காமநிலை யுரைத்தலும் தேர்நிலை யுரைத்தலும்

கிழவோன் குறிப்பினை எடுத்துக் கூறலும்

ஆவொடு பட்ட நிமித்தங் கூறலும்

செலவுறு கிளவியும் செலவழுங்கு கிளவியும்

அன்னவை பிறவும் பார்ப்பார்க் குரிய

க - து : 

பொருள் :  காமநிலை  உரைத்தலும்  என்பது  =  காமத்தின் நன்மை
அன்மைகளை  விளக்கிக் கூறுதலாம்.  அதனான் பிரிவாற்றுதல்  வேண்டும்
என்னும்    அறிவினையும்   தலைவன்  காவல்  முதலாய  கடமைகளைக்
காலத்தொடு   ஆற்றவேண்டுமென்னும்   அறிவினையும்  பெறவைத்தலாம்.
தேர்நிலை யுரைத்தலும் என்பது = தலைவனது ஊர்தியாகிய தேர்நிலையைக்
கூறுதலாம்.   அஃதாவது    தலைவன்     நகரத்தான்,   நகர்ப்புறத்தான்,
சேரியகத்தான்,    ஊர்ப்புறத்தான்,     போர்முகத்தான்   என    அவன்
மேற்கொண்டுள்ள ஒழுகலாற்றினை அவன் தேரினைச் சுட்டியுணர்த்துதலாம்.
தலைவனது  தேரினைக் கொண்டு  அவனது நிலையை உரைத்தல் என்பது
கருத்து. கிழவோன் குறிப்பினை  எடுத்துக்  கூறல்  என்பது =  தலைவனது
காதற்குறிப்பினையும்   செலவுக்குறிப்பினையும்  தலைவியிடத்து   விளங்கச்
சொல்லுதலாம்.  ஆவொடு    பட்ட    நிமித்தங்    கூறலும்   என்பது =
ஆவினாற்றோன்றிய  நிமித்தத்தான் நேரும் நன்மை  தீமைகளை  எடுத்துக்
கூறுதலாம். செலவுறு கிளவியும் என்பது = தலைவன் காவல் முதலிய பிரிவு
கருதிய  வழிச்செலவு  நன்றாமென உரைத்தலாம். செலவழுங்கு  கிளவியும்
என்பது = இது பொழுது ஒவ்வாது எனச்  செலவினைத் தவிரக் கூறுதலாம்.
அன்னவை    பிறவும்   பார்ப்பார்க்   குரிய  =   அவைபோல்வனவாகிய
பிறகிளவிகளும் நூலறிவு சான்ற பார்ப்பார்க்கு உரியவாகும்.
 

பார்ப்பாராவார்  நூலணிந்து  நூலோதும் இருபிறப்பாளராவார். இதனை
"மறப்பினும்  ஓத்துக்  கொளலாகும்  பார்ப்பான்  பிறப்பொழுக்கங் குன்றக்
கெடும்"   என்பதனான்  அறிக. [செந்தண்மை  பூண்டொழுகும்  அந்தணர்
வேறு; இவர்  வேறு.  அந்தணர், மறையோர், ஐயர்,  பார்ப்பார் என்போர்
செய்தொழில்  வேற்றுமையானும்  குறிக்கோளானும் வேறு வேறாவர். இவர்
நாற்பலருள்   முதலாமவர்   ஆதலின்  இப்  பெயர்களை   ஒருபொருட்
கிளவிபோலப்   புலவோர்   வழங்குவர். வழங்கினும்   இடம்   நோக்கிச்
சிறப்புப் பொருள் கொண்டு தெளிதல் மாணாக்கர் கடனாகும்.