சுடரின்று தமியளாய்ப் பனிக்கும், வெருவர 

மன்ற மராத்த கூகை குழறினும் 

நெஞ்சழிந் தரணம் சேரும் அதன்றலைப் 

புலிக்கணத் தன்ன நாய்தொடர் விட்டு 

முருகின் அன்ன சீற்றத்துக் கடுந்திறல் 

எந்தையும் இல்லா னாக 

அஞ்சுவள் அல்லளோ இவளிது செயலே  

இதன்கண்   தலைவியை  ஐயுற்ற தாயினைக் கனவு மருட்டலும் உண்டு
என்றது முதலாகப்  பொய்யென   மாற்றி அணங்கும் வருமென மெய்வழிக்
கொடுத்தமை காண்க.
 

26) அவள்  விலங்குறினும் என்பது :   தலைவி [காப்பு   மிகுதியானும்
நொதுமலர் வரைவு   வேண்டுதலைக் கேட்டலானும்,   தலைவற்குத்  தமர்
வரைவு மறுத்தலானும்]  நிலை  வேறுபட்டவழிச்   செவிலி  இவட்கு இஃது
ஏற்றினா னாயது எனத்   தெரியக்,   கட்டுங்  கழங்கும்  பிறவுமாகிய குறி
பார்த்தலைச் செய்யுமிடத்தும் என்றவாறு.
 

அவள்  என்றது  செவிலியை.   விலங்குறுதல்   என்றது  தலைவியின்
ஒழுகலாறு நோக்கித் தான் கருத்து மாறுபடுதலை.
 

பொய்படு பறியாக் கழங்கே, மெய்யே 

மணிவரைக் கட்சி மடமயில் ஆலும்நம் 

மலர்ந்த வள்ளியங் கானங் கிழவோன் 

ஆண்டகை விறல்வேள் அல்லன்இவள் 

பூண்டாங் கிளமுலை அணங்கி யோனே  

இது கழங்கு   பார்த்துழிக்    கூறியது.   பிறவும்    வந்தவழிக் கண்டு
கொள்க.
 

27) களம்பெறக்  காட்டினும்  என்பது : செவிலி அறிவரை வினாவி இது
தெய்வத்தானாயது     எனக்     கருதியவழிச்     செவிலி  வெறியாட்டு
நிகழ்த்துவான்   வேண்டிக்   களத்தைப்பெற,   அவ்வழித்    தலைவியது
நிலைமையைத் தாயர் உணருமாறு தக்க  சொற்களாற்    காட்டுதற்கண்ணும்
என்றவாறு.
 

கறிவளர் சிலம்பிற் கடவுட் பேணி 

அறியா வேலன் வெறியெனக் கூறும்

அதுமனங் கொள்குவை அனைஇவள் 

புதுமலர் மழைக்கண் புலம்பிய நோய்க்கே  

இது தாய்க்கு உரையாற் காட்டியது.