பாங்கன் எவ்விடத் தெவ்வியற் றென்றற்குச் செய்யுள்:

¹"முகத்திற் பகழி யிரண்டுடை யார்க்கிட மூரிமுந்நீர்
அகத்திற் பிறந்த வரவிந்த மோவடை யார்தமக்கு
மகத்திற் சனியன்ன சந்திர வாணன்றென் மாறைவெற்பா
நுகத்திற் பகலனை யாய்தன்மை யேது நுவலெனக்கே"

என வரும்.

தலைவன் இவ்விடத்திவ்வியற்று என்றற்குச் செய்யுள்:

²"கனமே குழல்செங் கயலே விழிமொழி கார்க்குயிலே
தனமே முகையென் தனிநெஞ்ச மேயிடை தன்பகைக்கு
வளமே யருளிய வாணன்றென் மாறை மணிவரைசூழ்
புனமே யிடமிங்ங னேயென்னை வாட்டிய பூங்கொடிக்கே"

எனவும்,

³"கடற்கோடு செறித்த வளைவார் முன்கைக்
கழிப்பூத் தொடர்ந்த விரும்பல் கூந்தற்
கானன் ஞாழற் கவின்பெரு தழையள்
வரையர மகளிரி னரியளென்
நிறையரு நெஞ்சங் கொண்டொளித் தோளே"

எனவும் வரும்.

பாங்கன் இறைவனைத் தேற்றற்குச் செய்யுள்:

⁴''மழைவளர் மாளிகை மாறை வரோதயன் வாணன்வெற்பின்
இழைவளர் வார்முலை யேரிளந் தோகையை யிக்கணம்போய்க் 
கழைவளர் சாரலிற் கண்டுனை யான்வந்து காண்பளவுந்
தழைவளர் தாரண்ண லேதணி வாய்நின் றகவின்மையே''

என வரும்.

பாங்கன் குறிவழிச் சேறற்குச் செய்யுள்:

⁵"பாரித்த திண்மையெம் மண்ணலுண் ணீரைப் பருகிநின்று
பூரித்த செவ்விள நீர்களுந் தாங்கியப் பூங்கொடிதான்
வாரித் தலம்புகழ் வாணன்றென் மாறை வரைப்புனஞ்சூழ்
வேரித் தடம்பொழில் வாய்விளை யாடுங்கொன் மேவிநின்றே"

என வரும்.

1. த. கோ. செ: 48.

2. த. கோ. செ: 49.

3. ஐங்குறு. செ: 191.

4. த. கோ. செ: 50.

5. த. கோ. செ: 51.