| நன்னூல் விருத்தியுரை
| இ-ள்: தெரிநிலை முதலாக விதந்த பதினான்கும் இவை போல்வன பிறவும் மேல்,
“தத்தம் பொருள” (நூ. 420) என்ற இடைச்சொற் பொருள்களாம் எ-று.
‘இன்னன’ என்றதனால் சில வருமாறு: அக்கொற்றன், எக்கொற்றன் என்பன
சுட்டுப்பொருளும் வினாப்பொருளும் தந்தன. நக்கீரர், நப்பாலத்தனார் என்புழி நகர
இடைச்சொல் சிறப்புப்பொருள் தந்தது. “அஆ, இழந்தானென் றெண்ணப் படும்”
(நாலடி. 9:3-4), “ஆஅ வளிய வலவன்றன் பார்ப்பினோடு” (யா. வி. 41), “அந்தோ
விசையை பட்டனள்” (சீவக. 312:1*),
| | | “அரக்காம்ப னாறும்வா யம்மருங்கிற் கன்னோ
பரற்கான மாற்றின கொல்லோ” (நாலடி. 396:1-2)
| என்புழி அஆ, ஆஅ, அந்தோ, அன்னோ என்னும் இடைச்சொற்கள்
இரங்குதற்பொருள் தந்தன. இவற்றிற்கு அதிசயப்பொருளும் உள. “அறிதோ றறியாமை
கண்டற்றால்” (குறள். 1110), “சேரி தொறிது செல்வத் தியற்கையே” (சீவக. 129:4*)
என்புழித்தோறு, தொறு என்னும் இடைச்சொற்கள் இடப்பன்மைப் பொருள் தந்தன.
இனிச் செய்வான், இனி எம் எல்லை என்புழி இனி என்னும் இடைச்சொல்
காலப்பொருளும் இடப்பொருளும் முறையே தந்தது. பிறவும் இவ்வாறு தனித்து நடக்கும்
பெயர், வினை ஆகாது வருவன எல்லாம் கொள்க.(2)
| | ஏகார இடைச்சொல்
| | {422} | பிரிநிலை வினாவெண் ணீற்றசை தேற்றம்
இசைநிறை யெனவா றேகா ரம்மே.
| எ-னின், வேற்றுமை உருபு முதலிய நான்கும் மேலே (420) சொல்லப்பட்டமையின்
அவற்றை ஒழித்து, ஏனையவற்றை423 உணர்த்துவான் தொடங்கி, அவற்றுள் ஏகார
இடைச்சொல் இலக்கணம் உணர்த்துதல் நுதலிற்று.
இ-ள்: தெரிநிலை முதலிய பதினான்கும் (421) அவை போல்வன பிறவும் ஆகிய
பொருள்களுள்ளும் இசை நிறைத்தல், அசைத்தல், குறிப்பு என்னும் மூன்று
பொருள்களுள்ளும் (420) பிரிநிலை முதலிய ஆறு பொருளையும் தரும் ஏகார
இடைச்சொல் எ-று.
-------------------------------
423வேற்றுமை உருபு முதலிய நான்கு: ஐ முதலிய ஆறு வேற்றுமை
உருபுகள், விகுதி முதலிய வினையுருபுகள், சாரியையுருபுகள், உவமவுருபுகள்
ஆகியன. ஏனையவை: தத்தம் பொருள் உணர்த்துவன, இசைநிறைப் பொருளன,
அசைநிலைப் பொருளன, குறிப்பின் வருவன என்னும் நான்கு. | |
|
|