:: TVU ::

4. - மெய்யீற்றுப்புணரியல்	91

	(211)	னஃகான் கிளைப்பெய ரியல்பு மஃகான் அடைவு மாகும் வேற்றுமைப் பொருட்கே.
எ - ன், னகாரவீற்றுள் ஒன்றற்கு எய்தியது விலக்கலும் எய்தாதது எய்துவித்தலும் நுதலிற்று. (இ - ள்.) னகாரவீற்றுச்சாதிப்பெயர்கள் மூவினமும்வந்தால் இயல்பாவனவும் இறுதி அகரம்பெறுவனவுமாம், வேற்றுமைக்கண் எ - று. வ - று. எயின்குடி; சேரி, தோட்டம், பாடி, ஞாற்சி, நீட்சி, மாட்சி, யாப்பு, வலிமை என இயல்பாயிற்று. எயினக்கன்னி; சிறுவன், தலைவன், பிள்ளை, மரபு, வரை என அகரம்பெற்றது. சாதியும் குழூஉவும் அஃறிணையாகலின் வேறு எடுத்தோதினாரென்க.
(9)
	(212)	மீன்றவ் வொடுபொரூஉம் வேற்றுமை வழியே.
இதுவுமது. (இ - ள்.) மீனென்னுமொழியீறு வேற்றுமைக்கண் வல்லெழுத்து வரின் றகாரத்தோடு உறழ்ந்துவரும் எ - று. வ - று. மீன்கண், மீற்கண்; செவி, தலை, புறம் எனவரும்
(10)
	(213)	தேன்மொழி மெய்வரி னியல்பு மென்மை மேவி னிறுதி யழிவும் வலிவரின் ஈறுபோய் வலிமெலி மிகலுமா மிருவழி.
இதுவுமது. (இ - ள்.) தேன்மொழிமுன் மூவினமெய்களும்வர இயல்பாதலும் மெல்லினம்வரின் ஈற்றுமெய்கெடுதலும் வல்வினம்வரின் ஈற்றெழுத்துக் ¹கெட வல்லெழுத்துமிகுதலும் மெல்லெழுத்துமிகுதலுமாகும், இருவழியும் எ - று. வ - று. தேன்கடிது; சிறிது, தீது, பெரிது, ஞான்றது, மாண்டது, யாது, வலிது எ -ம். கடுமை, சிறுமை, தீமை, பெருமை, ஞாற்சி, மாட்சி, யாப்பு, வலிமை எ - ம் இருவழியும் மூவினமெய்யும்வர இயல்பாயிற்று. தேஞான்றது, தேநீண்டது, தேமாண்டது எ - ம், தேஞெரி, தேநெரி, தேமுரி எ - ம் மென்மைவர இருவழியும் ஈறுகெட்டது. தேக்கடிது; சிறிது, தீது, பெரிது எ - ம், தேக்குடம்; சாடி, தாழி, பானை எ - ம், தேங்கடிது; சிறிது, தீது, பெரிது எ - ம் தேங்குடம்; சாடி, தாழி, பானை எ - ம், இருவழியும் வன்மைவர ஈறுகெட்டு வன்மைமென்மை மிக்கன. இதனை ஞாபகமாகச் ²சூத்திரித்தவதனானே, தேன்குடம், தேற்குடம் என உறழ்வாமென்பாரும் உள³ரெனக்கொள்க. (பி - ம்.) ¹கெட்டு ²சூத்திரத்தோதியவதனானே ³ரென்க.
(5)