parun'tu(eruvai, kazuku)

3. pAlai
irug kazi mutalai mEen'tOl anna
karug kAl Omaik kANpu in peruj cinaik
kaTiyuTai n'anan'talai, InRu iLaippaTTa,
koTu vAyp pETaikku alkuirai tarIiya,
5
mAnRu vETTu ezun'ta cej cevi eruvai
vAn tOy cimaiya viRal varaik kavAan,
tuLagku n'aTai maraiyA valam paTat tolaicci,
oN ceg kuruti uvaRRi uNTu arun'tupu,
pulavup puli tuRan'ta kalavuk kazi kaTu muTai,
10
koLLai mAn'tarin AnAtu kavarum
pul ilai marAatta akan cEN attam,
kalam taral uLLamoTu kaziyak kATTi,
pin n'inRu turakkum n'ejcam! n'in vAy
vAypOl poymmozi evvam en kaLaimA
15
kavir itaz anna kANpu in cev vAy,
am tIm kiLavi, Ay izai, maTan'tai
koTug kuzaikku amartta n'Okkam
n'eTuj cEN Ar iTai vilagkum jAnRE?

mun oru kAlattu, n'ejcinAl poruL valikkappaTTup pirin'tAn, talaimakan; pirin'tu iTaic curattininRu avaL n'alam n'ayan'tu mILaluRRa n'ejcinaik kazaRippOy, poruL muTittu van'ta talaimakan, pinnum poruL

19. pAlai
anRu avaN ozin'tanRum ilaiyE; van'tu n'ani
varun'tinai vAzi, en n'ejcE! parun'tu irun'tu
uyA viLi payiRRum, yA uyar, n'anan'talai,
uruL tuTi makuLiyin poruL terin'tu icaikkum
5
kaTug kuraR kuTijaiya n'eTum perug kunRam,
emmoTu iRattalumcellAy; pin n'inRu,
oziyac cUzn'tanaiAyin, tavirAtu,
cel ini; ciRakka, n'in uLLam! vallE
maRaval Ompumati, emmE n'aRavin
10
cEyitaz anaiya Aki, kuvaLai
mA itaz puraiyum malir koL Ir imai,
uLLakam kanala uLLutoRu ulaRi,
pazagkaN koNTa, kalizn'tu vIz, avir aRal
veyya ukutara, verIi, paiyena,
15
cil vaLai corin'ta mel iRai munkai
pU vI koTiyin pullenap pOki,
aTarcey Ay akal cuTar tuNai Aka,
iyagkAtu vatin'ta n'am kAtali
uyagku cAy ciRupuRam muyagkiya pinnE!

n'ejcinAR poruL valikkappaTTup pirin'ta talaimakan, talaimakaL n'alan n'ayan'tu uLLiya n'ejcinaik kazaRiyatu. - porun'til iLagkIranAr

21. pAlai
'manai iLa n'occi mauval vAl mukait
tuNai n'iraittanna, mA vIz, veN pal,
av vayiRRu, akanRa alkul, taiit
tAz men kUn'tal, taTa men paNait tOL,
5
maTan'tai mAN n'alam pulampa, cEy n'ATTuc
cellal' enRu, yAn collavum, ollAy,
vinai n'ayan'tu amain'tanaiAyin, manai n'akap
pal vERu veRukkai tarukam vallE,
ezu ini, vAzi, en n'ejcE! puri iNar
10
mel aviz am cinai pulampa, vallOn
kOTu aRai kompin vI ukat tINTi,
marAam alaitta maNa vAyt tenRal,
curam cel maLLar curiyal tURRum,
enRUz n'inRa pun talai vaippil,
15
parun'tu iLaippaTUum pARu talai Omai
irug kal viTarakattu, InRu iLaippaTTa,
men puniRRu am piNavu pacittena, paig kaT
cen'n'Ay ERRai kEzal tAkka,
iriyaR piNaval tINTalin, parIic
20
ceg kAy utirn'ta paig kulai In'tin
paral maN cuvala muraN n'ilam uTaitta
val vAyk kaNicci, kUz Ar, kOvalar
URAtu iTTa uvalaik kUval,
veN kOTu n'ayan'ta anpu il kAnavar
25
ikazn'tu iyagku iyavin akazn'ta kuzi cettu,
irug kaLiRRu ina n'irai, tUrkkum
perug kal attam vilagkiya kATE.

poruL valikkappaTTup pirin'ta talaimakan iTaic curattun'inRu mILaluRRa n'ejcinaik kazaRiyatu. - kAvanmullaip pUtanAr

27. pAlai
"koTu vari irum puli tayagka, n'eTu varai
ATu kazai iru vetir kOTaikku olkum
kAnam kaTiya ennAr, n'Am aza,
n'inRatu il poruT piNic cenRu ivaN tarumAr,
5
celpa" enpa' enpOy! n'alla
maTavaimanRa n'IyE; vaTavayin
vEgkaTam payan'ta veN kOTTu yAnai,
maRap pOrp pANTiyar aRattin kAkkum
koRkai am perum tuRai muttin anna
10
n'akaip polin'tu ilagkum eyiRu kezu tuvar vAy
takaippat tagkalar Ayinum, ikappa
yAgganam viTumO maRRE tEm paTat
teL n'Irkku ERRa tiraL kAR kuvaLaip
perun'takai citaittum, amaiyA, parun'tu paTa,
15
vEttu amark kaTan'ta venRi n'al vEl
kurutiyoTu tuyalvan'tanna n'in
ari vEy uNkaN amartta n'OkkE?

celavu uNarn'tu vERupaTTa talaimakaTkut tOzi colliyatu. - maturaikkaNakkAyanAr

31. pAlai
n'eruppu enac civan'ta uruppu avir maNTilam
pulagkaTai maTagkat teRutalin, joLki,
'n'ilam puTaipeyarvatu anRukol, inRu?' ena,
man uyir maTin'ta mazai mARu amaiyattu,
5
ilai ila Ogkiya n'ilai uyar yAattu
mER kavaTTu irun'ta pArppinagkaTku,
kalluTaik kuRumpin vayavar vil iTa,
n'iNa varik kuRain'ta n'iRatta atartoRum,
kaNavira mAlai iTUuk kazin'tanna
10
puN umiz kuruti parippak kiTan'tOr
kaN umiz kazukin kAnam n'In'ti,
'cenRAr' enpu ilar tOzi! venRiyoTu
vil alaittu uNNum val AN vAzkkait
tamiz kezu mUvar kAkkum
15
mozi peyar tEetta pal malai iRan'tE.

'piriviTai ARRALAyinAL' enRu piRar collak kETTu, vERupaTTa talaimakaL tOzikkuc colliyatu. - mAmUlanAr

33. pAlai
vinai n'anRAtal veRuppak kATTi,
"manai mAN kaRpin vANutal oziya,
kavai muRi izan'ta cen' n'ilai yAattu
onRu Ogku uyar cinai irun'ta, van paRai,
5
vILaip parun'tin kOL val cEval
vaLai vAyp pETai varu tiRam payirum
iLi tEr tIm kural icaikkum attam
celavu arugkuraiya ennAtu, cenRu, avaL
malar pATu AnRa, mai ezil, mazaik kaN
10
teLiyA n'Okkam uLLinai, uLi vAy
vem paral atara kunRu pala n'In'ti,
yAmE emiyam Aka, n'IyE
oziyac cUzn'tanaiAyin munAatu
vel pOr vAnavan kolli mImicai,
15
n'uNagku amai puraiyum vaNagku iRaip paNait tOL,
vari aNi alkul, vAl eyiRROLvayin
piriyAy Ayin n'anRuman tilla.
anRu n'am aRiyAy Ayinum, inRu n'am
ceyvinai ARRuRa vilagkin,
20
eytuvaiallaiyO, piRar n'aku poruLE?

talaimakan iTaiccurattut tan n'ejciRkuc colliyatu. - maturai aLakkar jAzAr makanAr maLLanAr

44. mullai
van'tu vinai muTittanan vEn'tanum; pakaivarum
tam tiRai koTuttut tamar AyinarE;
muraN ceRin'tirun'ta tAnai iraNTum
onRu ena aRain'tana paNaiyE; n'in tEr
5
mun iyagku Urti pinnilai IyAtu,
Urka, pAka! oru vinai, kaziya
n'annan, ERRai, n'aRum pUN atti,
tun arug kaTun' tiRaR kagkan, kaTTi,
pon aNi valvil punRuRai, enRu Agku
10
anRu avar kuzIiya aLappu arug kaTTUr,
parun'tu paTap paNNi, pazaiyan paTTena,
kaNTatu n'OnAnAki, tiN tErk
kaNaiyan akappaTa, kazumalam tan'ta
piNaial am kaNNip perum pUT cenni
15
azumpil anna aRAa yANar,
pazam pal n'ellin pal kuTip paravai,
pogkaTi paTikayam maNTiya pacu miLai,
taN kuTavAyil annOL
paNpuTai Akattu in tuyil peRavE!

vinai muRRi mILum talaimakan tErppAkaRkuc colliyatu.- kuTavAyiR kIrattanAr

51. pAlai
AL vazakku aRRa curattiTaik katir teRa,
n'IL eri paran'ta n'eTun' tAL yAttu,
pOz vaLi muzagkum, pullen uyarcinai,
muTai n'acai irukkaip peTai mukam n'Okki,
5
Un patittanna veruvaru cej cevi
eruvaic cEval karipu ciRai tIya,
vEnil n'ITiya vEy uyar n'anan'talai,
n'I uzan'tu eytum ceyvinaip poruT piNi
pal itaz mazaik kaN mAayOLvayin
10
piriyin puNarvatuAyin piriyAtu,
En'tu mulai muRRam vIgka, pal Uz
cEyizai teLirppak kavaii, n'ALum
manaimutal vinaiyoTum uvappa,
n'inai mAN n'ejcam! n'Igkutal maRan'tE.

poruLvayiR pirivu kaTaikkUTTiya n'ejciRkut talaimakan colliyatu.- perun'tEvanAr

76. marutam
maN kanai muzavoTu makiz mikat tUgka,
taN tuRai Uran em cEri van'tena
in kaTug kaLLin aHtai kaLiRRoTu
n'an kalan Iyum n'AL makiz irukkai
5
avai puku porun'ar paRaiyin, AnAtu,
kazaRupa enpa, avan peNTir; 'an'til,
kaccinan, kazalinan, tEm tAr mArpinan,
vakai amaip polin'ta, vanappu amai, teriyal,
curiyal am porun'anaik kANTirO? ena,
10
Atiman'ti pEtuRRu inaiya,
ciRai paRain'tu uraiic cegkuNakku ozukum
am taN kAviri pOla,
koNTu kai valittal cUzn'ticin, yAnE.

'talaimakanai n'ayappittuk koNTAL' enRu kazaRak kETTa parattai,talaimakaTkup pAgkAyinAr kETpa, colliyatu. - paraNar

79. pAlai
tOT patan amaitta karug kai ATavar
kanai poRi piRappa n'URi, vinaip paTarn'tu,
kalluRuttu iyaRRiya val uvarp paTuvil,
pAr uTai marugkin URal maNTiya
5
van pulam tumiyap pOki, kogkar
paTu maNi Ayam n'Irkku n'imirn'tu cellum
cEtA eTutta cen' n'ilak kurUut tukaL
akal iru vicumpin UnRit tOnRum
n'anan'talai azuvam, n'ammoTu tuNaippa,
10
'vallAgku varutum' ennAtu, alkuvara
varun'tinai vAzi, en n'ejcE! iruj ciRai
vaLai vAyp parun'tin vAn kaT pETai,
ATutoRu kanaiyum av vAyk kaTun' tuTik
koTu vil eyinar kOT curam paTara,
15
n'eTu viLi payiRRum n'irampA n'IL iTai,
kal piRagku attam pOki,
n'illAp poruT piNip pirin'ta n'IyE.

poruLvayiR pirin'ta talaimakan iTaic curattut tan n'ejciRkuc colliyatu. - kuTavAyiR kIrattanAr

81. pAlai
n'AL ulA ezun'ta kOL val uLiyam
Ogkucinai iruppait tIm pazam munaiyin,
pul aLaip puRRin pal kiLaic citalai
orugku muyanRu eTutta n'anai vAy n'eTug kOTu,
5
irumpu Utu kurukin, iTan'tu, irai tErum
maN paka vaRan'ta AgkaN, kaN porak
katir teRa, kavizn'ta ulaRutalai n'On cinai
n'eRi ayal marAam ERi, pulampu koLa
eRi parun'tu uyavum enRUz n'IL iTai
10
vem munai aruj curam n'In'ti ciRan'ta
cemmal uLLam turattalin, kaRuttOr
oLiRu vEl azuvam kaLiRu paTak kaTakkum
mA vaN kaTalan viLagkil anna, em
mai ezil uNkaN kaluza
15
aiya! cERirO, akanRu cey poruTkE?

pirivuNarttiya talaimakaRku, tOzi talaimakaL kuRippaRin'tu van'tu colliyatu. - AlampEri cAttanAr

97. pAlai
'kaLLi am kATTa puLLi am poRik kalai
vaRan uRal am kOTu utira, valam kaTan'tu,
pulavup puli tuRan'ta kalavuk kazi kaTu muTai,
iravuk kuRumpu alaRa n'URi, n'irai pakuttu,
5
irug kal muTukkart tiRRi keNTum
kolai vil ATavar pOla, palavuTan
perun' talai eruvaiyoTu parun'tu van'tu iRukkum
aruj curam iRan'ta koTiyOrkku alkalum,
irug kazai iRumpin Ayn'tu koNTu aRutta
10
n'uNagku kaN ciRu kOl vaNagkuiRai makaLiroTu
akavun'arp puran'ta anpin, kazal toTi,
n'aRavu makiz irukkai, n'annan vENmAn
vayalai vEli viyalUr anna, n'in
alarmulai Akam pulampa, pala n'inain'tu,
15
Azal' enRi tOzi! yAza en
kaN pani n'iRuttal eLitO kuravu malarn'tu,
aRciram n'Igkiya arum pata vEnil
aRal avir vAr maNal akalyARRu aTaikarai,
tuRai aNi marutamoTu ikal koLa Ogki,
20
kaliz taLir aNin'ta iruj cinai mAattu
iNar tatai putup pU n'iraitta pogkar,
pukai purai am majcu Ura,
n'ukar kuyil akavum kural kETpOrkkE?

vaRpuRukkum tOzikkut talaimakaL colliyatu. - mAmUlanAr

111. pAlai
uL Agku uvattal cellAr, kaRuttOr
eLLal n'ejcattu Eec col n'ANi
varuvar vAzi, tOzi! araca
yAnai koNTa tukiR koTi pOla,
5
alan'talai jemaiyattu valan'ta cilampi
OTaik kunRattuk kOTaiyoTu tuyalvara,
mazai ena maruNTa mammar pala uTan
OykaLiRu eTutta n'OyuTai n'eTug kai
tokucoR kOTiyar tUmpin uyirkkum
10
attak kEzal aTTa n'aR kOL
cen'n'Ay ERRai kammena Irppa,
kuruti Arum eruvaic cej cevi,
maNTu amar azuvattu ellik koNTa
puN tEr viLakkin, tOnRum
15
viN tOy piRagkal malai iRan'tOrE.

talaimakan pirivinkaN tOzi talaimakaLai ARRuvittatu.- pAlai pATiya perugkaTugkO

117. pAlai
mauvaloTu malarn'ta mAk kural n'occiyum,
av vari alkul Ayamum, uLLAL,
Etilan poymmozi n'ampi, Er vinai
vaLam kezu tiru n'akar pulampap pOki,
5
veruvaru kavalai AgkaN, aruLvara,
karug kAl Omai ERi, veN talaip
parun'tu peTai payirum pAz n'ATTu AgkaN,
polan'toTi teLirppa vIci; cEvaTic
cilampu n'aka iyalic cenRa en makaTkE
10
cAn'tu uLar vaNar kural vAri, vakaivakuttu;
yAn pOtu tuNaippa, takaram maNNAL,
tan Oranna takai veg kAtalan
veRi kamaz pal malar punaiyap pinnuviTa,
ciRupuRam putaiya n'eRipu tAzn'tanakol
15
n'eTug kAl mAattu UzuRu veN pazam
koTun' tAL yAmai pArppoTu kavarum
poykai cUzn'ta, poyyA yANar,
vANan ciRukuTi vaTAatu
tIm n'Irk kAnyARRu avir aRal pOnRE?

makaT pOkkiya cevilittAy colliyatu. - .........

161. pAlai
vinaivayiR pirital yAvatu? 'vaNar curi
vaTiyAp pittai, vankaN, ATavar
aTi amai pakazi Ara vAgki;
vampalarc cekutta ajcuvaru kavalai,
5
paTumuTai n'acaiiya vAzkkaic cej cevi
eruvaic cEval INTukiLai payirum
veruvaru kAnam n'In'ti, poruL purin'tu
iRappa eNNinar' enpatu ciRappak
kETTanaLkollO tAnE? tOL tAzpu
10
curumpu uNa olivarum irum pal kUn'tal,
am mA mEni, Ay izai, kuRumakaL
cuNagku cUz Akattu aNagku ena urutta
n'al varal iLa mulai n'anaiya;
pal itaz uNkaN paran'tana paniE.

pirivuNarttiya tOzi, talaimakaLatu vERupATu kaNTu, 'munnamE uNarn'tAL. n'am perumATTi' enRu, talaimakanaic celavu vilakkiyatu. - maturaip pullagkaNNanAr

175. pAlai
vIgku viLimpu urIiya vicai amai n'On cilai
vAgku toTai pizaiyA vankaN ATavar
viTutoRum viLikkum vev vAy vALi
ARu cel vampalar uyir celap peyarppin,
5
pARu kiLai payirn'tu paTumuTai kavarum
vej curam iRan'ta kAtalar n'ejcu uNa
ariya vajcinam colliyum, pal mAN
teri vaLai munkai paRRiyum, 'vinaimuTittu
varutum' enRanar anRE tOzi!
10
kAl iyal n'eTun' tErk kai vaN ceziyan
AlagkAnattu amar kaTan'tu uyartta
vElinum pal Uz minni, muracu ena
mA iru vicumpil kaTi iTi payiRRi,
n'Er katir n'iraitta n'Emiam celvan
15
pOr aTagku akalam porun'tiya tArpOl,
tiruvil tEettuk kulaii, uru kezu
maN payam pUppap pAay,
taN peyal ezili tAzn'ta pOztE?

pirivinkaN vaRpuRukkum tOzikkut talaimakaL colliyatu; tOzikkut talaimakaL colliyatUum Am; pirivinkaN vERupaTTa talaimakaL tOzikkuc coRRatUum Am.- AlampEri cAttanAr.

193. pAlai
kAn uyar marugkil kavalai allatu,
vAnam vENTA vil Er uzavar
peru n'AL vETTam, kiLai eza vAytta,
poru kaLattu ozin'ta kurutic cev vAy,
5
poRitta pOlum vAl n'iRa eruttin,
aNin'ta pOlum cej cevi, eruvai;
kuRum poRai ezun'ta n'eTun' tAL yAattu
arug kavaTTu uyarcinaip piLLai UTTa,
virain'tu vAy vazukkiya kozug kaN Un taTi
10
kol paci mutu n'ari valci Akum
curan n'amakku eLiyamannE; n'al manaip
pal mAN tagkiya cAyal, in mozi,
murun'tu Er muRuval, iLaiyOL
perun' tOL in tuyil kaiviTukalanE.

poruL valitta n'ejciRkuc colli, talaimakan celavu azugkiyatu. - maturai marutan iLan'AkanAr

215. pAlai
'vilagku iruj cimaiyak kunRattu umpar,
vERu pal moziya tEem munni,
vinai n'acaiip parikkum uran miku n'ejcamoTu
punai mAN eHkam vala vayin En'ti,
5
celal mANpu uRRa n'umvayin, vallE,
valan Aka!' enRalum n'anRuman tilla
kaTuttatu pizaikkuvatuAyin, toTutta
kai viral kavvum kallAk kATci,
koTumaram piTitta kOTA vankaN,
10
vaTi n'avil ampin Eval ATavar,
AL azittu uyartta ajcuvaru patukkai,
kUr n'utic cev vAy eruvaic cEval
paTu piNap pain' talai toTuvana kuzIi,
mallal mociviral oRRi, maNi koNTu,
15
val vAyp pETaikkuc coriyum AgkaN,
kazin'tOrkku iragkum n'ejcamoTu
ozin'tu ivaN uRaital ARRuvOrkkE.

celavu uNarttiya tOzi, talaimakaL kuRippaRin'tu, talaimakanaic celavu azugkuvittatu. - iRagku kuTik kunRa n'ATan

285. pAlai
'oziyac cenmAr, celpa' enRu, n'Am
azi paTar uzakkum avala n'ejcattu
evvam ikan'tu cEN akala, vai eyiRRu
Un n'acaip piNavin uRu paci kaLaiiyar,
5
kATu tEr maTap piNai alaRa, kalaiyin
OTu kuRagku aRutta cen'n'Ay ERRai
veyil pulan'tu iLaikkum vemmaiya, payil vari
irum puli vEgkaik karun' tOl anna
kal eTuttu eRin'ta pal kizi uTukkai
10
ulaRu kuTai vampalar uyar maram ERi,
ERu vETTu ezun'ta inam tIr eruvai
ATu cevi n'Okkum attam, paNait tOL
kuvaLai uNkaN ivaLum n'ammoTu
varUum enRanarE, kAtalar;
15
vArAy tOzi! muyagkukam, palavE.

uTanpOkku uTanpaTuvitta tOzi talaimakaTkuc colliyatu. - kAvirippUm paTTinattuk kArikkaNNanAr

291. pAlai
vAnam peyal vaLam karappa, kAnam
ulaRi ilai ilavAka, pala uTan
ERuTai Ayattu inam paci teRuppa,
kayan aRa vaRan'ta kOTaiyoTu n'ayan aRap
5
peru varai n'ivan'ta marugkil, koTu varip
puliyoTu porutu cinam ciRan'tu, valiyOTu
uravuk kaLiRu otugkiya marugkil, parUup paral,
ciRu pal minmini kaTuppa, evvAyum
n'iRaivana imaikkum n'irampA n'IL iTai
10
eruvai iruj ciRai irIiya, viri iNart
tAtu uN tumpi mural icai kaTuppa,
pariyinatu uyirkkum ampinar, veruvara
uvalai cUTiya talaiyar, kavalai
Arttu, uTan arum poruL vavvalin, yAvatum
15
cAttu iTai vazagkAc cEN cimai atara
ciRiyilai n'ellit tIm cuvait tiraL kAy
utirvana tAam attam tavirvu inRu,
puLLi am piNai uNIiya uLLi,
aRu maruppu ozitta talaiya, tOl poti,
20
maRu maruppu iLag kOTu atirak kUum
cuTar teRa varun'tiya aruj curam iRan'tu, Agku
uLLinai vAziya, n'ejcE! pOtu enap
pulam kamaz n'ARRattu irum pal kUn'tal,
n'al ezil, mazaik kaN, n'am kAtali
25
mel iRaip paNaittOL viLagkum mAN kavinE.

poruLvayiR pOkAn'inRa talaimakan iTaic curattut tan n'ejciRkuc colli yatu. - pAlai pATiya perug kaTugkO

297. pAlai
pAnAT kagkulum, perum pun mAlaiyum,
AnA n'OyoTu azi paTark kalagki,
n'amvayin inaiyum iTumpai kaimmika,
ennai AkumO, n'ejcE! n'am vayin
5
irug kavin illAp perum pun tATi,
kaTugkaN, maRavar pakazi mAyttena,
marugkul n'uNukiya pEem mutir n'aTukal,
peyar payam paTarat tOnRu kuyil ezuttu
iyaipuTan n'OkkalcellAtu, acaivuTan
10
ARu cel vampalar viTTanar kaziyum
cUr mutal irun'ta Omai am puRavin,
n'Ir muL vElip pulavu n'ARu munRil,
ezutiyanna koTi paTu verukin
pULai anna pogku mayirp piLLai,
15
mati cUz mInin, tAy vazippaTUum
ciRukuTi maRavar cEk kOL taNNumaikku
eruvaic cEval iruj ciRai peyarkkum
veru varu kAnam, n'ammoTu,
'varuval' enROL makiz maTa n'OkkE?

poruLvayiR pOkAn'inRa talaimakan tan n'ejciRkuc colliyatu. - maturai marutan iLan'AkanAr

299. pAlai
ellaiyum iravum, vinaivayin pirin'ta
munnam, mun uRupu aTaiya uLLiya
pati maRan'tu uRaital vallinam Ayinum,
atu maRan'tu uRaital aritu AkinRE
5
kaTu vaLi eTutta kAl kazi tEkkilai
n'eTu viLip parun'tin veRi ezun'tAgku,
vicumpu kaN putaiyap pAay, pala uTan
akal iTam cellun'ar aRivu keTat tAay,
kavalai karakkum kATu akal attam,
10
cey poruL marugkin celavu tanakku uraittena,
vaiku n'ilai matiyam pOla, paiyena,
pulampu koL avalamoTu, putuk kavin izan'ta
n'alam kezu tirumukam iRaijci, n'ilam kiLaiyA,
n'IroTu poruta Ir itaz mazaik kaN
15
ikutaru teN pani Akattu uRaippa,
kAl n'ilaicellAtu, kazi paTark kalagki,
n'A n'aTukkuRRa n'avilAk kiLaviyoTu,
aRal maruL kUn'talin maRaiyinaL,' tiRal mANTu
tirun'tukamAtO, n'um celavu' ena veytu uyirA,
20
paruvaral evvamoTu azin'ta
peru vituppuRuvi pEtuRu n'ilaiyE.

iTaic curattup pOkAn'inRa talaimakan tan n'ejciRkuc colliyatu. -eyinan'tai makanAr iLagkIranAr

342. kuRijci
oRuppa Ovalai; n'iRuppa n'illalai;
puNarn'tOr pOlap pORRumati! n'inakku yAn
kiLaijan allenO? n'ejcE! tenAatu
vel pOrk kavuriyar n'al n'ATTu uLLatai
5
maN koL puRRattu aruppu uzai tiRappin
A koL mUtUrk kaLvar perumakan,
Eval iLaiyar talaivan, mEvAr
arug kuRumpu eRin'ta ARRaloTu, parun'tu paTap
pal ceruk kaTan'ta cel uRaz taTak kai,
10
keTAa, n'al icait tennan, toTAa
n'Ir izi marugkil kal aLaik karan'ta av
varaiyaramakaLirin ariyaL,
av vari alkul aNaiyAkkAlE!

allakuRippaTTa talaimakan tan n'ejciRkuc colliyatu. - maturaik kaNakkAyanAr

363. pAlai
n'irai celal ivuLi viraivuTan kaTaii,
akal iru vicumpil pakal celac cenRu,
mazuku cuTar maNTilam mA malai maRaiya,
pozutu kazi malarin, punaiyizai! cAay,
5
aNai aNain'tu inaiyai Akal kaNai araip
pul ilai n'ellip pukar il pacug kAy
kal atar marugkil kaTu vaLi utirppa,
polam cey kAcin poRpat tAam
attam n'aNNi, atar pArttu irun'ta
10
kolai veg koLkaik koTun' tozil maRavar
ARu cel mAkkaL aru n'iRattu eRin'ta
eHku uRu vizuppuN kUrn'tOr eytiya,
vaLai vAyp parun'tin, vaL ukirc cEval
kiLai taru teL viLi kezu muTaip payirum
15
innA vej curam iRan'tOr, munniya
cey vinai valattar Aki, ivaN n'ayan'tu,
eyta van'tanarE tOzi! mai ezil
tuNai Er etir malar uNkaN
piNai Er n'Okkam perug kavin koLavE.

piriviTai vERupaTTa talaimakaTkut tOzi colliyatu. - maturaip poncey kollan veNNAkanAr

375. pAlai
'cenRu n'ITun'ar allar; avarvayin
inaital AnAy' enRicin ikuLai!
ampu toTai amaiti kANmAr, vampalar
kalan ilar Ayinum konRu, puL UTTum
5
kallA iLaiyar kalitta kavalai,
kaNa n'ari inanoTu kuzIi, n'iNan arun'tum
n'eyttOr ATiya mallal moci viral,
atta eruvaic cEval cErn'ta
arai cEr yAtta veN tiraL, vinai viRal,
10
ezUut tiNi tOL, cOzar peru makan
viLagku pukaz n'iRutta iLam peruj cenni
kuTik kaTan Akalin, kuRaivinai muTimAr,
cempu uRaz puricaip pAzi n'URi,
vampa vaTukar pain' talai cavaTTi,
15
konRa yAnaik kOTTin tOnRum,
ajcuvaru marapin vej curam iRan'tOr
n'Oy ilar peyartal aRiyin,
AzalamannO, tOzi! en kaNNE.

piriviTai vERupaTTa talaimakan tOzikkuc colliyatu. - iTaiyan cEn'tag koRRanAr

381. pAlai
ALi n'al mAn aNagkuTai oruttal
mILi vEzattu n'eTun'takai pulampa,
En'tal veN kOTu vAgki, kuruku arun'tum
ajcu varat takun'a AgkaN, majcu tapa,
5
azal kAnRu tiritarum alagku katir maNTilam
n'izal cUnRu uNTa n'irampA n'IL iTai,
kaRRu urik kuTampaik kata n'Ay vaTukar
vil cinam taNin'ta veruvaru kavalai,
kuruti ATiya pulavu n'ARu iruj ciRai
10
eruvaic cEval INTu kiLait tozuti,
paccUn koLLai cARRi, paRai n'ivan'tu,
cekkar vAnin vicumpu aNi koLLum
aruj curam n'In'tiya n'amminum, porun'tAr
munai araN kaTan'ta vinai val tAnai,
15
tEn imir n'aRun' tAr, vAnavan uTaRRiya
onnAt tevvar man eyil pOla,
perum pAz koNTa mEniyaL, n'eTitu uyirttu,
varun'tumkol? aLiyaL tAnE curumpu uNa,
n'eTu n'Ir payan'ta n'irai itazk kuvaLai
20
etir malar iNaip pOtu anna, tan
ari matar mazaik kaN teN pani koLavE!

talaimakan iTaic curattut tan n'ejciRkuc colliyatu. - maturai iLagkaucikanAr

397. pAlai
en makaL peru maTam yAn pArATTa,
tAy tan cemmal kaNTu kaTan iRuppa,
muzavu mukam pularA vizavuTai viyal n'akar,
maNan iTaiyAkak koLLAn, 'kal pakak
5
kaNa mazai tuRan'ta kAn mayagku azuvam
eLiyavAka, En'tu koTi paran'ta
poRi vari alkul mAayOTku' enat
taNin'ta paruvam cellAn, paTartarat
tuNin'tOnmanRa tunai veg kALai
10
kaTum pakaTTu oruttal n'aTugkak kutti,
pOz puN paTutta pori arai Omaip
perum poLic cEyarai n'Okki, Un cettu,
karug kAl yAattup parun'tu van'tu iRukkum
cEN uyarn'tu Ogkiya vAn uyar n'eTug kOTTuk
15
kOTai vev vaLikku ulamarum
pul ilai vetira n'el viLai kATE.

makaT pOkkiya cevilittAy colliyatu. - kayamanAr