:: TVU ::

பக்கம் எண் : 115

நன்னூல் விருத்தியுரை
நூற்கும் நூல் செய்தோனுக்கும் கிழமை கூறுதலும் நூல் நுதலிய பொருளே அன்றிப் படலம் நுதலியதூஉம் ஓத்து நுதலியதூஉம் சூத்திரம் நுதலியதூஉம் கூறுதலும் கேட்போரே அன்றிக் கேட்பிப்போரைக் கூறுதலும் பயனே அன்றிப் பயனுக்குப் பயன் கூறுதலும் ஆம். > இவ்வெட்டனுள், ‘சீய கங்கன்’ எனவே ஆக்குவித்தோன் பெயரும், ‘தொகைவகை விரி’ எனவே வழியின் வகையும், ‘மாண்பொருண் முழுவதும்’ எனவே பயனுக்குப் பயனும் பெறப்பட்டன. ஏனைய இந்நூலுள் வந்துழி வந்துழிக் காண்க.
<பயனுக்குப்⁹ பயனாவது.	(வெண்பா)
“எழுத்தறியத் தீரு மிழிதகைமை தீர்ந்தான் மொழித்திறத்தின் முட்டறுப்பா னாகு - மொழித்திறத்தின் முட்டறுத்த நல்லோன் முதனூற் பொருளுணர்ந்து கட்டறுத்து வீடு பெறும்” (குறள். 392 பரிமேலழகர்)
என்பதனால்¹⁰ காண்க. எனவே முதல்நூற் பொருள் உணர்தற்கு முறையானே இது கருவிநூல் என்பது பெறப்பட்டது. > முதல்நூல் என்றது அறம் முதலிய நான்கினையும் (10) உணர்த்தும் நூலை என அறிக. <எழுத்து¹¹ என்றது இயற்றமிழை. அது, “எண்ணென்ப வேனை யெழுத்தென்ப” (குறள். 392) என்பதனானும் உணர்க. > இசைத்தமிழும் நாடகத்தமிழும் இவ்வியற்றமிழ்போல முதல்நூல் பொருள் உணர்தற்குக் கருவி அன்மையின் இயற்றமிழ் ஒன்றுமே கூறினார். ஆயின் இயற்றமிழை, ‘அரும்பொரு ளைந்து’ எனக் கூறினமையின் இந்நூலுட் கூறிய பொருள் யாப்பு அணிகள் என்னும் மூன்று அதிகாரங்களும்¹² அக்காலத்து உள்ளன போலும். -------------------------- ⁹தொல்காப்பியச் சூத்திர விருத்தி (பக். 27). ¹⁰இப்பாடலின் துவக்கப் பகுதியை மயிலைநாதரும் (நன். 289) எடுத்துக்காட்டுவார். ¹¹தொல்காப்பியச் சூத்திர விருத்தி (பக். 21). ¹²மயிலைநாதரும், “இந்நூலிற் சொன்ன ஐந்து அதிகாரத்திற்கும் சிங்க நோக்காய் நிற்பதொரு புறநடை உணர்த்துதல் நுதலிற்று.” என்றும், “இவ்வாறே மேல் வரும் அதிகாரங்களிலும் கண்டுகொள்க.” (நன். 461) என்றும் இக்கருத்தைக் குறிப்பிடுவார்.