:: TVU ::

பக்கம் எண் : 133

நன்னூல் விருத்தியுரை
ஆசிரியன் வரலாறு
26.	குலனரு டெய்வங் கொள்கை மேன்மை கலைபயி றெளிவு கட்டுரை வன்மை நிலமலை நிறைகோன் மலர்நிகர் மாட்சியும் உலகிய லறிவோ டுயர்குண மினையவும் அமைபவ னூலுரை யாசிரி யன்னே.
எ-னின், நிறுத்த முறையானே (3) ஆசிரியனது வரலாறு உணர்த்துதல் நுதலிற்று. இ-ள்: இவ்வியல்பினை உடையார் கற்பிக்கும் ஆசிரியர் ஆவார் எ-று. (26)
நிலத்தின் மாட்சி
27.	தெரிவரும் பெருமையுந் திண்மையும் பொறையும் பருவ முயற்சி யளவிற் பயத்தலும் மருவிய நன்னில மாண்பா கும்மே.
எ-னின், மேற் கூறிய உவமையை விரித்து உணர்த்துதல் நுதலிற்று. இ-ள்: நிலத்தினது மாட்சிமை இது ஆதலின் இஃது உவமை ஆயிற்று எ-று. (27)
மலையின் மாட்சி
28.	அளக்க லாகா வளவும் பொருளுந் துளக்க லாகா நிலையுந் தோற்றமும் வறப்பினும் வளந்தரும் வண்மையு மலைக்கே.
எ-னின், இதுவும் அது. இ-ள்: மலையினது மாட்சிமை இது ஆதலின் இஃது உவமை ஆயிற்று எ-று. (28)
நிறைகோலின் மாட்சி
29.	ஐயந் தீரப் பொருளை யுணர்த்தலும் மெய்ந்நடு நிலையு மிகுநிறை கோற்கே.
எ-னின், இதுவும் அது. இ-ள்: நிறைகோலினது மாட்சிமை இது ஆதலின் இஃது உவமை ஆயிற்று எ-று. (29)