எனவே, அத் திரிபு இல்லாத பெயர் தானே தன் பொருளை வினைமுதற் பொருளாக வேற்றுமை செய்யும் என்பதாயிற்று.

இவ் எழுவாய் கொள்ளும் பெயர். இன்னது, இவ் அளவிற்று என்னும் பொருள் படவரும் பெயராம்.

1. சாத்தன் வந்தான் ; கொற்றன் வாழ்க - இவை தெரிநிலைவினை கொள வந்தன. அவன் பெரியன், ஆவுண்டு-இவை குறிப்புவினை கொள வந்தன.

2.சாத்தனிவன் கொற்றனவன் - இவை இன்னது என்னும் பொருள்பட வரும் பெயர் கொள வந்தன. ஆவொன்று யானை நூறு - இவை இவ் அளவிற்று என்னும் பொருள்படவரும் பெயர் கொள வந்தன.

3.அவன் யார்; ஆ யாது - இவை வினாக்கொள வந்தன.

வினைமுதற் பொருளாவது ஒரு தொழில் நிகழ்ச்சியிலே தன்வயத்ததாகக் குறிக்கப்படும் பொருளாம். வினைமுதல் , செய்பவன் , கருத்தா என்பன, ஒருபொருள் சொற்கள்.

சாத்தன் வந்தான் என்புழித், தொழில் நிகழ்ச்சி வருதல் , அத்தொழில் நிகழ்ச்சியிலே தன்வயத்த தாகக் குறிக்கப்படும் பொருள் சாத்தன் ஆதலால், சாத்தன் வினைமுதற் பொருள்.

இவ் எழுவாய்க்கு, ஐ முதலியன போன்ற உருபு இல்லையாயினும், உரையிற்கோடல் என்னும் உத்தியினாலே சிறுபான்மை ஆனவன், ஆகின்றவன்,ஆவான், என்பவன் முதலிய ஐம்பால் சொற்களும் சொல் உருபுகளாக வரும் எனக்கொள்க.

சாத்தன் ஆனவன் வந்தான்; சாத்தியானவள் வந்தாள், சாத்தரானவர் வந்தார்; யானை ஆனது வந்தது; யானை ஆனவை வந்தன என வரும் பிறவு மன்ன.

இன்னும், இவ் உத்தியைப் பின்வரும் வேற்றுமைகளிலே காட்டப்படும் சொல்உருபுகளுக்கு எல்லாம் கொள்க.