:: TVU ::

பக்கம் எண் : 489

நன்னூல் விருத்தியுரை
பூட்டுவிற் பொருள்கோள்
{415}	எழுவா யிறுதி நிலைமொழி தம்முட் பொருணோக் குடையது பூட்டுவில் லாகும்.
எ-னின், பூட்டுவிற் பொருள்கோள் ஆமாறு உணர்த்துதல் நுதலிற்று. இ-ள்: செய்யுட்கண் முதலினும் ஈற்றினும் நிற்கும் மொழிகள் தம்முள் பொருள் நோக்கமுடைய பொருள்கோள் பூட்டுவிற் பொருள்கோள் ஆம் எ-று. செய்யுட்கு எல்லாம் முதலினும் ஈற்றினும் என்னாமையின் அதனகத்து எங்ஙனம் இவ்வாறு வரினும் ஆம் என்க. வ-று:
	“திறந்திடுமின் றீயவை பிற்காண்டு மாதர் இறந்து படிற்பெரிதா மேத - முறந்தையர்கோன் தண்ணார மார்பிற் றமிழர் பெருமானைக் கண்ணாரக் காணக் கதவு” (முத்.*)
என வரும். பிறவும் அன்ன. (64)
தாப்பிசைப் பொருள்கோள்
416.	இடைநிலை மொழியே யேனையீ ரிடத்தும் நடந்து பொருளை நண்ணுத றாப்பிசை.
எ-னின், தாப்பிசைப் பொருள்கோள் ஆமாறு உணர்த்துதல் நுதலிற்று. இ-ள்: இடை நிற்கும் மொழி, ஒழிந்த முதலினும் ஈற்றினும் சென்று பொருளைக் கூடும் பொருள்கோள் தாப்பிசைப் பொருள்கோளாம் எ-று. வ-று:
	“உண்ணாமை யுள்ள துயிர்நிலை யூனுண்ண அண்ணாத்தல் செய்யா தளறு” (குறள். 255)
என வரும்.