu arug kAmam puNarn'tamai aRiyAr,
	tonRu iyal marapin manRal ayara,
	peN kOL ozukkam kaN koLa n'Okki,
	n'otumal virun'tinam pOla, ivaL
	putu n'AN oTukkamum kANkuvam, yAmE.

121. pAlai

	n'Am n'akai uTaiyam n'ejcE! kaTun' teRal
	vEnil n'ITiya vAn uyar vazin'AL,
	vaRumai kUriya maN n'Irc ciRu kuLat
	toTukuzi marugkil tuvvAk kalagkal
5	kanRuTai maTap piTik kayan'talai maNNi,
	cERu koNTu ATiya vERupaTu vayak kaLiRu
	ceg kOl vAl iNar tayagkat tINTi,
	cori puRam urijiya n'eRi ayal marA attu
	alkuRu vari n'izal acaii, n'ammoTu
10	tAn varum enpa, taTa men tOLi
	uRukaN mazavar uruL kINTiTTa
	ARu cel mAkkaL cORu poti veN kuTai
	kanai vicaik kaTu vaLi eTuttalin, tuNai cettu
	veruL ERu payirum AgkaN,
15	karu muka mucuvin kAnattAnE.

129. pAlai

	'uLLal vENTum ozin'ta pin' ena
	n'aLLen kagkul n'aTugku tuNai Ayavar
	n'in maRan'tu uRaital yAvatu? 'pul maRain'tu
	alagkal vAn kazai utirn'el n'Okki,
5	kalai piNai viLikkum kAnattu AgkaN,
	kal cErpu irun'ta katuvAyk kurampait
	tAzimutaR kalitta kOzilaip paruttip
	poti vayiRRu iLag kAy pETai UTTi,
	pOkil piLan'tiTTa pogkal veN kAz
10	n'alkUr peNTir alkaR kUTTum
	kalagkumunaic cIRUr kai talaivaippa,
	kozuppu A tinRa kUrm paTai mazavar,
	ceruppuTai aTiyar, teN cunai maNTum
	aruj curam ariyaalla; vAr kOl
15	tirun'tu izaip paNait tOL, tEn n'ARu katuppin,
	kuvaLai uNkaN, ivaLoTu celaRku' ena
	n'ejcu vAy avizn'tanar kAtalar
	am cil Oti Ayizai! n'amakkE.

133. pAlai

	'kunRi anna kaNNa, kurUu mayir,
	pun tAL, veLLeli mOvAy ERRai
	cem paral murampil citarn'ta pUzi,
	n'al n'AL vEgkai vI n'ankanam varippa,
5	kAr talaimaNan'ta paim putaR puRavin,
	vil eRi pajciyin veN mazai tavazum
	kollai itaiya kuRum poRai marugkil,
	kari paran'tanna kAyAj cemmaloTu
	eri paran'tanna ilamalar viraii,
10	pUg kaluz cuman'ta tIm punaR kAn yARRu
	vAn koL tUval vaLi tara uNkum;
	emmoTu varutal vallaiyO maRRu?' enak
	kon onRu vinavinarmannE tOzi!
	ital muL oppin mukai mutir veTci
15	kol punak kurun'toTu kal aRait tAam
	miLai n'ATTu attattu Irj cuvaR kalitta
	vari maraR kaRikkum maTap piNait
	tirimaruppu iralaiya kATu iRan'tOrE.

134. mullai

	vAnam vAyppak kavini, kAnam
	kamaj cUl mA mazai kAr payan'tu iRuttena,
	maNi maruL pUvai aNi malar iTaiiTai,
	cem puRa mUtAy parattalin, n'an pala
5	mullai vI kazal tAay, vallOn
	ceykai anna cen' n'ilap puRavin;
	vAap pANi vayagku toziR kalimAt
	tAat tAL iNai mella otugka,
	iTi maRan'tu, Emati valava! kuvimukai
10	vAzai vAn pU UzuRupu utirn'ta
	ozikulai anna tirimaruppu ERRoTu
	kaNaik kAl am piNaik kAmar puNar n'ilai
	kaTumAn tEr oli kETpin,
	n'aTun'AT kUTTam Akalum uNTE.

139. pAlai

	tujcuvatu pOla iruLi, viN paka
	imaippatu pOla minni, uRaikkoNTu
	ERuvatu pOlap pATu ciRan'tu uraii,
	n'ilam n'ejcu uTka OvAtu cilaittu Agku,
5	Ar taLi pozin'ta vAr peyaR kaTai n'AL;
	InRu n'AL ulan'ta vAlA veN mazai
	vAn tOy uyar varai ATum vaikaRai,
	putal oLi ciRan'ta kANpu in kAlai,
	taN n'aRum paTun'Ir mAn'ti, patavu arun'tu
10	veN puRakku uTaiya tirimaruppu iralai;
	vAr maNal oru ciRaip piTavu aviz kozu n'izal,
	kAmar tuNaiyoTu EmuRa vatiya;
	arakku n'iRa uruvin Iyal mUtAy
	parappiyavaipOR pAay, pala uTan
15	n'Ir vAr marugkin IraNi tikaza;
	innum vArAr Ayin n'annutal!
	yAtukol maRRuavar n'ilaiyE? kAtalar
	karuvik kAr iTi irIiya
	paruvam anRu, avar, 'varutum' enRatuvE.

147. pAlai

	Ogkumalaic cilampil piTavuTan malarn'ta
	vEgkai veRit tazai vERu vakuttanna
	Un poti avizAk kOTTu ukirk kuruLai
	mUnRu uTan InRa muTagkar n'izatta,
5	tuRukal viTar aLaip piNavup paci kUrn'tena,
	poRi kiLar uzuvaip pOz vAy ERRai
	aRu kOTTu uzai mAn AN kural Orkkum
	n'eRi paTu kavalai n'irampA n'ILiTai,
	veLLi vItiyaip pOla n'anRum
10	celavu ayarn'ticinAl yAnE; pala pulan'tu,
	uNNA uyakkamoTu uyir celac cAay,
	tOLum tol kavin tolaiya, n'ALum
	pirin'tOr peyarvukku iragki,
	marun'tu piRitu inmaiyin, irun'tu vinaiilanE!

151. pAlai

	'tam n'ayan'tu uRaivOrt tAgki, tAm n'ayan'tu
	in amar kELiroTu EmuRak kezIi,
	n'akutal ARRAr n'alkUrn'tOr!' ena,
	miku poruL n'inaiyum n'ejcamoTu aruL piRitu
5	Apaman vAzi, tOzi! kAl viripu
	uRuvaLi eRitoRum kalagkiya poRi varik
	kalaimAn talaiyin mutalmutaR kavartta
	kOTal am kavaTTa kuRug kAl uzujcil
	tARu cinai viLain'ta n'eRRam, ATumakaL
10	arik kOR paRaiyin, aiyena olikkum
	patukkaittu Aya cetukkai n'Izal,
	kaLLi muL araip porun'ti, cellun'arkku
	uRuvatu kURum, ciRu cen' n'Avin
	maNi Orttanna teN kural
15	kaNi vAy, palliya kATu iRan'tOrE!

154. mullai

	paTu mazai pozin'ta payam miku puRavin
	n'eTu n'Ir avala pakuvAyt tErai
	ciRu pal iyattin n'eTu n'eRik kaRagka,
	kuRum putaR piTavin n'eTug kAl alari
5	cen' n'ilamarugkin n'uN ayir varippa,
	vej cina aravin pai aNan'tanna
	taN kamaz kOTal tAtu piNi aviza,
	tiri maruppu iralai teL aRal parukik
	kAmar tuNaiyoTu EmuRa vatiya,
10	kATu kavin peRRa taN patap peru vazi;
	OTupari meliyAk koycuvaR puravit
	tAL tAz tAr maNi tayagkupu iyampa
	Urmati valava! tErE cIr mikupu
	n'am vayiR purin'ta koLkai
15	am mA arivaiyait tunnukam, virain'tE.

173. pAlai

	'aRam talaippiriyAtu ozukalum, ciRan'ta
	kELir kETu pala UnRalum, n'ALum
	varun'tA uLLamoTu irun'tOrkku il' enac
	ceyvinai purin'ta n'ejcinar, 'n'aRu n'utal
5	mai Ir Oti! arum paTar uzattal
	cil n'AL tAgkalvENTum' enRu, n'in
	n'al mAN el vaLai tiruttinar Ayin,
	varuvar vAzi, tOzi! pala puri
	vAr kayiRRu ozukai n'On cuvaR koLIi,
10	pakaTu tuRai ERRattu umaN viLi verIi,
	uzaimAn am piNai inan irin'tu OTa,
	kATu kavin aziya uraii, kOTai
	n'inRu tina viLin'ta, am paNai, n'eTu vEyk
	kaN viTat teRikkum maNNA muttam
15	kazagku uRaz tOnRala, pazag kuzit tAam
	in kaLi n'aRavin iyal tEr n'annan
	viN poru n'eTu varaik kavAan
	pon paTu marugkin malai iRan'tOrE.

184. mullai

	kaTavuT kaRpoTu kuTikku viLakku Akiya
	putalvaR payan'ta pukaz miku ciRappin
	n'annarATTikku anRiyum, enakkum
	initu AkinRAl; ciRakka, n'in AyuL!
5	arun' tozil muTitta cemmal uLLamoTu
	curumpu imir malara kAnam piRpaTa,
	veN piTavu avizn'ta vI kamaz puRavil
	kuNTaik kOTTa kuRu muL kaLLip
	pun talai putaitta kozug koTi mullai
10	Ar kazal putup pU uyirppin n'Ikki,
	teL aRal parukiya tirimaruppu eziR kalai
	puLLi am piNaiyoTu vatiyum AgkaN,
	kOTuTaik kaiyar, tuLar eRi vinaijar,
	ariyal Arkaiyar, viLaimakiz tUgka,
15	celkatir mazukiya uruva jAyiRRuc
	cekkar vAnam cenRa pozutil,
	kaR pAl aruviyin olikkum n'al tErt
	tAr maNi pala uTan iyampa
	cIr miku kurucil! n'I van'tu n'inRatuvE.

194. mullai

	pEr uRai talaiiya perum pular vaikaRai,
	Er iTam paTutta iru maRup pUzip
	puRam mARu peRRa pUval Irattu,
	Un kizittanna cej cuval n'eTuj cAl,
5	vittiya marugkin vitai pala n'ARi,
	iralai n'al mAninam paran'tavaipOl,
	kOTuTait talaikkuTai cUTiya vinaijar,
	kaRagku paRaic cIrin iragka vAgki,
	kaLai kAl kazIiya perum puna varakin
10	kavaik katir irum puRam katUu uNTa,
	kuTumi n'eRRi, n'eTu mAt tOkai
	kAmar kalavam parappi, EmuRak
	kollai uzavar kUz n'izal ozitta
	val ilaik kurun'tin vAgkucinai irun'tu,
15	kiLi kaTi makaLirin viLi paTap payirum
	kArman ituvAl tOzi! 'pOr mikak
	koTujci n'eTun' tEr pUNTa, kaTum pari,
	viriuLai, n'al mAn kaTaii
	varutum' enRu avar teLitta pOztE.

195. pAlai

	'aruj curam iRan'ta en perun' tOT kuRumakaL
	tirun'tuvEl viTalaiyoTu varum' ena, tAyE,
	punai mAN ijci pUval UTTi,
	manai maNal aTuttu, mAlai n'ARRi,
5	uvan'tu, initu ayarum enpa; yAnum,
	mAn piNai n'Okkin maTa n'allALai
	InRa n'aTpiRku aruLAn Ayinum,
	in n'akai muRuval Ezaiyaip pal n'AL,
	kUn'tal vAri, n'ucuppu ivarn'tu, Ompiya
10	n'alam punai utaviyum uTaiyanmannE;
	aHtu aRikiRpinO n'anRuman tilla;
	aRuvai tOyum oru perug kuTumi,
	ciRu pai n'ARRiya pal talaik koTug kOl,
	Akuvatu aRiyum mutuvAy, vEla!
15	kURukamAtO, n'in kazagkin tiTpam;
	mARA varupani kaluzum kagkulil,
	AnAtu tuyarum em kaN initu paTIiyar,
	em manai mun'tuRat tarumO?
	tan manai uykkumO? yAtu avan kuRippE?

199. pAlai

	karai pAy veN tirai kaTuppa, pala uTan,
	n'irai kAl oRRalin, kal cErpu utirum
	varai cEr marAattu Uz malar peyal cettu,
	uyagkal yAnai n'Ir n'acaikku alamara,
5	cilampi valan'ta vaRuj cinai vaRRal
	alagkal ulavai ari n'izal acaii,
	tiragkumaral kavviya kaiyaRu tokun'ilai,
	aram tin Ucit tiraL n'uti anna,
	tiN n'ilai eyiRRa cen'n'Ay eTuttalin,
10	vaLi munaip pULaiyin oyyenRu alaRiya
	keTumAn ina n'irai tarIiya, kalaiyE
	katir mAy mAlai AN kural viLikkum
	kaTal pOl kAnam piRpaTa, 'piRar pOl
	celvEm Ayin, em celavu n'anRu' ennum
15	Acai uLLam acaivinRu turappa,
	n'I celaRku uriyai n'ejcE! vEy pOl
	taTaiyina mannum, taNNiya, tiraNTa,
	perun' tOL arivai oziya, kuTAatu,
	irum pon vAkaip perun'tuRaic ceruvil,
20	polam pUN n'annan porutu kaLattu oziya,
	valam paTu koRRam tan'ta vAy vAL,
	kaLagkAyk kaNNi n'Ar muTic cEral
	izan'ta n'ATu tan'tanna
	vaLam peritu peRinum, vAralen yAnE.

234. mullai

	kAr payam pozin'ta n'Ir tikaz kAlai,
	n'uN ayir paran'ta taN aya marugkin,
	n'irai paRai annattu anna, virai parip
	pul uLaik kalimA mellitin koLIiya,
5	vaLpu orugku amaiyap paRRi, muLkiya
	pal katir Azi mel vazi aRuppa,
	kAl ena maruLa, ERi, n'Ul iyal
	kaN n'Okku ozikkum paN amai n'eTun' tEr
	val virain'tu Urmati n'al valam peRun'a!
10	tatar tazai munaiiya teRi n'aTai maTap piNai
	ERu puNar uvakaiya URu ila ukaLa,
	am ciRai vaNTin men paRait tozuti
	mullai n'aRu malart tAtu n'ayan'tu Uta,
	ellai pOkiya pullen mAlai,
15	puRavu aTain'tirun'ta uRaivu in n'al Ur,
	kazi paTar uzan'ta pani vAr uNkaN
	n'al n'iRam paran'ta pacalaiyaL
	min n'Er Otip pinnup piNi viTavE.

241. pAlai

	'tuni inRu iyain'ta tuvarA n'aTpin
	iniyar amma, avar' ena muniyAtu
	n'alkuvar n'alla kURinum, alkalum,
	piriyAk kAtaloTu uzaiyar Akiya
5	n'amarman vAzi, tOzi! uyarmicai
	mUgkil iLa muLai tiragka, kAmpin
	kazai n'aral viyal akam vempa, mazai maRan'tu
	aruvi AnRa veruvaru n'anan'talai,
	pEey veN tEr peyal cettu OTi,
10	tAam paTTa tani mutir perug kalai
	pulam peyarn'tu uRaital cellAtu, alagkutalai
	virun'tin veg kATTu varun'ti vaikum
	atta n'ellit tIj cuvait tiraL kAy
	vaTTak kazagkin tAay, tuyt talaic
15	cem muka man'ti ATum
	n'al mara marugkin malai iRan'tOrE!

249. pAlai

	amma vAzi, tOzi! pal n'AL
	iv Ur ampal evanO? vaL vAr
	vici piNittu yAtta ari kOl teN kiNai
	in kural akavun'ar irappin, n'AToRum
5	pon kOTTuc ceRittu, polan'tAr pUTTi,
	cAn'tam putaitta En'tu tuLagku ezil imil
	ERu mun'tuRuttu, cAl patam kuvaii,
	n'eTun' tEr kaLiRRoTu curakkum koTum pUN
	pal vEl mucuNTai vEmpi anna en
10	n'al ezil iLa n'alam tolaiyinum, n'alkAr
	pal pUg kAnattu alku n'izal acaii,
	tOkait tUvit toTait tAr mazavar
	n'Aku A vIzttu, tiRRi tinRa
	pulavuk kaLam tuzaiiya tukaL vAyk kOTai
15	n'IL varaic cilampin irai vETTu ezun'ta
	vAL vari vayap puli tINTiya viLi cettu,
	vERu vERu kavalaiya ARu parin'tu, alaRi,
	uzai mAn ina n'irai OTum
	kazai mAy piRagkal malai iRan'tOrE.

283. pAlai

	n'al n'eTug katuppoTu perun' tOL n'Ivi,
	n'in ivaN ozital ajciya enninum,
	celavu talaikkoNTa peru vituppu uRuvi
	pal kavar maruppin mutu mAn pOkki,
5	cil uNAt tan'ta cIRUrp peNTir
	tirivayin, tevuTTum cEN pulak kuTijaip
	paital men kural aitu van'tu icaittoRum,
	pOkun'ar pulampum ARE EkutaRku
	ariya Akum ennAmai, kari maram
10	kaN akai iLag kuzai kAlmutal kavini,
	vicumpuTan iruNTu, vemmai n'Igka,
	pacug kaN vAnam pAy taLi pozin'tena,
	pul n'ukumpu eTutta n'al n'eTug kAnattu,
	UTTuRu pajcip picir paran'tanna
15	vaNNa mUtAy taN n'ilam varippa,
	iniya Akuka taNin'tE
	innA n'Ippin n'innoTu celaRkE.

287. pAlai

	toTi aNi munkait toku viral kuvaii,
	paTiva n'ejcamoTu pakal tuNai Aka,
	n'Omkol? aLiyaL tAnE! tUgku n'ilai,
	marai ERu coRin'ta, mAt tAT kan'tin
5	curai ivar potiyil am kuTic cIRUr
	n'AT pali maRan'ta n'araik kaN iTTikai,
	puricai mUzkiya pori arai Alattu
	oru tani n'eTu vIz utaitta kOTai
	tuNaip puRA irikkum tUy mazai n'anan'talai,
10	kaNaik kAl am piNai ERu puRam n'akka,
	olku n'ilai yAattu Ogku cinai payan'ta
	alkuRu vari n'izal acaiyinam n'Okka,
	arampu van'tu alaikkum mAlai,
	n'irampA n'IL iTai varun'tutum yAmE.

304. mullai

	iru vicumpu ivarn'ta karuvi mA mazai,
	n'Ir ceRi n'ugkin kaN citarn'tavai pOl,
	cUr panippanna taN varal AliyoTu
	parUup peyal azi tuLi talaii, vAn n'avinRu,
5	kurUut tuLi pozin'ta perum pular vaikaRai,
	ceytu viTTanna cen' n'ila marugkil,
	ceRittu n'iRuttanna teL aRal paruki,
	ciRu maRi tazIiya teRin'aTai maTap piNai,
	valam tiri maruppin aNNal iralaiyoTu,
10	alagku cinaik kurun'tin alku n'izal vatiya,
	curumpu imirpu Uta, piTavut taLai aviza,
	arum poRi majjai Ala, vari maNal
	maNi miTai pavaLam pOla, aNi mikak
	kAyAj cemmal tAay, pala uTan
15	Iyal mUtAy Irm puRam varippa,
	pulan aNi koNTa kAr etir kAlai,
	'En'tu kOTTu yAnai vEn'tan pAcaRai
	vinaiyoTu vERu pulattu alki, n'anRum
	aRavar allar, n'am aruLAtOr' ena,
20	n'am n'Oy tanvayin aRiyAL,
	em n'on'tu pulakkumkol, mAayOLE?

314. mullai

	'n'Ilattu anna n'Ir poti karuvin,
	mA vicumpu atira muzagki, Aliyin
	n'ilam taNNenRu kAnam kuzaippa,
	inam tEr uzavar in kural iyampa,
5	maRiyuTai maTap piNai tazIi, puRavin
	tirimaruppu iralai paim payir ukaLa,
	Ar peyal utaviya kAr cey kAlai,
	n'Ul n'eRi n'uNagkiya kAl n'avil puravi
	kallenak kaRagku maNi iyampa, vallOn
10	vAc cela vaNakkiya tAp pari n'eTun' tEr
	Irm puRavu iyagku vazi aRuppa, tIm toTaip
	paiyuL n'al yAz cevvazi piRappa,
	in' n'ilai vArAr Ayin, tam n'ilai
	evankol? pANa! uraitticin, ciRitu' ena,
15	kaTavuT kaRpin maTavOL kURa,
	cey vinai azin'ta maiyal n'ejcin
	tuni koL paruvaral tIra, van'tOy!
	initu ceytanaiyAl; vAzka, n'in kaNNi!
	vEli cuRRiya vAl vI mullaip
20	perun' tAr kamazum, virun'tu oli, katuppin
	in n'akai iLaiyOL kavava,
	mannuka, peruma! n'in malarn'ta mArpE!

321. pAlai

	pacitta yAnaip pazagkaN anna
	vaRuj cunai mukan'ta kOTait teL viLi
	vicittu vAgku paRaiyin viTarakattu iyampa,
	katirk kAl am piNai uNIiya, pukal ERu
5	kutirk kAl iruppai veN pU uNNAtu,
	AN kural viLikkum cEN pAl viyan curaip
	paTu maNi ina n'irai uNIiya, kOvalar
	viTu n'ilam uTaitta kaluz kaN kUval,
	kanRuTai maTap piTi kaLiRoTu taTavarum
10	pun talai manRattu am kuTic cIRUr,
	tuNaiyoTu tuccil irukkumkollO?
	kaNaiyOr ajcAk kaTugkaN kALaiyoTu
	elli munnuRac cellumkollO?
	ev vinai ceyugkol? n'OkO yAnE!
15	ari peytu potin'ta teri cilampu kazIi,
	yAy aRivuRutal ajci,
	vEy uyar piRagkal malai iRan'tOLE.

353. pAlai

	ALvinaip piritalum uNTO? piriyinum,
	kEL, ini vAziya, n'ejcE! n'ALum
	kanavuk kazin'tanaiyavAki, n'anavin,
	n'ALatu celavum, mUppinatu varavum,
5	aritu peRu ciRappin kAmattu iyaRkaiyum,
	in' n'ilai aRiyAy Ayinum, cen' n'ilai
	amai ATu am kazai tINTi, kallena
	jemai ilai utirtta eri vAyk kOTai
	n'eTu veN kaLari n'IRu mukan'tu cuzala,
10	kaTu veyil tirukiya vEnil veg kATTu,
	uyagku n'aTai maTap piNai tazIiya, vayagku poRi,
	aRu kOTTu, eziR kalai aRukayam n'Okki,
	teN n'Ir vETTa ciRumaiyin, tazai maRan'tu,
	uNn'Ir inmaiyin, olkuvana taLara,
15	maram n'izal aRRa iyavin curan iRan'tu,
	uLLuvai allaiyO maRRE uLLiya
	virun'tu ozivu aRiyAp perun' taN pan'tar,
	varun'ti varun'ar Ompi, taNNenat
	tAtu tukaL utirtta tAzai am kUn'tal
20	vIz itaz alari mel akam cErtti,
	makiz aNi muRuval mANTa cEkkai,
	n'ammoTu n'an mozi n'avilum
	pommal Otip punaiyizai kuNanE?

367. pAlai

	ilagku cuTar maNTilam pulam talaippeyarn'tu,
	pal katir mazukiya kal cEr amaiyattu,
	alan'talai mUtERu AN kural viLippa,
	manai vaLar n'occi mA cErpu vatiya,
5	munai uzai irun'ta am kuTic cIRUr,
	karug kAl vEgkaic cej cuval varakin
	miku patam n'iRain'ta toku kUTTu oru ciRai,
	kuvi aTi verukin paig kaN ERRai
	Un n'acaip piNavin uyagku paci kaLaiiyar,
10	taLir purai koTiRRin, ceRi mayir eruttin,
	katirtta cennik kavirp pU anna
	n'eRRic cEval aRRam pArkkum
	pullen mAlaiyum, initu manRamma
	n'al aka vana mulai aTaiyap pullutoRum
15	uyir kuzaippanna cAyal,
	ceyir tIr, in tuNaip puNarn'ticinOrkkE.

371. pAlai

	av viLimpu urIiya vicai amai n'On cilai,
	cev vAyp pakazi, ceyir n'Okku ATavar
	kaNai iTak kazin'ta tan vIztuNai uLLi,
	kuRu n'eTun' tuNaiya maRi puTai ATa,
5	punkaN koNTa tiri maruppu iralai
	mEy patam maRutta ciRumaiyoTu, n'Oy kUrn'tu,
	n'eytal am paTuvil cil n'Ir uNNAtu,
	eHku uRu mAn'tarin inain'tu kaNpaTukkum,
	paitu aRa vempiya pAz cEr attam,
10	emiyam n'In'tum emminum, pani vArn'tu,
	ennaAm kol tAmE 'teN n'Ir
	Ay cunai n'ikar malar pOnm' ena n'acaii
	vI tEr paRavai vizaiyum
	pOtu Ar kUn'tal n'am kAtali kaNNE?

378. kuRijci

	'n'itiyam tujcum n'ivan'tu Ogku varaippin,
	vatuvai makaLir kUn'tal kamaz koLa,
	vagkUz ATTiya am kuzai vEgkai
	n'an pon anna n'aRun' tAtu utira,
5	kAmar pIli Ay mayil tOkai
	vERu vERu inatta varai vAz varuTaik
	kOTu muRRu iLan' takarp pATu viRan'tu, ayala
	ATu kaLa vayirin iniya Ali,
	pacum puRa men cIr ociya, vicumpu ukan'tu,
10	irug kaN ATu amait tayagka irukkum
	perug kal n'ATan pirin'ta pulampum,
	uTanRa annai amarA n'Okkamum,
	vaTan'tai tUkkum varu pani aRcirac
	cuTar kezu maNTilam azugka, jAyiRu
15	kuTa kaTal cErum paTar kUr mAlaiyum,
	anaittum, aTUu n'inRu n'aliya, ujaRRi,
	yAgganam vAzti?' enRi tOzi!
	n'IgkA vajcinam ceytu; n'at tuRan'tOr
	uLLAr Ayinum, uLenE avar n'ATTu
20	aL ilaip palavin kani kavar kaiya
	kallA man'ti kaTuvanOTu ukaLum
	kaTun' tiRal aNagkin n'eTum perug kunRattu,
	pATu in aruvi cUTi,
	vAn tOy cimaiyam tOnRalAnE.

379. pAlai

	n'am n'ayan'tu uRaivi tol n'alam aziya,
	teruLAmaiyin tItoTu kezIi,
	aruL aRa, n'imirn'ta munpoTu poruL purin'tu,
	ALvinaikku etiriya, mILi n'ejcE!
5	n'inaiyinaiAyin, enava kENmati!
	viri tirai mun'n'Ir maN tiNi kiTakkai,
	pariti am celvam potumai inRi,
	n'anavin iyanRatuAyinum, kagkul
	kanavin aRRu, atan kazivE; atanAl,
10	viravuRu pal malar vaNTu cUzpu aTaicci,
	cuvalmicai acaiiya n'ilai tayagku uRu muTi
	INTu pal n'ARRam vENTuvayin uvappa,
	ceyvuRu viLagku izaip polin'ta tOL cErpu,
	eytiya kanai tuyil ERRoRum, tiruki,
15	mey pukuvanna kai kavar muyakkin
	mikuti kaNTanRO ilenE; n'I n'in
	pal poruL vETkaiyin, col varai n'Ivi,
	celavu valiyuRuttanai Ayin, kAloTu
	kanai eri n'ikazn'ta ilai il am kATTu,
20	uzaip puRattu anna puLLi n'Izal,
	acaiiya pozutil pacaiiya van'tu, ivaL
	maRappu arum pal kuNam n'iRattu van'tu uRutara,
	oru tiRam n'inaittal cellAy, tiripu n'inRu,
	uRu puli uzan'ta vaTu maruppu oruttaRkup
25	piTi iTu pUcalin aTi paTak kuzin'ta
	n'irampA n'IL iTait tUgki,
	iragkuvai allaiyO, uram keTa melin'tE?

395. pAlai

	taN kayam payan'ta vaN kAR kuvaLai
	mAri mA malar peyaRku ERRanna,
	n'IroTu n'iRain'ta pEr amar mazaik kaN
	pani vAr evvam tIra, ini varin,
5	n'anRuman vAzi, tOzi! teRu katir
	Iram n'aitta n'Ir aRu n'anan'talai
	azal mEyn'tu uNTa n'izal mAy iyavin,
	vaRal marattu anna kavai maruppu eziR kalai,
	aRal avirn'tanna tEr n'acaii OTi,
10	pulampu vazippaTTa ulamaral uLLamoTu,
	mEy piNaip payirum melin'tu azi paTar kural
	aruj curam cellun'ar AL cettu Orkkum,
	tirun'tu arai jemaiya, perum punak kunRattu,
	ATu kazai iru vetir n'aralum
15	kOTu kAy kaTaRRa kATu iRan'tOrE!

399. pAlai

	cimaiyak kurala cAn'tu arun'ti, iruLi,
	imaiyak kAnam n'ARum kUn'tal,
	n'al n'utal, arivai! in uRal Akam
	parukuvanna kAtal uLLamoTu,
5	tirukupu muyagkal inRi, avaN n'ITAr
	kaTaRRu aTai marugkin kaNicciyin kuzitta
	uTaikkaN n'ITu amai URal uNTa,
	pATu in teN maNi, payam kezu peru n'irai
	vATu pulam pukkena, kOTu tuvaittu akaRRi,
10	olku n'ilaik kaTukkai alku n'izal acaii,
	pal An kOvalar kallAtu Utum
	ciRu vetirn' tIm kuzaR pulampu koL teL viLi,
	mai il paLigkin anna tORRap
	pal kOL n'ellip paig kAy arun'ti,
15	melkiTu maTa marai Orkkum attam,
	kAy katir kaTukiya kavin azi piRagkal,
	vEy kaN uTain'ta cimaiya,
	vAy paTu marugkin malai iRan'tOrE.