1. புதுமையாவது :அதுகாறும்  காணாததைக்  காண்டலும்  நிகழாதது
நிகழ்தலுமாம்.
 

நீங்கிற் றெறூஉம் குறுகுங்காற் றண்ணென்னும்

தீயாண்டுப் பெற்றா ளிவள்

என்றது தன்கண் நிகழ்ந்த புதுமைபற்றிப் பிறந்த மருட்கை.
 

................... பெருந்தேர் யானும்

ஏறிய தல்லது வந்த வாறு

நனியறிந் தன்றோ விலனே

.................. இல்வயின் நிறீஇ

இழிமின் என்றநின் மொழிமருண் டிசினே

என்பது பிறர்கண் நிகழ்ந்த புதுமைபற்றிப் பிறந்த மருட்கை.
 

2. பெருமையாவது :அளவையின் இகத்து கழியப் பெரிதாயினது எனக்
கருதிக் கோடலாம். (பெருமை - பெருக்கம்)
 

புல்லிக் கிடந்தேன் புடைபெயர்ந்தேன் அவ்வளவில்

அள்ளிக்கொள் வற்றே பசப்பு

கையான் முகக்குமளவிற்குப்  பெருகிற்றென்றலின் இது தன்கண் நிகழ்ந்த
பெருமைபற்றிப் பிறந்த மருட்கையாம்.
 

கண்டது மன்னும் ஒருநாள் அலர்மன்னும்

திங்களைப் பாம்புகொண் டற்று

ஒரு    நாளைக்   காட்சியளவிற்றாக    நில்லாது    அலர்   ஊரெங்கும்
பரவிற்றென்றலின் இது பிறர்கட்டோன்றிய பெருமைபற்றி வந்த மருட்கை.
 

3. சிறுமையாவது : அளவையின்  இகந்து   தவச்சிறிதாயினது  எனக்
கருதிக்கோடல். (சிறுமை - சிறுத்தல்.)
 

தணந்தமை சால அறிவிப்ப போலும்

மணந்தநாள் வீங்கிய தோள்

இது தன்கண் நிகழ்ந்த சிறுமைபற்றிப் பிறந்த மருட்கை.
 

மைம்மல ரோதி மணிநகைப் பேதைதன்

கொம்மை வரிமுலை ஏந்தினும் - அம்ம

கடையிற் சிவந்த கருநெடுங்கட் பேதை

இடையிற் சிறியதொன் றில்

இது பிறர் கட்டோன்றிய சிறுமைபற்றி வந்த மருட்கை.