71

	maTagkalin cinaii, maTagkA uLLattu,
	aTagkAt tAnai vEn'tar uTagku iyain'tu,
	ennoTu porutum enpa; avarai
	Ar amar alaRat tAkki, tEroTu
5	avarp puRagkANEn Ayin ciRan'ta
	pEr amar uNkaN ivaLinum pirika;
	aRan n'ilai tiriyA anpin avaiyattu,
	tiRan il oruvanai n'ATTi, muRai tirin'tu
	melikOl ceytEn Akuka; mali pukaz
10	vaiyai cUzn'ta vaLam kezu vaippin
	poyyA yANar maiyal kOmAn
	mAvanum, man eyil An'taiyum, urai cAl
	an'tuvaj cAttanum, Atan aziciyum,
	vej cina iyakkanum, uLappaTap piRarum,
15	kaN pOl n'aNpin kELiroTu kalan'ta
	in kaLi makiz n'akai izukki yAn onRO,
	manpatai kAkkum n'IL kuTic ciRan'ta
	ten pulam kAvalin orIi, piRar
	van pulam kAvalin mARi yAn piRakkE!

72

	'n'akutakkanarE, n'ATu mIkkURun'ar;
	iLaiyan ivan' ena uLaiyak kURi,
	'paTu maNi iraTTum pA aTip paNait tAL
	n'eTu n'al yAnaiyum, tErum, mAvum,
5	paTai amai maRavarum, uTaiyam yAm' enRu
	uRu tuppu ajcAtu, uTal cinam cerukki,
	ciRu col colliya cinam kezu vEn'tarai
	aruj camam citaiyat tAkki, muracamoTu
	orugku akappaTEen Ayin porun'tiya
10	en n'izal vAzn'ar cel n'izal kANAtu,
	'koTiyan em iRai' enak kaNNIr parappi,
	kuTi pazi tURRum kOlEn Akuka;
	Ogkiya ciRappin uyarn'ta kELvi
	mAgkuTi marutan talaivan Aka,
15	ulakamoTu n'ilaiiya palar pukaz ciRappin
	pulavar pATAtu varaika, en n'ilavarai;
	purappOr punkaN kUra,
	irappOrkku IyA inmai yAn uRavE.

73

	mella van'tu, en n'al aTi porun'ti,
	'I' ena irakkuvar Ayin, cIruTai
	muracu kezu tAyattu aracO tajcam;
	in uyir Ayinum koTukkuven, in' n'ilattu;
5	ARRal uTaiyOr ARRal pORRAtu, en
	uLLam eLLiya maTavOn, teLLitin
	tujcu puli iTaRiya citaTan pOla,
	uyn'tanan peyartalO aritE; main'tuTaik
	kazai tin yAnaik kAl akappaTTa
10	van tiNi n'IL muLai pOla, cenRu, avaN
	varun'tap porEen Ayin, porun'tiya
	tItu il n'ejcattuk kAtal koLLAp
	pal irug kUn'tal makaLir
	ollA muyakkiTaik kuzaika, en tArE!

281

	tIm kani iravamoTu vEmpu manaic cerIi,
	vAgku maruppu yAzoTu pal iyam kaRagka,
	kai payap peyarttu mai izutu izuki,
	aiyavi citaRi, Ampal Uti,
5	icai maNi eRin'tu, kAjci pATi,
	n'eTu n'akar varaippil kaTi n'aRai pukaii,
	kAkkam vammO kAtalam tOzi!
	vEn'tuRu vizumam tAgkiya
	pUm poRik kazal kAl n'eTun'takai puNNE.

293

	n'iRap paTaikku olkA yAnai mElOn
	kuRumparkku eRiyum Eval taNNumai
	n'AN uTai mAkkaTku iragkumAyin,
	emminum pEr ezil izan'tu, vinai enap
5	piRar manai pukuvaLkollO
	aLiyaL tAnE, pUvilaip peNTE!

336

	vETTa vEn'tanum vej cinattinanE;
	kaTavana kazippu ivaL tan'taiyum ceyyAn;
	oLiRu mukattu En'tiya vIgku toTi maruppin
	kaLiRum kaTimaram cErA; cErn'ta
5	oLiRu vEl maRavarum vAy mUzttanarE;
	iyavarum aRiyAp pal iyam kaRagka,
	annO, perum pEtuRRanRu, iv arug kaTi mUtUr;
	aRan ilaL manRa tAnE viRal malai
	vEgkai veRpin virin'ta kOgkin
10	mukai vanappu En'tiya muRRA iLamulait
	takai vaLarttu eTutta n'akaiyoTu,
	pakai vaLarttirun'ta ip paNpu il tAyE.

337

	Arkali yinanE, cONATTu aNNal;
	kavi kai maN AL celvar Ayinum,
	vAL valattu oziyap pATic cenRAar,
	varaltORu akam malara,
5	Ital AnA vilagku toTit taTak kaip
	pAri paRampin panic cunai pOla,
	kANTaRku ariyaL Aki, mANTa
	peNmai n'iRain'ta polivoTu, maNNiya
	tukil viri kaTuppa n'uTagki, taNNena
10	akil Ar n'aRum pukai aitu cenRu aTagkiya
	kapila n'eTu n'akark kamazum n'ARRamoTu,
	manaic ceRin'tanaLE, vANutal; iniyE,
	aRRanRuAkalin, teRRenap pORRi,
	kAy n'el kavaLam tIRRi, kAvutoRum
15	kaTugkaN yAnai kAppanar anRi,
	varutal AnAr vEn'tar; tannaiyar
	poru camam kaTan'ta uru kezu n'eTu vEl
	kuruti paRRiya veruvaru talaiyar;
	maRRu ivar maRanum iRRAl; teRRena
20	yAr Akuvarkol tAmE n'Erizai
	urutta pala cuNagku aNin'ta
	maruppu iLa vana mulai jemukkuvOrE?

338

	Er paran'ta vayal, n'Ir paran'ta ceRuvin,
	n'el malin'ta manai, pon malin'ta maRukin,
	paTu vaNTu Arkkum pal malark kAvin,
	n'eTu vEL Atan pOn'tai anna,
5	peruj cIr arug koNTiyaLE; karuj cinai
	vEmpum Arum pOn'taiyum mUnRum
	malain'ta cenniyar, aNin'ta villar,
	koRRa vEn'tar varinum, tan taka
	vaNagkArkku Ikuvan allan vaN tOTTup
10	piNagku katirk kazani n'AppaN, EmuRRu
	uNagku kalan Aziyin tOnRum
	Or eyil mannan oru maTa makaLE.

339

	viyan pulam paTarn'ta pal A n'eTu ERu
	maTalai mAN n'izal acaiviTa, kOvalar
	vI tatai mullaip pUp paRikkun'tu;
	kuRug kOl eRin'ta n'eTuj cevik kuRu muyal
5	n'eTu n'Irp parappin vALaiyoTu ukaLun'tu;
	toTalai alkul toTit tOL makaLir
	kaTal ATik kayam pAyn'tu,
	kazi n'eytal pUkkuRUun'tu;
	pain' tazai tuyalvarum ceRu viRaRa..............
10	............................................................................latti
	vaLara vENTum, avaLE, enRum
	Ar amar uzappatum amariyaLAki,
	muRam cevi yAnai vEn'tar
	maRam kezu n'ejcam koNTu oLittOLE.

340

	aNit tazai n'uTagka OTi, maNip poRik
	kural am kunRi koLLum iLaiyOL,
	mA makaL
	....................... l ena vinavuti, kEL, n'I:
5	eTuppave...,..................................................
	..........................main'tar tan'tai
	irum panai anna perug kai yAnai
	karan'tai am ceRuvin peyarkkum
	perun' takai mannarkku varain'tirun'tananE.

341

	vEn'tu kuRaiyuRavum koTAan, En'tu kOTTu
	am pUn' toTalai aNit tazai alkul,
	cem poRic cilampin iLaiyOL tan'tai,
	ezu viTTu amaitta tiN n'ilaik katavin
5	arai maN ijci n'AT koTi n'uTagkum
	..........................................................................................................
	pulik kaNattu anna kaTug kaN cuRRamoTu,
	mARRam mARAn, maRaliya cinattan,
	'pUk kOL' ena Eey, kayam pukkananE;
10	viLagkuizaip polin'ta vELA mel iyal,
	cuNagku aNi vana mulai, avaLoTu n'ALai
	maNam puku vaikal Akutal onRO
	Ar amar uzakkiya maRam kiLar munpin,
	n'IL ilai eHkam maRutta uTampoTu
15	vArA ulakam pukutal onRu enap
	paTai toTTananE, kurucil; AyiTaik
	kaLiRu porak kalagkiya taN kayam pOla,
	perug kavin izappatu kollO,
	men punal vaippin it taN paNai UrE!

342

	'kAnak kAkkaik kalic ciRaku Eykkum
	mayilaik kaNNi, perun' tOL kuRumakaL,
	EnOr makaLkol ivaL?' ena vituppuRRu,
	ennoTu vinavum ven vEl n'eTun'takai!
5	tiru n'ayattakka paNpin ivaL n'alanE
	porun'arkku allatu, piRarkku AkAtE;
	paig kAl kokkin paku vAyp piLLai
	men cERRu aTaikarai mEyn'tu uNTataRpin,
	Aral InRa aiyavi muTTai,
10	kUr n'al iRavin piLLaiyoTu peRUum,
	taN paNaik kizavan ivaL tan'taiyum; vEn'tarum
	peRAamaiyin pEr amar ceytalin,
	kazi piNam piRagku pOrpu azi kaLiRu erutA,
	vAL taka vaikalum uzakkum
15	mATciyavar, ivaL tannaimArE.

343

	'mIn n'oTuttu n'el kuvaii,
	micai ampiyin manai maRukkun'tu,
	manaik kuvaiiya kaRi mUTaiyAl,
	kalic cummaiya karai kalakkuRun'tu;
5	kalam tan'ta poR paricam
	kazit tONiyAn, karai cErkkun'tu;
	malait tAramum kaTal tAramum
	talaip peytu, varun'arkku Iyum
	punal am kaLLin polan' tArk kuTTuvan
10	muzagku kaTal muzavin muciRi anna,
	n'alamcAl vizup poruL paNin'tu van'tu koTuppinum,
	puraiyar allOr varaiyalaL, ivaL' enat
	tan'taiyum koTAan Ayin van'tOr,
	vAyppaTa iRutta ENi AyiTai
15	varun'tinRu kollO tAnE parun'tu uyirttu
	iTai matil cEkkum puricai,
	paTai mayagku Ar iTai, n'eTu n'al UrE?

344

	cen'n'el uNTa pain' tOTTu majjai,
	ceRi vaLai makaLir Oppalin, paRan'tu ezun'tu,
	tuRai n'aNi marutattu iRukkum UroTu,
	n'iRaicAl vizup poruL tarutal onRO
5	pukai paTu kUr eri parappip pakai ceytu,
	paNpu il ANmai tarutal onRO
	iraNTinuL onRu AkAmaiyO aritE,
	kAjcip panimuRi Arag kaNNi..................
	kaNi mEvan'tavaL alkul av variyE.

345

	kaLiRu aNaippak kalagkina, kAa,
	tEr OTat tukaL kezumina, teruvu;
	mA maRukalin mayakkuRRana, vazi;
	kalam kazAalin, tuRai kalakkuRRana;
5	teRal maRavar iRai kUrtalin,
	poRai malin'tu n'ilan n'eLiya,
	van'tOr palarE, vampa vEn'tar,
	piTi uyirppu anna kai kavar irumpin
	Ovu uRaz irum puRam kAval kaNNi,
10	karug kaN koNTa n'erugkal vem mulai,
	maiyal n'Okkin, taiyalai n'ayan'tOr
	aLiyar tAmE; ivaL tannaimArE
	celvam vENTAr, cerup pukal vENTi,
	'n'iral allOrkkut taralO il' ena;
15	kazip piNip palakaiyar, katuvAy vALar,
	kuzAam koNTa kurutiam pulavoTu
	kazAat talaiyar, karug kaTai n'eTu vEl
	inna maRavarttuAyinum annO!
	en Avatu koltAnE
20	pannal vEli ip paNai n'al UrE!

346

	piRa ..................... La pAl ena maTuttalin,
	InRa tAyO vENTAL allaL;
	kalviyen ennum, val AN ciRAan;
	olvEn allan, atu vAy Akutal
5	azin'tOr aziya, ozin'tOr okkal
	pENun'arp peRAatu viLiyum
	pun talaip perum pAz ceyum, ivaL n'alanE.

347

	uNpOn tAn n'aRug kaLLin iTac cila
	n'A iTaip pal tEr kOlac civan'ta
	oLiRu oL vATak kuzain'ta pain' tumpai,
	eRin'tu ilai muRin'ta katuvAy vElin,
5	maNam n'ARu mArpin, maRap pOr akutai,
	kuNTu n'Ir varaippin, kUTal anna
	kuvai irugkUn'tal varu mulai cEppa,
	...........................................................................................................
	en Avatukol tAnE?.....................................
10	viLagkuRu parAraiya Ayinum, vEn'tar
	vinai n'avil yAnai piNippa,
	vEr tuLagkina, n'am UruL maranE.

348

	veNNel arijar taNNumai verIi,
	kaN maTal koNTa tIm tEn iriya,
	kaL arikkum kuyam, ciRu cil
	mIn cIvum pAN cEri,
5	vAymozit tazumpan UNUr anna,
	kuvaLai uNkaN ivaLai, tAyE
	InALAyinaL Ayin, AnAtu
	n'izaltoRum n'eTun' tEr n'iRpa, vayintoRum,
	cen' n'utal yAnai piNippa,
10	varun'talaman em perun' tuRai maranE!

349

	n'uti vEl koNTu n'utal viyar tuTaiyA,
	kaTiya kURum, vEn'tE; tan'taiyum,
	n'eTiya allatu, paNin'tu moziyalanE;
	iHtu ivar paTivam: Ayin, vai eyiRRu,
5	ari matar mazaik kaN, am mA arivai,
	maram paTu ciRu tIp pOla,
	aNagku AyinaL, tAn piRan'ta UrkkE.

350

	tUrn'ta kiTagkin, cOrn'ta jAyil,
	citain'ta ijci, katuvAy mUtUr
	yAgku Avatukol tAnE, tAgkAtu?
	paTu mazai urumin iragku muracin
5	kaTu mAn vEn'tar kAlai van'tu, em
	n'eTu n'ilai vAyil koTkuvar mAtO;
	porutAtu amaikuvar allar pOr uzan'tu,
	aTu muraN munpin tannaiyar En'tiya
	vaTivEl eHkin civan'ta uNkaN,
10	toTi piRaz munkai, iLaiyOL
	aNi n'al Akattu arumpiya cuNagkE.

351

	paTu maNi marugkina paNait tAL yAnaiyum,
	koTi n'uTagku micaiya tErum, mAvum,
	paTai amai maRavaroTu, tuvanRik kallena,
	kaTal kaNTanna kaN akan tAnai
5	venRu eRi muracin vEn'tar, enRum,
	vaN kai eyinan vAkai anna
	ivaL n'alam tArAtu amaikuvar allar;
	en Avatukol tAnE teN n'Irp
	poykai mEyn'ta cev vari n'Arai
10	tEg koL marutin pUj cinai munaiyin,
	kAmaru kAjcit tujcum
	EmamcAl ciRappin, ip paNai n'al UrE?

352

	tEem koNTa veN maNTaiyAn,
	vI...................................................................kaRakkun'tu;
	aval vakutta pacug kuTaiyAn,
	putal mullaip pUp paRikkun'tu;
5	Ampal vaLLit toTik kai makaLir
	kunRu ERip punal pAyin,
	puRa vAyAl punal vaLa
	............................................................ n'oTai n'aRavin
	mA vaN tittan veNNel vEli
10	uRan'tai anna uraicAl n'an kalam
	koTuppavum koLAane
	.......................r tan'ta n'Aku iLa vEgkaiyin,
	katirttu oLi tikazum n'uN pal cuNagkin
	mAk kaN malarn'ta mulaiyaL; tannaiyum
15	ciRu kOl uLaiyum puravi
	...................................................................... yamarE.

353

	Acu il kammiyan mAcu aRap punain'ta
	polam cey pal kAcu aNin'ta alkul,
	Ikaik kaNNi ilagkat taii,
	tarumamoTu iyalvOL cAyal n'Okki,
5	tavirtta tErai, viLartta kaNNai,
	vinaval AnA vel pOr aNNal!
	'yAr makaL?' enpOy; kURak kEL, ini:
	kunRu kaNTanna n'ilaip pal pOrpu
	n'AL kaTA azitta n'anan' talaik kuppai
10	val vil iLaiyarkku alku patam mARRAt
	tol kuTi mannan makaLE; munn'AL
	kURi van'ta mA mutu vEn'tarkku
	.........................................................................................................
	............................................. uzakkik kuruti OTTi,
15	katuvAy pOkiya tuti vAy eHkamoTu,
	pajciyum kaLaiyAp puNNar,
	ajcutakavu uTaiyar, ivaL tannaimArE.

354

	araicu talaivarinum aTagkal AnA
	n'irai kAz eHkam n'Irin mUzkap
	puraiyOr cErn'tena, tan'taiyum peyarkkum;
	vayal amar kazani vAyil poykai,
5	kayal Ar n'Arai ukaitta vALai
	punalATu makaLir vaLa manai oyyum
	Ur kavin izappavum varuvatu kollO
	cuNagku aNin'tu eziliya aNan'tu En'tu iLa mulai,
	vIgku iRaip paNait tOL, maTan'tai
10	mAn piNai anna makiz maTa n'OkkE?

356

	kaLari paran'tu, kaLLi pOki,
	pakalum kUum kUkaiyoTu, piRazpal,
	Ima viLakkin, pEey makaLiroTu
	ajcu van'tanRu, im majcu paTu mutukATu;
5	n'ejcu amar kAtalar azuta kaNNIr
	enpu paTu cuTalai veN n'IRu avippa,
	ellAr puRanum tAn kaNTu, ulakattu
	manpataikku ellAm tAnAy,
	tan puRam kANpOrk kANpu aRiyAtE.

357

	kunRu talaimaNan'ta malai piNittu yAtta maN,
	potumai cuTTiya mUvar ulakamum,
	potumai inRi ANTicinOrkkum,
	mANTa anRE, yANTukaL; tuNaiyE
5	vaittatu anRE veRukkai; vi................
	..........................................................................................Nai
	puNai kaiviTTOrkku aritE, tuNai azat
	tokku uyir vauvumkAlai,
	ikkarai n'inRu ivarn'tu ukkarai koLalE.

358

	paruti cUzn'ta ip payam kezu mA n'ilam
	oru pakal ezuvar eytiyaRRE;
	vaiyamum tavamum tUkkin, tavattukku
	aiyavi anaittum ARRAtu Akalin,
5	kaiviTTanarE kAtalar; atanAl
	viTTOrai viTAaL, tiruvE;
	viTAatOr ivaL viTappaTTOrE.

359

	pARupaTap paRain'ta pal mARu marugkin,
	vERu paTu kurala vev vAyk kUkaiyoTu,
	piNam tin kuRu n'ari n'iNam tikaz palla,
	pEey makaLir piNam tazUup paRRi,
5	viLar Un tinRa vem pulAl meyyar,
	kaLari marugkin kAl peyarttu ATi,
	Ima viLakkin veruvarap pErum
	kATu munninarE, n'ATu koNTOrum;
	n'inakkum varutal vaikal aRRE;
10	vacaiyum n'iRkum; icaiyum n'iRkum;
	atanAl, vacai n'Ikki icai vENTiyum,
	n'acai vENTAtu n'anRu mozin'tum,
	n'ilavuk kOTTup pala kaLiRRoTu,
	polam paTaiya mA mayagkiTa,
15	izai kiLar n'eTun' tEr iravalarkku arukAtu,
	'koL' ena viTuvai Ayin, veLLena,
	ANTu n'I peyarn'ta pinnum,
	INTu n'ITu viLagkum, n'I eytiya pukazE.

360

	peritu ArAc ciRu cinattar,
	cila collAn pala kELviyar,
	n'uN uNarvinAn perug koTaiyar,
	kaluz n'anaiyAn taN tERalar,
5	kani kuyyAn kozun' tuvaiyar,
	tAz uvan'tu tazUu moziyar,
	payan uRuppap palarkku ARRi,
	Emam Aka in' n'ilam ANTOr
	cilarE; peruma! kEL, ini: n'ALum,
10	palarE, takaiyaHtu aRiyAtOrE;
	annOr celvamum manni n'illAtu;
	innum aRRu, atan paNpE; atanAl,
	n'iccamum ozukkam muTTilai; paricil
	n'accuvar kaiyin n'irappal Ompumati; accu varap
15	pARu iRai koNTa paRan'talai, mA kata
	kaLLi pOkiya kaLari marugkin,
	veLLil n'iRutta pinRai, kaLLoTu
	pullakattu iTTa cil aviz valci,
	pulaiyan Eva, pul mEl amarn'tu uNTu,
20	azal vAyp pukka pinnum,
	palar vAyttu irAar, paruttu uNTOrE.

365

	'mayagku irug karuviya vicumpu mukan Aka,
	iyagkiya iru cuTar kaN ena, peyariya
	vaLi iTai vazagkA vazakku aru n'Ittam,
	vayirak kuRaTTin vayagku maNi Arattup
5	pon am tikiri mun camattu uruTTi,
	porun'ark kANAc ceru miku munpin
	munnOr cellavum, cellAtu, innum
	vilai n'alap peNTirin palar mIkkURa,
	uLLEn vAziyar, yAn' enap pal mAN
10	n'ilamakaL azuta kAjciyum
	uNTu ena uraipparAl, uNarn'ticinOrE.

366

	vizuk kaTippu aRain'ta muzuk kural muracam
	ozukkuTai marugkin oru mozittu Aka,
	aravu eRi urumin uraRupu cilaippa,
	oru tAm Akiya perumaiyOrum,
5	tam pukaz n'iRIic cenRu mAyn'tanarE;
	atanAl, aRavOn makanE! maRavOr cemmAl!
	.............................uraippak kENmati:
	n'in URRam piRar aRiyAtu,
	piRar kURiya mozi teriyA,
10	jAyiRRu ellai ALvinaikku utavi,
	iravin ellai varuvatu n'ATi,
	urai.....................................................
	uzavu ozi perum pakaTu azi tinRAgku,
	ceg kaN makaLiroTu ciRu tuni aLaii,
15	am kaL tERal Ay kalattu ukuppa,
	keTal arun' tiruva!
	maTai vENTun'arkku iTai arukAtu,
	aviz vENTun'arkku iTai aruLi,
	viTai vIzttuc cUTu kizippa,
20	n'Ir n'ilai perutta vAr maNal aTai karai,
	kAvutoRum
	maTagkal uNmai mAyamO anRE.