:: TVU ::

பக்கம் எண் : 135

நன்னூல் விருத்தியுரை
பருத்திக்குண்டிகையின் தன்மை
34.	அரிதிற் பெயக்கொண் டப்பொரு டான்பிறர்க் கெளிதீ வில்லது பருத்திக் குண்டிகை.
எ-னின், இதுவும் அது. இ-ள்: பருத்தி பெய்த குண்டிகையின் குற்றம் இது ஆதலின் இஃது உவமை ஆயிற்று எ-று. (34)
முடத்தெங்கின் தன்மை
35.	பல்வகை யுதவி வழிபடு பண்பின் அல்லோர்க் களிக்கு மதுமுடத் தெங்கே.
எ-னின், இதுவும் அது. இ-ள்: முடத்தெங்கினது குற்றம் இது ஆதலின் இஃது உவமை ஆயிற்று எ-று. இவ்வுவமைகளின் குற்றம்போலப் பொருளின் குற்றமும் விரித்து உரைத்துக்கொள்க. (35)
கற்பித்தலின் வரலாறு
36.	ஈத லியல்பே யியம்புங் காலைக் காலமு மிடனும் வாலிதி னோக்கிச் சிறந்துழி யிருந்துதன் றெய்வம் வாழ்த்தி உரைக்கப் படும்பொரு ளுள்ளத் தமைத்து விரையான் வெகுளான் விரும்பி முகமலர்ந்து கொள்வோன் கொள்வகை யறிந்தவ னுளங்கொளக் கோட்டமின் மனத்தினூல் கொடுத்த லென்ப.
எ-னின், நிறுத்த முறையானே (3) ஆசிரியன் கற்பிக்குமாறு உணர்த்துதல் நுதலிற்று. இ-ள்: கற்பிக்குமாறு இவ்வாறு எனச் சொல்லுவார் புலவர் எ-று. (36)
மாணாக்கன் வரலாறு
37.	தன்மக னாசான் மகனே மன்மகன் பொருணனி கொடுப்போன் வழிபடு வோனே உரைகோ ளாளற் குரைப்பது நூலே.
எ-னின், நிறுத்த முறையானே (3) மாணாக்கனது வரலாறு உணர்த்துதல் நுதலிற்று. இ-ள்: இவ்வறுவர்க்கும் சொல்லப்படுவது நூல் எ-று.