1. pAlai

	'vaNTu paTat tatain'ta kaNNi, oN kazal,
	uruvak kutirai mazavar OTTiya
	murukan n'aR pOr n'eTu vEL Avi,
	aRukOTTu yAnaip potini AgkaN,
5	ciRu kArOTan payinoTu cErttiya
	kal pOl piriyalam' enRa coltAm
	maRan'tanarkollO tOzi! ciRan'ta
	vEy maruL paNait tOL n'ekiza, cEy n'ATTup
	polagkala veRukkai tarumAr n'ilam paka,
10	azal pOl vegkatir paitu aRat teRutalin,
	n'izal tEyn'tu ulaRiya maratta; aRai kAypu,
	aRun'Irp paij cunai Am aRap pulartalin,
	uku n'el poriyum vemmaiya; yAvarum
	vazagkun'ar inmaiyin, vauvun'ar maTiya,
15	curam pullenRa ARRa; alagku cinai
	n'Ar il murugkai n'aviral vAn pUc
	cUral am kaTu vaLi eTuppa, AruRRu,
	uTai tiraip pitirvin pogki, mun
	kaTal pOl tOnRala kATu iRan'tOrE?

4. mullai

	mullai vain' n'unai tOnRa, illamoTu
	paig kAR konRai men piNi aviza,
	irumpu tirittanna mA iru maruppin,
	paral aval aTaiya, iralai, teRippa,
5	malarn'ta jAlam pulampu puRakkoTuppa,
	karuvi vAnam kataz uRai citaRi,
	kAr ceytanRE, kavin peRu kAnam.
	kuragku uLaip polin'ta koycuvaR puravi,
	n'arampu Arttanna, vAgku vaLpu ariya,
10	pUtta pogkart tuNaiyoTu vatin'ta
	tAtu uN paRavai pEtuRal ajci,
	maNi n'A Artta mAN vinait tEran,
	uvakkAN tOnRum kuRum poRai n'ATan,
	kaRagku icai vizavin uRan'taik kuNAtu,
15	n'eTum perug kunRattu amanRa kAn'taT
	pOtu aviz alarin n'ARum
	Ay toTi arivai! n'in mAN n'alam paTarn'tE.

22. kuRijci

	aNagkuTai n'eTu varai ucciyin izitarum
	kaNam koL aruvik kAn kezu n'ATan
	maNam kamaz viyal mArpu aNagkiya cellal
	itu ena aRiyA maRuvaraR pozutil,
5	'paTiyOrt tEytta pal pukazt taTak kai
	n'eTu vET pENat taNikuvaL ivaL' ena,
	mutu vAyp peNTir atu vAy kURa,
	kaLam n'anku izaittu, kaNNi cUTTi,
	vaLa n'akar cilampap pATi, pali koTuttu,
10	uruvac cen'tinai kurutiyoTu tUuy,
	muruku ARRuppaTutta uru kezu n'aTu n'AL,
	Aram n'ARa, aru viTart tatain'ta
	cAraR pal pU vaNTu paTac cUTi,
	kaLiRRu irai terIiya pArval otukkin
15	oLittu iyagkum marapin vayap puli pOla,
	n'al manai n'eTu n'akark kAvalar aRiyAmai
	tan n'acai uLLattu n'am n'acai vAyppa,
	in uyir kuzaiya muyagkutoRum meym malin'tu,
	n'akkanen allenO yAnE eytta
20	n'Oy taNi kAtalar vara, INTu
	Etil vElaRku ulan'tamai kaNTE?

38. kuRijci

	viri iNar vEgkai vaNTu paTu kaNNiyan,
	teri itazk kuvaLait tEm pAy tAran,
	am cilai iTavatu Aka, vej celal
	kaNai valam terin'tu, tuNai paTarn'tu uLLi,
5	varutal vAyvatu, vAn tOy veRpan.
	van'tanan Ayin, am taLirc ceyalait
	tAzvu il Ogku cinait toTutta vIz kayiRRu
	Ucal mARiya marugkum, pAypu uTan
	ATAmaiyin kaluzpu ila tERi,
10	n'ITu itaz talaiiya kavin peRu n'Ilam
	kaN ena malarn'ta cunaiyum, vaN paRai
	maTak kiLi eTuttalcellAt taTak kural
	kulavup poRai iRutta kOl talai iruvi
	koytu ozi punamum, n'Okki; n'eTitu n'inain'tu;
15	paitalan peyaralankollO? ai tEyku
	'aya veL aruvi cUTiya uyar varaik
	kUum kaNaHtu em Ur' ena
	Agku atai aRivuRal maRan'ticin, yAnE.

40. n'eytal

	kAnal, mAlaik kazip pUk kUmpa,
	n'Il n'iRap perug kaTal pATu ezun'tu olippa,
	mIn Ar kurukin men paRait tozuti
	kuvai irum punnaik kuTampai cEra,
5	acai vaNTu Arkkum alkuRukAlai,
	tAzai taLarat tUkki, mAlai
	azitaka van'ta koNTaloTu kazi paTark
	kAmar n'ejcam kaiyaRupu inaiya,
	tuyaram ceytu n'am aruLAr Ayinum
10	aRAaliyarO avaruTaik kENmai!
	aLi inmaiyin avaN uRai munaii,
	vAraRkatilla tOzi! kazani
	veNNel arin'ar pinRait tatumpum
	taNNumai verIiya taTan' tAL n'Arai
15	ceRi maTai vayirin piLiRRi, peNNai
	akamaTal cEkkum tuRaivan
	in tuyil mArpil cenRa en n'ejcE!

46. marutam

	cERRu n'ilai munaiiya ceg kaT kArAn
	Ur maTi kagkulil, n'On taLai parin'tu,
	kUr muL vEli kOTTin n'Ikki,
	n'Ir mutir pazanattu mIn uTan iriya
5	am tUmpu vaLLai mayakki, tAmarai
	vaNTu Utu pani malar Arum Ura!
	yAraiyO? n'iR pulakkEm. vAruRRu,
	uRai iRan'tu, oLirum tAz irug kUn'tal,
	piRarum, oruttiyai n'am manait tan'tu,
10	vatuvai ayarn'tanai enpa. aHtu yAm
	kUREm. vAziyar, en'tai! ceRun'ar
	kaLiRuTai aruj camam tataiya n'URum
	oLiRu vAT tAnaik koRRac ceziyan
	piNTa n'ellin aLLUr anna en
15	oN toTi n'ekizinum n'ekizka;
	cenRi, peruma! n'iR takaikkun'ar yArO?

59. pAlai

	taN kayattu amanRa vaNTu paTu tuNai malarp
	perun' takai izan'ta kaNNinai, peritum
	varun'tinai, vAziyar, n'IyE! vaTAatu
	vaN punal tozun'ai vAr maNal akan tuRai,
5	aNTar makaLir taN tazai uTIiyar
	maram cela mititta mAal pOla,
	pun talai maTap piTi uNIiyar, am kuzai,
	n'eTu n'ilai yAam oRRi, n'anai kavuL
	paTi jimiRu kaTiyum kaLiRE tOzi!
10	cUr marugku aRutta cuTar ilai n'eTu vEl,
	cinam miku murukan taN paragkunRattu,
	an'tuvan pATiya can'tu kezu n'eTu varai,
	in tIm paij cunai IraNip polin'ta
	taN n'aRug kazun'Irc ceN iyaR ciRupuRam
15	tAm pArATTiya kAlaiyum uLLAr
	vIgku iRaip paNait tOL n'ekiza, cEy n'ATTu
	aruj ceyaR poruTpiNi munni, n'ap
	pirin'tu, cEN uRain'ar cenRa ARE.

71. pAlai

	n'iRain'tOrt tErum n'ejcamoTu, kuRain'tOr
	payan inmaiyin paRRu viTTu, orUum
	n'ayan il mAkkaL pOla, vaNTinam
	cunaip pU n'Ittu, cinaip pUp paTara,
5	mai il mAn inam maruLa, paiyena
	ven'tu ARu ponnin an'ti pUppa,
	aiyaRivu akaRRum kaiyaRu paTarOTu
	akal iru vAnam am majcu Ina,
	pakal ARRuppaTutta pazagkaN mAlai,
10	kAtalarp pirin'ta pulampin n'Otaka,
	Ar ajar uRun'ar aru n'iRam cuTTik
	kUr eHku eRijarin alaittal AnAtu,
	eL aRa iyaRRiya n'izal kAN maNTilattu
	uL Utu Aviyin paippaya n'uNuki,
15	matukai mAytal vENTum peritu azin'tu,
	itu kol vAzi, tOzi! en uyir
	vilagku veg kaTu vaLi eTuppat
	tuLagku marap puLLin tuRakkum pozutE?

74. mullai

	vinai valampaTutta venRiyoTu makiz ciRan'tu,
	pOr val iLaiyar tAL valam vAztta,
	taN peyal pozin'ta paituRu kAlai,
	kuruti uruvin oN cem mUtAy
5	peru vazi marugkil ciRu pala varippa,
	paig koTi mullai men patap putu vI
	veN kaLar arimaNal n'an pala tAay,
	vaNTu pOtu avizkkum taN kamaz puRavil,
	karug kOTTu iralaik kAmar maTap piNai
10	maruNTa mAn n'Okkam kANtoRum, 'n'in n'inain'tu
	"tiN tEr valava! kaTavu" enak kaTaii,
	inRE varuvar; AnRikam pani' ena,
	vanpuRai in col n'an pala payiRRum
	n'in valittu amaikuvenmannO alkal
15	punkaN mAlaiyoTu porun'ti, koTug kOR
	kallAk kOvalar Utum
	val vAyc ciRu kuzal varuttAkkAlE!

78. kuRijci

	'n'anan'talaik kAnattu ALi ajci,
	inam talaittarUum eRuz kiLar munpin,
	vari jimiRu Arkkum, vAy puku, kaTAttu,
	poRi n'utaR polin'ta vayak kaLiRRu oruttal
5	irum piNart taTak kaiyin, EmuRat tazuva,
	kaTujcUl maTap piTi n'aTugkum cAral,
	tEm pizi n'aRavin kuRavar munRil,
	mun'tUz Ay malar utira, kAn'taL
	n'ITu itaz n'eTun' tuTuppu ociya, taNNena
10	vATai tUkkum varupani aRciram,
	n'am il pulampin, tam Urt tamiyar
	en Akuvarkol aLiyartAm?' ena,
	em viTTu akanRa cil n'AL, ciRitum,
	uLLiyum aRitirO Ogkumalain'ATa!
15	ulakuTan tiritarum palar pukaz n'al icai
	vAymozik kapilan cUza, cEy n'inRu
	cezuj ceyn' n'ellin viLaikatir koNTu,
	taTan' tAL Ampal malaroTu kUTTi,
	yANTu pala kaziya, vENTuvayiR pizaiyAtu,
20	AL iTUuk kaTan'tu, vAL amar uzakki,
	En'tukOTTu yAnai vEn'tar OTTiya,
	kaTum parip puravik kai vaN pAri
	tIm perum paij cunaip pUtta
	tEm kamaz putu malar n'ARum ivaL n'utalE?

82. kuRijci

	ATu amaik kuyinRa avir tuLai marugkin
	kOTai av vaLi kuzalicai Aka,
	pATu in aruvip pani n'Ir in icai
	tOTu amai muzavin tutai kural Aka,
5	kaNak kalai ikukkum kaTug kuraR tUmpoTu,
	malaip pUj cAral vaNTu yAz Aka,
	in pal imiz icai kETTu, kali ciRan'tu,
	man'ti n'al avai maruLvana n'Okka,
	kazai vaLar aTukkattu, iyali ATu mayil
10	n'anavup puku viRaliyin tOnRum n'ATan
	uruva val viR paRRi, ampu terin'tu,
	ceruc cey yAnai cel n'eRi vinAay,
	pular kural EnaR puzaiyuTai oru ciRai,
	malar tAr mArpan, n'inROR kaNTOr
15	palartil, vAzi tOzi! avaruL,
	Ar iruT kagkul aNaiyoTu porun'ti,
	Or yAn Akuvatu evankol,
	n'Ir vAr kaNNoTu, n'ekiz tOLEnE?

89. pAlai

	teRu katir jAyiRu n'aTu n'inRu kAytalin,
	uRu peyal vaRan'ta OTu tEr n'anan' talai,
	uruttu ezu kurala kuTijaic cEval,
	pul cAy viTarakam pulampa, varaiya
5	kal eRi icaiyin iraTTum AgkaN,
	ciLvITu kaRagkum ciRiilai vElattu
	UzuRu viLain'eRRu utira, kAziyar
	kavvaip parappin vev uvarppu oziya,
	kaLari paran'ta kal n'eTu marugkin,
10	viLar Un tinRa vIgkucilai maRavar
	mai paTu tiN tOL malira vATTi,
	poRai mali kazutai n'eTu n'irai tazIiya
	tirun'tu vAL vayavar arun' talai tumitta
	paTu pulAk kamazum jATpil, tuTi ikuttu,
15	arug kalam teRutta perum pukal valattar,
	vil kezu kuRumpil kOL muRai pakukkum
	kollai irum punam n'eTiya ennAtu,
	mellen cEvaTi meliya Eka
	vallun'aLkollO tAnE tEm peytu
20	aLavuRu tIm pAl alaippavum uNNAL,
	iTu maNaR pan'taruL iyalum,
	n'eTu men paNait tOL, mAayOLE?

102. kuRijci

	uLaimAn tuppin, Ogku tinaip perum punattuk
	kazutil, kAnavan pizi makizn'tu vatin'tena;
	uraitta can'tin Ural irug katuppu
	aitu varal acaivaLi ARRa, kai peyarA,
5	oliyal vAr mayir uLarinaL, koTicci
	peru varai marugkil kuRijci pATa;
	kuralum koLLAtu, n'ilaiyinum peyarAtu,
	paTAap paig kaN pATu peRRu, oyyena
	maRam pukal maza kaLiRu uRagkum n'ATan;
10	Ara mArpin ari jimiRu Arppa,
	tAran, kaNNiyan, eHkuTai valattan,
	kAvalar aRital Ompi, paiyena
	vIzAk katavam acaiyinan pukutan'tu,
	uyagku paTar akalam muyagki, tOL maNan'tu,
15	in col aLaii, peyarn'tanan tOzi!
	inRu evankollO kaNTikum maRRu avan
	n'alkAmaiyin ampal Aki,
	orugku van'tu uvakkum paNpin
	iruj cUz Oti oN n'utaR pacappE?

104. mullai

	vEn'tu vinai muTittakAlai, tEm pAyn'tu
	ina vaNTu Arkkum taN n'aRum puRavin
	ven vEl iLaiyar inpuRa, valavan
	vaLpu valittu Urin allatu, muL uRin
5	mun'n'Ir maNTilam Ati ARRA
	n'al n'Alku pUNTa kaTum pari n'eTun' tEr,
	vAgkucinai poliya ERi; putala
	pUg koTi avaraip poy ataL anna
	uL il vayiRRa, veLLai veN maRi,
10	mAzkiyanna tAz peruj ceviya,
	pun talaic ciRArOTu ukaLi, manRuzaik
	kavai ilai Arin am kuzai kaRikkum
	cIRUr pala piRakku oziya, mAlai
	initu ceytanaiyAl en'tai! vAziya!
15	pani vAr kaNNaL pala pulan'tu uRaiyum
	Ay toTi arivai kUn'taR
	pOtu kural aNiya vEytan'tOyE!

108. kuRijci

	puNarn'tOr punkaN aruLalum uNarn'tOrkku
	ottanRumannAl! evankol? muttam
	varaimutal citaRiya vai pOl, yAnaip
	pukar mukam poruta putu n'Ir Ali
5	paLigku corivatu pOl pARai varippa,
	kAr katampaTTa kaN akan vicumpin
	viTupoRi jekiziyin koTi paTa minni,
	paTu mazai pozin'ta pAnAT kagkul,
	Ar uyirt tuppin kOL mA vazagkum
10	iruLiTait tamiyan varutal yAvatum
	aruLAn vAzi, tOzi! alkal
	viravup poRi majjai verIi, aravin
	aNagkuTai arun' talai pai virippavaipOl,
	kAyA men cinai tOya n'ITip
15	pal tuTuppu eTutta alagku kulaik kAn'taL
	aNi malar n'aRun' tAtu Utum tumpi
	kai ATu vaTTin tOnRum
	mai ATu cenniya malaikizavOnE.

124. mullai

	'n'an kalam kaLiRRoTu n'aNNAr En'ti,
	van'tu tiRai koTuttu, vaNagkinar, vazimozin'tu
	cenRIka' enpaAyin, vEn'tanum
	n'ilam vakun'tuRAa INTiya tAnaiyoTu
5	inRE pukutal vAyvatu; n'anRE.
	mATa mAN n'akarp pATu amai cEkkait
	tuni tIr koLkai n'am kAtali inituRa,
	pAcaRai varuttam vITa, n'Iyum
	minnu n'imirn'tanna pon iyaR punai paTai,
10	koycuval, puravi, kai kavar vayagku pari,
	vaN peyaRku avizn'ta paig koTi mullai
	vI kamaz n'eTu vazi UtuvaNTu iriya,
	kAlai eyta, kaTavumati mAlai
	an'tik kOvalar am paNai imiz icai
15	aramiya viyalakattu iyampum
	n'irai n'ilai jAyil n'eTu matil UrE.

128. kuRijci

	manRu pATu avin'tu manai maTin'tanRE;
	konROranna koTumaiyOTu inRE
	yAmam koLa varin kanaii, kAmam
	kaTalinum uraii, karai poziyummE.
5	evankol vAzi, tOzi! mayagki
	innam Akavum, n'annar n'ejcam
	ennoTum n'innoTum cUzAtu, kaimmikku,
	iRumpu paTTu iruLiya iTTu aruj cilampil
	kuRuj cunaik kuvaLai vaNTu paTac cUTi,
10	kAna n'ATan varUum, yAnaik
	kayiRRup puRattanna, kalmicaic ciRu n'eRi,
	mAri vAnam talaii n'Ir vArpu,
	iTTu arug kaNNa paTukuzi iyavin,
	iruLiTai mitippuzi n'Okki, avar
15	taLar aTi tAgkiya cenRatu, inRE?

130. n'eytal

	amma vAzi, kELir! mun n'inRu
	kaNTanir Ayin, kazaRalirmannO
	n'uN tAtu potin'ta ceg kAR kozu mukai
	muNTakam kezIiya mOTTu maNal aTaikarai,
5	pEeyt talaiya piNar arait tAzai
	eyiRuTai n'eTun' tOTu kAppa, pala uTan
	vayiRuTaip pOtu vAlitin virIi,
	pulavup porutu azitta pU n'ARu parappin
	ivar tirai tan'ta Irg katir muttam
10	kavar n'aTaip puravi kAl vaTut tapukkum
	n'al tEr vazuti koRkai mun tuRai
	vaNTu vAy tiRan'ta vAgkukazi n'eytaR
	pOtu puRagkoTutta uNkaN
	mAtar vAL mukam mataiiya n'OkkE.

131. pAlai

	'vicumpu uRa n'ivan'ta mAt tAL ikaNaip
	pacug kEz mel ilai aruku n'eRittanna,
	vaNTu paTupu iruLiya, tAz irug kUn'tal
	curumpu uNa virin'ta perun' taN kOtai
5	ivaLinum ciRan'tanRu, Ital n'amakku' ena
	vILai ampin vizut toTai mazavar
	n'AL A uytta n'Ama vej curattu
	n'aTai melin'tu ozin'ta cEN paTar kanRin
	kaTaimaNi ukun'Ir tuTaitta ATavar
10	peyarum pITum ezuti, atartoRum
	pIli cUTTiya piRagkun'ilai n'aTukal
	vEl UnRu palakai vERRu munai kaTukkum
	veruvaru takun'a kAnam, 'n'ammoTu
	varuka' ennutiAyin,
15	vArEn; n'ejcam! vAykka n'in vinaiyE.

132. kuRijci

	Enalum iRagku kural iRuttana; n'Oy malin'tu,
	Aykavin tolain'ta, ivaL n'utalum; n'Okki
	Etila moziyum, iv Urum; Akalin,
	kaLiRRu mukam tiRan'ta kavuLuTaip pakazi,
5	vAl n'iNap pukavin, kAnavar tagkai
	am paNai men tOL Ay itaz mazaik kaN
	olku iyaR koTicciyai n'alkinaiAyin,
	koNTanai cenmO n'uN pUN mArpa!
	tuLitalait talaiiya cAral n'aLi cunaik
10	kUmpu mukai aviztta kuRuj ciRaip paRavai
	vEgkai viri iNar Uti, kAn'taL
	tEnuTaik kuvikulait tujci, yAnai
	irug kavuT kaTAam kanavum,
	perug kal vEli, n'um uRaivu in UrkkE.

136. marutam

	maippu aRap puzukkin n'eyk kani veN cORu
	varaiyA vaNmaiyoTu puraiyOrp pENi,
	puLLup puNarn'tu iniya Aka, teL oLi
	am kaN iru vicumpu viLagka, tigkaT
5	cakaTam maNTiya tukaL tIr kUTTattu,
	kaTi n'akar punain'tu, kaTavuT pENi,
	paTu maNa muzavoTu parUup paNai imiza,
	vatuvai maNNiya makaLir vituppuRRu,
	pUkkaNum imaiyAr n'Okkupu maRaiya,
10	men pU vAkaip pun puRak kavaTTilai,
	pazag kanRu kaRitta payampu amal aRukait
	tazagkukural vAnin talaippeyaRku InRa
	maNNu maNi anna mAitazp pAvait
	taN n'aRu mukaiyoTu veN n'Ul cUTTi,
15	tU uTaip polin'tu mEvarat tuvanRi,
	mazai paTTanna maNal mali pan'tar,
	izai aNi ciRappin peyar viyarppu ARRi,
	tamar n'amakku Itta talain'AL iravin,
	'uvar n'Igku kaRpin em uyir uTampaTuvi!
20	murugkAk kaligkam muzuvatum vaLaii,
	perum puzukkuRRa n'in piRain'utaR poRi viyar
	uRu vaLi ARRac ciRu varai tiRa' ena
	Arva n'ejcamoTu pOrvai vavvalin,
	uRai kazi vALin uruvu peyarn'tu imaippa,
25	maRai tiRan aRiyAL Aki, oyyena
	n'ANinaL iRaijciyOLE pENi,
	parUup pakai AmpaR kurUut toTai n'Ivi,
	curumpu imir Aymalar vEyn'ta
	irum pal kUn'tal iruL maRai oLittE.

138. kuRijci

	ikuLai! kETTicin, kAtal am tOzi!
	kuvaLai uNkaN teN pani malka,
	vaRitu yAn varun'tiya cellaRku annai
	piRitu onRu kaTuttanaL Aki vEmpin
5	veRi koL pAcilai n'IlamoTu cUTi,
	uTalun'ark kaTan'ta kaTal am tAnai,
	tirun'tuilai n'eTu vER tennavan potiyil,
	aruj cimai izitarum Arttu varal aruviyin
	tatumpu cIr in iyam kaRagka, kaitozutu,
10	uru kezu ciRappin muruku manait tarIi,
	kaTampum kaLiRum pATi, n'uTagkupu
	tOTum toTalaiyum kaikkoNTu, alkalum
	ATinar Atal n'anRO? n'ITu
	n'innoTu teLitta n'al malai n'ATan
15	kuRi varal arain'AT kunRattu ucci,
	n'eRi keTa vIzn'ta tun arug kUr iruL,
	tiru maNi umizn'ta n'Akam kAn'taT
	kozu maTaR putup pU Utum tumpi
	n'al n'iRam maruLum aru viTar
20	innA n'IL iTai n'inaiyum, en n'ejcE.

145. pAlai

	vEr muzutu ulaRi n'inRa puzaRkAl,
	tEr maNi icaiyin ciLvITu Arkkum,
	vaRRal maratta poR talai Oti
	veyiR kavin izan'ta vaippin paiyuL koLa,
5	n'uNNitin n'ivakkum veN jemai viyan kATTu
	AL il attattu, aLiyaL avanoTu
	vALvari poruta puN kUr yAnai
	pukar citai mukatta kuruti vAra,
	uyar cimai n'eTug kOTTu urum ena muzagkum
10	'aruj curam iRan'tanaL' enpa peruj cIr
	anni kuRukkaip paRan'talai, titiyan
	tol n'ilai muzu mutal tumiyap paNNiya
	n'annar mel iNarp punnai pOla,
	kaTu n'avaip paTIiyarmAtO kaLi mayil
15	kujcarak kurala kurukOTu Alum,
	tujcA muzavin, tuyttu iyal vAzkkai,
	kUzuTait tan'tai iTanuTai varaippin,
	Uz aTi otugkinum uyagkum aim pAR
	ciRu pal kUn'taR pOtu piTittu aruLAtu,
20	eRi kOl citaiya n'URavum ciRupuRam,
	'enakku urittu' ennAL, n'inRa en
	amark kaN ajjaiyai alaitta kaiyE!

148. kuRijci

	panait tiraL anna paru Er eRuzt taTak kai,
	kolaic cinam tavirA matanuTai munpin,
	vaNTu paTu kaTAattu, uyar maruppu, yAnai
	taN kamaz cilampin maram paTat tolaicci;
5	uRu puli uraRak kutti; viRal kaTin'tu;
	ciRu tinaip perum punam vavvum n'ATa!
	kaTum parik kutirai Aay eyinan
	n'eTun' tEr jimiliyoTu porutu, kaLam paTTena,
	kANiya cellAk kUkai n'ANi,
10	kaTum pakal vazagkAtAagku, iTumpai
	peritAl amma ivaTkE; atanAl
	mAlai, varutal vENTum cOlai
	muLai mEy perug kaLiRu vazagkum
	malai mutal aTukkatta ciRu kal ARE.

149. pAlai

	ciRu pun citalai cEN muyanRu eTutta
	n'eTuj cem puRRattu oTugku irai munaiyin,
	pul arai iruppait toLLai vAn pUp
	perug kai eNkin irug kiLai kavarum
5	atta n'IL iTaip pOki, n'anRum
	aritu cey vizup poruL eLitinin peRinum
	vArEn vAzi, en n'ejcE! cEralar
	cuLLiam pEriyARRu veN n'urai kalagka,
	yavanar tan'ta vinai mAN n'an kalam
10	ponnoTu van'tu kaRiyoTu peyarum
	vaLam kezu muciRi Arppu eza vaLaii,
	aruj camam kaTan'tu, paTimam vavviya
	n'eTu n'al yAnai aTupOrc ceziyan
	koTi n'uTagku maRukin kUTaR kuTAatu,
15	pal poRi majjai vel koTi uyariya,
	oTiyA vizavin, n'eTiyOn kunRattu,
	vaNTu paTa n'ITiya kuNTu cunai n'Ilattu
	etir malarp piNaiyal anna ivaL
	ari matar mazaik kaN teN pani koLavE.

152. kuRijci

	n'ejcu n'aTugku arum paTar tIra van'tu,
	kunRuzai n'aNNiya cIRUr AgkaN
	celIiya peyarvOL vaNar curi aimpAl
	n'uN kOl akavun'arp puran'ta pEr icai,
5	cinam kezu tAnai, tittan veLiyan,
	iragkun'Irp parappin kAnal am perun' tuRai,
	tanam taru n'an kalam citaiyat tAkkum
	ciRu veL iRavin kuppai anna
	uRu pakai tarUum moym mUcu piNTan
10	munai muraN uTaiyak kaTan'ta ven vEl,
	icai n'al Ikaik kaLiRu vIcu vaN makiz,
	pArattut talaivan, Ara n'annan;
	Ezil n'eTu varaip pAzic cilampil
	kaLi mayiR kalAvattanna. tOLE
15	val vil iLaiyar perumakan; n'aLLi
	cOlai aTukkattuc curumpu uNa virin'ta
	kaTavuT kAn'taLuLLum, pala uTan
	iRumpUtu kajaliya Aymalar n'ARi,
	vallinum, vallAr Ayinum, cenROrkkuc
20	cAl aviz n'eTug kuzi n'iRaiya vIcum,
	mAal yAnai Aay kAnattut
	talaiyARRu n'ilaiiya cEyuyar piRagkal
	vEy amaik kaN iTai puraii,
	cEya Ayinum, n'aTugku tuyar tarumE.

159. pAlai

	teN kazi viLain'ta veN kal uppin
	koLLai cARRiya koTu n'uka ozukai
	uranuTaic cuvala pakaTu pala parappi
	umaN uyirttu iRan'ta ozikal aTuppin,
5	vaTi uRu pakazik koTu vil ATavar
	aNagkuTai n'On cilai vaNagka vAgki,
	pal An n'eTu n'irai tazIi, kallena
	aru munai alaitta perum pukal valattar,
	kanai kuraR kaTun' tuTip pANi tUgki,
10	uvalaik kaNNiyar, Un puzukku ayarum
	kavalai, 'kAtalar iRan'tanar' ena, n'ani
	avalam koLLalmA, kAtal am tOzi!
	vicumpin n'al ERu cilaikkum cEN cimai
	n'aRum pUj cAraR kuRum poRaik kuNAatu
15	vil kezu taTak kai vel pOr vAnavan
	mijiRu mUcu kavuLa ciRu kaN yAnait
	toTiyuTait taTa maruppu oTiya n'URi,
	koTumuTi kAkkum kurUukaN n'eTu matil
	cEN viLagku ciRappin AmUr eytinum,
20	ANTu amain'tu uRaiyun'ar allar, n'in
	pUN tAgku Akam porun'tutal maRan'tE.

161. pAlai

	vinaivayiR pirital yAvatu? 'vaNar curi
	vaTiyAp pittai, vankaN, ATavar
	aTi amai pakazi Ara vAgki;
	vampalarc cekutta ajcuvaru kavalai,
5	paTumuTai n'acaiiya vAzkkaic cej cevi
	eruvaic cEval INTukiLai payirum
	veruvaru kAnam n'In'ti, poruL purin'tu
	iRappa eNNinar' enpatu ciRappak
	kETTanaLkollO tAnE? tOL tAzpu
10	curumpu uNa olivarum irum pal kUn'tal,
	am mA mEni, Ay izai, kuRumakaL
	cuNagku cUz Akattu aNagku ena urutta
	n'al varal iLa mulai n'anaiya;
	pal itaz uNkaN paran'tana paniE.

164. mullai

	katir kaiyAka vAgki, jAyiRu
	paitu aRat teRutalin, payam karan'tu mARi,
	viTuvAyppaTTa viyan kaN mA n'ilam
	kATu kavin etirak kanai peyal pozitalin;
5	poRi vari ina vaNTu Arppa, pala uTan
	n'aRu vI mullaiyoTu tOnRi tOnRa.
	veRi EnRanRE vI kamaz kAnam.
	'evankol maRRu avar n'ilai?' ena mayagki,
	iku pani uRaikkum kaNNoTu inaipu, Agku
10	innAtu uRaivi tol n'alam peRUum
	itu n'aR kAlam; kaNTicin pakaivar
	matil mukam murukkiya toTi citai maruppin,
	kan'tu kAl ocikkum yAnai,
	vej cina vEn'tan vinai viTappeRinE!

166. marutam

	'n'al maram kuzIiya n'anai mutir cATi
	pal n'AL aritta kOoy uTaippin,
	mayagkumazait tuvalaiyin maRuku uTan panikkum
	pazam pal n'ellin vELUrvAyil,
5	n'aRu virai teLitta n'ARuiNar mAlai,
	poRi vari ina vaNTu Utala kaziyum
	uyar pali peRUum uru kezu teyvam,
	punai irug katuppin n'I kaTuttOLvayin
	anaiyEn Ayin, aNagkuka, en!' ena
10	manaiyOT tERRum makizn'an Ayin,
	yArkol vAzi, tOzi! n'erun'al
	tAr pUN kaLiRRin talaip puNai tazIi,
	vatuvai Ir aNip polin'tu, n'ammoTu,
	putuvatu van'ta kAvirik
15	kOTu tOy malirn'iRai, ATiyOrE?

170. n'eytal

	kAnalum kazaRAtu; kaziyum kURAtu;
	tEn imir n'aRu malarp punnaiyum moziyAtu;
	oru n'in allatu piRitu yAtum ilanE;
	irug kazi malarn'ta kaN pOl n'eytal
5	kamaz itaz n'ARRam amiztu ena n'acaii,
	taN tAtu Utiya vaNTinam kaLi ciRan'tu,
	paRaii taLarum tuRaivanai, n'IyE,
	collal vENTumAl alava! palkAl
	kaitaiam paTucinai evvamoTu acAam
10	kaTaR ciRu kAkkai kAmar peTaiyoTu
	kOTTumIn vazagkum vETTam maTi parappin
	veL iRAk kanavum n'aLLen yAmattu,
	'n'in uRu vizumam kaLain'tOL
	tan uRu vizumam n'In'tumO!' enavE.

180. n'eytal

	n'akai n'ani uTaittAl tOzi! takai mika,
	kOtai AyamoTu kuvavu maNal ERi,
	vI tatai kAnal vaNTal ayara,
	kataz parit tiN tEr kaTaii van'tu,
5	taN kayattu amanRa oN pUg kuvaLai
	arumpu alaittu iyaRRiya curumpu Ar kaNNi
	pinnup puRam tAzak konnE cUTTi,
	n'al varal iLa mulai n'Okki, n'eTitu n'inain'tu,
	n'illAtu peyarn'tanan, oruvan; ataRkE
10	pulavu n'ARu irug kazi tuzaii, pala uTan
	puL iRai koNTa muLLuTai n'eTun' tOTTut
	tAzai maNan'tu jAzaloTu kezIi,
	paTappai n'inRa muTat tAT punnaip
	pon n'Er n'uN tAtu n'Okki,
15	ennum n'Okkum, iv azugkal UrE.

183. pAlai

	'kuvaLai uNkaN kaluzavum, tirun'tizait
	titalai alkul av vari vATavum,
	attam Ar azuvam n'at tuRan'tu aruLAr
	cenRu cEN iTaiyar Ayinum, n'anRum
5	n'ITalar' enRi tOzi! pATu AnRu
	panit tuRaip perug kaTal iRan'tu, n'Ir paruki,
	kuvavut tirai arun'tu koLLaiya kuTakku Erpu,
	vayavup piTi inattin vayinvayin tOnRi,
	irug kiLaik koNmU orugkuTan tuvanRi,
10	kAlai van'tanRAl kArE mAlaik
	kuLir koL piTavin kUr mukai alari
	vaNTu vAy tiRakkum taNTA n'ARRam
	kUtir aRcirattu Utai tURRa,
	pani alaik kalagkiya n'ejcamoTu
15	varun'tuvam allamO, pirin'ticinOr tiRattE?

184. mullai

	kaTavuT kaRpoTu kuTikku viLakku Akiya
	putalvaR payan'ta pukaz miku ciRappin
	n'annarATTikku anRiyum, enakkum
	initu AkinRAl; ciRakka, n'in AyuL!
5	arun' tozil muTitta cemmal uLLamoTu
	curumpu imir malara kAnam piRpaTa,
	veN piTavu avizn'ta vI kamaz puRavil
	kuNTaik kOTTa kuRu muL kaLLip
	pun talai putaitta kozug koTi mullai
10	Ar kazal putup pU uyirppin n'Ikki,
	teL aRal parukiya tirimaruppu eziR kalai
	puLLi am piNaiyoTu vatiyum AgkaN,
	kOTuTaik kaiyar, tuLar eRi vinaijar,
	ariyal Arkaiyar, viLaimakiz tUgka,
15	celkatir mazukiya uruva jAyiRRuc
	cekkar vAnam cenRa pozutil,
	kaR pAl aruviyin olikkum n'al tErt
	tAr maNi pala uTan iyampa
	cIr miku kurucil! n'I van'tu n'inRatuvE.

191. pAlai

	attap pAtirit tuyt talaip putu vI
	eri itaz alariyoTu iTai paTa viraii,
	vaN tOTTut toTutta vaNTu paTu kaNNi,
	tOl putai ciraRRu aTi, kOluTai umaNar
5	Ur kaNTanna Aram vAgki,
	aruj curam ivarn'ta acaivu il n'On tAL
	tirun'tu pakaTTu iyampum koTu maNi, purin'tu avar
	maTi viTu vILaiyoTu, kaTitu etir OTi,
	Omai am perug kATTu varUum vampalarkku
10	Emam ceppum enRUz n'IL iTai,
	arum poruL n'acaii, pirin'tu uRai valli,
	cenRu, vinai eNNutiAyin, n'anRum,
	uraitticin vAzi en n'ejcE! 'n'irai mukai
	mullai arun'tum melliya Aki,
15	aRal ena virin'ta uRal in cAyal
	oli irug kUn'tal tERum' ena,
	valiya kURavum vallaiyO, maRRE?

198. kuRijci

	'kURuvamkollO? kURalamkol?' enak
	karan'ta kAmam kain'n'iRukkallAtu,
	n'ayan'tu n'Am viTTa n'al mozi n'ampi,
	arai n'AL yAmattu vizu mazai karan'tu;
5	kAr virai kamazum kUn'tal, tU vinai
	n'uN n'Ul Akam porun'tinaL, veRpin
	iLa mazai cUzn'ta maTa mayil pOla,
	vaNTu vazip paTara, taN malar vEyn'tu,
	vil vakuppuRRa n'al vAgku kuTaic cUl
10	am cilampu oTukki ajcinaL van'tu,
	tujcu Ur yAmattu muyagkinaL, peyarvOL,
	AnRa kaRpin cAnRa periyaL,
	am mA arivaiyO allaL; tenAatu
	Aay n'al n'ATTu aNagkuTaic cilampil,
15	kaviram peyariya uru kezu kavAan,
	Er malar n'iRai cunai uRaiyum
	cUrmakaLmAtO ennum en n'ejcE!

204. mullai

	ulaku uTan n'izaRRiya tolaiyA veNkuTai,
	kaTal pOl tAnai, kalimA, vazuti
	venRu amar uzan'ta viyan perum pAcaRaic
	cenRu, vinai muTittanam Ayin, inRE
5	kArp peyaRku etiriya kANtaku puRavil,
	kaNam koL vaNTin am ciRait tozuti
	maNam kamaz mullai mAlai Arppa,
	utukkAN van'tanRu pozutE; val virain'tu,
	celka, pAka! n'in n'al vinai n'eTun' tEr
10	veNNel arin'ar maTi vAyt taNNumai
	pal malarp poykaip paTu puL Oppum
	kAy n'el paTappai vANan ciRukuTit
	taNTalai kamazum kUn'tal,
	oN toTi maTan'tai tOL iNai peRavE.

207. pAlai

	aNagkuTai mun'n'Ir paran'ta ceRuvin
	uNagku tiRam peyarn'ta veN kal amiztam
	kuTa pula marugkin uymmAr, puL Orttup
	paTai amaittu ezun'ta peruj cey ATavar
5	n'iraip parap poRaiya n'araip puRak kazutaik
	kuRaik kuLampu utaitta kal piRaz iyavin,
	vej curam pOzn'ta, ajcuvaru kavalai,
	mijiRu Ar kaTAam karan'tu viTu kavuLa,
	veyil tina varun'tiya, n'ITu maruppu oruttal
10	piNar azi perug kai puraNTa kUval
	teN kaN uvarik kuRaik kuTa mukavai,
	aRanilALan tONTa, veytu uyirttu,
	piRain'utal viyarppa, uNTanaLkollO
	tEm kalan'tu aLaiiya tIm pAl En'tik
15	kUzai uLarn'tu mOzaimai kURavum,
	maRutta collaL Aki,
	veRutta uLLamoTu uNNAtOLE?

213. pAlai

	vinai n'avil yAnai viRaR pOrt toNTaiyar
	ina mazai tavazum ERRu aru n'eTug kOTTu
	Ogku veL aruvi vEgkaTattu umpar,
	koykuzai atiral vaiku pular alari
5	curi irum pittai curumpu paTac cUTi,
	ikal munait tarIiya ERuTaip peru n'irai
	n'anai mutir n'aRavin n'AT pali koTukkum
	vAl n'iNap pukavin vaTukar tEettu,
	n'izaR kavin izan'ta n'Ir il n'IL iTai
10	azal avir aruj curam n'eTiya ennAtu,
	akaRal Ayn'tanar Ayinum, pakal celap
	pal katir vAgkiya paTu cuTar amaiyattup
	peru maram konRa kAl puku viyan punattu,
	eri maruL katira tiru maNi imaikkum
15	velpOr vAnavan kollik kuTa varai
	vEy ozukku anna, cAy iRaip paNait tOL
	perug kavin citaiya n'Igki, AnROr
	arum peRal ulakam amiztoTu peRinum,
	cenRu, tAm n'ITalOilarE enRum
20	kalam peyak kavizn'ta kazal toTit taTak kai,
	valam paTu venRi vAy vAL, cOzar
	ilagku n'Irk kAviri izipunal varitta
	aRal ena n'eRin'ta kUn'tal,
	uRal in cAyaloTu onRutal maRan'tE.

218. kuRijci

	'kiLai pArATTum kaTu n'aTai vayak kaLiRu
	muLai tarupu UTTi, vENTu kuLaku arutta,
	vAL n'iRa uruvin oLiRupu minni,
	parUu uRaip pal tuLi citaRi, vAn n'avinRu,
5	peru varai n'aLir cimai atira vaTTittu,
	puyal ERu uraiiya viyal iruL n'aTu n'AL,
	viRal izaip polin'ta kANpu in cAyal,
	taTaiit tiraNTa n'in tOL cErpu allatai,
	paTAavAkum, em kaN' ena, n'Iyum,
10	'iruL mayagku yAmattu iyavuk keTa vilagki,
	vari vayagku irum puli vazagkun'arp pArkkum
	peru malai viTarakam vara aritu' ennAy,
	vara eLitAka eNNuti; atanAl,
	n'uNNitin kUTTiya paTu mAN Aram
15	taNNitu kamazum n'in mArpu, oru n'AL
	aTaiya muyagkEm Ayin, yAmum
	viRal izai n'ekizac cAaytum; atuvE
	annai aRiyinum aRika! alar vAy
	ampal mUtUr kETpinum kETka!
20	vaNTu iRai koNTa eri maruL tOnRiyoTu,
	oN pU vEgkai kamazum
	taN peruj cAral pakal van'tImE!

233. pAlai

	alamaral mazaik kaN malku pani vAra, n'in
	alar mulai n'anaiya, azAal tOzi!
	eri kavarpu uNTa kari puRap peru n'ilam
	pITu kezu marugkin OTu mazai tuRan'tena,
5	Un il yAnai uyagkum vEnil,
	maRap paTaik kutirai, mARA main'tin,
	tuRakkam eytiya toyyA n'al icai
	mutiyarp pENiya, utiyaj cEral
	peruj cORu koTutta jAnRai, irum pal
10	kULic cuRRam kuzIi irun'tAgku,
	kuRiyavum n'eTiyavum kunRu talaimaNan'ta
	curan iRan'tu akanRanar Ayinum, mika n'ani
	maTagkA uLLamoTu mati mayakkuRAa,
	poruLvayin n'ITalOilar n'in
15	iruL aig kUn'tal in tuyil maRan'tE.

225. pAlai

	anpum, maTanum, cAyalum, iyalpum,
	enpu n'ekizkkum kiLaviyum, piRavum,
	onRupaTu koLkaiyoTu OrAgku muyagki,
	inRE ivaNam Aki, n'ALai,
5	putal ivar ATu amai, tumpi kuyinRa
	akalA am tuLai, kOTai mukattalin,
	n'Irkku iyagku ina n'iraip pinRai vAr kOl
	Ayk kuzal pANiyin aitu van'tu icaikkum,
	tEkku amal cOlaik kaTaRu Ogku aruj curattu,
10	yAtta tUNit talai tiRan'tavaipOl,
	pUtta iruppaik kuzai poti kuvi iNar
	kazal tuLai muttin cen' n'ilattu utira,
	mazai tuLi maRan'ta am kuTic cIRUrc
	cEkkuvam kolO n'ejcE! pUp punai
15	puyal ena olivarum tAz irug kUn'tal,
	ceRi toTi munkai, n'am kAtali
	aRivu ajar n'Okkamum pulaviyum n'inain'tE?

231. pAlai

	'ceRuvOr cemmal vATTalum, cErn'tOrkku
	uRum iTattu uvakkum utavi ANmaiyum,
	il irun'tu amaivOrkku il, enRu eNNi,
	n'al icai valitta n'ANuTai manattar
5	koTu viR kAnavar kaNai iTat tolain'tOr,
	paTu kaLattu uyartta mayirt talaip patukkaik
	kaLLi am paRan'talaik kaLartoRum kuzIi,
	uLLun'arp panikkum Ukku arug kaTattiTai
	vej curam iRan'tanar Ayinum, n'ejcu uruka
10	varuvar vAzi, tOzi! poruvar
	cel camam kaTan'ta cellA n'al icai,
	vicumpu ivar veN kuTai, pacum pUT pANTiyan
	pATu peRu ciRappin kUTal anna n'in
	ATu vaNTu araRRum muccit
15	tOTu Ar kUn'tal marIiyOrE.

234. mullai

	kAr payam pozin'ta n'Ir tikaz kAlai,
	n'uN ayir paran'ta taN aya marugkin,
	n'irai paRai annattu anna, virai parip
	pul uLaik kalimA mellitin koLIiya,
5	vaLpu orugku amaiyap paRRi, muLkiya
	pal katir Azi mel vazi aRuppa,
	kAl ena maruLa, ERi, n'Ul iyal
	kaN n'Okku ozikkum paN amai n'eTun' tEr
	val virain'tu Urmati n'al valam peRun'a!
10	tatar tazai munaiiya teRi n'aTai maTap piNai
	ERu puNar uvakaiya URu ila ukaLa,
	am ciRai vaNTin men paRait tozuti
	mullai n'aRu malart tAtu n'ayan'tu Uta,
	ellai pOkiya pullen mAlai,
15	puRavu aTain'tirun'ta uRaivu in n'al Ur,
	kazi paTar uzan'ta pani vAr uNkaN
	n'al n'iRam paran'ta pacalaiyaL
	min n'Er Otip pinnup piNi viTavE.

240. n'eytal

	cev vI jAzaR karug kOTTu iruj cinait
	tanip pArppu uLLiya taN paRai n'Arai
	maNip pU n'eytal mAk kazi n'ivappa,
	inip pulampinRE kAnalum; n'aLi kaTal
5	tiraic curam uzan'ta tiN timil viLakkil
	pal mIn kUTTam ennaiyark kATTiya,
	en'taiyum cellumAr iravE; an'til
	aNagkuTaip panit tuRai kaitozutu Etti,
	yAyum AyamOTu ayarum; n'Iyum,
10	tEm pAy Oti tiru n'utal n'Ivi,
	kOgku mukaittanna kuvimulai Akattu,
	in tuyil amarn'tanaiAyin, vaNTu paTa
	virin'ta cerun'ti veN maNal muTukkar,
	pU vEy punnai am taN pozil,
15	vAvE teyya, maNan'tanai celaRkE.

242. kuRijci

	arumpu mutir vEgkai alagkal men cinaic
	curumpu vAy tiRan'ta pon purai n'uN tAtu
	maNi maruL kalavattu uRaippa, aNi mikku
	avir poRi majjai ATum cOlai,
5	pain' tAT cen' tinaik koTug kural viyan punam,
	cen' tAr kiLLai n'ammoTu kaTin'tOn
	paNpu tara van'tamai aRiyAL, 'n'uN kEz
	muRi purai ezil n'alattu en makaL tuyar marugku
	aRital vENTum' ena, pal pirappu irIi,
10	aRiyA vElaR tarIi, annai
	veRi ayar viyan kaLam poliya Etti,
	maRi uyir vazagkA aLavai, cenRu yAm,
	cela varat tuNin'ta, cEN viLagku, el vaLai
	n'ekizn'ta mun kai, n'Er iRaip paNait tOL,
15	n'al ezil azivin tol kavin peRIiya,
	mukizttu varal iLa mulai mUzka, pal Uz
	muyagkal iyaivatumannO tOzi!
	n'aRai kAlyAtta n'aLir mukaic cilampil
	peru malai viTarakam n'ITiya ciRiyilaic
20	cAn'ta men cinai tINTi, mElatu
	piracam tUgkum cEN cimai
	varaiyaka veRpan maNan'ta mArpE!

244. mullai

	'''pacai paTu paccai n'ey tOyttanna
	cEy uyar cinaiya mAc ciRaip paRavai
	pakal uRai mutu maram pulampap pOki,
	mukai vAy tiRan'ta n'akai vAy mullai
5	kaTimakaL katuppin n'ARi, koTimicai
	vaNTinam tavirkkum taN patak kAlai
	varinum, vArAr Ayinum, ANTu avarkku
	initukol, vAzi tOzi?'' ena, tan
	pal itaz mazaik kaN n'allakam civappa,
10	arun' tuyar uTaiyaL ivaL' ena virumpip
	pANan van'tanan, tUtE; n'Iyum
	pul Ar puravi, val virain'tu, pUTTi,
	n'eTun' tEr Urmati, valava!
	muTin'tanRu amma, n'Am munniya vinaiyE!

245. pAlai

	'uyirinum ciRan'ta oN poruL tarumAr
	n'anRu puri kATciyar cenRanar, avar' ena
	manai valittu oziyum matukaiyaL Atal
	n'I n'aRku aRin'tanaiAyin, n'Igki,
5	mazai peyal maRan'ta kazai tiragku iyavil,
	cel cAttu eRiyum paNpu il vAzkkai
	val vil iLaiyar talaivar, el uRa,
	vari kiLar paNait tOL, vayiRu aNi titalai,
	ariyalATTiyar alku manai varaippil,
10	makiz n'oTai peRAarAki, n'anai kavuL
	kAna yAnai veN kOTu cuTTi,
	manRu OTu putalvan pun talai n'Ivum
	aru munaip pAkkattu alki, vaikuRa,
	n'izal paTak kavinRa n'IL arai ilavattu
15	azal akain'tanna alagkucinai oN pUk
	kuzal icait tumpi Arkkum AgkaN,
	kuRum poRai uNagkum tatar veL enpu
	kaTug kAl oTTakattu alku paci tIrkkum
	kal n'eTug kavalaiya kAnam n'In'ti,
20	am mA arivai oziya,
	cenmO n'ejcam! vAralen yAnE.

250. n'eytal

	evan kol? vAzi, tOzi! mayagku picir
	malku tirai uzan'ta olku n'ilaip punnai
	vaNTu imir iNara n'uN tAtu varippa,
	maNam kamaz iLa maNal ekkark kANvara,
5	kaNam koL AyamoTu puNarn'tu viLaiyATa,
	koTujci n'eTun' tEr iLaiyaroTu n'Ikki,
	tAran, kaNNiyan, cEra van'tu, oruvan,
	vari manai pukazn'ta kiLaviyan, yAvatum
	maRu mozi peRAan peyarn'tanan; ataRkoNTu
10	arum paTar evvamoTu perun' tOL cAay,
	av valaip paratavar kAnal am ciRu kuTi
	vev vAyp peNTir kavvaiyin kalagki,
	iRai vaLai n'ekizn'ta n'ammoTu
	tuRaiyum tujcAtu, kagkulAnE!

257. pAlai

	vEniR pAtirik kUni mA malar
	n'aRai vAy vATal n'ARum n'AL, curam,
	ari Ar cilampin cIRaTi civappa,
	emmoTu Or ARu paTIiyar, yAza n'in
5	pommal Oti potuLa vAri,
	arumpu aRa malarn'ta Ay pU marAattuc
	curumpu cUz alari taii, vEyn'ta n'in
	tEm pAy kUn'tal kuRum pala mocikkum
	vaNTu kaTin'tu Ompal tERRAy, aNi koLa
10	n'uN kOl el vaLai teLirkkum munkai
	mel iRaip paNait tOL viLagka vIci,
	valluvaimannAl n'aTaiyE kaLvar
	pakai miku kavalaic cel n'eRi kANmAr,
	micai maram cErttiya kavai muRi yAattu,
15	n'Ar arai marugkin n'Ir varap poLittu,
	kaLiRu cuvaittiTTa kOtuTait tataral
	kallA umaNarkkut tI mUTTu Akum,
	tunpuRu takuvana AgkaN, pun kOTTu
	aril ivar puRRattu alku irai n'acaii,
20	veL arA miLira vAgkum
	piLLai eNkin malaivayinAnE.

260. n'eytal

	maNTilam mazuka, malai n'iRam kiLara,
	vaNTinam malar pAyn'tu Uta, mImicaik
	kaNTaR kAnal kurukinam olippa,
	tirai pATu aviya, timil tozil maRappa,
5	karai ATu alavan aLaivayin ceRiya,
	cekkar tOnRa, tuNai puNar anRil
	ekkarp peNNai aka maTal cEra,
	kazi malar kamaz mukam karappa, pozil manaip
	punnai n'aRu vI pon n'iRam koLAa,
10	ellai paippayak kazippi, el uRa,
	yAgku Akuvalkol yAnE? n'IgkAtu,
	mutu marattu uRaiyum muravu vAy mutu puL
	katumenak kuzaRum, kazutu vazagku, arai n'AL,
	n'ejcu n'ekiz paruvaral ceyta
15	anpilALan aRivu n'ayan'tEnE.

262. kuRijci

	mutai paTu pacug kATTu aril pavar mayakki,
	pakaTu pala pUNTa uzavuRu cej cey,
	iTu muRai n'irampi, Aku vinaik kalittu,
	pAcilai amanRa payaRu A pukkena,
5	vAy mozit tan'taiyaik kaN kaLain'tu, aruLAtu,
	Ur mutu kOcar n'avaitta ciRumaiyin,
	kalattum uNNAL, vAlitum uTAaL,
	cinattin koNTa paTivam mARAL,
	maRam kezu tAnaik koRRak kuRumpiyan,
10	ceru iyal n'al mAn titiyaRku uraittu, avar
	in uyir cekuppak kaNTu cinam mARiya
	annimijili pOla, meym malin'tu,
	AnA uvakaiyEm Ayinem pU malin'tu
	aruvi Arkkum ayam tikaz cilampin
15	n'uN pala tuvalai putalmicai n'anaikkum
	vaNTu paTu n'aRavin vaN makizp pEkan
	koNTal mA malai n'ARi,
	am tIm kiLavi van'tamARE.

269. pAlai

	toTi tOL ivarka! evvamum tIrka!
	n'eRi irug katuppin kOtaiyum punaika!
	ERuTai ina n'irai peyara, peyarAtu,
	ceRi curai veL vEl mazavart tAgkiya
5	taRukaNALar n'al icai n'iRumAr,
	piTi maTin'tanna kuRumpoRai marugkin,
	n'aTTa pOlum n'aTAa n'eTug kal
	akal iTam kuyinRa pal peyar maNNi,
	n'aRu virai majcaL Irm puRam poliya
10	ampu koNTu aRutta Ar n'Ar urivaiyin
	cem pUg karan'tai punain'ta kaNNi
	vari vaNTu Arppac cUTTi, kazaR kAl
	iLaiyar patip peyarum aruj curam iRan'tOr,
	taii n'inRa taN peyal kaTai n'AL,
15	polagkAcu n'iraitta kOTu En'tu alkul
	n'alam kEz mAk kural kuzaiyoTu tuyalvara,
	pATu Urpu ezutarum paku vAy maNTilattu
	vayir iTaippaTTa teL viLi iyampa,
	vaNTaR pAvai uNtuRait tarIi,
20	tiru n'utal makaLir kuravai ayarum
	peru n'Irk kAnal tazIiya irukkai,
	vANan ciRukuTi, vaNagku katir n'ellin
	yANart taN paNaip pOtu vAy avizn'ta
	oN ceg kazun'Ir anna, n'in
25	kaN pani tuTaimAr van'tanar, virain'tE.

277. pAlai

	taN katir maNTilam avir, aRac cAayp
	pakal azi tORRam pOla, paiyena
	n'utal oLi karappavum, ALvinai tarumAr,
	taval il uLLamoTu eHku tuNai Aka,
5	kaTaiyal am kurala vAL vari uzuvai
	pEz vAyp piNavin vizup paci n'OnAtu,
	irum panaj ceRumpin anna parUu mayir,
	ciRu kaN, panRi varu tiRam pArkkum
	attam Ar azuvattu AgkaN n'anan'talai,
10	pottuTai maratta pukar paTu n'Izal,
	ARu cel vampalar acaiyun'ar irukkum,
	Iram il, vej curam iRan'tOr n'amvayin
	vArA aLavai Ayizai! kUr vAy
	azal akain'tanna kAmar tutai mayir
15	manai uRai kOzi maRanuTaic cEval
	pOr puri eruttam pOlak kajaliya
	pogku azal murukkin oN kural mAn'ti,
	citar citarn'tu ukutta cevvi vEnil
	van'tanRu amma, tAnE;
20	vArAr tOzi! n'am kAtalOrE.

290. n'eytal

	kuTumik kokkin paig kAR pETai,
	iruj cERRu aLLal n'AT pulam pOkiya
	kozu mIn valcip pun talaic ciRAar,
	n'uN jAN av valaic cEval paTTena,
5	alkuRu pozutin melku irai micaiyAtu,
	paital piLLai tazIi, oyyena,
	am kaN peNNai anpuRa n'aralum
	ciRu pal tol kuTip peru n'Irc cErppan,
	kazi cEr punnai azi pUg kAnal,
10	taNavA n'ejcamoTu tamiyan van'tu, n'am
	maNavA munnum evanO tOzi!
	veN kOTTu yAnai viRaR pOrk kuTTuvan
	teN tiraip parappin toNTi muntuRai,
	curumpu uNa malarn'ta perun' taN n'eytal
15	maNi Er mAN n'alam orIi,
	pon n'Er vaNNam koNTa en kaNNE?

291. pAlai

	vAnam peyal vaLam karappa, kAnam
	ulaRi ilai ilavAka, pala uTan
	ERuTai Ayattu inam paci teRuppa,
	kayan aRa vaRan'ta kOTaiyoTu n'ayan aRap
5	peru varai n'ivan'ta marugkil, koTu varip
	puliyoTu porutu cinam ciRan'tu, valiyOTu
	uravuk kaLiRu otugkiya marugkil, parUup paral,
	ciRu pal minmini kaTuppa, evvAyum
	n'iRaivana imaikkum n'irampA n'IL iTai
10	eruvai iruj ciRai irIiya, viri iNart
	tAtu uN tumpi mural icai kaTuppa,
	pariyinatu uyirkkum ampinar, veruvara
	uvalai cUTiya talaiyar, kavalai
	Arttu, uTan arum poruL vavvalin, yAvatum
15	cAttu iTai vazagkAc cEN cimai atara
	ciRiyilai n'ellit tIm cuvait tiraL kAy
	utirvana tAam attam tavirvu inRu,
	puLLi am piNai uNIiya uLLi,
	aRu maruppu ozitta talaiya, tOl poti,
20	maRu maruppu iLag kOTu atirak kUum
	cuTar teRa varun'tiya aruj curam iRan'tu, Agku
	uLLinai vAziya, n'ejcE! pOtu enap
	pulam kamaz n'ARRattu irum pal kUn'tal,
	n'al ezil, mazaik kaN, n'am kAtali
25	mel iRaip paNaittOL viLagkum mAN kavinE.

298. kuRijci

	payam kezu tiruvin pal katir jAyiRu
	vayagku tozil tarIiyar, valan Erpu viLagki,
	malku kaTal tOnRiyAgku, malku paTa,
	maNi maruL mAlai, malarn'ta vEgkai
5	oN taLir avir varum oli kezu peruj cinait
	taN tuLi acaivaLi taivarum n'ATa!
	konRu cinam taNiyAtu, venRu muraN cAmpAtu,
	irum piTit tozutiyin inam talaimayagkAtu,
	perum peyaR kaTAam cerukki, vaLa malai
10	irug kaLiRu iyalvarum perug kATTu iyavin,
	Ar iruL tumiya veL vEl En'ti,
	tAz pUg kOtai Utu vaNTu irIi,
	men piNi avizn'ta arai n'AL iravu, ivaN
	n'I van'tataninum, initu AkinRE
15	tUval kaLLin tunai tEr, en'tai
	kaTiyuTai viyal n'akar OmpinaL uRaiyum
	yAy aRivuRutal ajci, pAnAL,
	kAval n'ejcamoTu kAmam ceppEn,
	yAn n'in koTumai kURa, n'inaipu Agku,
20	inaiyal vAzi, tOzi! n'at tuRan'tavar
	n'ITalar Aki varuvar, vallena;
	kagkul uyavut tuNai Akiya
	tujcAtu uRaivi ivaL uvan'tatuvE!

302. kuRijci

	cilampil pOkiya cem muka vAzai
	alagkal am tOTu, acaivaLi uRutoRum,
	paLLi yAnaip parUup puRam taivarum
	n'al varai n'ATanoTu aruvi ATiyum,
5	pal itaz n'Ilam paTu cunaik kuRRum,
	n'aRu vI vEgkai ina vaNTu Arkkum
	veRi kamaz cOlai n'ayan'tu viLaiyATalum
	ariya pOlum kAtal am tOzi!
	irug kal aTukkattu ennaiyar uzuta
10	karumpu enak kaviniya perug kural Enal,
	kiLi paTa viLain'tamai aRin'tum,' celka' ena,
	n'am avaN viTun'aL pOlAL, kaimmikac
	cil cuNagku aNin'ta, ceRin'tu vIgku, iLa mulai,
	mel iyal olivarum katuppoTu,
15	pal kAl n'Okkum aRan il yAyE.

304. mullai

	iru vicumpu ivarn'ta karuvi mA mazai,
	n'Ir ceRi n'ugkin kaN citarn'tavai pOl,
	cUr panippanna taN varal AliyoTu
	parUup peyal azi tuLi talaii, vAn n'avinRu,
5	kurUut tuLi pozin'ta perum pular vaikaRai,
	ceytu viTTanna cen' n'ila marugkil,
	ceRittu n'iRuttanna teL aRal paruki,
	ciRu maRi tazIiya teRin'aTai maTap piNai,
	valam tiri maruppin aNNal iralaiyoTu,
10	alagku cinaik kurun'tin alku n'izal vatiya,
	curumpu imirpu Uta, piTavut taLai aviza,
	arum poRi majjai Ala, vari maNal
	maNi miTai pavaLam pOla, aNi mikak
	kAyAj cemmal tAay, pala uTan
15	Iyal mUtAy Irm puRam varippa,
	pulan aNi koNTa kAr etir kAlai,
	'En'tu kOTTu yAnai vEn'tan pAcaRai
	vinaiyoTu vERu pulattu alki, n'anRum
	aRavar allar, n'am aruLAtOr' ena,
20	n'am n'Oy tanvayin aRiyAL,
	em n'on'tu pulakkumkol, mAayOLE?

317. pAlai

	' "mAka vicumpin mazai tozil ulan'tena,
	pAay anna pakal iruL parappi,
	pukai n'iRa uruvin aRciram n'Igka,
	kuvimukai murukkin kUr n'unai vai eyiRRu
5	n'akai muka makaLir UTTu ukir kaTukkum
	mutirAp pal itaz utirap pAyn'tu, uTan
	malar uN vETkaiyin citar citarn'tu ukuppa,
	pon cey kannam poliya, veLLi
	n'uN kOl aRai kuRain'tu utirvana pOla,
10	arava vaNTinam UtutoRum kuravattu
	Ogku cinai n'aRu vI kOgku alar uRaippa,
	tuvaittu ezu tumpi, tavir icai viLari
	putaittu viTu n'arampin, immena imirum
	An EmuRRa kAmar vEnil,
15	veyil avir puraiyum vI tatai marAattuk
	kuyil iTu pUcal emmoTu kETpa
	varuvEm" enRa paruvam ANTai
	illaikol?' ena mella n'Okki,
	n'inain'tanam irun'tanamAka, n'ayan'tu Agku
20	uLLiya marugkin uLLam pOla,
	van'tu n'inRanarE kAtalar; n'an' tuRan'tu
	ennuziyatukol tAnE pal n'AL
	annaiyum aRivuRa aNagki,
	n'al n'utal pAaya pacalai n'OyE?

319. pAlai

	maNi vAyk kAkkai mA n'iRap perug kiLai
	piNi vIz Alattu alagku cinai ERi,
	koTu vil eyinar kuRumpiRku Ukkum
	kaTu vinai maRavar villiTat tolain'tOr
5	paTu piNam kavarum pAz paTu n'anan'talai,
	aNagku ena urutta n'Okkin, aiyena
	n'uNagkiya n'ucuppin, n'uN kEz mAmai,
	pon vI vEgkaip putu malar puraiya
	n'al n'iRattu ezun'ta, cuNagku aNi vana mulai,
10	curumpu Ar kUn'tal, perun' tOL, ivaLvayin
	pirin'tanir akaRal cUzin, arum poruL
	eytukamAtO n'umakkE; koy tazait
	taLir Er anna, tAgku aru matukaiyaL,
	melliyaL, iLaiyaL, n'ani pEr anpinaL,
15	'celvEm' ennum n'um etir,
	'ozivEm' ennum oNmaiyO ilaLE!

324. mullai

	virun'tum peRukun'aL pOlum, tirun'tu izait
	taTa men paNait tOL, maTa mozi arivai
	taLir iyal kiLLai ini tinin eTutta
	vaLarAp piLLait tUvi anna,
5	uLar peyal vaLartta, paim payirp puRavil
	paRaik kaN anna n'iRaic cunai tORum
	tuLi paTu mokkuL tuLLuvana cAla,
	toLi poru pokuTTut tOnRuvana mAya,
	vaLi cinai utirttalin, veRi koLpu tAay,
10	ciraR ciRaku Eyppa aRaRkaN varitta
	vaNTu uN n'aRu vI tumitta n'Emi
	taN n'ila marugkil pOzn'ta vaziyuL,
	n'irai cel pAmpin viraipu n'Ir muTuka,
	cellum, n'eTun'takai tErE
15	mullai mAlai n'akar pukal Ayn'tE!

332. kuRijci

	muLai vaLar mutala mUgkil murukki,
	kiLaiyoTu mEyn'ta kEz kiLar yAnai,
	n'Ir n'acai marugkin n'iRam pArttu oTugkiya,
	poru muraN uzuvai tolaicci, kUr n'unaik
5	kurutic ceg kOTTu azi tuLi kazAa,
	kal mukai aTukkattu menmela iyali,
	ceRu pakai vATTiya cemmaloTu, aRu kAl
	yAz icaip paRavai imira, piTi puNarn'tu,
	vAzai am cilampil tujcum n'ATan
10	n'in purai takka cAyalan ena, n'I
	anpu uraittu aTagkak kURiya in col
	vAyttana vAzi, tOzi! vETTOrkku
	amiztattu anna kamaz tAr mArpin
	vaNTu iTaip paTAa muyakkamum,
15	taNTAk kAtalum, talai n'AL pOnmE!