:: TVU ::

பக்கம் எண் : 494

நன்னூல் விருத்தியுரை
நான்காவது
இடையியல்
இடைச்சொல்லின் பொது இலக்கணம்
{420}	வேற்றுமை வினைசா ரியையொப் புருபுகள் தத்தம் பொருள விசைநிறை யசைநிலை குறிப்பெனெண் பகுதியிற் றனித்திய லின்றிப் பெயரினும் வினையினும் பின்முன் னோரிடத் தொன்றும் பலவும்வந் தொன்றுவ திடைச்சொல்.
எ-னின், “இடையுரி யடுத்து, நான்குமாம்” (நூ. 270) என நிறுத்த முறையானே இடைச்சொல் இலக்கணம் இவ்வியலால் உணர்த்துவான் தொடங்கி, அவை இத்துணைய; இவ்வியல்பின என அவற்றின் பொது இலக்கணம் உணர்த்துதல் நுதலிற்று. இ-ள்: எழுவாயுருபு முதலிய எட்டு வேற்றுமை உருபுகளுள் (292) பெயரும் பெயரது விகாரமும் ஆகிய எழுவாயும் விளியும் ஒழித்து, ஒழிந்த ஐ முதலிய ஆறு உருபுகளும் (152) பகுதி, விகுதி, இடைநிலை என்னும் தெரிநிலையும் குறிப்பும் ஆகிய வினையுருபுகளுள் முதனிலைத் தனிவினைப்பெயரும் பொருளாதி அறுவகைப் பெயரும் ஆகிய பகுதி ஒழித்து, ஒழிந்த விகுதி முதலிய வினையுருபுகளும் (140, 142-145; 340, 341, 343) அன், ஆன் முதலிய சாரியையுருபுகளும் (244) போலப், புரைய முதலிய உவமவுருபுகளும் (367) பிறவாறு தத்தமக்கு உரிய பொருளை உணர்த்தி வருவனவும் (422-425; 428, 431-433; 435, 437, 438) வேறு பொருளின்றிச் செய்யுள் இசை நிறைத்தலே பொருளாக வருவனவும் (422, 436) அசைத்தலே பொருளாக நிற்பனவும் (422, 423, 432, 433, 435, 437, 439-441) வெளிப்படையின் வரும் இவை போலாது குறிப்பின் வருவனவும் (424) என்னும் எட்டு வகையினை உடையவாய்த் தனித்து நடத்தலின்றிப் பெயரின் அகத்தும் வினையின் அகத்தும் அவற்றின் புறமாகிய பின்னும் முன்னும் இவ்விடங்கள் ஆறனுள்⁴¹⁷ ஓர் இடத்து ஒன்றேனும் பலவேனும் வந்து, அப்பெயர்வினைகட்கு அகத்துறுப்பாயும் புறத்துறுப்பாயும் ஒன்றுபட்டு நடக்கும் தன்மையது இடைச்சொல்லாம் எ-று. தெரிநிலைவினை இடைநிலைபோல ஏனை இடைநிலை சாரியைகட்கு வேறு பொருள் இன்றேனும் பெயர்வினைகட்கு இன்றியமையாது வருதலே பெரும்பால ஆதலின் அவற்றின் பொருளே பொருள் என்பது கருதி, இசைநிறை அசைநிலைகளைச் சார வையாது முதற்கண் வைத்தார் என்க. ------------------------------ ⁴¹⁷பெயரின் அகத்தும் வினையின் அகத்தும் அவற்றின் புறமாகிய பெயரின் பின்னும் பெயரின் முன்னும் வினையின் பின்னும் வினையின் முன்னும் ஆகிய ஆறு இடங்கள்.