செல்வம் முதலிய நான்கும் அறத்தொடு கூடி  வாராவிடத்துத் தனக்கும்
பிறர்க்கும்  அவை  வருத்தமும்  செய்வனவாதலின் "அல்லல்  நீத்த" எனச்
சிறப்பித்துக் கூறினார் என்க.
 

1. செல்வமாவது :பொருட்  செல்வமேயன்றி    அறுசுவை   உண்டி
முதலிய  நுகர்பொருளும்,   ஆடையணி  முதலாய  துய்த்தற்  பொருளும்,
கொடியும் படையும் முதலிய அரசச் செல்வமுமாம்.
 

வல்லாங்கு வாழ்தும் என்னாது நீயும்

எல்லார்க்கும் கொடுமதி மனைகிழ வோயே

பழந்தூங்கு முதிரத்துக் கிழவன்

திருந்துவேற் குமணன் நல்கிய வளனே.

எனவும் ....... ...... .......... ........ .......... ......... ........ இரவல
 

வென்வே லண்ணற் காணா வூங்கே

நின்னினும் புல்லியேம் மன்னே, இனியே

இனன் மாயினேம் .... .... ..... .....

எனவும் வரும். இது தன்கண்ணதாய் நிகழவரும்.
 

2. புலனாவது :ஊழான்    அமைந்த     தன்னுணர்வான்   எய்தும்
உண்மையறிவாகிய புலமைப் பேறு.
 

வழிபடு வோரை வல்லறி தீயே

பிறர்பழி கூறுவோர் மொழிதே றலையே

நீமெய் கண்ட தீமை காணின்

ஒப்ப நாடி அத்தக ஒறுத்தி

வந்தடி பொருந்தி முந்தை நிற்பின்

தண்டமும் தணிதிநீ பண்டையிற் பெரிதே

இகலிலர் எஃகுடையார் தம்முட் குழீஇ

நகலின் இனிதாயிற் காண்பாம் - அகல்வானத்து

உம்பர் உறைவார் பதி

எனவரும். இஃது இருபாலும் பற்றிவரும்.
 

3. புணர்வாவது :ஒன்றியுயர்ந்த     பாலதாணையாற்    பொருந்திய
தலைவனும்   தலைவியும்   எய்தும்   உள்ளப்   புணர்ச்சியும்,  மெய்யுறு
புணர்ச்சியுமாம்.  "அல்லல்   நீத்த"  என்றதனான்  உயிரோரன்ன  நட்பிற்
புணர்ச்சியுமாம் எனக் கொள்க.
 

தம்மில் லிருந்து தமதுபாத் துண்டற்றால்

அம்மா அரிவை முயக்கு

எனவரும்.
 

"விரிதிரைப் பெருங்கடல் வளைஇய உலகமும்"

என்னும் குறுந்தொகைச் செய்யுளும் அது.