புள்ளெழுப்புதல், நீரிற்கல்லெறிதல், இளநீர்வீழ்த்தல் முதலிய குறிகள் பிறிதொன்றனால் நிகழ்த்தப்படத் தலைவி குறிக்கண் வந்துதலைவனைக் காணாது சென்றாள். பிறகு தலைவன் அங்கு வந்து தலைவியைக் கூடப் பெறாமற் சென்றான்.இங்ஙனம் தலைவனால் நிகழ்த்தப்படுதற்குரிய குறிகள் பிறிதொன்றினால் நிகழ்த்தப்படுதலின் அஃது அல்ல குறியாயிற்று.

2. வருந்தொழிற்கருமை - தலைவன் இரவுக் குறிக்கண் வருவதற்கு இடையூறாகிய நிகழ்ச்சிகள் நிகழ்தல்.

வரைதல் வேட்கையின் வகை-3.

சூ. 163.

1. அச்சம் - தலைவி தலைவனை எய்துதற்கிடையூறான நிகழ்ச்சிகள் உண்டாகத் தலைவி அஞ்சுதல்.

2. உவர்த்தல் - பாங்கி தலைவனை, வெறுத்துக் கூறல். உவர்த்தல் - வெறுத்தல்.

3. ஆற்றாமை - தலைவன் வராமையைத் தலைவி பொறாமல் வருந்துதல்.

வரைவு கடாதலின் வகை - 4.

சூ. 165.

1. பொய்த்தல் - தோழியானவள் தலைவியைத் தலைவன் மணந்து கொள்ளும்படி செய்ய எண்ணித் தலைவனிடம் பொய்யாயினவற்றைத் தானே புனைந்து கூறுதல்.

2. மறுத்தல் - தலைவன் குறிக்கண் வருதலைத் தோழி குறிப்பாகவும், வெளிப்படையாகவும் மறுத்தல்.

3. கழறல் - தோழி, நீ தலைவியை மணந்துகொள்ளாமல் களவின்கண் ஒழுகுதல் நின்னாடு முதலியவற்றிற்கு ஏற்றது அன்றெனத் தலைவற்குக் கூறுதல்.

4. மெய்த்தல் - தோழி, தலைவனுக்கு மெய்யாயினவற்றைக் கூறுதல்.

ஒருவழித்தணத்தலின் வகை - 7.

சூ. 167.

1. செலவறிவுறுத்தல் - தலைவன் தான் ஒருவழித்தணந்து செல்லும் செலவைப் பாங்கிக்குத் தெரிவித்தலும், அவள் அதனைத் தலைவிக்குத் தெரிவித்தலுமாம்.

2. செலவுடன்படாமை - தலைவன் செலவைப் பாங்கி தடுத்தல்.

3. செலவுடன்படுத்தல் - தலைவன் தான் செல்ல வேண்டியது இன்றியமையாதது என்று கூறிப்பாங்கியை உடன்படச் செய்தல்.

4. செலவுடன்படுதல் - தலைவன் செல்வதற்குப் பாங்கி உடன்படல்.