:: TVU ::

220	நன்னூல் மூலமும், மயிலைநாதருரையும்

	(403)	இயற்கைப் பொருளை யிற்றெனக் கிளத்தல்.
இதுவுமது. (இ - ள்.) உலகத்துப் பொருள்களெல்லாம் இயற்கைப்பொருளும் செயற்கைப்பொருளுமென இருவகையவாம். அவற்றுள், இயல்பாகவாரா நின்றபொருளைச் சொல்லுமிடத்து இத்தன்மையதென்று சொல்லல்வேண்டும் எ - று. இவ்வாற்றானும் சொல்லும் பொருளும் வரையறுத்தாராப. வ - று. நிலம்வலிது, நீர்தண்ணிது, தீவெய்யது, வளி உளரும், உயிருணருமெனவரும்.
(53)
	(404)	காரண முதலா வாக்கம் பெற்றும் காரண மின்றி யாக்கம் பெற்றும் ஆக்க மின்றிக் காரண மடுத்தும் இருமையு மின்றியு மியலுஞ் செயும்பொருள்.
இதுவுமது. (இ - ள்.) காரணச்சொல்லை முன்கொண்டு ஆக்கச்சொல்லொடு வருவனவும், காரணச்சொல்லின்றி ஆக்கச்சொல்லொடுவருவனவும் ஆக்கச் சொல்லின்றிக் காரணச்சொல்லொடு வருவனவும் ஆக்கமும் காரணமுமின்றி வருவனவுமென்னும் இந்நான்மையின் நடக்கும், செயற்கையையுடைய பொருள்கள் எ - று. வ - று. கடுவும் கைபிழியெண்ணெயும் பெற்றமையால் மயிர் நல்லவாயின, எருப்பெய்து இளங்களைகட்டு நீர் காலியாத்தமையாற் பைங்கூழ் நல்லவாயின எ - ம், மயிர் நல்லவாயின, பைங்கூழ் நல்லவாயின எ - ம், கடுவும் கைபிழியெண்ணெயும் பெற்றமையான் மயிர் நல்ல, எருப்பெய்து இளங்களைகட்டு நீர்காலியாத்தமையாற் பைங்கூழ் நல்ல எ - ம், மயிர்நல்ல, பைங்கூழ்நல்ல எ - ம் முறையே நான்மையும் வந்தவாறு காண்க. “பல்லார்தோ டோய்ந்து வருதலாற் ¹பாய்புன, னல்வய லூரநின் றார்புலால் - புல்லெருக்க, மாசின் மணிப்பூணெம் மைந்தன் மலைந்தமையாற், காதற்றாய் நாறு மெமக்கு” (தொல். கிளவி. 56, ந.) என்றற்றொடக்கத்தனவும் அதன்பாற்படுத்தறிக. இது, பரத்தையிற் பிரிந்துவந்த கிழவனோடு புலந்துரைக்கின்றாளாதலின், ¹தார் புலால்நாறுதற்குக்காரணம் பரத்தையரொடு கூடலென்பதூஉம், எருக்கங்கண்ணி நறிதாதற்குக் காரணம் தலைவன்செய்த தீங்கு தன் புதல்வன் இனியமுகத்தால் தணிக்குமன்பென்பதூஉம் பெறப்படுகின்றன. ‘தார்’ என்ற சொல் ஆக்கமின்றிக் காரணமடுத்தது. (பி - ம்.) ¹ பூம்பொய்கை ² குவளைபுலால்
(54)
	(405)	தம்பா லில்ல தில்லெனி ¹னினனா யுள்ளது கூறி மாற்றியு முள்ளது சுட்டியு முரைப்பர் சொற்சுருங்கு தற்கே.