3

	uvavu mati uruvin Ogkal veN kuTai
	n'ilavuk kaTal varaippin maNNakam n'izaRRa,
	Ema muracam izumena muzagka,
	n'Emi uytta n'Ee n'ejcin,
5	tavirA Ikai, kavuriyar maruka!
	ceyir tIr kaRpin cEyizai kaNava!
	pon OTaip pukar aNi n'utal,
	tun arun' tiRal, kamaz kaTAattu,
	eyiRu paTaiyAka eyiR katavu iTAa,
10	kayiRu piNikkoNTa kaviz maNi marugkin,
	perug kai, yAnai irum piTart talai irun'tu,
	marun'tu il kURRattu arun' tozil cAyAk
	karug kai oL vAT perumpeyar vazuti!
	n'ilam peyarinum, n'in col peyaral;
15	polag kazaR kAl, pular cAn'tin
	vilagku akanRa viyal mArpa!
	Ur illa, uyavu ariya,
	n'Ir illa, n'IL iTaiya,
	pArval irukkai, kavi kaN n'Okkin,
20	cen' toTai pizaiyA vankaN ATavar
	ampu viTa, vIzn'tOr vampap patukkai,
	tirun'tu ciRai vaLai vAyp parun'tu irun'tu uyavum
	unna maratta tun arug kavalai,
	n'in n'acai vETkaiyin iravalar varuvar atu
25	munnam mukattin uNarn'tu, avar
	inmai tIrttal vanmaiyAnE.

5

	erumai anna karug kal iTai tORu,
	Anin parakkum yAnaiya, munpin,
	kAnaka n'ATanai! n'IyO, peruma!
	n'I Or Akalin, n'in onRu mozival:
5	aruLum anpum n'Ikki, n'IgkA
	n'irayam koLpavaroTu onRAtu, kAval,
	kuzavi koLpavarin, Ompumati!
	aLitO tAnE; atu peRal arug kuraittE.

6

	vaTAatu pani paTu n'eTu varai vaTakkum,
	tenAatu uru kezu kumariyin teRkum,
	kuNAatu karai poru toTu kaTaR kuNakkum,
	kuTAatu tonRu mutir pauvattin kuTakkum,
5	kIzatu mup puNar aTukkiya muRai mutaR kaTTin
	n'Ir n'ilai n'ivappin kIzum, mElatu
	Anilai ulakattAnum, AnAtu,
	uruvum pukazum Aki, viri cIrt
	teri kOl jaman pOla, oru tiRam
10	paRRal iliyarO! n'in tiRam ciRakka!
	cey vinaikku etirn'ta tevvar tEettu,
	kaTal paTai kuLippa maNTi, aTar pukarc
	ciRu kaN yAnai cevvitin Evi,
	pAcaval paTappai Ar eyil pala tan'tu,
15	av eyil koNTa ceyvuRu n'an kalam
	paricil mAkkaTku varicaiyin n'alki,
	paNiyiyar attai, n'in kuTaiyE munivar
	muk kaT celvar n'akar valam ceyaRkE!
	iRaijcuka, peruma! n'in cenni ciRan'ta
20	n'AnmaRai munivar En'tu kai etirE!
	vATuka, iRaiva! n'in kaNNi onnAr
	n'ATu cuTu kamaz pukai eRittalAnE!
	celiyar attai, n'in vekuLi vAl izai
	magkaiyar tunitta vAL mukattu etirE!
25	Agka, venRi ellAm venRu akattu aTakkiya
	taNTA Ikait takai mAN kuTumi!
	taN katir matiyam pOlavum, teRu cuTar
	oN katir jAyiRu pOlavum,
	manniya, peruma! n'I n'ilamicaiyAnE!

7

	kaLiRu kaTaiiya tAL,
	kazal urIiya tirun'tu aTi,
	kaNai porutu kavi vaN kaiyAl,
	kaN oLirvarUum kavin cApattu,
5	mA maRutta malar mArpin,
	tOl peyariya eRuz munpin,
	ellaiyum iravum eNNAy, pakaivar
	Ur cuTu viLakkattu azu viLik kampalaik
	koLLai mEvalai; Akalin, n'alla
10	illa AkupavAl iyal tEr vaLava!
	taN punal paran'ta pUcal maN maRuttu
	mInin ceRukkum yANarp
	payan tikaz vaippin piRar akan talai n'ATE.

9

	'Avum, An iyaR pArppana mAkkaLum,
	peNTirum, piNiyuTaiyIrum, pENit
	ten pula vAzn'arkku arug kaTan iRukkum
	pon pOl putalvarp peRAatIrum,
5	em ampu kaTi viTutum, n'um araN cErmin' ena,
	aRattu ARu n'uvalum pUTkai, maRattin
	kol kaLiRRu mImicaik koTi vicumpu n'izaRRum
	em kO, vAziya, kuTumi tam kOc
	cen' n'Irp pacum pon vayiriyarkku Itta,
10	mun'n'Ir vizavin, n'eTiyOn
	n'al n'Irp paHRuLi maNalinum palavE!

12

	pANar tAmarai malaiyavum, pulavar
	pU n'utal yAnaiyoTu punai tEr paNNavum,
	aRanO maRRu itu viRal mAN kuTumi!
	innA Akap piRar maN koNTu,
5	iniya ceyti, n'in Arvalar mukattE?

13

	'ivan yAr?' enkuvai Ayin, ivanE
	puli n'iRak kavacam pUm poRi citaiya,
	ey kaNai kizitta pakaTTu ezil mArpin,
	maRali anna kaLiRRu micaiyOnE;
5	kaLiRE, mun'n'Ir vazagku n'AvAy pOlavum,
	pal mIn n'AppaN tigkaL pOlavum,
	cuRavinattu anna vALOr moyppa,
	marIiyOr aRiyAtu, main'tu paTTanRE;
	n'Oy ilan Akip peyarkatil amma!
10	pazana majjai ukutta pIli
	kazani uzavar cUTToTu tokukkum,
	kozu mIn, viLain'ta kaLLin,
	vizu n'Ir vEli n'ATu kizavOnE.

14

	kaTug kaNNa kol kaLiRRAl
	kAppu uTaiya ezu murukki,
	pon iyal punai tOTTiyAl
	munpu turan'tu, camam tAgkavum;
5	pAr uTaitta kuNTu akazi
	n'Ir azuva n'ivappuk kuRittu,
	n'imir pariya mA tAgkavum;
	Avam cErn'ta puRattai tEr micaic
	cApa n'On jAN vaTuk koLa vazagkavum;
10	paricilarkku arug kalam n'alkavum; kuricil!
	valiya Akum, n'in tAL tOy taTak kai.
	pulavu n'ARRatta pain' taTi
	pU n'ARRatta pukai koLIi, Un tuvai
	kaRi cORu uNTu varun'tu tozil allatu,
15	piRitu tozil aRiyA Akalin, n'anRum
	melliya peruma! tAmE. n'allavarkku
	Ar aNagku Akiya mArpin, porun'arkku
	iru n'ilattu anna n'Onmai,
	ceru miku cEey! n'iR pATun'ar kaiyE.

15

	kaTun' tEr kuzitta jeLLal AgkaN,
	veL vAyk kazutaip pul inam pUTTi,
	pAz ceytanai, avar n'anan' talai n'al eyil;
	puLLinam imizum pukazcAl viLai vayal,
5	veL uLaik kali mAn kavi kuLampu ukaLat
	tEr vazagkinai, n'in tevvar tEettu;
	tuLagku iyalAn, paNai eruttin,
	pAvu aTiyAn, ceRal n'Okkin,
	oLiRu maruppin kaLiRu avara
10	kAppu uTaiya kayam paTiyinai;
	anna cIRRattu anaiyai; Akalin,
	viLagku pon eRin'ta n'alam kiLar palakaiyoTu
	n'izal paTu n'eTu vEl En'ti, onnAr
	oN paTaik kaTun' tAr munpu talaik koNmAr,
15	n'acai tara van'tOr n'acai piRakku oziya,
	vacai paTa vAzn'tOr palarkol? purai il
	n'al panuval, n'Al vEtattu,
	aruj cIrttip perug kaNNuRai
	n'eym mali Avuti pogka, pal mAN
20	vIyAc ciRappin vELvi muRRi,
	yUpam n'aTTa viyan kaLam palakol?
	yA palakollO? peruma! vAr uRRu
	vici piNikkoNTa maN kanai muzavin
	pATini pATum vajcikku
25	n'ATal cAnRa main'tinOy! n'inakkE.

16

	vinai mATciya virai puraviyoTu,
	mazai uruvina tOl parappi,
	munai murugkat talaic cenRu, avar
	viLai vayal kavarpUTTi,
5	manai maram viRaku Akak
	kaTi tuRai n'Irk kaLiRu paTIi,
	ellup paTa iTTa cuTu tI viLakkam
	cel cuTar jAyiRRuc cekkarin tOnRa,
	pulam keTa iRukkum varampu il tAnai,
10	tuNai vENTAc ceru venRi,
	pulavu vAL, pular cAn'tin,
	murukaR cIRRattu, uru kezu kurucil!
	mayagku vaLLai, malar Ampal,
	panip pakanRai, kanip pAkal,
15	karumpu allatu kATu aRiyAp
	perun' taN paNai pAz Aka,
	Ema n'al n'ATu oL eri UTTinai,
	n'Ama n'al amar ceyya,
	OrAgku malain'tana, peruma! n'in kaLiRE.

17

	ten kumari, vaTa perugkal,
	kuNa kuTa kaTalA ellai,
	kunRu, malai, kATu, n'ATu,
	onRu paTTu vazimoziya,
5	koTitu kaTin'tu, kOl tirutti,
	paTuvatu uNTu, pakal ARRi,
	initu uruNTa cuTar n'Emi
	muzutu ANTOr vazi kAvala!
	kulai iRaijciya kOL tAzai
10	akal vayal, malai vEli,
	n'ilavu maNal viyan kAnal,
	teN kazimicait tIp pUvin,
	taN toNTiyOr aTu porun'a!
	mAp payampin poRai pORRAtu,
15	n'ITu kuzi akappaTTa
	pITu uTaiya eRuz munpin,
	kOTu muRRiya kol kaLiRu
	n'ilai kalagkak kuzi konRu,
	kiLai pukalat talaikkUTiyAgku
20	n'I paTTa aru munpin
	perun' taLarcci, palar uvappa,
	piRitu cenRu, malar tAyattup
	palar n'AppaN mIkkURalin,
	'uNTAkiya uyar maNNum,
25	cenRu paTTa vizuk kalanum,
	peRal kUTum, ivan n'ejcu uRap peRin' enavum,
	'En'tu koTi iRaippuricai,
	vIgku ciRai, viyal aruppam,
	izan'tu vaikutum, ini n'Am ivan
30	uTanRu n'Okkinan, peritu' enavum,
	vERRu aracu paNi toTagku n'in
	ARRaloTu pukaz Etti,
	kANku van'ticin, peruma! INTiya
	mazai ena maruLum pal tOl, malai enat
35	tEn iRai koLLum irum pal yAnai,
	uTalun'ar uTka vIgki, kaTal ena
	vAn n'Irkku Ukkum tAnai, AnAtu
	kaTu oTugku eyiRRa aravut talai panippa,
	iTi ena muzagkum muracin,
40	varaiyA Ikaik kuTavar kOvE!

19

	imiz kaTal vaLaiiya INTu akan kiTakkai,
	tamiz talaimayagkiya talaiyAlagkAnattu,
	man uyirp panmaiyum, kURRattu orumaiyum,
	n'innoTu tUkkiya ven vEl ceziya!
5	'irum puli vETTuvan poRi aRin'tu mATTiya
	perug kal aTArum pOnm' ena virumpi,
	muyagkinEn allanO, yAnE mayagkik
	kunRattu iRutta kurIi inam pOla,
	ampu cenRu iRutta arum puN yAnait
10	tUmpuTait taTak kai vAyoTu tumin'tu,
	n'Ajcil oppa, n'ilam micaip puraLa,
	eRin'tu kaLam paTutta En'tu vAL valattar
	en'taiyoTu kiTan'tOr, em pun talaip putalvar;
	'inna viRalum uLakol, n'amakku?' ena,
15	mUtil peNTir kacin'tu aza, n'ANi,
	kURRuk kaNNOTiya veruvaru paRan'talai,
	ezuvar n'al valam kaTan'tOy! n'in
	kazUu viLagku Aram kavaiiya mArpE?

22

	tUgku kaiyAn Ogku n'aTaiya,
	uRaz maNiyAn uyar maruppina,
	piRai n'utalAn ceRal n'Okkina,
	pA aTiyAn paNai eruttina,
5	tEn citain'ta varai pOla,
	mijiRu Arkkum kamaz kaTAttu,
	ayaRu cOrum iruj cenniya,
	main'tu malin'ta maza kaLiRu
	kan'tu cErpu n'ilaii vazagka;
10	pAal n'inRu katir cOrum
	vAn uRaiyum mati pOlum
	mAlai veN kuTai n'IzalAn,
	vAL marugku ilOr kAppu uRagka;
	alagku cen'n'el katir vEyn'ta
15	Ay karumpin koTik kUrai,
	cARu koNTa kaLam pOla,
	vERu vERu polivu tOnRa;
	kuRRu AnA ulakkaiyAn
	kalic cummai viyal AgkaN,
20	polan' tOTTup pain' tumpai
	micai alagku uLaiya panaip pOz cerIi,
	cina mAn'tar veRik kuravai
	Ota n'Irin peyarpu pogka;
	vAy kAvAtu paran'tu paTTa
25	viyan pAcaRaik kAppALa!
	vEn'tu tan'ta paNi tiRaiyAn
	cErn'tavartam kaTumpu Arttum,
	Ogku kolliyOr, aTu porun'a!
	vEza n'Okkin viRal vej cEey!
30	vAziya, peruma! n'in varampu il paTaippE,
	n'iR pATiya vayagku cen' n'Ap
	pin piRar icai n'uvalAmai,
	OmpAtu Iyum ARRal em kO!
	'mAn'tarajcEral irumpoRai Ompiya n'ATE
35	puttEL ulakattu aRRu' enak kETTu van'tu,
	initu kaNTicin; peruma! munivu ilai,
	vERu pulattu iRukkum tAnaiyoTu,
	cORu paTa n'aTatti n'I tujcAymARE!

23

	'veLiRu il n'On kAzp paNai n'ilai munaii,
	kaLiRu paTin'tu uNTena, kalagkiya tuRaiyum;
	kAr n'aRug kaTampin pAcilait teriyal,
	cUr n'avai, murukan cuRRattu anna, n'in
5	kUr n'al ampin koTu vil kULiyar
	koLvatu koNTu, koLLA miccil
	koL patam oziya vIciya pulanum;
	vaTi n'avil n'aviyam pAytalin, UrtoRum
	kaTi maram tuLagkiya kAvum; n'eTu n'akar
10	vinai punai n'al il vev eri n'aippa,
	kanai eri uraRiya marugkum; n'Okki,
	n'aNNAr n'ANa, n'ALtoRum talaic cenRu,
	innum inna pala ceykuvan, yAvarum
	tunnal pOkiya tuNivinOn' ena,
15	jAlam n'eLiya INTiya viyan paTai
	AlagkAnattu amar kaTan'tu aTTa
	kAla munpa! n'in kaNTanen varuval
	aRu maruppu ezil kalai pulippAl paTTena,
	ciRu maRi tazIiya teRin'aTai maTap piNai
20	pULai n'ITiya veruvaru paRan'talai
	vELai veN pUk kaRikkum
	AL il attam Akiya kATE.

24

	n'el ariyum irun' tozuvar
	cej jAyiRRu veyil munaiyin,
	teN kaTal tirai micaip pAyun'tu;
	tiN timil van paratavar
5	veppu uTaiya maTTu uNTu,
	taN kuravaic cIr tUgkun'tu;
	tUval kalitta tEm pAy punnai
	mel iNark kaNNi milain'ta main'tar
	el vaLai makaLirt talaik kai tarUun'tu;
10	vaNTu paTa malarn'ta taN n'aRug kAnal
	muNTakak kOtai oN toTi makaLir
	irum panaiyin kurumpai n'Irum,
	pUg karumpin tIm cARum,
	Ogku maNal kuvavut tAzait
15	tIm n'IroTu uTan virAay,
	mun' n'Ir uNTu mun'n'Irp pAyum;
	tAgkA uRaiyuL n'al Ur kezIiya
	OmpA Ikai mA vEL evvi
	punal am putavin mizalaiyoTu kazanik
20	kayal Ar n'Arai pOrvil cEkkum,
	pon aNi yAnait tol mutir vELir,
	kuppai n'ellin, muttURu tan'ta
	koRRa n'IL kuTai, koTit tErc ceziya!
	n'inRu n'ilaiiyar n'in n'ALmIn; n'illAtu
25	paTAac celIiyar, n'in pakaivar mInE
	n'innoTu, tonRu mUtta uyirinum, uyiroTu
	n'inRu mUtta yAkkai anna, n'in
	ATu kuTi mUtta vizut tiNaic ciRan'ta
	vALin vAzn'ar tAL valam vAztta,
30	iraval mAkkaL Ikai n'uvala,
	oN toTi makaLir polagkalattu En'tiya
	taN kamaz tERal maTuppa, makiz ciRan'tu,
	Agku initu ozukumati, peruma! 'Agku atu
	vallun'ar vAzn'tOr' enpa tol icai,
35	malar talai ulakattut tOnRi,
	palar, celac cellAtu, n'inRu viLin'tOrE.

26

	n'aLi kaTal irug kuTTattu
	vaLi puTaitta kalam pOla,
	kaLiRu cenRu kaLan akaRRavum,
	kaLan akaRRiya viyal AgkaN
5	oLiRu ilaiya eHku En'ti,
	araicu paTa amar uzakki,
	urai cela muracu vauvi,
	muTit talai aTuppu Aka,
	punal kuruti ulaik koLIi,
10	toTit tOL tuTuppin tuzan'ta valciyin,
	aTukaLam vETTa aTu pOrc ceziya!
	AnRa kELvi, aTagkiya koLkai,
	n'An maRai mutalvar cuRRam Aka,
	mannar Eval ceyya, manniya
15	vELvi muRRiya vAy vAL vEn'tE!
	n'ORROr manRa n'in pakaivar, n'innoTu
	mARRAr ennum peyar peRRu,
	ARRAr Ayinum, ANTu vAzvOrE.

30

	cej jAyiRRuc celavum,
	aj jAyiRRup parippum,
	parippuc cUzn'ta maNTilamum,
	vaLi tiritaru ticaiyum,
5	vaRitu n'ilaiiya kAyamum, enRu ivai
	cenRu aLan'tu aRin'tOr pOla, enRum
	inaittu enpOrum uLarE; anaittum
	aRi aRivu AkAc ceRivinai Aki,
	kaLiRu kavuL aTutta eRikal pOla
10	oLitta tuppinaiAtalin, veLippaTa
	yAgganam pATuvar, pulavar? kUmpoTu
	mIp pAy kaLaiyAtu micaip param tONTAtu
	pukAarp pukun'ta perug kalam takAar
	iTaip pulap peru vazic coriyum
15	kaTal pal tAratta n'ATu kizavOyE!

31

	ciRappuTai marapin poruLum inpamum
	aRattu vazippaTUum tORRam pOla,
	iru kuTai pinpaTa Ogkiya oru kuTai,
	uru kezu matiyin, n'ivan'tu, cEN viLagka,
5	n'al icai vETTam vENTi, vel pOrp
	pAcaRai allatu n'I ollAyE;
	n'utimukam mazugka maNTi, onnAr
	kaTi matil pAyum n'in kaLiRu aTagkalavE;
	'pOr' enin, pukalum punai kazal maRavar,
10	'kATu iTaik kiTan'ta n'ATu n'ani cEeya;
	celvEm allEm' ennAr; 'kallen
	vizavuTai AgkaN vERRup pulattu iRuttu,
	kuNa kaTal pinnatu Aka, kuTa kaTal
	veN talaip puNari n'in mAn kuLampu alaippa,
15	vala muRai varutalum uNTu' enRu alaman'tu,
	n'ejcu n'aTugku avalam pAya,
	tujcAk kaNNa, vaTa pulattu aracE.

35

	n'aLi iru mun'n'Ir ENi Aka,
	vaLi iTai vazagkA vAnam cUTiya
	maN tiNi kiTakkait taN tamizk kizavar,
	muracu muzagku tAnai mUvaruLLum,
5	aracu enappaTuvatu n'inatE, peruma!
	alagkukatirk kanali n'Alvayin tOnRinum,
	ilagkukatir veLLi ten pulam paTarinum,
	am taN kAviri van'tu kavarpu UTTa,
	tOTu koL vElin tORRam pOla,
10	ATu kaN karumpin veN pU n'uTagkum
	n'ATu enappaTuvatu n'inatE attai; Agka
	n'ATu kezu celvattup pITu kezu vEn'tE!
	n'inava kURuval; enava kENmati!
	aRam purin'tanna cegkOl n'ATTattu
15	muRai vENTu pozutil patan eLiyOr INTu
	uRai vENTu pozutil peyal peRROrE;
	jAyiRu cuman'ta kOTu tiraL koNmU
	mAka vicumpin n'aTuvu n'inRAgku,
	kaN pora viLagku n'in viN poru viyankuTai
20	veyil maRaik koNTanRO? anRE; varun'tiya
	kuTi maRaippatuvE; kUrvEl vaLava!
	veLiRRup panan' tuNiyin vIRRuvIRRuk kiTappa,
	kaLiRRuk kaNam poruta kaN akan paRan'talai,
	varupaTai tAgki, peyar puRattu Arttu,
25	porupaTai tarUum koRRamum uzupaTai
	UnRu cAl marugkin InRatan payanE;
	mAri poyppinum, vAri kunRinum,
	iyaRkai allana ceyaRkaiyil tOnRinum,
	kAvalarp pazikkum, ik kaN akal jAlam;
30	atu n'aRku aRin'tanaiAyin, n'Iyum
	n'otumalALar potumozi koLLAtu,
	pakaTu puRan'tarun'ar pAram Ompi,
	kuTi puRan'tarukuvai Ayin, n'in
	aTi puRan'tarukuvar, aTagkAtOrE.

37

	n'ajcuTai vAl eyiRRu, ain' talai cuman'ta,
	vEka ven' tiRal, n'Akam pukkena,
	vicumpu tIp piRappat tiruki, pacug koTip
	peru malai viTarakattu urum eRin'tAgku,
5	puL uRu punkaN tIrtta, veL vEl,
	cinam kezu tAnai, cempiyan maruka!
	karAam kalitta kuNTu kaN akazi,
	iTam karug kuTTattu uTan tokku OTi,
	yAmam koLpavar cuTar n'izal katUum
10	kaTu muraN mutalaiya n'eTu n'Ir ilajci,
	cempu uRaz puricai, cemmal mUtUr,
	vampu aNi yAnai vEn'tu akattu uNmaiyin,
	'n'alla' ennAtu, citaittal
	vallaiyAl, n'eTun'takai! ceruvattAnE.

38

	varai puraiyum maza kaLiRRin micai,
	vAn tuTaikkum vakaiya pOla,
	viravu uruvina koTi n'uTagkum
	viyan tAnai viRal vEn'tE!
5	n'I, uTanRu n'OkkumvAy eri tavaza,
	n'I, n'ayan'tu n'OkkumvAy pon pUppa,
	cej jAyiRRu n'ilavu vENTinum,
	veN tigkaLuL veyil vENTinum,
	vENTiyatu viLaikkum ARRalaiAkalin,
10	n'in n'izal piRan'tu, n'in n'izal vaLarn'ta,
	em aLavu evanO maRRE? 'in n'ilaip
	polam pUg kAvin n'al n'ATTOrum
	cey vinai marugkin eytal allatai,
	uTaiyOr Italum illOr irattalum
15	kaTavatu anmaiyin, kaiyaRavu uTaittu' ena,
	ANTuc cey n'ukarcci INTum kUTalin,
	n'in n'ATu uLLuvar, paricilar
	onnAr tEettum, n'innuTaittu enavE.

39

	puRavin allal colliya, kaRai aTi
	yAnai vAl maruppu eRin'ta veN kaTaik
	kOl n'iRai tulAam pukkOn maruka!
	Ital n'in pukazum anRE; cArtal
5	onnAr uTkum tun arug kaTun' tiRal
	tUgku eyil eRin'ta n'in UgkaNOr n'inaippin,
	aTutal n'in pukazum anRE; keTu inRu,
	maRam kezu cOzar uRan'tai avaiyattu,
	aRam n'inRu n'ilaiyiRRu Akalin, atanAl
10	muRaimai n'in pukazum anRE; maRam mikku
	ezu camam kaTan'ta ezu uRaz tiNi tOL,
	kaN Ar kaNNi, kali mAn, vaLava!
	yAgkanam mozikO yAnE Ogkiya
	varai aLan'tu aRiyAp pon paTu n'eTug kOTTu
15	imayam cUTTiya Ema viRpoRi,
	mAN vinai n'eTun' tEr, vAnavan tolaiya,
	vATA vajci vATTum n'in
	pITu kezu n'On tAL pATugkAlE?

40

	n'IyE, piRar OmpuRu maRa man eyil
	OmpAtu kaTan'tu aTTu, avar
	muTi punain'ta pacum pon n'in
	aTi poliyak kazal taiiya
5	vallALanai; vaya vEn'tE!
	yAmE, n'in, ikaz pATuvOr eruttu aTagka,
	pukaz pATuvOr polivu tOnRa,
	inRu kaNTAgkuk kANkuvam enRum
	incol eN patattai Akumati peruma!
10	oru piTi paTiyum cIRiTam
	ezu kaLiRu purakkum n'ATu kizavOyE!

41

	kAlanum kAlam pArkkum; pArAtu,
	vEl INTu tAnai vizumiyOr tolaiya,
	vENTu iTattu aTUum vel pOr vEn'tE!
	ticai iru n'Ankum uRkam uRkavum,
5	peru marattu, ilai il n'eTug kOTu vaRRal paRRavum,
	veg katirk kanali tuRRavum, piRavum,
	ajcuvarat takun'a puLLuk kural iyampavum,
	eyiRu n'ilattu vIzavum, eNNey ATavum,
	kaLiRu mEl koLLavum, kAzakam n'Ippavum,
10	veLLi n'On paTai kaTTiloTu kavizavum,
	kanavin ariyana kANA, n'anavil
	ceruc cey munpa! n'in varu tiRan n'Okki,
	maiyal koNTa Emam il irukkaiyar,
	putalvar pUg kaN mutti, manaiyOTku
15	evvam karakkum paital mAkkaLoTu
	perug kalakkuRRanRAl tAnE kARROTu
	eri n'ikazn'tanna celavin
	ceru miku vaLava! n'in cinaiiyOr n'ATE.

42

	AnA Ikai, aTu pOr, aNNal! n'in
	yAnaiyum malaiyin tOnRum; peruma! n'in
	tAnaiyum kaTal ena muzagkum; kUr n'unai
	vElum minnin viLagkum; ulakattu
5	araicu talai panikkum ARRalaiAtalin,
	purai tIrn'tanRu; atu putuvatO anRE;
	taN punal pUcal allatu, n'on'tu,
	'kaLaika, vAzi, vaLava!' enRu, n'in
	munaitaru pUcal kanavinum aRiyAtu,
10	puli puRagkAkkum kuruLai pOla,
	melivu il cegkOl n'I puRagkAppa,
	peru viRal yANarttu Aki, arin'ar
	kIz maTaik koNTa vALaiyum, uzavar
	paTai miLirn'tiTTa yAmaiyum, aRain'ar
15	karumpil koNTa tEnum, perun' tuRai
	n'Ir taru makaLir kuRRa kuvaLaiyum,
	van pulak kELirkku varu virun'tu ayarum
	men pula vaippin n'al n'ATTup porun'a!
	malaiyin izin'tu, mAk kaTal n'Okki,
20	n'ila varai izitarum pal yARu pOla,
	pulavar ellAm n'in n'OkkinarE;
	n'IyE, marun'tu il kaNicci varun'ta vaTTittuk
	kURRu vekuNTanna munpoTu,
	mARRu iru vEn'tar maN n'OkkinaiyE.

44

	irum piTit tozutiyoTu perug kayam paTiyA,
	n'elluTaik kavaLamoTu n'eym miti peRAa,
	tirun'tu arai n'On veLil varun'ta oRRi,
	n'ilamicaip puraLum kaiya, veytu uyirttu,
5	alamaral yAnai urum ena muzagkavum,
	pAl il kuzavi alaRavum, makaLir
	pU il vaRun' talai muTippavum, n'Ir il
	vinai punai n'al il inaikUuk kETpavum,
	innAtu amma, Igku initu iruttal;
10	tun arun' tuppin vaya mAn tOnRal!
	aRavai Ayin,' n'inatu' enat tiRattal;
	maRavai Ayin, pOroTu tiRattal;
	aRavaiyum maRavaiyum allaiyAka,
	tiRavAtu aTaitta tiN n'ilaik katavin
15	n'IL matil oru ciRai oTugkutal
	n'ANuttakavu uTaittu, itu kANugkAlE.

46

	n'IyE, puRavin allal anRiyum, piRavum
	iTukkaN palavum viTuttOn marukanai,
	ivarE, pulan uzutu uNmAr punkaN ajci,
	tamatu pakuttu uNNum taN n'izal vAzn'ar;
5	kaLiRu kaNTu azUum azAal maRan'ta
	pun talaic ciRAar; manRu maruNTu n'Okki,
	virun'tin punkaN n'OvuTaiyar;
	kETTanaiAyin, n'I vETTatu ceymmE!

53

	mutir vAr ippi mutta vAr maNal,
	katir viTu maNiyin kaN poru mATattu,
	ilagku vaLai makaLir teRRi ATum
	viLagku cIr viLagkil vizumam konRa
5	kaLam koL yAnai, kaTu mAn, poRaiya!
	virippin akalum; tokuppin ejcum;
	mammar n'ejcattu emmanOrkku orutalai
	kaimmuRRala, n'in pukazE, enRum;
	oLiyOr piRan'ta im malar talai ulakattu
10	vAzEm enRalum aritE 'tAzAtu
	ceRutta ceyyuL cey cen' n'Avin,
	veRutta kELvi, viLagku pukazk kapilan
	inRu uLan Ayin, n'anRuman' enRa n'in
	ATu koL varicaikku oppa,
15	pATuval mannAl, pakaivaraik kaTappE.

55

	Ogku malaip peru vil pAmpu jAN koLIi,
	oru kaNai koNTu mUeyil uTaRRi,
	peru viRal amararkku venRi tan'ta
	kaRai miTaRRu aNNal kAmar cennip
5	piRai n'utal viLagkum oru kaN pOla,
	vEn'tu mEmpaTTa pUn' tAr mARa!
	kaTuj cinatta kol kaLiRum; kataz pariya kali mAvum,
	n'eTug koTiya n'imir tErum, n'ejcu uTaiya pukal maRavarum, ena
	n'AnkuTan mANTatuAyinum, mANTa
10	aRa n'eRi mutaRRE, aracin koRRam;
	atanAl, 'n'amar' enak kOl kOTAtu,
	'piRar' enak kuNam kollAtu,
	jAyiRRu anna ven' tiRal ANmaiyum,
	tigkaL anna taN peruj cAyalum,
15	vAnattu anna vaNmaiyum, mUnRum,
	uTaiyai Aki, illOr kaiyaRa,
	n'I n'ITu vAziya n'eTun'takai! tAz n'Ir
	veN talaip puNari alaikkum cen'til
	n'eTu vEL n'ilaiiya kAmar viyan tuRai,
20	kaTu vaLi tokuppa INTiya
	vaTu Az ekkar maNalinum palavE!

57

	vallAr Ayinum, vallun'ar Ayinum,
	pukaztal uRROrkku mAyOn anna,
	uraicAl ciRappin pukazcAl mARa!
	n'in onRu kURuvatu uTaiyEn: en enin,
5	n'IyE, piRar n'ATu koLLumkAlai, avar n'ATTu
	iRagku katirk kazani n'in iLaiyarum kavarka;
	n'anan' talaip pEr Ur eriyum n'aikka;
	minnu n'imirn'tanna n'in oLiRu ilagku n'eTu vEl
	onnArc cekuppinum cekukka; ennatUum
10	kaTimaram taTital Ompu n'in
	n'eTu n'al yAnaikkuk kan'tu ARRAvE.

63

	enaip pal yAnaiyum ampoTu tuLagki,
	viLaikkum vinai inRip paTai ozin'tanavE;
	viRal pukaz mANTa puravi ellAm
	maRat takai main'taroTu ANTup paTTanavE;
5	tEr tara van'ta cAnROr ellAm,
	tOl kaN maRaippa, orugku mAyn'tanarE;
	vicittu vinai mANTa mayirk kaN muracam,
	poRukkun'ar inmaiyin, irun'tu viLin'tanavE;
	cAn'tu amai mArpil n'eTu vEl pAyn'tena,
10	vEn'tarum porutu, kaLattu ozin'tanar; iniyE,
	en AvatukoltAnE kazani
	Ampal vaLLit toTik kai makaLir
	pAcaval mukki, taN punal pAyum,
	yANar aRAa vaippin
15	kAmar kiTakkai avar akan talai n'ATE?

64

	n'al yAz, AkuLi, patalaiyoTu curukki,
	cellAmOtil cil vaLai viRali!
	kaLiRRuk kaNam poruta kaN akan paRan'talai,
	vicumpu ATu eruvai pacun' taTi taTuppa,
5	pakaip pulam marIiya takaip peruj ciRappin
	kuTumik kOmAR kaNTu,
	n'eTu n'Irp puRkai n'Ittanam varaRkE?

66

	n'aLi iru mun'n'Ir n'AvAy OTTi,
	vaLi tozil ANTa uravOn maruka!
	kaLi iyal yAnaik karikAlvaLava!
	cenRu, amark kaTan'ta n'in ARRal tOnRa
5	venROy! n'inninum n'allan anRE
	kali koL yANar veNNip paRan'talai,
	mikap pukaz ulakam eyti,
	puRap puN n'ANi, vaTakkirun'tOnE?

68

	uTumpu urittanna enpu ezu marugkin
	kaTumpin kaTum paci kaLaiyun'ark kANAtu,
	cil cevittu Akiya kELvi n'on'tu n'on'tu,
	Igku evan ceytiyO? pANa! 'pUN cuman'tu,
5	am pakaTTu eziliya cem poRi Akattu
	menmaiyin makaLirkku vaNagki, vanmaiyin
	ATavarp piNikkum pITu kezu n'eTun' takai,
	puniRu tIr kuzavikku iliRRu mulai pOlac
	curan'ta kAviri maram kol mali n'Ir
10	manpatai purakkum n'al n'ATTup porun'an,
	uTpakai oru tiRam paTTena, puT pakaikku
	EvAn Akalin, cAvEm yAm' ena,
	n'IgkA maRavar vIgku tOL puTaippa,
	taNi paRai aRaiyum aNi koL tEr vazi,
15	kaTug kaL parukun'ar n'aTugku kai ukutta
	n'aRuj cERu ATiya vaRun' talai yAnai
	n'eTu n'akar varaippil paTu muzA Orkkum
	uRan'taiyOnE kurucil;
	piRan kaTai maRappa, n'alkuvan, celinE.

69

	kaiyatu, kaTan n'iRai yAzE; meyyatu,
	puravalar inmaiyin paciyE; araiyatu,
	vERRu izai n'uzain'ta vEr n'anai citAar
	Ompi uTutta uyaval pANa!
5	pUTkai illOn yAkkai pOlap
	perum pullenRa irum pEr okkalai;
	vaiyakam muzutuTan vaLaii, paiyena
	ennai vinavuti Ayin, mannar
	aTu kaLiRu uyavum koTi koL pAcaRai,
10	kurutip parappin kOTTu mA tolaicci,
	pulAk kaLam ceyta kalAat tAnaiyan
	piRagku n'ilai mATattu uRan'taiyOnE;
	porun'arkku Okkiya vElan, oru n'ilaip
	pakaip pulam paTartalum uriyan; takait tAr
15	oL eri puraiyum uru kezu pacum pUN
	kiLLi vaLavaR paTarkuvai Ayin,
	n'eTug kaTai n'iRRalum ilaiyE; kaTum pakal
	tEr vIcu irukkai Ara n'Okki,
	n'I avaR kaNTa pinRai, pUvin
20	ATu vaNTu imirAt tAmarai
	cUTAyAtal ataninum ilaiyE.

72

	'n'akutakkanarE, n'ATu mIkkURun'ar;
	iLaiyan ivan' ena uLaiyak kURi,
	'paTu maNi iraTTum pA aTip paNait tAL
	n'eTu n'al yAnaiyum, tErum, mAvum,
5	paTai amai maRavarum, uTaiyam yAm' enRu
	uRu tuppu ajcAtu, uTal cinam cerukki,
	ciRu col colliya cinam kezu vEn'tarai
	aruj camam citaiyat tAkki, muracamoTu
	orugku akappaTEen Ayin porun'tiya
10	en n'izal vAzn'ar cel n'izal kANAtu,
	'koTiyan em iRai' enak kaNNIr parappi,
	kuTi pazi tURRum kOlEn Akuka;
	Ogkiya ciRappin uyarn'ta kELvi
	mAgkuTi marutan talaivan Aka,
15	ulakamoTu n'ilaiiya palar pukaz ciRappin
	pulavar pATAtu varaika, en n'ilavarai;
	purappOr punkaN kUra,
	irappOrkku IyA inmai yAn uRavE.

73

	mella van'tu, en n'al aTi porun'ti,
	'I' ena irakkuvar Ayin, cIruTai
	muracu kezu tAyattu aracO tajcam;
	in uyir Ayinum koTukkuven, in' n'ilattu;
5	ARRal uTaiyOr ARRal pORRAtu, en
	uLLam eLLiya maTavOn, teLLitin
	tujcu puli iTaRiya citaTan pOla,
	uyn'tanan peyartalO aritE; main'tuTaik
	kazai tin yAnaik kAl akappaTTa
10	van tiNi n'IL muLai pOla, cenRu, avaN
	varun'tap porEen Ayin, porun'tiya
	tItu il n'ejcattuk kAtal koLLAp
	pal irug kUn'tal makaLir
	ollA muyakkiTaik kuzaika, en tArE!

79

	mUtUr vAyil panik kayam maNNi,
	manRa vEmpin oN kuzai malain'tu,
	teN kiNai munnark kaLiRRin iyali,
	vem pOrc ceziyanum van'tanan; etirn'ta
5	vampa maLLarO palarE;
	ejcuvar kollO, pakal tavac ciRitE?

80

	in kaTug kaLLin AmUr AgkaN,
	main'tuTai mallan mata vali murukki,
	oru kAl mArpu otugkinRE; oru kAl
	varu tAr tAgkip pin otugkinRE
5	n'alkinum n'alkAn Ayinum, vel pOrp
	poral arun' tittan kANkatil amma
	pacittup paNai muyalum yAnai pOla,
	iru talai ociya eRRi,
	kaLam puku mallaR kaTan'tu aTu n'ilaiyE.

81

	Arppu ezu kaTalinum peritu; avan kaLiRE
	kArp peyal urumin muzagkal AnAvE;
	yArkol aLiyartAmE Ar n'Arc
	ceRiyat toTutta kaNNik
5	kavi kai maLLan kaippaTTOrE?

93

	tiN piNi muracam izumena muzagkac
	cenRu, amar kaTattal yAvatu? van'tOr
	tAr tAgkutalum ARRAr, veTipaTTu,
	OTal marIiya pITu il mannar
5	n'OyppAl viLin'ta yAkkai tazIi,
	kAtal maRan'tu, avar tItu marugku aRumAr,
	aRam puri koLkai n'AnmaRai mutalvar
	tiRam puri pacum pul parappinar kiTappi,
	'maRam kan'tAka n'al amar vIzn'ta
10	n'IL kazal maRavar celvuzic celka!' ena
	vAL pOzn'tu aTakkalum uyn'tanar mAtO
	vari jimiRu Arkkum vAy puku kaTAattu
	aNNal yAnai aTu kaLattu oziya,
	aruj camam tataiya n'URi, n'I,
15	perun' takai! vizup puN paTTa mARE.

94

	Urk kuRumAkkaL veN kOTu kazAalin,
	n'Irt tuRai paTiyum perug kaLiRu pOla
	iniyai, peruma! emakkE; maRRu atan
	tun arug kaTAam pOla
5	innAy, peruma! n'in onnAtOrkkE.

96

	alar pUn' tumpai am pakaTTu mArpin,
	tiraNTu n'ITu taTakkai, ennai iLaiyORku
	iraNTu ezun'tanavAl, pakaiyE: onRE,
	pUp pOl uNkaN pacan'tu, tOL n'uNuki,
5	n'Okkiya makaLirp piNittanRu; onRE,
	'vizavinRuAyinum, paTu patam pizaiyAtu,
	mai Un mocitta okkaloTu, tuRai n'Irk
	kaimAn koLLumO?' ena,
	uRaiyuL muniyum, avan cellum UrE.

97

	pOrkku uraiip pukanRu kazitta vAL,
	uTanRavar kAppuTai matil azittalin,
	Un uRa mUzki, uru izan'tanavE;
	vElE, kuRumpu aTain'ta araN kaTan'tu, avar
5	n'aRug kaLLin n'ATu n'aittalin,
	curai tazIiya irug kAzoTu
	maTai kalagki n'ilai tirin'tanavE;
	kaLiRE, ezUut tAgkiya katavam malaittu, avar
	kuzUuk kaLiRRuk kuRumpu uTaittalin,
10	parUup piNiya toTi kazin'tanavE;
	mAvE, paran'tu orugku malain'ta maRavar
	polam pain' tAr keTap paritalin,
	kaLan uzan'tu acaiiya maRuk kuLampinavE;
	avan tAnum, n'ilam tiraikkum kaTal tAnaip
15	polan' tumpaik kazal pANTil
	kaNai poruta tuLait tOlannE.
	AyiTai, uTanROr uytal yAvatu? 'taTan' tAL,
	piNik katir, n'ellin cemmal mUtUr
	n'umakku urittAkal vENTin, cenRu avaRku
20	iRukkal vENTum, tiRaiyE; maRuppin,
	olvAn allan, velpOrAn' enac
	collavum tERIrAyin, mel iyal,
	kazal kani vakutta tuNaic cil Oti,
	kuRun' toTi makaLir tOL viTal
25	iRumpUtu anRu; aHtu aRin'tu ATuminE.

98

	munait tevvar muraN aviyap
	porak kuRukiya n'uti maruppin n'in
	inak kaLiRu celak kaNTavar
	matil katavam ezuc cellavum,
5	piNan azugkak kaLan uzakkic
	celavu acaiiya maRuk kuLampin n'in
	ina n'al mAc celak kaNTavar
	kavai muLLin puzai aTaippavum,
	mArpuRac cErn'tu olkAt
10	tOl ceRippu il n'in vEl kaNTavar
	tOl kaziyoTu piTi ceRippavum,
	vAL vAytta vaTup paran'ta n'in
	maRa main'tar main'tu kaNTavar
	puN paTu kuruti ampu oTukkavum,
15	n'IyE, aiyavi pukaippavum tAgkAtu, oyyena,
	uRumuRai marapin puRam n'inRu uykkum
	kURRattu anaiyai; Akalin, pORRAr
	iragka viLivatukollO varampu aNain'tu
	iRagkukatir alamvaru kazani,
20	perum punal paTappai, avar akan talai n'ATE!

100

	kaiyatu vElE; kAlana punai kazal;
	meyyatu viyarE; miTaRRatu pacum puN;
	vaTkar pOkiya vaLar iLam pOn'tai
	uccik koNTa Uci veN tOTTu,
5	veTci mA malar, vEgkaiyoTu viraii,
	curi irum pittai poliyac cUTi,
	varivayam poruta vayak kaLiRu pOla,
	innum mARAtu cinanE; annO!
	uyn'tanar allar, ivan uTaRRiyOrE;
10	ceRuvar n'Okkiya kaN, tan
	ciRuvanai n'Okkiyum, civappu AnAvE.

101

	oru n'AL cellalam; iru n'AL cellalam;
	pala n'AL payinRu, palaroTu cellinum,
	talai n'AL pOnRa viruppinanmAtO
	izai aNi yAnai iyal tEr ajci
5	atiyamAn; paricil peRUum kAlam
	n'ITTinum, n'ITTAtuAyinum, kaLiRu tan
	kOTTu iTai vaitta kavaLam pOlak
	kaiyakattatu; atu poy AkAtE;
	arun'ta EmAn'ta n'ejcam!
10	varun'ta vENTA; vAzka, avan tALE!

103

	oru talaip patalai tUgka, oru talait
	tUmpu akac ciRu muzAt tUgkat tUkki,
	'kavizn'ta maNTai malarkkun'ar yAr?' enac
	curanmutal irun'ta cil vaLai viRali!
5	celvaiAyin, cENOn allan;
	munai cuTa ezun'ta magkul mAp pukai
	malai cUz majcin, maza kaLiRu aNiyum
	pakaip pulattOnE, pal vEl ajci;
	pozutu iTaippaTAap pularA maNTai
10	mezuku mel aTaiyin kozu n'iNam peruppa,
	alattaR kAlai Ayinum,
	purattal vallan; vAzka, avan tALE!

104

	pORRumin, maRavIr! cARRutum, n'ummai:
	Urk kuRumAkkaL ATak kalagkum
	tAL paTu cil n'Irk kaLiRu aTTu vIzkkum
	IrppuTaik karAattu anna ennai
5	n'uN pal karumam n'inaiyAtu,
	'iLaiyan' enRu ikazin, peRal aritu, ATE.

109

	aLitOtAnE, pAriyatu paRampE!
	n'aLi koL muracin mUvirum muRRinum,
	uzavar uzAtana n'Anku payan uTaittE:
	onRE, ciRiyilai vetirin n'el viLaiyummE;
5	iraNTE, tIm cuLaip palavin pazam UzkkummE;
	mUnRE, kozug koTi vaLLik kizagku vIzkkummE;
	n'AnkE, aNi n'iRa Ori pAytalin, mItu azin'tu,
	tiNi n'eTug kunRam tEn coriyummE.
	vAn kaN aRRu, avan malaiyE; vAnattu,
10	mIn kaN aRRu, atan cunaiyE; Agku,
	maramtoRum piNitta kaLiRRinir Ayinum,
	pulamtoRum parappiya tErinir Ayinum,
	tALin koLLalir; vALin tAralan;
	yAn aRikuven, atu koLLum ARE:
15	cukir puri n'arampin cIRiyAz paNNi,
	virai oli kUn'tal n'um viRaliyar pin vara,
	ATinir pATinir celinE,
	n'ATum kunRum orugku IyummE.

114

	INTu n'inROrkkum tOnRum; ciRu varai
	cenRu n'inROrkkum tOnRum, manRa
	kaLiRu menRu iTTa kavaLam pOla,
	n'aRavup pizin'tu iTTa kOtuTaic citaRal
5	vAr acumpu ozukum munRil,
	tEr vIcu irukkai, n'eTiyOn kunRE.

115

	oru cAr aruvi Arppa, oru cAr
	pANar maNTai n'iRaiyap peymmAr,
	vAkka ukka tEk kaL tERal
	kal alaittu ozukummannE! pal vEl,
5	aNNal yAnai, vEn'tarkku
	innAn Akiya iniyOn kunRE.

119

	kArp peyal talaiiya kANpu in kAlai,
	kaLiRRu muka variyin teRuz vI pUppa,
	cem puRRu Iyalin in aLaip puLittu;
	men tinai yANarttu; n'an'tum kollO
5	n'izal il n'IL iTait tani maram pOla,
	paNai kezu vEn'tarai iRan'tum
	iravalarkku Iyum vaLLiyOn n'ATE!

125

	paruttip peNTin panuval anna,
	n'eruppuc cinam taNin'ta n'iNam tayagku kozug kuRai,
	parUuk kaL maNTaiyoTu, Uz mARu peyara
	uNkum, en'tai! n'iR kANku van'ticinE,
5	n'aLLAtAr miTal cAytta
	vallALa! n'in makiz irukkaiyE.
	uzuta n'On pakaTu azi tinRAgku
	n'al amiztu Aka, n'I n'ayan'tu uNNum n'aRavE;
	kunRattu anna kaLiRu peyara,
10	kaTan'tu aTTu venROnum, n'iR kURummE;
	'velIiyOn ivan' ena,
	'kazal aNip polin'ta cEvaTi n'ilam kavarpu
	virain'tu van'tu, camam tAgkiya,
	val vEl malaiyan allan Ayin,
15	n'al amar kaTattal eLituman, n'amakku' enat
	tORROntAnum, n'iR kURummE,
	'tolaiiyOn ivan' ena,
	oru n'I Ayinai peruma! peru mazaikku
	irukkai cAnRa uyar malait
20	tirut taku cEey! n'iR peRRicinOrkkE.

126

	onnAr yAnai OTaip pon koNTu,
	pANar cenni poliyat taii,
	vATAt tAmarai cUTTiya vizuc cIr
	OTAp pUTkai uravOn maruka!
5	vallEm allEm Ayinum, vallE
	n'invayin kiLakkuvamAyin, kagkul
	tuyil maTin'tanna tUgku iruL iRumpin,
	paRai icai aruvi, muLLUrp porun'a!
	teRal aru marapin n'in kiLaiyoTum poliya,
10	n'ilamicaip paran'ta makkaTku ellAm
	pulan azukku aRRa an'taNALan,
	iran'tu cel mAkkaTku ini iTan inRi,
	paran'tu icai n'iRkap pATinan; ataRkoNTu
	cinam miku tAnai vAnavan kuTa kaTal,
15	polam taru n'AvAy OTTiya av vazi,
	piRa kalam celkalAtu anaiyEm attai,
	inmai turappa, icai tara van'tu, n'in
	vaNmaiyin toTuttanam, yAmE muL eyiRRu
	aravu eRi urumin muracu ezun'tu iyampa,
20	aNNal yAnaiyoTu vEn'tu kaLattu oziya,
	aruj camam tataiyat tAkki, n'anRum
	n'aNNAt tevvart tAgkum
	peNNai am paTappai n'ATu kizavOyE!

127

	'kaLagkani anna karug kOTTuc cIRiyAzp
	pATu in panuval pANar uyttena,
	kaLiRu ilavAkiya pul arai n'eTu veLil,
	kAna majjai kaNanoTu cEppa,
5	Ikai ariya izai aNi makaLiroTu
	cAyinRu' enpa, Aay kOyil;
	cuvaikku initu Akiya kuyyuTai aTicil
	piRarkku Ivu inRit tam vayiRu arutti,
	uraicAl Ogku pukaz orIiya
10	muraicu kezu celvar n'akar pOlAtE.

129

	kuRi iRaik kurampaik kuRavar mAkkaL
	vAgku amaip pazuniya tERal makizn'tu,
	vEgkai munRil kuravai ayarum,
	tIm cuLaip palavin, mA malaik kizavan
5	Aay aNTiran, aTu pOr aNNal
	iravalarkku Itta yAnaiyin, karavu inRu,
	vAnam mIn pala pUppin, AnAtu
	oru vazik karu vazi inRip
	peru veLLennin, pizaiyAtu mannE.

130

	viLagku maNik koTum pUN Aay! n'in n'ATTu
	iLam piTi oru cUl pattu InummO?
	n'innum n'inmalaiyum pATi varun'arkku,
	in mukam karavAtu, uvan'tu n'I aLitta
5	aNNal yAnai eNNin, kogkark
	kuTa kaTal OTTiya jAnRait
	talaippeyarttiTTa vElinum palavE!

131

	mazaik kaNam cEkkum mA malaik kizavan,
	vazaip pUg kaNNi vAy vAL aNTiran,
	kunRam pATinakollO
	kaLiRu mika uTaiya ik kavin peRu kATE?

135

	koTuvari vazagkum kOTu uyar n'eTu varai,
	aru viTarc ciRu n'eRi ERalin, varun'ti,
	taTavaral koNTa takai mel otukkin,
	vaLaik kai viRali en pinnaL Aka,
5	pon vArn'tanna puri aTagku n'arampin
	vari n'avil panuval pulam peyarn'tu icaippa,
	paTumalai n'inRa payam kezu cIRiyAz
	olkal uLLamoTu oru puTait tazIi,
	pukazcAl ciRappin n'in n'al icai uLLi,
10	van'tanen en'tai! yAnE: enRum,
	manRu paTu paricilark kANin, kanRoTu
	kaRai aTi yAnai iriyal pOkkum
	malai kezu n'ATan! mA vEL Aay!
	kaLiRum anRE; mAvum anRE;
15	oLiRu paTaip puraviya tErum anRE;
	pANar, pATun'ar, paricilar, Agku avar,
	tamatu enat toTukkuvarAyin, 'ematu' enap
	paRRal tERRAp payag kezu tAyamoTu,
	anna Aka, n'in Uzi; n'innaik
20	kANTal vENTiya aLavai vENTAr
	uRu muraN kaTan'ta ARRal
	potu mIkkURRattu n'ATu kizavOyE!

137

	iragku muracin, inamcAl yAnai,
	mun'n'Ir ENi viRal kezu mUvarai
	innum Or yAn avA aRiyEnE;
	n'IyE, mun yAn aRiyumOnE tuvanRiya
5	kayattu iTTa vittu vaRattin cAvAtu,
	kazaik karumpin olikkun'tu,
	koNTal koNTa n'Ir kOTai kAyinum,
	kaN anna malar pUkkun'tu,
	karug kAl vEgkai malarin, n'ALum
10	pon anna vI cuman'tu,
	maNi anna n'Ir kaTal paTarum;
	cev varaip paTappai n'Ajcil porun'a!
	ciRu veL aruvip perug kal n'ATanai!
	n'I vAziyar! n'in tan'tai
15	tAy vAziyar, n'iR payan'ticinOrE!

140

	taTavu n'ilaip palavin n'Ajcil porun'an
	maTavan, manRa; cen' n'Ap pulavIr!
	vaLaik kai viRaliyar paTappaik koyta
	aTakin kaNNuRaiAka yAm cila
5	arici vENTinEmAka, tAn piRa
	varicai aRitalin, tannum tUkki,
	irug kaTaRu vaLaiiya kunRattu annatu Or
	perug kaLiRu n'alkiyOnE; annatu Or
	tERRA Ikaiyum uLatukol?
10	pORRAr amma, periyOr tam kaTanE?

141

	'pANan cUTiya pacum pon tAmarai
	mAN izai viRali mAlaiyoTu viLagka,
	kaTum pari n'eTun' tEr pUTTu viTTu acaii,
	UrIr pOlac curattiTai irun'tanir!
5	yArIrO?' ena, vinaval AnA,
	kAren okkal, kaTum paci, iravala!
	ven vEl aNNal kANA UgkE,
	n'inninum pulliyEm mannE; iniyE,
	innEm AyinEm mannE; enRum
10	uTAa, pOrA Akutal aRin'tum,
	paTAam majjaikku Itta em kO,
	kaTAa yAnaik kali mAn pEkan,
	'et tuNai Ayinum Ittal n'anRu' ena,
	maRumai n'OkkinRO anRE,
15	piRar, vaRumai n'OkkinRu, avan kai vaNmaiyE.

142

	aRu kuLattu ukuttum, akal vayal pozin'tum,
	uRum iTattu utavAtu uvar n'ilam UTTiyum,
	varaiyA marapin mAripOla,
	kaTAa yAnaik kazal kAl pEkan
5	koTaimaTam paTutal allatu,
	paTaimaTam paTAn, piRar paTai mayakkuRinE.

145

	'maTat takai mA mayil panikkum' enRu aruLi,
	paTAam Itta keTAa n'al icai,
	kaTAa yAnaik kali mAn pEka!
	pacittum vArEm; pAramum ilamE;
5	kaLagkani anna karug kOTTuc cIRiyAz
	n'ayam purin'tu uRaiyun'ar n'aTugkap paNNi,
	'aRam ceytImO, aruL veyyOy!' ena,
	iHtu yAm iran'ta paricil: aHtu iruLin,
	ina maNi n'eTun' tEr ERi,
10	innAtu uRaivi arum paTar kaLaimE!

148

	kaRagku micai aruviya piRagku malai n'aLLi! n'in
	acaivu il n'On tAL n'acai vaLan Etti,
	n'ALtoRum n'an kalam kaLiRRoTu koNarn'tu,
	kUTu viLagku viyal n'akar, paricil muRRu aLippa;
5	pITu il mannarp pukazcci vENTi,
	ceyyA kURik kiLattal
	eyyAtAkinRu, em ciRu cen' n'AvE.

151

	paNTum paNTum pATun'ar uvappa,
	viN tOy cimaiya viRal varaik kavAan,
	kizavan cET pulam paTarin, izai aNin'tu,
	pun talai maTap piTi paricilAka,
5	peNTirum tam patam koTukkum vaN pukazk
	kaNTIrakkOn Akalin, n'anRum
	muyagkal AnRicin, yAnE; polan' tEr
	n'annan marukan anRiyum, n'Iyum
	muyagkaRku ottanai mannE; vayagku mozip
10	pATun'arkku aTaitta katavin, ATu mazai
	aNagku cAl aTukkam poziyum n'um
	maNam kamaz mAl varai varain'tanar, emarE.

152

	'vEzam vIztta vizut toTaip pakazi
	pEz vAy uzuvaiyaip perumpiRitu uRIi,
	puzal talaip pukark kalai uruTTi, ural talaik
	kEzaR panRi vIza, ayalatu
5	Azal puRRattu uTumpil ceRRum,
	val vil vETTam valam paTuttu irun'tOn,
	pukazcAl ciRappin ampu mikat tiLaikkum
	kolaivan yArkolO? kolaivan maRRu ivan
	vilaivan pOlAn; veRukkai n'anku uTaiyan;
10	Aram tAzn'ta am pakaTTu mArpin,
	cAral aruvip paya malaik kizavan,
	Ori kolO? allankollO?
	pATuval, viRali! Or vaNNam; n'Irum
	maN muzA amaimin; paN yAz n'iRumin;
15	kaN viTu tUmpin kaLiRRu uyir toTumin;
	ellari toTumin; AkuLi toTumin;
	patalai oru kaN paiyena iyakkumin;
	matalai mAk kOl kaivalam tamin' enRu,
	iRaivan Akalin, collupu kuRuki,
20	mU Ez tuRaiyum muRaiyuLik kazippi,
	'kO' enap peyariya kAlai, Agku atu
	tan peyar Akalin n'ANi, maRRu, 'yAm
	n'ATTiTan n'ATTiTan varutum; Igku Or
	vETTuvar illai, n'in oppOr' ena,
25	vETTatu moziyavum viTAan, vETTattil
	tAn uyir cekutta mAn n'iNap puzukkOTu,
	An urukku anna vEriyai n'alki,
	tan malaip piRan'ta tA il n'an pon,
	pal maNik kuvaiyoTum viraii, 'koNm' ena,
30	curattiTai n'alkiyOnE viTarc cimai
	Ogku irug kollip porun'an,
	OmpA Ikai viRal veyyOnE!