:: TVU ::

252

புள்ளிமயங்கியல்

இதன் பொருள் : விண்என வரூஉங் காயப் பெயர்வயின் - விண்ணென்று சொல்லவருகிற ஆகாயத்தை உணரநின்ற பெயர்க்கண், அத்து என் சாரியை மிகுதலும் உரித்து - அத்தென்னுஞ் சாரியை உண்டாதலும் உரித்து இல்லையாதலும் உரித்து, செய்யுள் மருங்கில் தொழில்வருகாலை - செய்யுளிடத்துத் தொழிற்சொல் வருங்காலத்து என்றவாறு.
உதாரணம் :'விண்ணத்துக் கொட்கும் வண்ணத் தமரர்' 'விண்ணத்துக் கொட்கும் விரைசெல் லூர்தியோய்' எனவும், 'விண்குத்து நீள்வரை வெற்ப களைபவோ' (நாலடி - 226) எனவும் வரும். விண்ணென்னும் குறிப்பினை நீக்குதற்குக் காயமென்றார்.
விண்வத்துக்கொட்கும் என உடம்படுமெய் புணர்ந்து நிற்றலுங் கொள்க. ¹அதிகார வல்லெழுத்தின்மையிற் சாரியை வல்லெழுத்துக் கொடுக்க.
(10)
304.	தொழிற்பெய ரெல்லாந் தொழிற்பெய ரியல.

இஃது இவ் வீற்றுட் சிலவற்றிக்குத் திரிபு விலக்கி உகரமும் வல்லெழுத்தும் விதிக்கின்றது.
இதன் பொருள் :தொழிற்பெயர் எல்லாம் தொழிற்பெயர் இயல - அல்வழிக்கண்ணும் வேற்றுமைக்கண்ணும் ஞகார ஈற்றுத் தொழிற்பெயரது இயல்பிற்றாய் வன்கணம் வந்துழி வல்லெழுத்தும் உகரமும் பெற்றும் மென்கணத்தும் இடைக்கணத்து வகரத்தும் உகரம் பெற்றும் முடியும் என்றவாறு.
உதாரணம் :²மண்ணுக்கடிது பண்ணுக்கடிது சிறிது தீது பெரிது ஞான்றது நீண்டது மாண்டது வலிது எனவும், மண்ணுக்கடுமை சிறுமை தீமை பெருமை ஞாற்சி நீட்சி மாட்சி வன்மை எனவும் வரும்.

1. அதிகார வல்லெழுத்தின்மை என்றது, உயிரீற்றுக்காயின் அதிகார வல்லெழுத்து உண்டு ; இது மெய்யீறானபடியால் அதிகார வல்லெழுத்தின்று என்றபடி. ஆதலின் வல்லெழுத்துக் கொடுத்து முடிக்க என்றபடி. உயிரீற்றின் முன்னன்றி யரழ வொழிந்த மெய்யீற்றின்முன் வல்லினம் மிகாதென்க.
2. மண்ணுதல் - கழுவுதல். வெண் - ஓராறு. எண்ணுப்பாறு எண்ணின்கட்பாறு என விரியும். எண்-எள். பாறு-பருந்து.