2. திளைப்புவினை மறுத்தலாவது :   தலைவனது     வருந்தொழிற்
கருமையும் இடையூறும் எண்ணித் தலைவி  வரைவு  கடாதற்  கருத்தினான்
இருவகைக்குறிக்கண்ணும்  இடையீடு  செய்து  கூட்டத்தைத்  தவிர்த்தலாம்.
தவிர்த்தலை மறுத்தல் என்றார்.
 

கருங்கற் கான்யா றருஞ்சுழி வழங்கும்

கராஅம் பேணாய் இரவரின்

வாழேன் ஐய மைகூர் பனியே

குடிமுறை புரக்கும் நெடுமலை நாட

உரவுச்சின வேழம் உறுபுலி பார்க்கும்

இரவின் அஞ்சாய், அஞ்சுவல் இரவின்

ஈரளைப் புற்றம் காரென முற்றி

இரைதேர் எண்கினம் அகழும்

வரைசேர் சிறுநெறி வாரா தீமே

எனவும் வரும். இஃது அச்சத்திற்குப் பொருளாக அமையும்.
 

3. கரந்திடத் தொழிதலாவது :தலைவனைக் கண்டவழி உளந்தடுமாறு
மென  அஞ்சி  அவன்  காணாவகையிற்  கரந்து  மனையிடத்து  அடங்கி
அவனின் நீங்கியிருத்தல். ஒழிதலாவது தலைவன் வழியமையாது தவிர்த்தல்.
தங்குதல் எனக்  கருத்துப்  பொருள்  கூறுவர்  உரையாசிரியன்மார்.  அது
சொற் பொருளாகாமை எழுத்ததிகாரத்து விளக்கப்பட்டது.
 

யாவதும் அறிகிலர் கழறு வோரே

தாயில் முட்டை போல உட்கிடந்து

சாயின் அல்லது பிறிதெவன் உடைத்தே

யாமைப் பார்ப்பின் அன்ன

காமங் காதலர் கையற விடினே

எனவரும். இஃது இளிவரலுக்குப் பொருளாக அமையும்.
 

4. கண்டவழி உவத்தலாவது :   கரந்துறைதலால்    ஆற்றாமைமிக்கு
வருந்திப்  புலம்பியிருக்குங்கால்  தலைவன்  'புகாஅக்  காலை  புக்கெதிர்
பட்டுழியும் பகாஅ விருந்தின் பகுதியாய  வழியும்' (கள-17) கண்டு  பெருங்
களிப்புறுதல்.
 

உள்ளக் களித்தலும் காண மகிழ்தலும்

கள்ளுக்கில் காமத்திற் குண்டு

இஃது உவகைக்குப் பொருளாக அமையும்.