paricil kaTAn'ilai

11
ari mayirt tiraL munkai,
vAl izai, maTa magkaiyar
vari maNal punai pAvaikkuk
kulavuc cinaip pUk koytu,
5
taN porun'aip punal pAyum,
viN poru pukaz, viRal vajci,
pATal cAnRa viRal vEn'tanummE,
veppu uTaiya araN kaTan'tu,
tuppu uRuvar puRam peRRicinE;
10
puRam peRRa vaya vEn'tan
maRam pATiya pATiniyummE,
Er uTaiya vizuk kazajcin,
cIr uTaiya izai peRRicinE;
izai peRRa pATinikkuk
15
kural puNar cIrk koLai val pAN makanummE,
ena Agku,
oL azal purin'ta tAmarai
veLLi n'ArAl pU peRRicinE.

tiNai pATAN tiNai; tuRai paricil kaTA n'ilai.
cEramAn pAlai pATiya perugkaTugkOvaip pEymakaL iLaveyini pATiyatu.

101
oru n'AL cellalam; iru n'AL cellalam;
pala n'AL payinRu, palaroTu cellinum,
talai n'AL pOnRa viruppinanmAtO
izai aNi yAnai iyal tEr ajci
5
atiyamAn; paricil peRUum kAlam
n'ITTinum, n'ITTAtuAyinum, kaLiRu tan
kOTTu iTai vaitta kavaLam pOlak
kaiyakattatu; atu poy AkAtE;
arun'ta EmAn'ta n'ejcam!
10
varun'ta vENTA; vAzka, avan tALE!

tiNai pATAN tiNai; tuRai paricil kaTAn'ilai.
avanai avar pATiyatu.

136
yAzp pattarp puRam kaTuppa
izai valan'ta pal tunnattu
iTaip purai paRRi, piNi viTAa
Irk kuzAttOTu iRai kUrn'ta
5
pEen pakai ena onRu enkO?
uNNAmaiyin Un vATi,
teN n'Irin kaN malki,
kacivuRRa en pal kiLaiyoTu
paci alaikkum pakai onRu enkO?
10
anna tanmaiyum aRin'tu IyAr,
'n'innatu tA' ena, n'ilai taLara,
maram piRagkiya n'aLic cilampil,
kuragku anna pun kuRug kULiyar
paran'tu alaikkum pakai onRu enkO?
15
'Aagku, enaip pakaiyum aRiyun'an Ay'
enak karuti, peyar Etti,
vAy Ara n'in icai n'ampi,
cuTar cuTTa curattu ERi,
ivaN van'ta peru n'acaiyEm;
20
'emakku IvOr piRarkku IvOr;
piRarkku IvOr tamakku Ipa' ena,
anaittu uraittanan yAn Aka,
n'inakku ottatu n'I n'ATi,
n'alkinai viTumati, paricil! alkalum,
25
taN punal vAyil tuRaiyUr muntuRai
n'uN pala maNalinum Etti,
uNkuvam, peruma! n'I n'alkiya vaLanE.

tiNai atu; tuRai paricil kaTAn'ilai.
avanait tuRaiyUr OTaikizAr pATiyatu.

139
cuval azun'tap pala kAya
cil Otip pal iLaijarumE,
aTi varun'ta n'eTitu ERiya
koTi marugkul viRaliyarumE,
5
vAztal vENTip
poy kUREn; mey kURuval;
OTAp pUTkai uravOr maruka!
uyar cimaiya uzAa n'Ajcil porun'a!
mAyA uLLamoTu paricil tunni,
10
kani patam pArkkum kAlai anRE;
Ital AnAn, vEn'tE; vEn'taRkuc
cAtal ajcAy, n'IyE; AyiTai,
iru n'ilam miLirn'ticinAagku, oru n'AL,
aruj camam varukuvatuAyin,
15
varun'talum uNTu, en paital am kaTumpE.

tiNai atu; tuRai paricil kaTAn'ilai.
avanai avar pATiyatu.

158
muracu kaTippu ikuppavum, vAl vaLai tuvaippavum,
aracuTan poruta aNNal n'eTu varai,
kaRagku veL aruvi kal alaittu ozukum
paRampin kOmAn pAriyum; piRagku micaik
5
kolli ANTa val vil Oriyum;
kAri Urn'tu pEr amark kaTan'ta,
mAri Ikai, maRap pOr malaiyanum;
UrAtu En'tiya kutirai, kUr vEl,
kUviLag kaNNi, koTum pUN, eziniyum;
10
Irn' taN cilampin iruL tUgku n'aLi muzai,
arun' tiRal kaTavuL kAkkum uyar cimai,
perug kal n'ATan pEkanum; tirun'tu mozi
mOci pATiya Ayum; Arvam uRRu
uLLi varun'ar ulaivu n'ani tIra,
15
taLLAtu Iyum takaicAl vaNmai,
koLLAr OTTiya, n'aLLiyum ena Agku
ezuvar mAyn'ta pinRai, 'azivarap
pATi varun'arum piRarum kUTi
iran'tOr aRRam tIrkku' ena, virain'tu, ivaN
20
uLLi van'tanen, yAnE; vicumpuRak
kazai vaLar cilampin vazaiyoTu n'ITi,
Acinik kaviniya palavin ArvuRRu,
muL puRa mutu kani peRRa kaTuvan
tuyt talai man'tiyaik kaiyiTUup payirum,
25
atirA yANar, mutirattuk kizava!
ivaN viLagku ciRappin, iyal tErk kumaNa!
icai mEn'tOnRiya vaNmaiyoTu,
pakai mEmpaTuka, n'I En'tiya vElE!

tiNai atu; tuRai vAzttiyal; paricil kaTA n'ilaiyum Am.
kumaNanaip perujcittiranAr pATiyatu.

159
'vAzum n'ALOTu yANTu pala uNmaiyin,
tIrtal cellAtu, en uyir' enap pala pulan'tu,
kOl kAlAkak kuRum pala otugki,
n'Ul virittanna katuppinaL, kaN tuyinRu,
5
munRil pOkA mutirvinaL yAyum;
pacan'ta mEniyoTu paTar aTa varun'ti,
marugkil koNTa pal kuRumAkkaL
picain'tu tina, vATiya mulaiyaL, peritu azin'tu,
kuppaik kIrai koykaN akaitta
10
muRRA iLan' taLir koytukoNTu, uppu inRu,
n'Ir ulaiAka ERRi, mOr inRu,
avizp patam maRan'tu, pAcaTaku micain'tu,
mAcoTu kuRain'ta uTukkaiyaL, aRam paziyA,
tuvvALAkiya en veyyOLum;
15
enRAgku, iruvar n'ejcamum uvappa kAnavar
kari punam mayakkiya akankaN kollai,
aivanam vitti, maiyuRak kavini,
InalcellA EnaRku izumenak
karuvi vAnam talaii yAgkum,
20
Itta n'in pukaz Etti, tokka en,
paci tinat tiragkiya, okkalum uvappa
uyarn'tu En'tu maruppin kolkaLiRu peRinum,
tavirn'tu viTu paricil koLLalen; uvan'tu, n'I
inpuRa viTutiAyin, ciRitu
25
kunRiyum koLval, kUr vEl kumaNa!
ataRpaTa aruLal vENTuval viRal pukaz
vacai il vizut tiNaip piRan'ta
icai mEn' tOnRal! n'iR pATiya yAnE.

tiNai atu; tuRai paricil kaTA n'ilai.
avanai avar pATiyatu.

160
'uru kezu jAyiRRu oN katir micain'ta
muLi pul kAnam kuzaippa, kallena
atir kural ERoTu tuLi corin'tAgku,
paci tinat tiragkiya kacivuTai yAkkai
5
aviz pukuvu aRiyAtuAkalin, vATiya
n'eRi koL varik kuTar kuLippat taNNena,
kuy koL kozun' tuvai n'eyyuTai aTicil,
mati cEr n'ALmIn pOla, n'avinRa
ciRu pon n'an kalam cuRRa irIi,
10
"kETu inRAka, pATun'ar kaTumpu" ena,
aritu peRu polag kalam eLitinin vIci,
n'aTTOr n'aTTa n'al icaik kumaNan,
maTTu Ar maRukin, mutirattOnE;
celkuvaiAyin, n'alkuvan, peritu' ena,
15
pal pukaz n'uvalun'ar kURa, val virain'tu,
uLLam turappa van'tanen; eLLuRRu,
il uNAt tuRattalin, il maRan'tu uRaiyum
pul uLaik kuTumip putalvan pal mAN
pAl il vaRu mulai cuvaittanan peRAan,
20
kUzum cORum kaTaii, Uzin
uL il vaRug kalam tiRan'tu, azak kaNTu,
maRap puli uraittum, matiyam kATTiyum,
n'on'tanaLAki, 'n'un'taiyai uLLi,
poTin'ta n'in cevvi kATTu' enap palavum
25
vinaval AnALAki, n'anavin
allal uzappOL mallal ciRappa,
cellAc celvam mikuttanai, vallE
viTutal vENTuval attai; paTu tirai
n'Ir cUz n'ilavarai uyara, n'in
30
cIr kezu vizup pukaz Ettukam palavE.

tiNaiyum tuRaiyum avai.
avanai avar pATiyatu.

164
ATu n'ani maRan'ta kOTu uyar aTuppin
Ampi pUppa, tEmpu paci uzavA,
pAal inmaiyin tOloTu tiragki,
illi tUrn'ta pollA vaRu mulai
5
cuvaittoRu azUum tan makattu mukam n'Okki,
n'IroTu n'iRain'ta Ir itaz mazaikkaN en
manaiyOL evvam n'Okki, n'inaii,
n'iR paTarn'ticinE n'al pOrk kumaNa!
en n'ilai aRin'tanaiAyin, in' n'ilait
10
toTuttum koLLAtu amaiyalen aTukkiya
paN amai n'arampin paccai n'al yAz,
maN amai muzavin, vayiriyar
inmai tIrkkum kuTip piRan'tOyE.

tiNai atu; tuRai paricil kaTAn'ilai.
tampiyAl n'ATu koLLappaTTuk kATu paRRiyirun'ta kumaNanaip perun'talaic cAttanAr pATiyatu.

169
n'um paTai cellumkAlai, avar paTai
eTuttu eRi tAnai munnarai enAa,
avar paTai varUumkAlai, n'um paTaik
kUzai tAgkiya, akal yARRuk
5
kunRu vilagku ciRaiyin n'inRanai enAa,
aritAl, peruma! n'in cevvi enRum;
peritAl attai, en kaTumpinatu iTumpai;
innE viTumati paricil! ven vEl
iLam pal kOcar viLagku paTai kanmAr,
10
ikalinar eRin'ta akal ilai murukkin
peru marak kampam pOla,
porun'arkku ulaiyA n'in valan vAziyavE!

tiNai atu; tuRai paricil kaTA n'ilai.
avanaik kAvirippUm paTTinattuk kArikkaNNanAr pATiyatu.

196
olluvatu ollum enRalum, yAvarkkum
ollAtu il ena maRuttalum, iraNTum,
ALvinai marugkin kENmaip pAlE;
ollAtu ollum enRalum, olluvatu
5
il ena maRuttalum, iraNTum, vallE
irappOr vATTal anRiyum, purappOr
pukaz kuRaipaTUum vAyil attai;
anaittu Akiyar, ini; ituvE enaittum
cEyttuk kANAtu kaNTanam; atanAl,
10
n'Oy ilarAka n'in putalvar; yAnum,
veyil ena muniyEn, pani ena maTiyEn,
kal kuyinRanna en n'alkUr vaLi maRai,
n'AN alatu illAk kaRpin vAL n'utal
mel iyal kuRu makaL uLLic
15
celval attai; ciRakka, n'in n'ALE!

tiNai pATAN tiNai; tuRai paricil kaTA n'ilai.
pANTiyan ilavan'tikaip paLLit tujciya n'anmARan paricil n'ITTittAnai AvUr mUlag kizAr pATiyatu.

197
vaLi n'aTan'tanna vAc celal ivuLiyoTu
koTi n'uTagku micaiya tErinar enAa,
kaTal kaNTanna oN paTait tAnaiyoTu
malai mARu malaikkum kaLiRRinar enAa,
5
urum uraRRanna uTkuvaru muracamoTu
ceru mEmpaTUum venRiyar enAa,
maN kezu tAnai, oN pUN, vEn'tar
veN kuTaic celvam viyattalO ilamE;
emmAl viyakkappaTUumOrE,
10
iTu muL paTappai maRi mEyn'tu ozin'ta
kuRu n'aRu mujjaik kozug kaN kuRRaTaku,
pun pula varakin conRiyoTu, peRUum,
cIRUr mannar Ayinum, em vayin
pATu aRin'tu ozukum paNpinArE;
15
mikap pEr evvam uRinum, enaittum
uNarcci illOr uTaimai uLLEm;
n'al aRivu uTaiyOr n'alkuravu
uLLutum, peruma! yAm, uvan'tu, n'ani peritE.

tiNaiyum tuRaiyum avai.
cOzan kurAppaLLit tujciya perun'tirumAvaLavan paricil n'ITTittAnaik kOnATTu eRiccilUr mATalan maturaik kumaranAr pATiyatu.

198
'aruvi tAzn'ta peru varai pOla
AramoTu polin'ta mArpil taNTA,
kaTavuL cAnRa kaRpin, cEyizai
maTavOL payan'ta maNi maruL av vAyk
5
kiNkiNip putalvar polika!' enRu Etti,
tiN tEr aNNal n'iR pArATTi,
kAtal perumaiyin kanavinum araRRum en
kAmar n'ejcam EmAn'tu uvappa,
Al amar kaTavuL anna n'in celvam,
10
vEl kezu kurucil! kaNTEn; Atalin,
viTuttanen; vAzka, n'in kaNNi! toTutta
taN tamiz varaippakam koNTi Aka,
panittuk kUTTu uNNum taNippu arug kaTun' tiRal
n'in Oranna n'in putalvar, enRum,
15
onnAr vATa arug kalam tan'tu, n'um
ponnuTai n'eTu n'akar n'iRaiya vaitta n'in
munnOr pOlka, ivar perug kaNNOTTam!
yANTum n'ALum peruki, INTu tiraip
perug kaTal n'Irinum, ak kaTal maNalinum,
20
n'INTu uyar vAnattu uRaiyinum, n'anRum,
ivar peRum putalvark kANtoRum, n'Iyum,
pukanRa celvamoTu pukaz initu viLagki,
n'ITu vAziya! n'eTun'takai! yAnum
kEL il cEey n'ATTin, en'n'ALum,
25
tuLi n'acaip puLLin n'in aLi n'acaikku iragki, n'in
aTi n'izal pazakiya aTiyuRai;
kaTumAn mARa! maRavAtImE.

tiNaiyum tuRaiyum avai.
pANTiyan ilavan'tikaip paLLit tujciya n'anmARanai vaTama vaNNakkan pEri cAttanAr pATiyatu.

199
kaTavuL Alattut taTavuc cinaip pal pazam
n'erun'al uNTanam ennAtu, pinnum
celavu AnAvE, kali koL puLLinam;
anaiyar vAziyO iravalar; avaraip
5
puravu etirkoLLum peruj cey ATavar
uTaimai Akum, avar uTaimai;
avar inmai Akum, avar inmaiyE.

tiNaiyum tuRaiyum avai.
perumpatumanAr pATTu.

209
poykai n'Arai pOrvil cEkkum
n'eytal am kazani, n'el ari tozuvar
kUmpu viTu meN piNi avizn'ta Ampal
akal aTai ariyal mAn'ti, teN kaTal
5
paTu tirai in cIrp pANi tUgkum
men pula vaippin n'al n'ATTup porun'a!
pal kani n'acaii, alku vicumpu ukan'tu,
peru malai viTarakam cilampa munni,
pazanuTaip peru maram tIrn'tena, kaiyaRRu,
10
peRAtu peyarum puLLinam pOla, n'in
n'acai tara van'tu, n'in icai n'uval paricilen
vaRuviyEn peyarkO? vAL mEmpaTun'a!
IyAy Ayinum, iragkuven allEn;
n'Oy ilai Akumati; peruma! n'ammuL
15
kuRu n'aNi kANkuvatAka n'ALum,
n'aRum pal olivarum katuppin, tE mozi,
teriizai makaLir pANi pArkkum
peru varai anna mArpin,
ceru vej cEey! n'in makiz irukkaiyE!

tiNai atu; tuRai paricil kaTA n'ilai.
mUvan paricil n'ITTittAnaip perun'talaic cAttanAr pATiyatu.

210
manpatai kAkkum n'in puraimai n'OkkAtu,
anpu kaN mARiya aRan il kATciyoTu,
n'ummanOrum maRRu inaiyar Ayin,
emmanOr ivaN piRavalar mAtO;
5
ceyir tIr koLkai em veg kAtali
uyir ciRitu uTaiyaL Ayin, emvayin
uLLAtu iruttalO aritE; atanAl,
'aRan il kURRam tiRan inRu tuNiyap
piRan Ayinankol? iRIiyar, en uyir!' ena
10
n'uvalvuRu ciRumaiyaL pala pulan'tu uRaiyum
iTukkaN manaiyOL tIriya, in' n'ilai
viTuttEn; vAziyar, kurucil! utuk kAN:
avala n'ejcamoTu celval n'iR kaRuttOr
arug kaTi munai araN pOlap
15
perug kaiyaRRa en pulampu mun'tuRuttE.

tiNaiyum tuRaiyum avai.
cEramAn kuTakkOc cEral irumpoRai paricil n'ITTittAnaip perug kunRUr kizAr pATiyatu.

211
ajcuvaru marapin vej cinap puyalERu
aNagkuTai aravin arun' talai tumiya,
n'inRu kANpanna n'IL malai miLira,
kunRu tUva eRiyum aravam pOla,
5
muracu ezun'tu iragkum tAnaiyoTu talaiccenRu,
araicu paTak kaTakkum uraicAl tOnRal! n'in
uLLi van'ta Ogku n'ilaip paricilen,
'vaLLiyai Atalin vaNagkuvan ivan' ena,
koLLA mAn'tar koTumai kURa, n'in
10
uLLiyatu muTittOy manRa; mun n'AL
kai uLLatu pOl kATTi, vazi n'AL
poyyoTu n'inRa puRan'ilai varuttam
n'ANAy Ayinum, n'ANak kURi, en
n'uNagku cen' n'A aNagka Etti,
15
pATap pATap pATupukaz koNTa n'in
ATu koL viyan mArpu tozutanen paziccic
celval attai, yAnE vaikalum,
valci inmaiyin vayinvayin mARi,
il eli maTin'ta tol cuvar varaippin,
20
pAal inmaiyin pal pATu cuvaittu,
mulaikkOL maRan'ta putalvanoTu,
manait tolain'tirun'ta en vALn'utal paTarn'tE.

tiNaiyum tuRaiyum avai.
avanai avar pATiyatu.

266
payam kezu mA mazai peyyAtu mARi,
kayam kaLi muLiyum kOTaiAyinum,
puzalkAl Ampal akal aTai n'Izal,
katirk kOTTu n'an'tin curi muka ERRai
5
n'Aku iLa vaLaiyoTu pakal maNam pukUum
n'Ir tikaz kazani n'ATu kezu peru viRal!
vAn tOy n'IL kuTai, vaya mAn cenni!
cAnROr irun'ta avaiyattu uRROn,
'Acu Aku' ennum pUcal pOla,
10
vallE kaLaimatiattai uLLiya
virun'tu kaNTu oLikkum tirun'tA vAzkkai,
poRip puNar uTampil tOnRi en
aRivu keTa n'inRa n'alkUrmaiyE!

tiNai pATAN tiNai; tuRai paricil kaTAn'ilai.
cOzan uruvap pal tEr iLaj cETcenniyaip perugkunRUr kizAr pATiyatu.