291-300

291
ciRAaar! tuTiyar! pATu val makAaar!
tU veL aRuvai mAyOR kuRuki,
irum puL pUcal Ompumin; yAnum,
viLarik koTpin, veL n'ari kaTikuven;
5
en pOl peru vituppuRuka, vEn'tE
konnum cAtal veyyORkut tan talai
maNi maruL mAlai cUTTi, avan talai
oru kAz mAlai tAn malain'tananE!

tiNai atu; tuRai vEttiyal.
n'eTugkazuttup paraNar pATiyatu.

292
vEn'taRku En'tiya tIm taN n'aRavam
yAm tanakku uRumuRai vaLAva, vilakki,
'vAy vAL paRRi n'inRanan' enRu,
cinaval Ompumin, ciRu pullALar!
5
INTE pOla vENTuvan Ayin,
en muRai varuka ennAn, kammena
ezu taru perum paTai vilakki,
ANTum n'iRkum ANtakaiyannE.

tiNai vajci; tuRai perujcORRun'ilai.
viricciyUr n'annAkanAr pATiyatu.

293
n'iRap paTaikku olkA yAnai mElOn
kuRumparkku eRiyum Eval taNNumai
n'AN uTai mAkkaTku iragkumAyin,
emminum pEr ezil izan'tu, vinai enap
5
piRar manai pukuvaLkollO
aLiyaL tAnE, pUvilaip peNTE!

tiNai kAjci; tuRai pUkkOT kAjci.
n'occi n'iyamag kizAr pATiyatu.

294
'veNkuTai matiyam mEl n'ilAt tikaztara,
kaNkUTu iRutta kaTal maruL pAcaRai,
kumarip paTai tazIiya kURRu vinai ATavar
tamar piRar aRiyA amar mayagku azuvattu,
5
iRaiyum peyarum tORRi, n'umaruL
n'AL muRai taputtIr vammin, Igku' ena,
pOr malain'tu oru ciRai n'iRpa, yAvarum
aravu umiz maNiyin kuRukAr
n'irai tAr mArpin n'in kELvanai, piRarE.

tiNai tumpai; tuRai tAnaimaRam.
perun'talaic cAttanAr pATiyatu.

295
kaTal kiLarn'tanna kaTTUr n'AppaN,
ven'tu vAy maTittu vEl talaip peyari,
tOTu ukaittu ezutarUu, turan'tu eRi jATpin,
varu paTai pOzn'tu vAyp paTa vilagki,
5
iTaip paTai azuvattuc citain'tu vERAkiya,
ciRappuTaiyALan mANpu kaNTaruLi,
vATu mulai URic curan'tana
OTAp pUTkai viTalai tAykkE.

tiNai atu; tuRai uvakaik kaluzcci.
auvaiyAr pATiyatu.

296
vEmpu cinai oTippavum, kAjci pATavum,
n'eyyuTaik kaiyar aiyavi pukaippavum,
ellA manaiyum kallenRavvE;
vEn'tu uTanRu eRivAnkollO
5
n'eTitu van'tanRAl n'eTun'takai tErE?

tiNai vAkai; tuRai ERAN mullai.
veLLaimALar pATiyatu.

297
peru n'Ir mEval taNNaTai erumai
iru maruppu uRazum n'eTu mAN n'eRRin
paim payaRu utirtta kOtin kOl aNai,
kanRuTai marai At tujcum cIRUrk
5
kOL ivaN vENTEm, puravE; n'Ar ari
n'anai mutir cATi n'aRavin vAztti,
tuRai n'ani kezIik kampuL Inum
taNNaTai peRutalum urittE vain' n'uti
n'eTu vEl pAyn'ta mArpin,
10
maTal van pOn'taiyin, n'iRkumOrkkE.

tiNai veTci; tuRai uNTATTu.
...........................................................................

298
emakkE kalagkal tarumE; tAnE
tERal uNNum mannE; n'anRum
innAn manRa vEn'tE, iniyE
n'ErAr Ar eyil muRRi,
5
vAy maTittu uraRi, 'n'I mun'tu' ennAnE.

tiNai karan'tai; tuRai n'eTumozi.
AliyAr pATiyatu.

299
parutti vElic cIRUr mannan
uzuttu atar uNTa Oy n'aTaip puravi,
kaTal maNTu tONiyin, paTai mukam pOza
n'eymiti arun'tiya, koy cuval eruttin,
5
taNNaTai mannar, tAruTaip puravi,
aNagkuTai murukan kOTTattuk
kalam toTA makaLirin, ikan'tu n'inRavvE.

tiNai n'occi; tuRai kutirai maRam.
ponmuTiyAr pATiyatu.

300
'tOl tA; tOl tA' enRi; tOloTu
tuRukal maRaiyinum uykuvai pOlAy;
n'erun'al ellai n'I eRin'tOn tampi,
akal pey kunRiyin cuzalum kaNNan,
5
pEr Ur aTTa kaLLiRku
Or il kOyil tErumAl n'innE.

tiNai tumpai; tuRai tAnai maRam.
aricil kizAr pATiyatu.