:: TVU ::

132	வேற்றுமை மயங்கியல்

மென்பார் நிலைவினை என்றார். முதல் சினை என்பவை நியதியின்றித் தடுமாறும் இயல்பினவாதலின் ஒன்றன்பாற் படுதலை நிலை என்றார். இஃது உருபும் பொருளும் உடன் மயங்கின மயக்கம். இஃது நிலை மொழி பற்றிய வரையறையாகலின் வேறு கூறினார்.
சூ. 86 :	கன்றலும் செலவும் ஒன்றுமார் வினையே
[3]
க-து :	இரண்டாவதனொடும் ஏழாவதனொடும் வருமொழித் தொழிற்சொல் மயங்குமாறு கூறுகின்றது.

உரை :கன்றலும் செலவும் ஆகிய தொழிற் சொற்கள் மேற்கூறிய இரண்டு வேற்றுமைக் கண்ணும் ஒத்த வரவினவாம்.
எ-டு :சூதினைக் கன்றினான் - சூதின்கட் கன்றினான் எனவும், நெறியைச் சென்றான் - நெறிக்கட் சென்றான் எனவும் வரும். கன்றுதல் - இவறுதல். சார்பென் கிளவி போலன்றி இவை இரண்டு வேற்றுமைக்கண்ணும் ஒத்த வரவின ஆதலின் 'சார்பென் கிளவிக்கு' என்பதன் பின்வையாது இதனை ஈண்டு வைத்தார்.
சூ. 87 :	முதற்சினைக் கிளவிக்கு அதுவென் வேற்றுமை
	முதற்கண் வரினே சினைக்கு ஐவருமே
[4]
க-து :	ஒரு தொடரின்கண் முதலும் சினையும் ஒருங்கு வருதற்கண் எய்தும் வேற்றுமை மயக்கம் ஆமாறு கூறுகின்றது.

உரை: முதலும் சினையும் ஒருங்குவரும் தொடரின்கண் ஆறாம் உருபு முதற்பொருள் இடத்துவரின் சினைக் கிளவியினிடத்து இரண்டாம் உருபு வரும்.
எ-டு :யானையது கோட்டைக் குறைத்தான், மரத்தினது கிளையை முரித்தான் எனவரும்.
சூ. 88 :	முதல்முன் ஐவரின் கண்ணென் வேற்றுமை
	சினைமுன் வருதல் தெள்ளி தென்ப
[5]
க-து :	இதுவுமது.

உரை : மேற்கூறிய முதற்சினைகிளவிகள் அங்ஙனம் ஒருங்கு வருமிடத்து முதற்கிளவிக்கண் இரண்டாம் உருபு வரின் சினைக் கிளவிக்கண் ஏழாவதன் உருபு வருதல் தெளிவுடையதாகும் என்று கூறுவர் ஆசிரியர்.