18

	muzagku mun'n'Ir muzuvatum vaLaiip
	paran'tupaTTa viyal jAlam
	tALin tan'tu, tam pukaz n'iRIi,
	oru tAm Akiya uravOr umpal!
5	onRu pattu aTukkiya kOTi kaTai irIiya
	perumaittAka, n'in AyuLtAnE!
	n'Irt tAzn'ta kuRug kAjcip
	pUk katUum ina vALai,
	n'uN Aral, paru varAl,
10	kurUuk keTiRRa, kuNTu akazi;
	vAn uTkum vaTi n'IL matil;
	mallal mUtUr vaya vEn'tE!
	cellum ulakattuc celvam vENTinum,
	jAlam kAvalar tOL vali murukki,
15	oru n'I Akal vENTinum, ciRan'ta
	n'al icai n'iRuttal vENTinum, maRRu atan
	takuti kEL, ini, mikutiyALa!
	n'Ir inRu amaiyA yAkkaikku ellAm
	uNTi koTuttOr uyir koTuttOrE;
20	uNTi mutaRRE uNavin piNTam;
	uNavu enappaTuvatu n'ilattoTu n'IrE;
	n'Irum n'ilanum puNariyOr INTu
	uTampum uyirum paTaitticinOrE;
	vitti vAn n'Okkum pun pulam kaN akan
25	vaippiRRu Ayinum, n'aNNi ALum
	iRaivan tATku utavAtE; atanAl,
	aTu pOrc ceziya! ikazAtu vallE
	n'ilan n'eLi marugkil n'Ir n'ilai perukat
	taTTOr amma, ivaN taTTOrE;
30	taLLAtOr ivaN taLLAtOrE.

24

	n'el ariyum irun' tozuvar
	cej jAyiRRu veyil munaiyin,
	teN kaTal tirai micaip pAyun'tu;
	tiN timil van paratavar
5	veppu uTaiya maTTu uNTu,
	taN kuravaic cIr tUgkun'tu;
	tUval kalitta tEm pAy punnai
	mel iNark kaNNi milain'ta main'tar
	el vaLai makaLirt talaik kai tarUun'tu;
10	vaNTu paTa malarn'ta taN n'aRug kAnal
	muNTakak kOtai oN toTi makaLir
	irum panaiyin kurumpai n'Irum,
	pUg karumpin tIm cARum,
	Ogku maNal kuvavut tAzait
15	tIm n'IroTu uTan virAay,
	mun' n'Ir uNTu mun'n'Irp pAyum;
	tAgkA uRaiyuL n'al Ur kezIiya
	OmpA Ikai mA vEL evvi
	punal am putavin mizalaiyoTu kazanik
20	kayal Ar n'Arai pOrvil cEkkum,
	pon aNi yAnait tol mutir vELir,
	kuppai n'ellin, muttURu tan'ta
	koRRa n'IL kuTai, koTit tErc ceziya!
	n'inRu n'ilaiiyar n'in n'ALmIn; n'illAtu
25	paTAac celIiyar, n'in pakaivar mInE
	n'innoTu, tonRu mUtta uyirinum, uyiroTu
	n'inRu mUtta yAkkai anna, n'in
	ATu kuTi mUtta vizut tiNaic ciRan'ta
	vALin vAzn'ar tAL valam vAztta,
30	iraval mAkkaL Ikai n'uvala,
	oN toTi makaLir polagkalattu En'tiya
	taN kamaz tERal maTuppa, makiz ciRan'tu,
	Agku initu ozukumati, peruma! 'Agku atu
	vallun'ar vAzn'tOr' enpa tol icai,
35	malar talai ulakattut tOnRi,
	palar, celac cellAtu, n'inRu viLin'tOrE.

27

	cERRu vaLar tAmarai payan'ta, oN kEz,
	n'URRu itaz alarin n'irai kaNTanna,
	vERRumai illA vizut tiNaip piRan'tu,
	vIRRirun'tOrai eNNumkAlai,
5	uraiyum pATTum uTaiyOr cilarE;
	marai ilai pOla mAyn'ticinOr palarE;
	'pulavar pATum pukazuTaiyOr vicumpin
	valavan EvA vAna Urti
	eytupa enpa, tam cey vinai muTittu' enak
10	kETpal; en'tai! cETcenni! n'alagkiLLi!
	tEytal uNmaiyum, perukal uNmaiyum,
	mAytal uNmaiyum, piRattal uNmaiyum,
	aRiyAtOraiyum aRiyak kATTi,
	tigkaL puttEL tiritarum ulakattu,
15	vallAr Ayinum, vallun'ar Ayinum,
	varun'ti van'tOr marugku n'Okki,
	aruLa, vallai Akumati; aruL ilar
	koTAamai vallar Akuka;
	keTAata tuppin n'in pakai etirn'tOrE.

28

	'ciRappu il citaTum, uRuppu il piNTamum,
	kUnum, kuRaLum, Umum, ceviTum,
	mAvum, maruLum, uLappaTa vAzn'arkku
	eN pEr eccam enRu ivai ellAm
5	pEtaimai allatu Utiyam il' ena,
	munnum, aRin'tOr kURinar; innum,
	atan tiRam attai yAn uraikka van'tatu
	vaTTa variya cem poRic cEval
	Enal kAppOr uNarttiya kUum
10	kAnattOr, n'in tevvar; n'IyE,
	puRajciRai mAkkaTku aRam kuRittu, akattOr
	puyttu eRi karumpin viTu kazai tAmaraip
	pUm pOtu citaiya vIzn'tena, kUttar
	ATu kaLam kaTukkum aka n'ATTaiyE;
15	atanAl, aRanum poruLum inpamum mUnRum
	ARRum, peruma! n'in celvam;
	ARRAmai n'iR pORRAmaiyE.

29

	azal purin'ta aTar tAmarai
	aitu aTarn'ta n'Ul peytu,
	punai vinaip polin'ta polan n'aRun' teriyal
	pARu mayir irun' talai poliyac cUTi,
5	pAN muRRuka, n'in n'AL makiz irukkai!
	pAN muRRu ozin'ta pinRai, makaLir
	tOL muRRuka, n'in cAn'tu pular akalam! Agka
	munivu il muRRattu, initu muracu iyampa,
	koTiyOrt teRutalum, cevviyOrkku aLittalum,
10	oTiyA muRaiyin maTivu ilai Aki,
	'n'allatan n'alanum tIyatan tImaiyum
	illai' enpOrkku inan Akiliyar!
	n'el viLai kazanip paTu puL Oppun'ar
	ozi maTal viRakin kazi mIn cuTTu,
15	veg kaL tolaicciyum, amaiyAr, tegkin
	iLan'Ir utirkkum vaLam miku n'al n'ATu
	peRRanar uvakkum n'in paTai koL mAkkaL
	paRRA mAkkaLin parivu mun'tuRuttu,
	kUvai tuRRa n'AR kAl pan'tarc
20	ciRu manai vAzkkaiyin orIi, varun'arkku
	utavi ARRum n'aNpin paNpuTai
	UziRRAka, n'in ceykai! vizavil
	kOTiyar n'Irmai pOla muRaimuRai
	ATun'ar kaziyum iv ulakattu, kUTiya
25	n'akaippuRan Aka, n'in cuRRam!
	icaippuRan Aka, n'I Ompiya poruLE!

65

	maN muzA maRappa, paN yAz maRappa,
	irug kaN kuzici kavizn'tu izutu maRappa,
	curumpu Ar tERal cuRRam maRappa,
	uzavar Otai maRappa, vizavum
5	akaluL AgkaN cIRUr maRappa,
	uvavut talaivan'ta peru n'AL amaiyattu,
	iru cuTar tammuL n'Okki, oru cuTar
	punkaN mAlai malai maRain'tAgku,
	tan pOl vEn'tan munpu kuRittu eRin'ta
10	puRap puN n'ANi, maRat takai mannan
	vAL vaTakkirun'tanan; Igku,
	n'AL pOl kaziyala, jAyiRRup pakalE.

74

	kuzavi iRappinum, UntaTi piRappinum,
	'AL anRu' enRu vALin tappAr;
	toTarp paTu jamaliyin iTarppaTuttu irIiya
	kEL al kELir vELAN ciRu patam,
5	matukai inRi, vayiRRut tIt taNiya,
	tAm iran'tu uNNum aLavai
	InmarO, iv ulakattAnE?
	tiNai potuviyal; tuRai mutumozik kAjci.

75

	'mUttOr mUttOrk kURRam uyttena,
	pAl tara van'ta paza viRal tAyam
	eytinam Ayin, eytinam ciRappu' enak
	kuTi puravu irakkum kUr il ANmaic
5	ciRiyOn peRin, atu ciRan'tanRu mannE;
	maNTu amar parikkum matan uTai n'On tAL
	vizumiyOn peRukuvanAyin, tAz n'Ir
	aRu kayamarugkin ciRu kOl veN kiTai
	enRUz vATu vaRal pOla, n'anRum
10	n'oytAl amma tAnE mai aRRu,
	vicumpuRa Ogkiya veN kuTai,
	muracu kezu vEn'tar aracu kezu tiruvE.

112

	aRRait tigkaL av veN n'ilavin,
	en'taiyum uTaiyEm; em kunRum piRar koLAr;
	iRRait tigkaL iv veN n'ilavin,
	venRu eRi muracin vEn'tar em
5	kunRum koNTAr; yAm en'taiyum ilamE!

113

	maTTu vAy tiRappavum, mai viTai vIzppavum,
	aTTu AnRu AnAk kozun' tuvai Un cORum
	peTTAgku Iyum peru vaLam pazuni,
	n'aTTanai mannO, munnE; iniyE,
5	pAri mAyn'tena, kalagkik kaiyaRRu,
	n'Ir vAr kaNNEm tozutu n'iR paziccic
	cERum vAziyO perum peyarp paRampE!
	kOl tiraL mun kaik kuRun' toTi makaLir
	n'ARu irug kUn'tal kizavaraip paTarn'tE.

114

	INTu n'inROrkkum tOnRum; ciRu varai
	cenRu n'inROrkkum tOnRum, manRa
	kaLiRu menRu iTTa kavaLam pOla,
	n'aRavup pizin'tu iTTa kOtuTaic citaRal
5	vAr acumpu ozukum munRil,
	tEr vIcu irukkai, n'eTiyOn kunRE.

115

	oru cAr aruvi Arppa, oru cAr
	pANar maNTai n'iRaiyap peymmAr,
	vAkka ukka tEk kaL tERal
	kal alaittu ozukummannE! pal vEl,
5	aNNal yAnai, vEn'tarkku
	innAn Akiya iniyOn kunRE.

116

	tIm n'Irp perug kuNTu cunaip pUtta kuvaLaik
	kUmpu aviz muzun'eRi puraLvarum alkul,
	En'tu ezil mazaik kaN, in n'akai, makaLir
	pul mUcu kavalaiya muL miTai vEli,
5	pajci munRil, ciRRil AgkaN,
	pIrai n'ARiya curai ivar marugkin,
	Ittu ilaik kuppai ERi, umaNar
	uppu oy ozukai eNNupa mAtO;
	n'OkO yAnE; tEykamA, kAlai!
10	payil pUj cOlai mayil ezun'tu Alavum,
	payil iruj cilampil kalai pAyn'tu ukaLavum,
	kalaiyum koLLAvAka, palavum
	kAlam anRiyum maram payam pakarum
	yANar aRAa viyal malai aRRE
15	aNNal n'eTu varai ERi, tan'tai
	periya n'aRavin, kUr vEl pAriyatu
	arumai aRiyAr, pOr etirn'tu van'ta
	valam paTu tAnai vEn'tar
	polam paTaik kali mA eNNuvOrE.

117

	maimmIn pukaiyinum, tUmam tOnRinum,
	ten ticai marugkin veLLi OTinum,
	vayalakam n'iRaiya, putal pU malara,
	manaittalai makavai InRa amark kaN
5	AmA n'eTu n'irai n'an pul Ara,
	kOol cemmaiyin cAnROr palki,
	peyal pizaippu aRiyAp punpulattatuvE
	piLLai verukin muL eyiRu puraiyap
	pAcilai mullai mukaikkum
10	Ay toTi arivaiyar tan'tai n'ATE.

118

	aRaiyum poRaiyum maNan'ta talaiya,
	eN n'AL tigkaL anaiya koTug karait
	teL n'Irc ciRu kuLam kILvatu mAtO
	kUr vEl kuvaiiya moympin
5	tEr vaN pAri taN paRampu n'ATE!

119

	kArp peyal talaiiya kANpu in kAlai,
	kaLiRRu muka variyin teRuz vI pUppa,
	cem puRRu Iyalin in aLaip puLittu;
	men tinai yANarttu; n'an'tum kollO
5	n'izal il n'IL iTait tani maram pOla,
	paNai kezu vEn'tarai iRan'tum
	iravalarkku Iyum vaLLiyOn n'ATE!

120

	veppuL viLain'ta vEgkaic cej cuval
	kArp peyal kalitta perum pATTu Irattu,
	pUzi mayagkap pala uzutu, vitti,
	palli ATiya pal kiLaic cevvik
5	kaLai kAl kazAlin, tOTu olipu n'an'ti,
	men mayil puniRRup peTai kaTuppa n'ITi,
	karun' tAL pOki, orugku pIL virin'tu,
	kIzum mElum ejcAmaip pala kAyttu,
	vAlitin viLain'ta putu varaku ariya,
10	tinai koyya, kavvai kaRuppa, avaraik
	kozug koTi viLark kAy kOT patam Aka,
	n'ilam putaip pazuniya maTTin tERal
	pul vEyk kurampaik kuTitoRum pakarn'tu,
	n'aRu n'eyk kaTalai vicaippa, cORu aTTu,
15	perun'tOL tAlam pUcal mEvara,
	varun'tA yANarttu; n'an'tumkollO
	irum pal kUn'tal maTan'taiyar tan'tai
	ATu kazai n'aralum cET cimai, pulavar
	pATi AnAp paNpin pakaivar
20	OTu kazal kampalai kaNTa
	ceru vej cEey peru viRal n'ATE!

121

	oru ticai oruvanai uLLi, n'Al ticaip
	palarum varuvar, paricil mAkkaL;
	varicai aRitalO aritE; peritum
	Ital eLitE; mA vaN tOnRal!
5	atu n'aRku aRin'tanaiAyin,
	potu n'Okku ozimati, pulavar mATTE!

182

	uNTAl amma, iv ulakam in'tirar
	amiztam iyaivatuAyinum, 'initu' enat
	tamiyar uNTalum ilarE; munivu ilar;
	tujcalum ilar; piRar ajcuvatu ajci,
5	pukaz enin, uyirum koTukkuvar, pazi enin,
	ulakuTan peRinum, koLLalar; ayarvilar;
	anna mATci anaiyar Aki,
	tamakku ena muyalA n'On tAL,
	piRarkku ena muyalun'ar uNmaiyAnE.

183

	uRRuzi utaviyum, uRu poruL koTuttum,
	piRRai n'ilai muniyAtu, kaRRal n'anRE;
	piRappu Oranna uTanvayiRRuLLum,
	ciRappin pAlAl, tAyum manam tiriyum;
5	oru kuTip piRan'ta pallOruLLum,
	'mUttOn varuka' ennAtu, avaruL
	aRivuTaiyOn ARu aracum cellum;
	vERRumai terin'ta n'ARpAluLLum,
	kIzppAl oruvan kaRpin,
10	mERpAl oruvanum avankaN paTumE.

185

	kAl pAr kOttu, jAlattu iyakkum
	kAvaR cAkATu kaippOn mANin,
	URu inRAki ARu initu paTumE;
	uyttal tERRAnAyin, vaikalum,
5	pakaik kUz aLLaR paTTu,
	mikap pal tI n'Oy talaittalait tarumE.

186

	n'ellum uyir anRE; n'Irum uyir anRE;
	mannan uyirttE malar talai ulakam:
	atanAl, yAn uyir enpatu aRikai
	vEl miku tAnai vEn'taRkuk kaTanE.

187

	n'ATA konRO; kATA konRO;
	avalA konRO; micaiyA konRO;
	ev vazi n'allavar ATavar,
	av vazi n'allai; vAziya n'ilanE!

188

	paTaippup pala paTaittup palarOTu uNNum
	uTaip peruj celvar Ayinum, iTaip paTak
	kuRukuRu n'aTan'tu, ciRu kai n'ITTi,
	iTTum, toTTum, kavviyum, tuzan'tum,
5	n'eyyuTai aTicil mey paTa vitirttum,
	mayakkuRu makkaLai illOrkkup
	payak kuRai illai tAm vAzu n'ALE.

189

	teN kaTal vaLAkam potumai inRi
	veN kuTai n'izaRRiya orumaiyOrkkum,
	n'aTu n'AL yAmattum pakalum tujcAn
	kaTu mAp pArkkum kallA oruvaRkum,
5	uNpatu n'Azi; uTuppavai iraNTE;
	piRavum ellAm Or okkumE;
	celvattup payanE Ital;
	tuyppEm eninE, tappun'a palavE.

190

	viLai patac cIRiTam n'Okki, vaLai katir
	valci koNTu, aLai malka vaikkum
	eli muyanRanaiyar Aki, uLLa tam
	vaLan valiyuRukkum uLam ilALaroTu
5	iyain'ta kENmai illAkiyarO!
	kaTug kaN kEzal iTam paTa vIzn'tena,
	anRu avaN uNNAtAki, vazi n'AL,
	peru malai viTarakam pulampa, vETTu ezun'tu,
	irug kaLiRRu oruttal n'al valam paTukkum
10	puli pacittanna melivu il uLLattu
	uranuTaiyALar kENmaiyoTu
	iyain'ta vaikal uLa AkiyarO!

191

	'yANTu pala Aka, n'arai ila Akutal
	yAgku Akiyar?' ena vinavutir Ayin,
	mANTa en manaiviyoTu, makkaLum n'irampinar;
	yAn kaNTanaiyar en iLaiyarum; vEn'tanum
5	allavai ceyyAn, kAkkum; atantalai
	AnRu avin'tu aTagkiya koLkaic
	cAnROr palar, yAn vAzum UrE.

192

	yAtum UrE; yAvarum kELir;
	tItum n'anRum piRar tara vArA;
	n'Otalum taNitalum avaRROranna;
	cAtalum putuvatu anRE; vAztal
5	initu ena makizn'tanRum ilamE; munivin,
	innAtu enRalum ilamE; 'minnoTu
	vAnam taN tuLi talai i, AnAtu
	kal porutu iragkum mallal pEr yARRu
	n'Ir vazippaTUum puNai pOl, Ar uyir
10	muRai vazippaTUum' enpatu tiRavOr
	kATciyin teLin'tanam Akalin, mATciyin
	periyOrai viyattalum ilamE;
	ciRiyOrai ikaztal ataninum ilamE.

193

	ataL eRin'tanna n'eTu veN kaLarin
	oruvan ATTum pulvAy pOla,
	OTi uytalum kUTumman;
	okkal vAzkkai taTkummA kAlE.

194

	Or il n'eytal kaRagka, Or il
	Irn' taN muzavin pANi tatumpa,
	puNarn'tOr pU aNi aNiya, pirin'tOr
	paital uNkaN pani vArpu uRaippa,
5	paTaittOn manRa, ap paNpilALan!
	innAtu amma, iv ulakam;
	iniya kANka, itan iyalpu uNarn'tOrE.

195

	pal cAnRIrE! pal cAnRIrE!
	kayal muL anna n'arai mutir tirai kavuL,
	payan il mUppin, pal cAnRIrE!
	kaNiccik kUrm paTaik kaTun' tiRal oruvan
5	piNikkum kAlai, iragkuvir mAtO;
	n'allatu ceytal ARRIr Ayinum,
	allatu ceytal Ompumin; atutAn
	ellArum uvappatu; anRiyum,
	n'al ARRup paTUum n'eRiyummAr atuvE.

214

	'ceykuvamkollO, n'alvinai?' enavE
	aiyam aRAar, kacaTu INTu kATci
	n'IgkA n'ejcattut tuNivu illOrE;
	yAnai vETTuvan yAnaiyum peRumE;
5	kuRumpUz vETTuvan vaRug kaiyum varumE:
	atanAl, uyarn'ta vETTattu uyarn'ticinOrkku,
	ceyvinai marugkin eytal uNTu enin,
	toyyA ulakattu n'ukarcciyum kUTum;
	toyyA ulakattu n'ukarcci il enin,
10	mARip piRappin inmaiyum kUTum;
	mARip piRavAr Ayinum, imayattuk
	kOTu uyarn'tanna tam icai n'aTTu,
	tItu il yAkkaiyoTu mAytal tavat talaiyE.

217

	n'inaikkum kAlai maruTkai uTaittE,
	enaip peruj ciRappinOTu Igku itu tuNital;
	ataninum maruTkai uTaittE, piRan n'ATTut
	tORRam cAnRa cAnROn pORRi,
5	icai marapu Aka, n'aTpuk kan'tu Aka,
	inaiyatu Or kAlai Igku varutal;
	'varuvan' enRa kOnatu perumaiyum,
	atu pazutu inRi van'tavan aRivum,
	viyattoRum viyattoRum viyappu iRan'tanRE;
10	atanAl, tan kOl iyagkAt tEyattu uRaiyum
	cAnROn n'ejcuRap peRRa tonRu icai
	annOnai izan'ta iv ulakam
	en Avatukol? aLiyatu tAnE!

218

	ponnum, tukirum, muttum, manniya
	mA malai payan'ta kAmaru maNiyum,
	iTaipaTac cEya Ayinum, toTai puNarn'tu,
	aru vilai n'an kalam amaikkumkAlai,
5	oru vazit tOnRiyAgku enRum cAnROr
	cAnROr pAlar Apa;
	cAlAr cAlAr pAlar AkupavE.

219

	uL ARRuk kavalaip puLLi n'Izal,
	muzUu vaLLUram uNakkum maLLa!
	pulavuti mAtO n'IyE
	palarAl attai, n'in kuRi irun'tOrE.

220

	peruj cORu payan'tu, pal yANTu puran'ta
	perug kaLiRu izan'ta paital pAkan
	atu cErn'tu alkiya azugkal Alai,
	veLil pAzAkak kaNTu kaluzn'tAgku,
5	kalagkinen allanO, yAnE polan' tArt
	tEr vaN kiLLi pOkiya
	pEr icai mUtUr manRam kaNTE?

221

	pATun'arkku Itta pal pukazannE;
	ATun'arkku Itta pEr anpinanE;
	aRavOr pukazn'ta Ay kOlannE;
	tiRavOr pukazn'ta tiN anpinanE;
5	makaLir cAyal; main'tarkku main'tu;
	tukaL aRu kELvi uyarn'tOr pukkil;
	anaiyan ennAtu, at takkOnai,
	n'inaiyAk kURRam in uyir uyttanRu;
	paital okkal tazIi, atanai
10	vaikam vammO vAymozip pulavIr!
	'n'anan' talai ulakam aran'tai tUgka,
	keTu il n'al icai cUTi,
	n'aTukal Ayinan puravalan' enavE.

222

	'azal avir vayagku izaip polin'ta mEni,
	n'izalinum pOkA, n'in veyyOL payan'ta
	pukazcAl putalvan piRan'ta pin vA' ena,
	en ivaN ozitta anpilALa!
5	eNNAtu irukkuvai allai;
	en iTam yAtu? maRRu icai veyyOyE!

223

	palarkku n'izal Aki, ulakam mIkkURi,
	talaippOkanmaiyin ciRu vazi maTagki,
	n'ilai peRu n'aTukal Akiyak kaNNum,
	iTam koTuttu aLippa, manRa uTampOTu
5	in uyir virumpum kizamait
	tol n'aTpuTaiyAr tam uzaic celinE.

224

	aruppam pENAtu amar kaTan'tatUum;
	tuNai puNar AyamoTu tacumpu uTan tolaicci,
	iru pAN okkal kaTumpu puran'tatUum;
	aRam aRak kaNTa n'eRi mAN avaiyattu,
5	muRai n'aRku aRiyun'ar munnuRap pukazn'ta
	tU iyal koLkait tukaL aRu makaLiroTu,
	paruti uruvin pal paTaip puricai,
	eruvai n'ukarcci, yUpa n'eTun' tUN,
	vEta vELvit tozil muTittatUum;
10	aRin'tOn manRa aRivuTaiyALan:
	iRan'tOn tAnE; aLittu iv ulakam!
	aruvi mARi, ajcu varak karuki,
	peru vaRag kUrn'ta vEnil kAlai,
	pacitta Ayattup payan n'irai tarumAr,
15	pU vAL kOvalar pUvuTan utirak
	koytu kaTTu azitta vEgkaiyin,
	mel iyal makaLirum izai kaLain'tanarE.

225

	talaiyOr n'ugkin tIm cERu micaiya,
	iTaiyOr pazattin paig kani mAn'ta,
	kaTaiyOr viTu vAyp piciroTu cuTu kizagku n'ukara,
	n'ila malar vaiyattu vala muRai vaLaii,
5	vEn'tu pITu azitta En'tu vEl tAnaiyoTu,
	'ARRal' enpatan tORRam kEL, ini:
	kaLLi pOkiya kaLariam paRan'talai,
	muLLuTai viyan kATTatuvE 'n'anRum
	cETcenni n'alagkiLLi kETkuvankol?' ena,
10	in icaip paRaiyoTu venRi n'uvala,
	tUkkaNag kurIit tUgku kUTu Eyppa
	oru ciRaik koLIiya tiri vAy valampuri,
	jAlag kAvalar kaTaittalai,
	kAlait tOnRinum n'OkO yAnE.

226

	ceRRanRu Ayinum, ceyirttanRu Ayinum,
	uRRanRu Ayinum, uyvu inRu mAtO;
	pATun'ar pOlak kaitozutu Etti,
	iran'tanRAkal vENTum polan' tAr
5	maNTu amar kaTakkum tAnait
	tiN tEr vaLavaR koNTa kURRE.

227

	n'ani pEtaiyE, n'ayan il kURRam!
	viraku inmaiyin vittu aTTu uNTanai;
	innum kANkuvai, n'an vAy Akutal;
	oLiRu vAL maRavarum, kaLiRum, mAvum,
5	kuruti am kurUup punal poru kaLattu oziya,
	n'ALum AnAn kaTan'tu aTTu, enRum n'in
	vATu paci aruttiya vacai tIr ARRal
	n'in Or anna pon iyal perum pUN
	vaLavan ennum vaNTu mUcu kaNNi
10	inaiyOR koNTanaiAyin,
	ini yAr, maRRu n'in paci tIrppOrE?

228

	kalam cey kOvE! kalam cey kOvE!
	iruL tiNin'tanna kurUut tiraL parUup pukai
	akal iru vicumpin UnRum cULai,
	n'anan' talai mUtUrk kalam cey kOvE!
5	aLiyai n'IyE; yAgku Akuvaikol?
	n'ilavarai cUTTiya n'IL n'eTun' tAnaip
	pulavar pukazn'ta poyyA n'al icai,
	viri katir jAyiRu vicumpu ivarn'tanna
	cEN viLagku ciRappin, cempiyar marukan
10	koTi n'uTagku yAnai n'eTumA vaLavan
	tEvar ulakam eytinan Atalin,
	annOR kavikkum kaN akan tAzi
	vanaital vETTanaiAyin, enaiyatUum
	iru n'ilam tikiriyA, peru malai
15	maNNA, vanaital ollumO, n'inakkE?

229

	ATu iyal azal kuTTattu
	Ar iruL arai iravil,
	muTap panaiyattu vEr mutalAk
	kaTaik kuLattuk kayam kAya,
5	pagkuni uyar azuvattu,
	talai n'ALmIn n'ilai tiriya,
	n'ilai n'ALmIn atan etir Ertara,
	tol n'ALmIn tuRai paTiya,
	pAcic cellAtu, Ucit tunnAtu,
10	aLakkart tiNai viLakkAkak
	kanai eri parappa, kAl etirpu pogki,
	oru mIn vIzn'tanRAl, vicumpinAnE;
	atu kaNTu, yAmum piRarum pal vERu iravalar,
	'paRai icai aruvi n'al n'ATTup porun'an
15	n'Oy ilanAyin n'anRuman til' ena
	azin'ta n'ejcam maTiuLam parappa,
	ajcinam; ezu n'AL van'tanRu, inRE;
	main'tuTai yAnai kai vaittu uRagkavum,
	tiN piNi muracam kaN kizin'tu uruLavum,
20	kAval veNkuTai kAl parin'tu ulaRavum,
	kAl iyal kali mAk kati ila vaikavum,
	mElOr ulakam eytinan; Akalin,
	oN toTi makaLirkku uRu tuNai Aki,
	tan tuNai Ayam maRan'tanankollO
25	pakaivarp piNikkum ARRal, n'acaivarkku
	aLan'tu koTai aRiyA Ikai,
	maNi varai anna mAayOnE?

230

	kanRu amar Ayam kAnattu alkavum,
	veg kAl vampalar vENTu pulattu uRaiyavum,
	kaLam mali kuppai kAppu ila vaikavum,
	vilagku pakai kaTin'ta kalagkAc cegkOl,
5	vaiyakam pukazn'ta vayagku vinai oL vAL,
	poyyA ezini porutu kaLam cEra
	InROL n'Itta kuzavi pOla,
	tan amar cuRRam talaittalai inaiya,
	kaTum paci kalakkiya iTumpai kUr n'ejcamoTu
10	n'Oy uzan'tu vaikiya ulakinum, mika n'ani
	n'I izan'tanaiyE, aRan il kURRam!
	vAztalin varUum vayal vaLan aRiyAn,
	vIz kuTi uzavan vittu uNTAagku
	oruvan Ar uyir uNNAy Ayin,
15	n'ErAr pal uyir paruki,
	Arkuvai mannO, avan amar aTu kaLattE.

231

	eRi punak kuRavan kuRaiyal anna
	kari puRa viRakin Ima oL azal,
	kuRukinum kuRukuka; kuRukAtu cenRu,
	vicumpuRa n'ILinum n'ILka pacug katirt
5	tigkaL anna veNkuTai
	oN jAyiRu annOn pukaz mAyalavE.

232

	illAkiyarO, kAlai mAlai!
	allAkiyar, yAn vAzum n'ALE!
	n'aTukal pIli cUTTi, n'Ar ari
	ciRu kalattu ukuppavum koLvankollO
5	kOTu uyar piRagku malai kezIiya
	n'ATu uTan koTuppavum koLLAtOnE?

233

	poyyAkiyarO! poyyAkiyarO!
	pA aTi yAnai paricilarkku arukAc
	cIr kezu n'On tAL akutaikaN tOnRiya
	pon punai tikiriyin poyyAkiyarO!
5	'irum pAN okkal talaivan, perum pUN,
	pOr aTu tAnai, evvi mArpin
	eHkuRu vizuppuN pala' ena
	vaikuRu viTiyal, iyampiya kuralE.

234

	n'OkO yAnE? tEykamA kAlai!
	piTi aTi anna ciRu vazi mezuki,
	tan amar kAtali pul mEl vaitta
	in ciRu piNTam yAgku uNTanankol
5	ulaku pukat tiRan'ta vAyil
	palarOTu uNTal marIiyOnE?

235

	ciRiya kaL peRinE, emakku Iyum; mannE!
	periya kaL peRinE,
	yAm pATa, tAn makizn'tu uNNum; mannE!
	ciRu cORRAnum n'ani pala kalattan; mannE!
5	peruj cORRAnum n'ani pala kalattan; mannE!
	enpoTu taTi paTu vazi ellAm emakku Iyum; mannE!
	ampoTu vEl n'uzai vazi ellAm tAn n'iRkum; mannE!
	n'aran'tam n'ARum tan kaiyAl,
	pulavu n'ARum en talai taivarum; mannE!
10	arun' talai irum pANar akal maNTait tuLai urIi,
	irappOr kaiyuLum pOki,
	purappOr punkaN pAvai cOra,
	am col n'uN tErccip pulavar n'Avil
	cenRu vIzn'tanRu, avan
15	aru n'iRattu iyagkiya vElE!
	Acu Aku en'tai yANTu uLankollO?
	ini, pATun'arum illai; pATun'arkku onRu Ikun'arum illai;
	panit tuRaip pakanRai n'aRaik koL mAmalar
	cUTAtu vaikiyAgku, piRarkku onRu
20	IyAtu vIyum uyir tavap palavE!

236

	kalai uNak kizin'ta, muzavu maruL, perum pazam
	cilai kezu kuRavarkku alku micaivu Akum
	malai kezu n'ATa! mA vaN pAri!
	kalan'ta kENmaikku ovvAy, n'I; eR
5	pulan'tanai Akuvai puran'ta ANTE
	perun' taku ciRappin n'aTpiRku ollAtu,
	orugku varal viTAtu, 'ozika' enak kURi,
	inaiyaiAtalin n'inakku maRRu yAn
	mEyinEn anmaiyAnE; Ayinum,
10	immai pOlak kATTi, ummai
	iTai il kATci n'innOTu
	uTan uRaivu Akkuka, uyarn'ta pAlE!

237

	'n'ITu vAzka?' enRu, yAn n'eTug kaTai kuRuki,
	pATi n'inRa paci n'ATkaNNE,
	'kOTaik kAlattuk kozu n'izal Aki,
	poyttal aRiyA uravOn cevimutal
5	vittiya panuval viLain'tanRu n'anRu' ena
	n'acci irun'ta n'acai pazutAka,
	aTTa kuzici azal payan'tAagku,
	'aLiyartAmE Arka' ennA
	aRan il kURRam tiRan inRu tuNiya,
10	Uzin uruppa erukkiya makaLir
	vAzaip pUvin vaLai muRi citaRa,
	mutu vAy okkal paricilar iragka,
	kaLLi pOkiya kaLariam paRan'talai,
	veL vEl viTalai cenRu mAyn'tananE:
15	Agku atu n'Oy inRAka; Ogku varaip
	puli pArttu oRRiya kaLiRRu irai pizaippin,
	eli pArttu oRRAtAkum; mali tiraik
	kaTal maNTu punalin izumenac cenRu,
	n'aniyuTaip paricil tarukam,
20	ezumati, n'ejcE! tuNipu mun'tuRuttE.

238

	kavi cen' tAzik kuvi puRattu irun'ta
	cevi cej cEvalum pokuvalum veruvA,
	vAy van kAkkaiyum kUkaiyum kUTi,
	pEey AyamoTu peTTAgku vazagkum
5	kATu munninanE, kaL kAmuRun'an;
	toTi kazi makaLirin tol kavin vATi,
	pATun'ar kaTumpum paiyenRanavE;
	tOTu koL muracum kizin'tana, kaNNE;
	AL il, varai pOl, yAnaiyum maruppu izan'tanavE;
10	ven' tiRal kURRam perum pEtuRuppa,
	en'tai Akula ataR paTal aRiyEn;
	an'tO! aLiyEn van'tanen; manRa
	en Akuvarkol, en tunniyOrE?
	mAri iravin, maram kaviz pozutin,
15	Ar ajar uRRa n'ejcamoTu, orAgkuk
	kaN il Uman kaTal paTTAgku,
	varai aLan'tu aRiyAt tirai aru n'Ittattu,
	avala maRu cuzi maRukalin,
	tavalE n'anRuman; takutiyum atuvE.

239

	toTiyuTaiya tOL maNan'tanan;
	kaTi kAvil pUc cUTinan;
	taN kamazum cAn'tu n'Ivinan;
	ceRROrai vazi taputtanan;
5	n'aTTOrai uyarpu kURinan;
	'valiyar' ena, vazimoziyalan;
	'meliyar' ena, mIkkURalan;
	piRarait tAn irappu aRiyalan;
	iran'tOrkku maRuppu aRiyalan;
10	vEn'tuTai avaiyattu Ogku pukaz tORRinan;
	varupaTai etir tAgkinan;
	peyarpaTai puRagkaNTanan;
	kaTum pariya mAk kaTavinan;
	n'eTun' teruvil tEr vazagkinan;
15	Ogku iyala kaLiRu Urn'tanan;
	tIm ceRi tacumpu tolaiccinan;
	pAN uvappa paci tIrttanan;
	mayakkuTaiya mozi viTuttanan; Agkuc
	ceypa ellAm ceytanan Akalin
20	iTuka onRO! cuTuka onRO!
	paTu vazip paTuka, ip pukaz veyyOn talaiyE!

240

	ATu n'aTaip puraviyum, kaLiRum, tErum,
	vATA yANar n'ATum Urum,
	pATun'arkku arukA Aay aNTiran
	kOTu En'tu alkul, kuRun' toTi makaLiroTu,
5	kAlan ennum kaNNili uyppa,
	mElOr ulakam eytinan enAa,
	potta aRaiyuL pOz vAyk kUkai,
	'cuTTuk kuvi' enac cettOrp payirum
	kaLLi am paRan'talai oru ciRai alki,
10	oL eri n'aippa uTampu mAyn'tatu;
	pullen kaNNar puravalark kANAtu,
	kallen cuRRamoTu kaiyazin'tu, pulavar
	vATiya paciyarAki, piRar
	n'ATu paTu celavinar Ayinar, iniyE.

241

	'tiN tEr iravalarkku, Itta, taN tAr,
	aNTiran varUum' enna, oN toTi
	vaccirat taTak kai n'eTiyOn kOyiluL,
	pOrppuRu muracam kaRagka,
5	Arppu ezun'tanRAl, vicumpinAnE.

242

	iLaiyOr cUTAr; vaLaiyOr koyyAr;
	n'al yAz maruppin mella vAgki,
	pANan cUTAn; pATini aNiyAL;
	ANmai tOnRa ATavark kaTan'ta
5	val vEl cAttan mAyn'ta pinRai
	mullaiyum pUttiyO, ollaiyUr n'ATTE?

243

	ini n'inain'tu irakkam AkinRu: tiNi maNal
	ceyvuRu pAvaikkuk koy pUt taii,
	taN kayam ATum makaLiroTu kai piNain'tu,
	tazuvuvazit tazIi, tUgkuvazit tUgki,
5	maRai enal aRiyA mAyam il AyamoTu
	uyar cinai marutat tuRai uRat tAzn'tu,
	n'Ir n'aNip paTi kOTu ERi, cIr mika,
	karaiyavar maruLa, tiraiakam pitira,
	n'eTu n'Irk kuTTattut tuTumenap pAyn'tu,
10	kuLittu maNal koNTa kallA iLamai
	aLitOtAnE! yANTu uNTu kollO
	toTit talai vizut taNTu UnRi, n'aTukkuRRu,
	irum iTai miTain'ta cila col
	peru mUtALarEm Akiya emakkE?

245

	yAgkup perituAyinum, n'Oy aLavu enaittE,
	uyir cekukkallA matukaittu anmaiyin?
	kaLLi pOkiya kaLari marugkin
	veLLiTaip pottiya viLai viRaku Imattu,
5	oL azal paLLip pAyal cErtti,
	jAgkar mAyn'tanaL, maTan'tai;
	innum vAzval; en itan paNpE!

246

	pal cAnRIrE! pal cAnRIrE!
	'celka' enac collAtu, 'ozika' ena vilakkum,
	pollAc cUzccip pal cAnRIrE!
	aNil varik koTug kAy vAL pOzn'tiTTa
5	kAz pOl n'al viLar n'aRu n'ey tINTAtu,
	aTai iTaik kiTan'ta kai pizi piNTam,
	veL eL cAn'toTu, puLip peytu aTTa
	vELai ven'tai, valci Aka,
	paral pey paLLip pAy inRu vatiyum
10	uyaval peNTirEm allEm mAtO;
	perug kATTup paNNiya karug kOTTu Imam
	n'umakku aritAkuka tilla; emakku em
	perun' tOL kaNavan mAyn'tena, arumpu aRa
	vaL itaz avizn'ta tAmarai
15	n'aL irum poykaiyum tIyum OraRRE!

247

	yAnai tan'ta muLi mara viRakin
	kAnavar pottiya jeli tI viLakkattu,
	maTa mAn peru n'irai vaiku tuyil eTuppi,
	man'ti cIkkum aNagkuTai munRilil,
5	n'Ir vAr kUn'tal irum puRam tAza,
	pEr ajark kaNNaL, perug kATu n'Okki,
	terumarum amma tAnE tan kozun'an
	muzavu kaN tuyilAk kaTiyuTai viyal n'akarc
	ciRu n'ani tamiyaL Ayinum,
10	in uyir n'aTugkum tan iLamai puRagkoTuttE!

248

	aLiyatAmE, ciRu veL Ampal!
	iLaiyamAkat tazai AyinavE;
	iniyE, peru vaLak kozun'an mAyn'tena, pozutu maRuttu,
	innA vaikal uNNum
5	allip paTUum pul AyinavE.

249

	katir mUkku Aral kIz cERRu oLippa,
	kaNaik kOTTu vALai mIn'Irp piRaza,
	erip pUm pazanam n'erittu uTan valaijar
	arik kural taTAriyin yAmai miLira,
5	panai n'ukumpu anna cinai mutir varAloTu,
	uRaz vEl anna oN kayal mukakkum,
	akal n'ATTu aNNal pukAvE, n'erun'aip
	pakal iTam kaNNip palaroTum kUTi,
	oruvazippaTTanRu; mannE! inRE,
10	aTagkiya kaRpin, Ay n'utal maTan'tai,
	uyar n'ilai ulakam avan puka,.... vari
	n'IRu ATu cuLakin cIRiTam n'Ikki,
	azutal AnAk kaNNaL,
	mezukum, Appi kaN kaluz n'IrAnE.

250

	kuy kural malin'ta kozun' tuvai aTicil
	iravalart taTutta vAyil, puravalar
	kaNNIrt taTutta taN n'aRum pan'tar,
	kUn'tal koytu, kuRun' toTi n'Ikki,
5	alli uNavin manaiviyoTu, iniyE
	pullenRanaiyAl vaLam kezu tiru n'akar!
	vAn cORu koNTu tIm pAl vENTum
	munittalaip putalvar tan'tai
	tanit talaip perug kATu munniya pinnE.

253

	en tiRattu avalam koLLal, iniyE;
	vala Ar kaNNi iLaiyar tiLaippa,
	'n'akAal' ena van'ta mARE, ezA n'el
	paig kazai poti kaLain'tanna viLarppin,
5	vaLai il, vaRug kai Occi,
	kiLaiyuL oyvalO? kURu n'in uraiyE!

254

	iLaiyarum mutiyarum vERu pulam paTara,
	eTuppa ezAay, mArpam maN pulla,
	iTaic curattu iRutta maLLa! viLartta
	vaLai il vaRug kai Occi, kiLaiyuL,
5	'innan Ayinan, iLaiyOn' enRu,
	n'in urai cellum Ayin, 'maRRu
	mun Urp pazuniya kOLi Alattu,
	puL Ar yANarttaRRE, en makan
	vaLanum cemmalum emakku' ena, n'ALum
10	AnAtu pukazum annai
	yAgku AkuvaLkol? aLiyaL tAnE!

255

	'aiyO!' enin, yAn puli ajcuvalE;
	aNaittanan koLinE, akal mArpu eTukkavallEn;
	en pOl peru vitirppuRuka, n'innai
	innAtu uRRa aRan il kURRE!
5	n'irai vaLai mun kai paRRi
	varai n'izal cErkam n'aTatticin ciRitE!

256

	kalam cey kOvE! kalam cey kOvE!
	accuTaic cAkATTu Aram porun'tiya
	ciRu veN palli pOla, tannoTu
	curam pala van'ta emakkum aruLi,
5	viyal malar akan pozil Imat tAzi
	akalitAka vanaimO
	n'anan' talai mUtUrk kalam cey kOvE!

280

	ennai mArpil puNNum veyya;
	n'aTu n'AL van'tu tumpiyum tuvaikkum;
	n'eTu n'akar varaippin viLakkum n'illA;
	tujcAk kaNNE tuyilum vETkum;
5	ajcuvaru kurAal kuralum tURRum;
	n'el n'Ir eRin'tu viricci Orkkum
	cem mutu peNTin collum n'irampA;
	tuTiya! pANa! pATu val viRali!
	en Akuvirkol? aLiyir; n'umakkum
10	ivaN uRai vAzkkaiyO, aritE! yAnum
	maNNuRu mazit talait teN n'Ir vAra,
	tonRu tAm uTutta am pakait teriyal
	ciRu veL Ampal alli uNNum
	kazi kala makaLir pOla,
15	vazi n'inain'tiruttal, ataninum aritE!

362

	jAyiRRu anna Ay maNi miTain'ta
	mati uRaz Aram mArpil puraLa,
	pali peRu muracam pAcaRaic cilaippa,
	pozilakam paran'ta pe.................
5	.......................kuma vicaya veN koTi
	aNagku uruttanna kaNam koL tAnai,
	kURRattu anna mARRu aru munpin,
	Ak kural kANpin an'taNALar
	n'AnmaRaik kuRi .......................... yin
10	aRam kuRittanRu; poruL Akutalin
	maruL tIrn'tu, mayakku orIi,
	kai peyta n'Ir kaTaR parappa,
	Am irun'ta aTai n'alki,
	cORu koTuttu, mikap peritum
15	vIRu cAna......................... n'anRum
	ciRu veL enpin n'eTu veN kaLarin,
	vAy van kAkkai kUkaiyoTu kUTip
	pakalum kUvum akaluL AgkaN,
	kATu kaN maRaitta kallen cuRRamoTu,
20	il enRu ilvayin peyara, mella
	iTam ciRitu otugkal ajci,
	uTampoTum cenmAr, uyarn'tOr n'ATTE.

363

	irug kaTal uTutta ip perug kaN mA n'ilam
	uTaiyilai n'aTuvaNatu iTai piRarkku inRi,
	tAmE ANTa Emam kAvalar
	iTu tirai maNalinum palarE; cuTu piNak
5	kATu pati Akap pOki, tamtam
	n'ATu piRar koLac cenRu mAyn'tanarE;
	atanAl, n'Iyum kENmati attai! vIyAtu
	uTampoTu n'inRa uyirum illai;
	maTagkal uNmai mAyamO anRE;
10	kaLLi vEyn'ta muLLiam puRagkATTu,
	veLLil pOkiya viyaluL AgkaN,
	uppu ilAa avip puzukkal
	kaikkoNTu, piRakku n'OkkAtu,
	izi piRappinOn Iyap peRRu,
15	n'ilam kalanAka, ilagku pali micaiyum
	innA vaikal vArAmunnE,
	cey n'I munniya vinaiyE,
	mun'n'Ir varaippakam muzutu uTan tuRan'tE.

364

	vATA mAlai pATini aNiya,
	pANan cennik kENi pUvA
	eri maruL tAmaraip peru malar tayagka,
	mai viTai irum pOttuc cen' tIc cErtti,
5	kAyam kanin'ta kaN akan kozug kuRai
	n'aRavu uN cev vAy n'At tiRam peyarppa,
	uNTum, tinRum, irappOrkku Iyn'tum,
	makizkam vammO, maRap pOrOyE!
	ariyaAkalum uriya, peruma!
10	n'ilam paka vIzn'ta alagkal pal vEr
	mutu marap pottin katumena iyampum
	kUkaik kOzi AnAt
	tAziya perug kATu eytiya jAnRE.