:: TVU ::

1. - எழுத்தியல்	27

(இ - ள்.) மேற்கூறியநெறியாற் பிறக்குமிடத்துப் பன்னீருயிருக்கும் இடையினம் ஆறிற்கும் இடம் மிடறாகும்; மெல்லினமாறும் மூக்கை இடமாகப்பொருந்தும்; வல்லினமாறும் நெஞ்சை இடமாகப்பெறும்எ - று.
(20)

முதலெழுத்துக்களின் முயற்சிப்பிறப்பு
	(75)	அவற்றுள், முயற்சியுள் அஆ வங்காப் புடைய.
எ - ன், அகர ஆகாரங்கட்கு முயற்சியாமாறுணர்த்துதல் நுதலிற்று. (இ - ள்.) மேல் இடம் வகுக்கப்பட்ட முதலெழுத்துக்களுள், அகரமும் ஆகாரமும் அங்காந்துசொல்லுதலை முயற்சியாகவுடையவாம் எ - று. ஆ ஆ என உச்சரித்துக் கண்டுகொள்க.
(21)
	(76)	இஈ எஏ ஐயங் காப்போ டண்பன் முதனா விளிம்புற வருமே.
எ - ன், இவ் வைந்தெழுத்துக்கும் முயற்சியாமாறு உணர்த்துதல் நுதலிற்று. (இ - ள்.) இக்கூறப்பட்ட ஐந்தெழுத்தும் அங்காப்புடனே அண்பல்லை முதனாவிளிம்பு உறும் முயற்சியாற்பிறக்கும் எ - று. இ ஈ எ ஏ ஐ என உச்சரித்துக் கண்டுகொள்க.
(22)
	(77)	உஊ ஒஓ ஒளவிதழ் குவிவே.
எ - ன், இவ்வைந்துயிருக்கும் முயற்சியாமாறு உணர்த்துதல் நுதலிற்று. (இ - ள்.) ¹இக்கூறப்பட்ட ஐந்தெழுத்தும் இதழைக்குவித்துச் சொல்லு முயற்சியாற் பிறக்கும் எ - று. உ ஊ ஒ ஓ ஒள என உச்சரித்துக் கண்டுகொள்க. (பி - ம்.) ¹இக்கூற்றைந்தெழுத்தும்
(23)
	(78)	கஙவுஞ் சஞவும் டணவு முதலிடை நுனிநா வண்ண முறமுறை வருமே.
எ - ன், இவ்வாறெழுத்துக்கும் முயற்சியாமாறுணர்த்துதல் நுதலிற்று. (இ - ள்.) ¹ககரமும் ஙகரமும் முதல்நா முதலண்ணத்தை உறிஞ்சப் பிறக்கும்; சகரமும் ஞகரமும் இடைநா இடையண்ணத்தை உரிஞ்சப் பிறக்கும்; டகரமும் ணகரமும் நுனிநா நுனியண்ணத்தை உரிஞ்சப் பிறக்கும் எ - று. கங சஞ டண என உச்சரித்துக் கண்டுகொள்க. (பி - ம்.) ¹ககாரமும் ஙகாரமும் பின்னும் இப்படியே.
(24)
	(79)	அண்ப லடிநா முடியுறத் தநவரும்.
எ - ன், இவ்விரண்டிற்கும் முயற்சியாமாறு உணர்த்துதல் நுதலிற்று.