3. கூற்று

களவிற் கூற்றிற் குரியார்

213. தலைவன் தலைவி பார்ப்பான் பாங்கன்
பாங்கி செவிலியென் றீங்கிவ் வறுவருஞ்
சாற்றிய களவிற் கூற்றிற் குரியர்.

(இ - ம்.) களவுக் கைகோளகத்துக் கூற்றிற்கு உரியோரை உணர்த்துதல் நுதலிற்று.

(இ - ள்.) தலைவன் முதலாகச் சொல்லப்பட்ட அறுவரும் மேற்சொல்லப்பட்ட களவினகத்திற் கூற்றிற்கு உரியவராவர் என்றவாறு.

(4)

கற்பின் கூற்றிற் குரியார்

214. நற்றாய் கண்டோர் பாணன் கூத்தர்
விறலி பரத்தை அறிவரென் றெழுவரும்
¹அறுவரென் றவரும் ஆகிய அனைவரும்
குறைவறு கற்பிற் கூற்றிற் குரியர்.

(இ - ம்.) கற்பிற் கூற்றிற்கு உரியோரை உணர்த்துதல் நுதலிற்று.

(இ - ள்.) நற்றாய் முதலாகிய எழுவரும் மேற்சொல்லப்பட்ட தலைவன் முதலாகிய அறுவருமாகிய பதின்மூவரும் குற்றம் அற்ற கற்பினகத்துக் கூற்றிற்கு உரியராவர் என்றவாறு.

(5)

கூற்றிற் குரிமை இல்லாதார்

215. ²பயந்தோன் றன்னை உயங்குநோ யறிவோர்
³ஊரவர் அயலோர் சேரியோர் என்றிவர்
⁴முகத்துரை நிகழா அகப்பொரு ளகத்தே.

(இ - ம்.) இதுவும் அகப்பொருளகத்து முகத்துரை நிகழாதோரை உணர்த்துதல் நுதலிற்று.

1. (பாடம்)'அறுவகை யவரும்'

2. இது களவுகற்பு என்னும் இரண்டினுக்கும் பொது.

3. (பாடம்) உரவர், அறிஞர்.

4. முகம் - வாய்.