15. pAlai

	em veg kAmam iyaivatu Ayin,
	meym mali perum pUN, cemmaR kOcar
	kommaiam pacug kAyk kuTumi viLain'ta
	pAkal Arkaip paRaik kaT pIlit
5	tOkaik kAvin tuLun'ATTu anna,
	vaRug kai vampalart tAgkum paNpin
	ceRin'ta cEric cemmal mUtUr,
	aRin'ta mAkkaTTu Akukatilla
	tOzimArum yAnum pulampa,
10	cUzi yAnaic cuTarp pUN n'annan
	pAzi anna kaTiyuTai viyal n'akarc
	ceRin'ta kAppu ikan'tu, avanoTu pOki,
	atta iruppai Ar kazal putup pUt
	tuytta vAya, tukaL n'ilam parakka,
15	konRai am cinaik kuzaRpazam kozuti,
	van kai eNkin vaya n'irai parakkum
	in tuNaip paTarn'ta koLkaiyoTu orAgku
	kunRa vEyin tiraNTa en
	men tOL ajjai cenRa ARE!

63. pAlai

	kELAy; vAziyO! makaLai! n'in tOzi,
	tiru n'akar varaippakam pulampa, avanoTu
	peru malai iRan'tatu n'OvEn; n'Oval
	kaTugkaN yAnai n'eTug kai cErtti,
5	muTagku tAL utaitta polag kezu pUzi
	perum pular viTiyal virin'tu, veyil eRippa,
	karun' tAL miTaRRa cem pUzc cEval
	ciRu pun peTaiyoTu kuTaiyum AgkaN,
	ajcuvarat takun'a kAnam n'In'ti,
10	kanRu kANAtu, pun kaNNa, cevi cAyttu,
	manRu n'iRai paital kUra, pala uTan
	kaRavai tan'ta kaTug kAl maRavar
	kallen cIRUr elliyin acaii
	mutuvAyp peNTin cetu kAR kurampai
15	maTa mayil anna en n'aTai meli pEtai
	tOL tuNaiyAkat tuyiRRat tujcAL,
	'vETTak kaLvar viciyuRu kaTug kaN
	cEk kOL aRaiyum taNNumai
	kETkun'aLkol?' enak kaluzum en n'ejcE.

69. pAlai

	Ayn'alam tolain'ta mEniyum, mA malart
	takai vanappu izan'ta kaNNum, vakai ila
	vaNNam vATiya variyum, n'Okki,
	Azal AnRicin n'IyE. uritinin
5	Ital inpam veHki, mEvarac
	cey poruL tiRavar Aki, pul ilaip
	parArai n'elli am puLit tiraL kAy
	kAna maTa maraik kaNan'irai kavarum
	vEnil attam ennAtu, EmuRRu,
10	viN poru n'eTug kuTai iyal tEr mOriyar
	pon punai tikiri tiritarak kuRaitta
	aRai iRan'tu akanRanar Ayinum, enaiyatUum
	n'ITalar vAzi, tOzi! ATu iyal
	maTa mayil ozitta pIli vArn'tu, tam
15	cilai mAN val vil cuRRi, pala mAN
	ampuTaik kaiyar araN pala n'URi,
	n'ankalam tarUum vayavar perumakan
	cuTar maNip perum pUN Aay kAnattut
	talai n'AL alarin n'ARum n'in
20	alar mulai Akattu in tuyil maRan'tE.

82. kuRijci

	ATu amaik kuyinRa avir tuLai marugkin
	kOTai av vaLi kuzalicai Aka,
	pATu in aruvip pani n'Ir in icai
	tOTu amai muzavin tutai kural Aka,
5	kaNak kalai ikukkum kaTug kuraR tUmpoTu,
	malaip pUj cAral vaNTu yAz Aka,
	in pal imiz icai kETTu, kali ciRan'tu,
	man'ti n'al avai maruLvana n'Okka,
	kazai vaLar aTukkattu, iyali ATu mayil
10	n'anavup puku viRaliyin tOnRum n'ATan
	uruva val viR paRRi, ampu terin'tu,
	ceruc cey yAnai cel n'eRi vinAay,
	pular kural EnaR puzaiyuTai oru ciRai,
	malar tAr mArpan, n'inROR kaNTOr
15	palartil, vAzi tOzi! avaruL,
	Ar iruT kagkul aNaiyoTu porun'ti,
	Or yAn Akuvatu evankol,
	n'Ir vAr kaNNoTu, n'ekiz tOLEnE?

85. pAlai

	'n'al n'utal pacappavum, perun' tOL n'ekizavum,
	uNNA uyakkamoTu uyir celac cAay,
	innam Akavum, igku n'at tuRan'tOr
	aRavar allar avar' enap pala pulan'tu,
5	Azal vAzi, tOzi! 'cAral,
	InRu n'AL ulan'ta mel n'aTai maTap piTi,
	kanRu, paci kaLaiiya, paig kaN yAnai
	muRRA mUgkil muLai tarupu. UTTum
	ven vEl tiraiyan vEgkaTa n'eTu varai,
10	n'al n'AL pUtta n'Aku iLa vEgkai
	n'aRu vI ATiya poRi vari majjai
	n'anaip pacug kurun'tin n'ARu cinai irun'tu,
	tuNaip payirn'tu akavum tuNaitaru taN kAr,
	varutum, yAm' enat tERRiya
15	paruvamkAN atu; pAyinRAl mazaiyE.

108. kuRijci

	puNarn'tOr punkaN aruLalum uNarn'tOrkku
	ottanRumannAl! evankol? muttam
	varaimutal citaRiya vai pOl, yAnaip
	pukar mukam poruta putu n'Ir Ali
5	paLigku corivatu pOl pARai varippa,
	kAr katampaTTa kaN akan vicumpin
	viTupoRi jekiziyin koTi paTa minni,
	paTu mazai pozin'ta pAnAT kagkul,
	Ar uyirt tuppin kOL mA vazagkum
10	iruLiTait tamiyan varutal yAvatum
	aruLAn vAzi, tOzi! alkal
	viravup poRi majjai verIi, aravin
	aNagkuTai arun' talai pai virippavaipOl,
	kAyA men cinai tOya n'ITip
15	pal tuTuppu eTutta alagku kulaik kAn'taL
	aNi malar n'aRun' tAtu Utum tumpi
	kai ATu vaTTin tOnRum
	mai ATu cenniya malaikizavOnE.

145. pAlai

	vEr muzutu ulaRi n'inRa puzaRkAl,
	tEr maNi icaiyin ciLvITu Arkkum,
	vaRRal maratta poR talai Oti
	veyiR kavin izan'ta vaippin paiyuL koLa,
5	n'uNNitin n'ivakkum veN jemai viyan kATTu
	AL il attattu, aLiyaL avanoTu
	vALvari poruta puN kUr yAnai
	pukar citai mukatta kuruti vAra,
	uyar cimai n'eTug kOTTu urum ena muzagkum
10	'aruj curam iRan'tanaL' enpa peruj cIr
	anni kuRukkaip paRan'talai, titiyan
	tol n'ilai muzu mutal tumiyap paNNiya
	n'annar mel iNarp punnai pOla,
	kaTu n'avaip paTIiyarmAtO kaLi mayil
15	kujcarak kurala kurukOTu Alum,
	tujcA muzavin, tuyttu iyal vAzkkai,
	kUzuTait tan'tai iTanuTai varaippin,
	Uz aTi otugkinum uyagkum aim pAR
	ciRu pal kUn'taR pOtu piTittu aruLAtu,
20	eRi kOl citaiya n'URavum ciRupuRam,
	'enakku urittu' ennAL, n'inRa en
	amark kaN ajjaiyai alaitta kaiyE!

149. pAlai

	ciRu pun citalai cEN muyanRu eTutta
	n'eTuj cem puRRattu oTugku irai munaiyin,
	pul arai iruppait toLLai vAn pUp
	perug kai eNkin irug kiLai kavarum
5	atta n'IL iTaip pOki, n'anRum
	aritu cey vizup poruL eLitinin peRinum
	vArEn vAzi, en n'ejcE! cEralar
	cuLLiam pEriyARRu veN n'urai kalagka,
	yavanar tan'ta vinai mAN n'an kalam
10	ponnoTu van'tu kaRiyoTu peyarum
	vaLam kezu muciRi Arppu eza vaLaii,
	aruj camam kaTan'tu, paTimam vavviya
	n'eTu n'al yAnai aTupOrc ceziyan
	koTi n'uTagku maRukin kUTaR kuTAatu,
15	pal poRi majjai vel koTi uyariya,
	oTiyA vizavin, n'eTiyOn kunRattu,
	vaNTu paTa n'ITiya kuNTu cunai n'Ilattu
	etir malarp piNaiyal anna ivaL
	ari matar mazaik kaN teN pani koLavE.

152. kuRijci

	n'ejcu n'aTugku arum paTar tIra van'tu,
	kunRuzai n'aNNiya cIRUr AgkaN
	celIiya peyarvOL vaNar curi aimpAl
	n'uN kOl akavun'arp puran'ta pEr icai,
5	cinam kezu tAnai, tittan veLiyan,
	iragkun'Irp parappin kAnal am perun' tuRai,
	tanam taru n'an kalam citaiyat tAkkum
	ciRu veL iRavin kuppai anna
	uRu pakai tarUum moym mUcu piNTan
10	munai muraN uTaiyak kaTan'ta ven vEl,
	icai n'al Ikaik kaLiRu vIcu vaN makiz,
	pArattut talaivan, Ara n'annan;
	Ezil n'eTu varaip pAzic cilampil
	kaLi mayiR kalAvattanna. tOLE
15	val vil iLaiyar perumakan; n'aLLi
	cOlai aTukkattuc curumpu uNa virin'ta
	kaTavuT kAn'taLuLLum, pala uTan
	iRumpUtu kajaliya Aymalar n'ARi,
	vallinum, vallAr Ayinum, cenROrkkuc
20	cAl aviz n'eTug kuzi n'iRaiya vIcum,
	mAal yAnai Aay kAnattut
	talaiyARRu n'ilaiiya cEyuyar piRagkal
	vEy amaik kaN iTai puraii,
	cEya Ayinum, n'aTugku tuyar tarumE.

158. kuRijci

	'urum uraRu karuviya peru mazai talaii,
	peyal AnRu avin'ta tUgkuiruL n'aTun'AL,
	minnu n'imirn'tanna kanagkuzai imaippa,
	pinnu viTu n'eRiyin kiLaiiya kUn'talaL,
5	varai izi mayilin olkuvanaL otugki,
	miTai Urpu iziya, kaNTanen, ivaL' ena
	alaiyal vAzi! vENTu, annai! n'am paTappaic
	cUruTaic cilampil, cuTarppU vEyn'tu
	tAm vENTu uruvin aNagkumAr varumE;
10	n'anavin vAyE pOlat tujcun'ark
	kanavu ANTu maruTTalum uNTE; ivaLtAn
	cuTar inRu tamiyaLum panikkum; veruvara
	manRa marAatta kUkai kuzaRinum,
	n'ejcu azin'tu araNam cErum; atantalaip
15	pulik kaNattanna n'Ay toTarviTTu,
	murukan anna cIRRattuk kaTun' tiRal
	en'taiyum illan Aka,
	ajcuvaL allaLO, ivaL itu ceyalE?

177. pAlai

	'tol n'alam citaiyac cAay, alkalum,
	innum vArAr; ini evan ceyku?' enap
	perum pulampuRutal Ompumati ciRu kaN
	irum piTit taTak kai mAna, n'ey arun'tu
5	orugku piNittu iyanRa n'eRi koL aimpAl
	tEm kamaz veRi malar peymmAr, kANpin
	kazai amal cilampin vazai talai vATak
	katir katam kaRRa E kal n'eRiyiTai,
	paig koTip pAkaR ceg kani n'acaii,
10	kAna majjaik kamajcUl mAp peTai
	ayir yARRu aTaikarai vayirin n'aralum
	kATu iRan'tu akanROr n'ITinar Ayinum,
	vallE varuvarpOlum veN vEl
	ilai n'iRam peyara Occi, mARROr
15	malai maruL yAnai maNTuamar ozitta
	kazaR kAl paNNan kAviri vaTavayin
	n'izaR kayam tazIiya n'eTug kAl mAvin
	taLir Er Akam takai peRa mukain'ta
	aNagkuTai vana mulait tAaya n'in
20	cuNagkiTai varitta toyyilai n'inain'tE.

194. mullai

	pEr uRai talaiiya perum pular vaikaRai,
	Er iTam paTutta iru maRup pUzip
	puRam mARu peRRa pUval Irattu,
	Un kizittanna cej cuval n'eTuj cAl,
5	vittiya marugkin vitai pala n'ARi,
	iralai n'al mAninam paran'tavaipOl,
	kOTuTait talaikkuTai cUTiya vinaijar,
	kaRagku paRaic cIrin iragka vAgki,
	kaLai kAl kazIiya perum puna varakin
10	kavaik katir irum puRam katUu uNTa,
	kuTumi n'eRRi, n'eTu mAt tOkai
	kAmar kalavam parappi, EmuRak
	kollai uzavar kUz n'izal ozitta
	val ilaik kurun'tin vAgkucinai irun'tu,
15	kiLi kaTi makaLirin viLi paTap payirum
	kArman ituvAl tOzi! 'pOr mikak
	koTujci n'eTun' tEr pUNTa, kaTum pari,
	viriuLai, n'al mAn kaTaii
	varutum' enRu avar teLitta pOztE.

198. kuRijci

	'kURuvamkollO? kURalamkol?' enak
	karan'ta kAmam kain'n'iRukkallAtu,
	n'ayan'tu n'Am viTTa n'al mozi n'ampi,
	arai n'AL yAmattu vizu mazai karan'tu;
5	kAr virai kamazum kUn'tal, tU vinai
	n'uN n'Ul Akam porun'tinaL, veRpin
	iLa mazai cUzn'ta maTa mayil pOla,
	vaNTu vazip paTara, taN malar vEyn'tu,
	vil vakuppuRRa n'al vAgku kuTaic cUl
10	am cilampu oTukki ajcinaL van'tu,
	tujcu Ur yAmattu muyagkinaL, peyarvOL,
	AnRa kaRpin cAnRa periyaL,
	am mA arivaiyO allaL; tenAatu
	Aay n'al n'ATTu aNagkuTaic cilampil,
15	kaviram peyariya uru kezu kavAan,
	Er malar n'iRai cunai uRaiyum
	cUrmakaLmAtO ennum en n'ejcE!

242. kuRijci

	arumpu mutir vEgkai alagkal men cinaic
	curumpu vAy tiRan'ta pon purai n'uN tAtu
	maNi maruL kalavattu uRaippa, aNi mikku
	avir poRi majjai ATum cOlai,
5	pain' tAT cen' tinaik koTug kural viyan punam,
	cen' tAr kiLLai n'ammoTu kaTin'tOn
	paNpu tara van'tamai aRiyAL, 'n'uN kEz
	muRi purai ezil n'alattu en makaL tuyar marugku
	aRital vENTum' ena, pal pirappu irIi,
10	aRiyA vElaR tarIi, annai
	veRi ayar viyan kaLam poliya Etti,
	maRi uyir vazagkA aLavai, cenRu yAm,
	cela varat tuNin'ta, cEN viLagku, el vaLai
	n'ekizn'ta mun kai, n'Er iRaip paNait tOL,
15	n'al ezil azivin tol kavin peRIiya,
	mukizttu varal iLa mulai mUzka, pal Uz
	muyagkal iyaivatumannO tOzi!
	n'aRai kAlyAtta n'aLir mukaic cilampil
	peru malai viTarakam n'ITiya ciRiyilaic
20	cAn'ta men cinai tINTi, mElatu
	piracam tUgkum cEN cimai
	varaiyaka veRpan maNan'ta mArpE!

249. pAlai

	amma vAzi, tOzi! pal n'AL
	iv Ur ampal evanO? vaL vAr
	vici piNittu yAtta ari kOl teN kiNai
	in kural akavun'ar irappin, n'AToRum
5	pon kOTTuc ceRittu, polan'tAr pUTTi,
	cAn'tam putaitta En'tu tuLagku ezil imil
	ERu mun'tuRuttu, cAl patam kuvaii,
	n'eTun' tEr kaLiRRoTu curakkum koTum pUN
	pal vEl mucuNTai vEmpi anna en
10	n'al ezil iLa n'alam tolaiyinum, n'alkAr
	pal pUg kAnattu alku n'izal acaii,
	tOkait tUvit toTait tAr mazavar
	n'Aku A vIzttu, tiRRi tinRa
	pulavuk kaLam tuzaiiya tukaL vAyk kOTai
15	n'IL varaic cilampin irai vETTu ezun'ta
	vAL vari vayap puli tINTiya viLi cettu,
	vERu vERu kavalaiya ARu parin'tu, alaRi,
	uzai mAn ina n'irai OTum
	kazai mAy piRagkal malai iRan'tOrE.

266. marutam

	kOTuRa n'ivan'ta n'ITu irum parappin
	an'tip parAaya putup punal, n'erun'ai,
	main'tu mali kaLiRRin talaip puNai tazIi,
	n'aran'tam n'ARum kuvai irug kUn'tal
5	iLan' tuNai makaLiroTu Ir aNik kalaii,
	n'Ir peyarn'tu ATiya En'tu ezil mazaik kaN
	n'OkkutoRum n'OkkutoRum tavirvilaiyAki,
	kAmam kaimmikac ciRattalin, n'AN izan'tu,
	ATinai enpa makizn'a! atuvE
10	yAz icai maRukin n'ITUr kizavOn
	vAy vAL evvi Eval mEvAr
	n'eTu miTal cAytta pacum pUN porun'talar
	arimaNavAyil uRattUr AgkaN,
	kaLLuTaip peruj cORRu el imiz anna,
15	kavvai AkinRAl peritE; ini aHtu
	avalam anRuman, emakkE; ayala
	kazani uzavar kali ciRan'tu eTutta
	kaRagku icai verIip paRan'ta tOkai
	aNagkuTai varaippakam poliya van'tu iRukkum
20	tiru maNi viLakkin alaivAyc
	ceru miku cEeyoTu uRRa cULE!

272. kuRijci

	irum puli tolaitta perug kai vEzattup
	pulavu n'ARu pukar n'utal kazuva, kagkul
	aruvi tan'ta aNagkuTai n'eTug kOTTu
	ajcu varu viTar mukai Ar iruL akaRRi,
5	min oLir eHkam cel n'eRi viLakka,
	taniyan van'tu, pani alai muniyAn,
	n'Ir izi marugkin Ar iTattu amanRa
	kuLaviyoTu miTain'ta kUtaLag kaNNi
	acaiyA n'ARRam acai vaLi pakara,
10	tuRu kal n'aNNiya kaRi ivar paTappaik
	kuRi iRaik kurampai n'am manaivayin pukutarum,
	meym mali uvakaiyan; an' n'ilai kaNTu,
	'muruku' ena uNarn'tu, mukaman kURi,
	uruvac cen' tinai n'IroTu tUuy,
15	n'eTu vEL paravum, annai; annO!
	en Avatu koltAnE pon ena
	malarn'ta vEgkai alagku cinai poliya
	maNi n'iRa majjai akavum
	aNi malai n'ATanoTu amain'ta n'am toTarpE?

281. pAlai

	ceyvatu terin'ticin tOzi! alkalum,
	akaluL ANmai accu aRak kURiya
	col pazutu Akum enRum ajcAtu,
	olku iyal maTa mayil ozitta pIli,
5	vAn pOz val vil cuRRi, n'On cilai
	av vAr viLimpiRku amain'ta n'ovvu iyal
	kanai kural icaikkum virai celal kaTug kaNai
	muraN miku vaTukar munnuRa, mOriyar
	ten ticai mAtiram munniya varaviRku
10	viNNuRa Ogkiya pani irug kunRattu,
	oN katirt tikiri uruLiya kuRaitta
	aRai iRan'tu, avarO cenRanar
	paRai aRain'tanna alar n'amakku ozittE.

304. mullai

	iru vicumpu ivarn'ta karuvi mA mazai,
	n'Ir ceRi n'ugkin kaN citarn'tavai pOl,
	cUr panippanna taN varal AliyoTu
	parUup peyal azi tuLi talaii, vAn n'avinRu,
5	kurUut tuLi pozin'ta perum pular vaikaRai,
	ceytu viTTanna cen' n'ila marugkil,
	ceRittu n'iRuttanna teL aRal paruki,
	ciRu maRi tazIiya teRin'aTai maTap piNai,
	valam tiri maruppin aNNal iralaiyoTu,
10	alagku cinaik kurun'tin alku n'izal vatiya,
	curumpu imirpu Uta, piTavut taLai aviza,
	arum poRi majjai Ala, vari maNal
	maNi miTai pavaLam pOla, aNi mikak
	kAyAj cemmal tAay, pala uTan
15	Iyal mUtAy Irm puRam varippa,
	pulan aNi koNTa kAr etir kAlai,
	'En'tu kOTTu yAnai vEn'tan pAcaRai
	vinaiyoTu vERu pulattu alki, n'anRum
	aRavar allar, n'am aruLAtOr' ena,
20	n'am n'Oy tanvayin aRiyAL,
	em n'on'tu pulakkumkol, mAayOLE?

334. mullai

	OTA n'al ERRu urivai taiiya
	ATu koL muracam izumena muzagka,
	n'ATu tiRai koNTanam Ayin pAka!
	pATu imiz kaTalin ezun'ta cummaiyoTu
5	perug kaLiRRut taTak kai puraiyak kAl vIzttu,
	irum piTit tozutiyin INTuvana kuzIi,
	vaNagku iRai makaLir ayarn'tanar ATum
	kazagku uRaz AliyoTu kataz uRai citaRi,
	peyal toTagkinRAl, vAnam; vAnin
10	vayagku ciRai annattu n'irai paRai kaTuppa,
	n'Alku uTan pUNTa kAl n'avil puravik
	koTijci n'eTun' tEr kaTum pari tavirAtu,
	ina mayil akavum kAr koL viyan punattu,
	n'On cUTTu Azi Ir n'ilam tumippa,
15	INTE kANak kaTavumati pUg kEzp
	polivana amartta uNkaN,
	oli pal kUn'tal Ay ciRu n'utalE!

344. mullai

	vaLa mazai pozin'ta vAl n'iRak kaLari,
	uLartaru taN vaLi uRutoRum, n'ilavu enat
	toku mukai virin'ta muTak kAR piTavin,
	vai Er vAl eyiRRu, oL n'utal, makaLir
5	kai mAN tONi kaTuppa, paiyena,
	mayilinam payilum maram payil kAnam
	el iTai uRAa aLavai, vallE,
	kazal oli n'Avin teN maNi kaRagka,
	n'izal oLippanna n'imir parip puravi
10	vayakku uRu koTijci poliya, vaLpu Ayn'tu,
	iyakkumati vAziyO, kaiyuTai valava!
	payappuRu paTar aTa varun'tiya
	n'ayappu in kAtali n'akai mukam peRavE!

352. kuRijci

	'muTavu mutir palavin kuTam maruL perum pazam
	pal kiLait talaivan kallAk kaTuvan,
	pATu imiz aruvip pARai marugkin,
	ATu mayil munnatu Aka, kOTiyar
5	vizavu koL mUtUr viRali pinRai
	muzavan pOla akappaTat tazIi,
	in tuNaip payirum kunRa n'ATan
	kuTi n'anku uTaiyan; kUTun'arp piriyalan;
	keTu n'A moziyalan; anpinan' ena, n'I
10	valla kURi, vAyvatin puNarttOy;
	n'allai; kAN, ini kAtal am tOzIi!
	kaTum parip puravi n'eTun' tEr ajci,
	n'al icai n'iRutta n'ayam varu panuval,
	tol icai n'iRIiya urai cAl pANmakan
15	eNNu muRai n'iRutta paNNinuLLum,
	putuvatu punain'ta tiRattinum,
	vatuvai n'ALinum, iniyanAl emakkE.

358. kuRijci

	n'Ilattu anna n'iRam kiLar eruttin,
	kAmar pIli, Ay mayil tOkai
	in tIm kurala tuvanRi, men cIr
	ATu takai ezil n'alam kaTuppak kUTi,
5	kaN n'Er itaza, taN n'aRug kuvaLaik
	kuRun' toTar aTaicciya n'aRum pal kUzai
	n'ITu n'Ir n'eTuj cunai AyamoTu ATAy,
	uyagkiya manattaiyAki, pulampu koNTu,
	innai Akiya n'in n'iRam n'Okki,
10	annai vinavinaL Ayin, annO!
	en ena uraikkO yAnE tunniya
	peru varai izitarum n'eTu veL aruvi,
	OTai yAnai uyar micai eTutta
	ATu koTi kaTuppa, tOnRum
15	kOTu uyar veRpan uRIiya n'OyE?

368. kuRijci

	toTutOR kAnavan cUTuRu viyan punam,
	kari puRam kazIiya perum pATTu Irattu,
	tOTu vaLar pain' tinai n'ITu kural kAkkum
	oN toTi makaLirkku UcalAka
5	ATu cinai ozitta kOTu iNar kajaliya
	kuRumpoRai ayalatu n'eTun' tAL vEgkai,
	maTa mayiR kuTumiyin, tOnRum n'ATan
	uyar varai marugkin kAn'taL am cOlaik
	kuragku aRivArA maram payil iRumpil,
10	kaTi cunait teLin'ta maNi maruL tIm n'Ir
	piTi puNar kaLiRRin emmoTu ATi,
	pal n'AL umparp peyarn'tu, cil n'AL
	kaziyAmaiyE vazivazip peruki,
	am paNai viLain'ta tEk kaT tERal
15	vaNTu paTu kaNNiyar makizum cIRUr,
	evankol vAzi, tOzi! kogkar
	maNi arai yAttu maRukin ATum
	uLLi vizavin anna,
	alar AkinRu, atu palar vAyp paTTE?

369. pAlai

	kaNTicin makaLE! kezIi iyaivenai:
	oN toTi ceRitta munkai Uz koLpu,
	magkaiyar pala pArATTa, cen' tArk
	kiLLaiyum tIm pAl uNNA; mayil iyal
5	cEyizai makaLir Ayamum ayarA;
	tAziyum malar pala aNiyA; kEz koLak
	kAz punain'tu iyaRRiya vanappu amai n'On cuvarp
	pAvaiyum pali enap peRAa; n'Oy pora,
	ivai kaNTu, inaivatantalaiyum, n'inaivilEn,
10	koTiyOL munniyatu uNarEn, 'toTiyOy!
	inRu n'in oli kural maNNal' enRataRku,
	eR pulan'tu azin'tanaLAki, taR takak
	kaTal am tAnai kai vaN cOzar,
	keTal aru n'al icai uRan'tai anna,
15	n'itiyuTai n'al n'akarp putuvatu punain'tu,
	tamar maNan ayaravum ollAL, kavarmutal
	Omai n'ITiya ulavai n'IL iTai,
	maNi aNi palakai, mAk kAz n'eTu vEl,
	tuNivuTai uLLamoTu tutain'ta munpin
20	aRiyAt tEettu aruj curam maTutta
	ciRiyORku otta en peru maTat takuvi,
	'ciRappum cIrum inRi, cIRUr
	n'alkUr peNTin pul vEy kurampai
	Or A yAtta oru tUN munRil
25	Etil vaRu manaic cilampu uTan kazIi,
	mEyinaLkol?' ena n'Oval yAnE.

378. kuRijci

	'n'itiyam tujcum n'ivan'tu Ogku varaippin,
	vatuvai makaLir kUn'tal kamaz koLa,
	vagkUz ATTiya am kuzai vEgkai
	n'an pon anna n'aRun' tAtu utira,
5	kAmar pIli Ay mayil tOkai
	vERu vERu inatta varai vAz varuTaik
	kOTu muRRu iLan' takarp pATu viRan'tu, ayala
	ATu kaLa vayirin iniya Ali,
	pacum puRa men cIr ociya, vicumpu ukan'tu,
10	irug kaN ATu amait tayagka irukkum
	perug kal n'ATan pirin'ta pulampum,
	uTanRa annai amarA n'Okkamum,
	vaTan'tai tUkkum varu pani aRcirac
	cuTar kezu maNTilam azugka, jAyiRu
15	kuTa kaTal cErum paTar kUr mAlaiyum,
	anaittum, aTUu n'inRu n'aliya, ujaRRi,
	yAgganam vAzti?' enRi tOzi!
	n'IgkA vajcinam ceytu; n'at tuRan'tOr
	uLLAr Ayinum, uLenE avar n'ATTu
20	aL ilaip palavin kani kavar kaiya
	kallA man'ti kaTuvanOTu ukaLum
	kaTun' tiRal aNagkin n'eTum perug kunRattu,
	pATu in aruvi cUTi,
	vAn tOy cimaiyam tOnRalAnE.

385. pAlai

	tan Oranna Ayamum, mayil iyal
	en Oranna tAyarum, kANa,
	kai val yAnaik kaTun' tErc cOzar
	kAvirip paTappai uRan'tai anna
5	ponnuTai n'eTu n'akar, puraiyOr ayara,
	n'al mAN vizavil takaram maNNi,
	yAm pala puNarppac collAL, kAmpoTu
	n'elli n'ITiya kal aRaik kavAan,
	atta Alattu alan'talai n'eTu vIz
10	tittik kuRagkil tirun'ta urija,
	vaLaiyuTai munkai aLaii, kiLaiya
	payil irum piNaiyal pacug kAzk kOvai
	akal amai alkul paRRi, kUn'tal
	ATu mayil pIliyin pogka, n'anRum,
15	tAn amar tuNaivan Ukka, Ugki,
	uLLAtu kazin'ta muL eyiRRut tuvar vAyc
	ciRu vankaNNi cilampu kazIi,
	aRiyAt tEettaL Akutal koTitE.

392. kuRijci

	tAz perun' taTak kai talaiiya, kAnattu,
	vIz piTi keTutta, veN kOTTu yAnai
	uN kuLaku maRutta uyakkattanna,
	paNpuTai yAkkaic citaivu n'anku aRIi,
5	pinnilai muniyAnAki, 'n'anRum,
	tAtu cey pAvai anna taiyal,
	mAtar mel iyal, maTa n'allOLvayin
	tItu inRAka, n'I puNai pukuka!' ena
	ennum taNTum Ayin, maRRu avan
10	azitakap peyartal n'ani innAtE
	ol ini, vAzi, tOzi! kallenak
	kaNa mazai pozin'ta kAn paTi iravil,
	tinai mEy yAnai inan irin'tu OTa,
	kal uyar kazutil cENOn eRin'ta
15	val vAyk kavaNin kaTu veTi ollena,
	maRap puli uraRa, vAraNam kataRa,
	n'anavuRu kaTciyin n'al mayil Ala,
	malai uTan verUum mAk kal veRpan
	piriyun'an AkalO aritE; atAanRu,
20	uritual paNpin piriyunan Ayin,
	vinai tavap peyarn'ta ven vEl vEn'tan
	munaikol tAnaiyoTu mun van'tu iRuppa,
	tan varampu Akiya man eyil irukkai
	ARRAmaiyin, piTitta vEl valit
25	tORRam pizaiyAt tol pukaz peRRa,
	vizai taka Ogkiya kazai tujcu marugkin
	kAn amar n'annan pOla,
	yAn Akuval, n'in n'alam taruvEnE.

393. pAlai

	kOTu uyar piRagkaR kunRu pala n'In'ti,
	vERu pulam paTarn'ta vinai taral uLLattu
	ARu cel vampalar kAy paci tIriya,
	mutaic cuvaR kalitta Ir ilai n'eTun' tOTTuk
5	kavaik katir varakin kAl toku pogkazi,
	kavaTTu aTip poruta pal cinai utirvai
	akan kaN pARaic cevvayin teRIi,
	vari aNi paNait tOL vAr cevit tannaiyar
	paNNai veN pazattu arici Eyppa,
10	cuzal maram colitta cuLaku alai veN kAz
	toTi mAN ulakkai Uzin pOkki,
	uralmukam kATTiya curai n'iRai koLLai,
	AgkaN iruj cunai n'IroTu mukavA,
	kaLi paTu kuzicik kal aTuppu ERRi,
15	iNar tatai kaTukkai INTiya tAtin,
	kuTavar puzukkiya pogku avizp punkam,
	matarvai n'al An pAloTu, pakukkum
	n'irai pala kuzIiya n'eTumozip pulli
	tEn tUgku uyar varai n'al n'ATTu umpar,
20	vEgkaTam iRan'tanar Ayinum, ANTu avar
	n'ITalar vAzi, tOzi! tOTu koL
	uru kezu majjai oli cIr Eyppa,
	takaram maNNiya taN n'aRu mucci,
	pukar il kuvaLaip pOtoTu teri itaz
25	vEnil atiral vEyn'ta n'in
	EmuRu puNarcci in tuyil maRan'tE.