445.

இஃது எய்தாத தெய்துவித்தது.
 

இதன் பொருள் : ஒன்பான் ஒகரமிசைத் தகரம் ஒற்றும் - ஒன்பது என
நிறுத்திப்  பஃது  என   வருவித்து   முடிக்குங்கால்,   நிலைமொழியாகிய
ஒன்பதென்னும்   எண்ணினது   ஒகரத்திற்கு    முன்னாக    ஒரு   தகர
ஒற்றுத்தோன்றி  நிற்கும்,  முந்தை  ஒற்றே  ணகாரம்  இரட்டும்  -  முன்
சொன்ன ஒகரத்திற்கு முன்னர் நின்ற னகர ஒற்று ணகர ஒற்றாய் இரட்டித்து
நிற்கும்,  பஃதென்  கிளவி   ஆய்த   பகரங்கெட   -   வருமொழியாகிய
பஃதென்னுஞ் சொல் தன்கண் ஆய்தமும் பகரமுங் கெட்டுப்போக, ஊகாரக்
கிளவி  நிற்றல்வேண்டும் - நிலைமொழியில்  இரட்டிய ணகரத்தின் பின்னர்
ஊகாரமாகிய எழுத்து வந்து நிற்றலை ஆசிரியன்  விரும்பும், ஒற்றிய தகரம்
றகரமாகும் -  வருமொழியாகிய  பத்தென்பதன்  ஈற்றின்மேலேறிய  உகரங்
கெடாது   பிரிந்துநிற்ப   ஒற்றாய்   நின்ற   தகரம் றகர  ஒற்றாய் நிற்கும்
என்றவாறு.
 

உதாரணம் : தொண்ணூறு  என  வரும். இதனை  ஒற்றாய் வந்துநின்ற
தகர ஒற்றின்மேல்  நிலைமொழி  ஒகரத்தை  ஏற்றித்  தொவ்வாக்கி  ணகர
ஒற்று  இரட்டி அதன்மேல் வருமொழிக்கட்  பகரமும் ஆய்தமுங்கெட வந்த
ஊகாரமேற்றித்  தொண்ணூவாக்கிப்   பகரவாய்தமென்னாத   முறையன்றிக்
கூற்றினான் நிலைமொழிக்கட் பகரமும் ஆய்தமுங் கெடுத்துக் குற்றியலுகரம்
மெய்யொடுங்கெடுத்து வருமொழி  இறுதித் தகர ஒற்றுத் திரிந்து நின்ற றகர
ஒற்றின்மேலே நின்ற உகரமேற்றித் தொண்ணூறென முடிக்க. 
 

446.

இது  மேற்கூறிய  ஒன்றுமுதல்  ஒன்பானெண்களோடு அளவுப்பெயரும்
நிறைப்பெயரும் முடியுமாறு கூறுகின்றது.