:: TVU ::

பக்கம் எண் : 160

நன்னூல் விருத்தியுரை
எ-னின், மேற் கூறிய (74-87) பிறப்பிற்கு ஓர் புறனடை உணர்த்துதல் நுதலிற்று. இ-ள்: பல எழுத்திற்குப் பிறப்பு ஒன்றாகச் சொல்லப்பட்டனவேனும் எடுத்தல், படுத்தல், நலிதல்⁷⁵ என்னும் எழுத்திற்கு உரிய ஒலிமுயற்சியான் ஒன்றற்கு ஒன்று பிறப்பு வேறுபாடுகளும் அவ்வவற்றின்கண் சிறிது சிறிது உளவாம் எ-று. (33)
உயிர்மெய்
{89}	புள்ளிவிட் டவ்வொடு முன்னுரு வாகியும் ஏனை யுயிரோ டுருவு திரிந்தும் உயிரள வாயதன் வடிவொழித் திருவயிற் பெயரொடு மொற்றுமுன் னாய்வரு முயிர்மெய்.
எ-னின், மேல் (87) பிறப்பு உணர்த்திய சார்பெழுத்திற்குச் சார்ந்து வருமாறும் ஓர் பிறப்பு ஆதலின் பிறப்பதிகாரத்துள் (74-97) அடக்கி உணர்த்துவான் தொடங்கி, அவற்றுள் உயிர்மெய் வருமாறு உணர்த்துதல்⁷⁶ நுதலிற்று. இ-ள்: மெய் புள்ளியை விட்டு அகரத்தோடு கூடியவழி விட்ட உருவே உருவாகியும் ஒழிந்த உயிர்களோடு கூடியவழி உருவு வேறுபட்டும் தன் மாத்திரை தோன்றாது, உயிர்மாத்திரையே மாத்திரையாய், அதன்⁷⁷ வரிவடிவினது விகாரவடிவே வடிவாய், உயிர்வடிவை ஒழித்து மெய், உயிர் என்னும் பெயராகிய இரண்டு இடத்தும் பிறந்த உயிர்மெய் என்னும் பெயருடனே ஒற்றொலி முன்னும் உயிரொலி பின்னுமாகி வரும் உயிர்மெய் எழுத்து எ-று. <உருவு திரிதல்⁷⁸ புள்ளி பெறுவன புள்ளி பெற்றும் மேலும் கீழும் விலங்கு பெறுவன விலங்கு பெற்றும் கோடு பெறுவன கோடு பெற்றும் புள்ளியும் கோடும் உடன் பெறுவன உடன் பெற்றும் வருவனவாம். அருகே பெற்ற புள்ளியை இக்காலத்தார் காலாக எழுதுவர். > ‘ஒழித்து’ என்றும், ‘ஒற்றுமுன் னாய்’ என்றும் வந்த சினைவினைகள், ‘இருவயிற் பெயரொடும்... வரும்’ என்னும் முதல்வினையோடு முடிந்தன. ---------------------------- ⁷⁵இவற்றோடு உரப்பலைக் கூட்டி நான்கு என்றும் (வீர. 4) விலங்கலைக் கூட்டி நான்கு என்றும் (தொல். பிற. 6 நச்.; இல. விள. 14; இல. கொ. 127) கூறப்படும். ⁷⁶இந்நூற்பாவின் உரைக்குச் சிவஞான முனிவர் செய்த திருத்தம் ஆறுமுக நாவலர் பதிப்புகளில் இடம் மாறியுள்ளது. ⁷⁷“மாத்திரையாய்த் தன் வரிவடிவினது” என்பது ஆறுமுக நாவலர் பாடம். ⁷⁸இளம்பூரணர், நச்சினார்க்கினியர் (தொல். நூன். 17) உரை.