:: TVU ::

பக்கம் எண் : 131

நன்னூல் விருத்தியுரை
வேண்டுழி விரித்து உரைத்தல். அதிகாரமாவது: எடுத்துக்கொண்ட அதிகாரம் இது ஆதலின் இச்சூத்திரத்து அதிகரித்த பொருள் இது என அவ்வதிகாரத்தோடு பொருந்த உரைக்க வேண்டுழி உரைத்தல். துணிவாவது: ஐயுறக் கிடந்துழி இதற்கு இதுவே பொருள் என உரைத்தல். ஏனைய³⁶ பொருள் விளங்கிக் கிடந்தன. இப்பதினான்கும் இவ்வுரைகள் வந்துழி வந்துழிக்³⁷ காட்டுதும்; ஆங்காங்கு உணர்க. (21)
காண்டிகையுரை
22.	கருத்துப் பதப்பொருள் காட்டு மூன்றினும் அவற்றொடு வினாவிடை யாக்க லானுஞ் சூத்திரத் துட்பொரு டோற்றுவ காண்டிகை
எ-னின், காண்டிகையுரை ஆமாறு உணர்த்துதல் நுதலிற்று. இ-ள்: மேற் கூறிய பதினான்கினுள் (21) கருத்துரையும் பதப்பொருளும் உதாரணமும் ஆகிய மூன்றனையும் உரைத்தலானும் அம்மூன்றனோடு வினா, விடை என்னும் இரண்டனையும் கூட்டி உரைத்தலானும் சூத்திரத்துட்பொருளை விளக்குவன காண்டிகையுரைகளாம் எ-று. (22)
விருத்தியுரை
23.	சூத்திரத் துட்பொரு ளன்றியு மாண்டைக் கின்றி யமையா யாவையும் விளங்கத் தன்னுரை யானும் பிறநூ லானும் ஐய மகலவைங் காண்டிகை யுறுப்பொடு மெய்யினை யெஞ்சா திசைப்பது விருத்தி.
எ-னின், விருத்தியுரை ஆமாறு உணர்த்துதல் நுதலிற்று. இ-ள்: காண்டிகையுரைபோல் சூத்திரத்துட்பொருள் விளக்குதல் மாத்திரையின் நில்லாது, அவ்விடங்கட்கு இன்றியமையாத பொருள்கள் யாவையும் விளங்கத், தான் உரைக்கும் உரையானும் ஆசிரிய வசனங்களானும் மேற் கூறிய காண்டிகை உறுப்பு ஐந்தனானும் ஐயம் தீரச், சுருங்காது மெய்ம்மைப் பொருளை விரித்து உரைப்பது விருத்தியுரையாம் எ-று. ----------------------------- ³⁶‘பாடம்’ என்பது மூலபாடமும் பாடபேதமும் என்றும், ‘சொற்பொருள்’ என்பது பதவுரை என்றும், ‘தொகுத்துரை’ என்பது பொழிப்புரை என்றும் இராமாநுச கவிராயர் (நன். 21) கூறுவார். ³⁷காட்டிய இடங்களில் சில. நூ. 14, 110, 207, 344.